Read idoma ÉMƆ̄SI 8 Bible Online

ÉMƆ̄SI 8 - idoma bible

ÉMƆ̄SI 8

¹Émɔ̄si klla kahíníī, “Óndú, Ɔwɔicō le ɛbɛ ɔhá mafú gā um. Ipú ɛbɛ ā, n má ómblí kú īkpɔ̄cí nēe le pīya ɛɛ́ mā.

²Anɔ́ɔ ó da um ka. Ámɔ̄si, ‘Ɔdí nāa yɔ̄ ī má ā?’ Anɔ́ɔ n tá ɔ̄ ohi ka, ‘Ómblí kú īkpɔ̄cí nōo le pīya.’ Anɔ́ɔ Óndú ā da um ka, ‘Īkpɔ̄cí ā kwɛyí ācɛ ɔlɛ́ um Ísrɛ̄lu, eko nɛ̄ n géē yá uwā italā le yá ɛɛ́, ɛ́gɛ́nɛ̄ īkpɔ̄cí gē pīya kú ācɛ kéē lé ā. Ń kē gáā pīya ɔtū kú um abɔ̄ lɛyíkwu italā ō yá uwā gbóógbóō gɛ ŋ́.

³Óndú ā ka, ícíícɛ ɔ́ɔmā, ijē nēé gē gwó ipú agbla kú uwā ā, géē je pīya ikwū ōje. Okwū géē bá bɛɛ́ɛ̄ ɛga dóódu. É géē kpó uwā bɛ̄cɛ fɛ́yɛ́ eyīdūdū.”

⁴Aá jāhɔ̄ lɛ ɛlā nyā, aá nēe gē lɛ ikpó da ācogbɛhá ɛyí tāajɛ, klla ī tíne kéē kpó ācogbɛhá yíífi ŋmá ajɛ ā.

⁵Aá gē kahíníī, “Eko nyá nɛ̄ ɔyā ɛ̄yīpɛ̄ ā í wā í yɛ, cɛ́ɛ́ kú ālɔ̄ je īkpɔ̄dā kú alɔ lá āa? Eko nyá nɛ̄ ɛ̄cī usábāti, géē yɛ kú ālɔ̄ je īkpɔ̄dā kú alɔ lá āa? Cɛ́ɛ́ kú ālɔ̄ lɛ okoolo ca píyɔ́kɔ̄piyɔkɔ̄ lígíí, cɛ́ɛ́ kú ālɔ̄ lé itene nwuné āa? Alɔ klla í hɛ́ ɔlá tū aódée kú alɔ, cɛ́ɛ́ kú ālɔ̄ hɛ́ ācɛ lé.

⁶Aá klla gē ka, alɔ géē fú ígbóngbō ŋmá ajɛ tū ipú īkpɔ̄dā kú alɔ, cɛ́ɛ́ kú ālɔ̄ je lá ígbɔ́lá nɛ̄hi lɛ ācɛ. Alɔ géē má ɔ̄cogbɛhá éyi nɛ̄ ó má ije gbá ulé nɛ̄ ó bī ā glá ŋ́, cɛ́ɛ́ alɔ kwú ɔ̄ ú pīya ɔfiyɛ kú ɔlɛ́ kwɛyí ije kú ɔ́lá kú áblákpá ékpónú nɛ̄ ó cílá glá ŋ́ mā.

⁷Émɔ̄si kahíníī, “Óndú, Ɔwɔicō kú Ísrɛ̄lu kē le ɔkpá gbo ɛɛ́ ka, ‘Ɔkwɔ̄ɔ̄kwɛ̄yi ā, ń gáā mlanyī ɔdōbɔ̄bí nēé yá nyā gbóógbō ŋ́.

⁸Ohígbū ɔ́ɔmā, ajɛ ā géē jíliyē. Ācɛ nēe lā anú ā, í gáā yɔ́tūnōbí klla yēekwu ŋ́ nɛɛ? Odúúdú Ísrɛ̄lu géē túgbagwú, í hɛ́ gicō lógólógó klla í wāajɛ bɛ̄ɛka ísu nēé hī ka Unáyilu ā.”

⁹Óndú kahíníī, “Ɛ̄cī ɔ́ɔmā, n géē yá kú ɛnɔ kóō gaajɛ ɛnɔ oyɛ̄ɛyí, kú ajɛ kóō kwú dobū ɔlɛ́ɛnɔ.

¹⁰N géē je eko o lé ucɛ kú aá pīya ekwu ō yɔ̄, cɛ́ɛ́ odúúdú ijē nɛ̄ aá géē gwó ā kwú pīya ikwāyidɔ. N géē yá kú aá kpó īlī ekwu wu iyē, klla í wá aá ɛyí faá. Aá géē lɛbɛ̄ɛka ācɛ nēe ī jikwū kú ɔyínɔ̄nyīlɔ ékpónú kú uwā ā. Ɛ̄cī ɔ́ɔmā géē hɔ́nɔ jāā ga oŋmɛ́yí kú nū.”

¹¹Óndú, Ɔwɔicō kahíníī, “Aá má ɔ̄, ɛ̄cī éyi géē wā, n géē tū ɔkpɛtā klá ajɛ ā. Ó wɛ ɔkpɛtā kú ɔdōlé ámāŋ ka ákú ijēnyi o ŋmó uwā ŋ́. Amáŋ ó géē wɛ ɔkpɛtā kú ɛlā kú Óndú ā ō pó.

¹²É géē bá ī yɛ ŋmá ísu kú ɔmā éyi ga ísu Umeditarénīya, cɛ́ɛ́ é klla yɛ biílí ŋmá ɛhíícō ga ɛnɔ̄ɔ̄cī. É géē bá ī kwinya ga ajɛ, gicō kéē dɔɔ̄kā ɛlā Ɔwɔicō kéē pó. Amáŋ, é gáā má ɔ̄cɛ nōo í ka lɛ uwá ŋ́.

¹³Ijēenyi géē ŋmó ayípɔ̄nɔ̄nyā mɛ́mla ayípōklóbīya nōo géē cɛ̄ lɛ uwá hɛ́kwú.

¹⁴Ācɛ ɛ̄nɛ̄ e géē bī Assíma nōo wɛ ɔwɔ kú Usamérīya gbo ɔkpá ka, ‘N bī iyē kú ɔwɔ kú Udán, ámāŋ ka n bī iyē kú ɔwɔ kú Ubiyɛssɛ́ba ā’ géē gwōnū, anɔ́ɔ é kē gáā cāŋjɛ igbɔhá glá gɛ ŋ́.”