Read idoma ÉMƆ̄SI 9 Bible Online

ÉMƆ̄SI 9 - idoma bible

ÉMƆ̄SI 9

¹Émɔ̄si klla ka anúɔ má Óndú ā háyi pī ede ā, anɔ́ɔ ɔ́ɔ kahíníī, “Lɛ ɔda éyi fīyɛ̄ ɛhícō kú upíla kú Agblīihɔ-nɛ̄hi ā, cɛ́ɛ́ kú etikpa kú nū kóō gbɔɔ́ ō jíliyē, cɛ́ɛ́ kóō kwú ca klá odúúdú ācɛ nēe hile ā ikpɛ̄yí.

²Ɔ́dāŋ ka é kōō lɛ ɔ̄gɔ̄ bu jāā ga ɔlékwū, nááná, n géē kwú uwā bɛ̄cɛ ŋmá abɔ́ɔ. É kōō le icō tū ga ɔkpáncō, nááná n géē pi uwá wāajɛ.

³Ká ē kōō kwú iyī uwā í tayínū ɛyí ɛfu nēé hī Ukámɛ̄lu ā, nááná, n géē dɔɔ̄kā uwā ga abɔ́ɔ, klla í kwú uwā. É kōō kwú iyī uwā í tayínū okɛklɛ kú ísu ŋmá ɛgiyí um, nááná, n géē je íkwu lɛ aɛ́bɛ́ nɛ̄hi kú ipú ísu kéē kwú uwā ayīnu.

⁴É kōō le tá ajɛ kú aólɛlā kú uwā bɛ̄ɛka aɔ́fiyɛ ā, nááná, n géē je ɔ́da lɛ aólɛlā ā kéē lɛ uwá kpó ŋmó abɔ́ɔ. N leyī hɛ́kwu uwā kú n kpó uwā yíífi, ó wɛ ka n gáā tá uwā abɔ̄ ŋ́.”

⁵Ó klla ka, eko nɛ̄ Óndú, Ɔwɔicō nōo lɔfú fíyɛ́ dúú ā, kwú abɔ̄ ú kwu ipú ɛcɛ kpátáá ā, ó kwú ja tāajɛ. Cɛ́ɛ́ ācɛ nēe lā ipú nū ā bá í yá ɔtūnōbí. Odúúdú ɛcɛ le hɛ́ gicō lógólógó klla hɛ́ wāajɛ wuuu bɛ́ɛka úgbágwú kú ísu nēé hī ka Unáyilu ā.

⁶Ó ka Óndú ɔ́ɔ le ɔlɛ́ nū gwó kwu ɔkpáncō, anɔ́ɔ ɔ́ɔ le ikpó kú nū táajɛ ɛyí ɛcɛ á. Anɔ́ɔ ɔ́ɔ le ɔkpáncō yá klá ɛyí kú ɛcɛ á. Ó le éŋkpɔ̄ kú ísu hīigwú, anɔ́ɔ ó le ɔ́ cē klá ɛcɛ gbɔɔ á. Ó ka iyē kú nū ɔ́ɔ lé ka Óndú ā!

⁷Émɔ̄si ka anɔ́ɔ Óndú ā ɔ́ɔ kahíníī, “Ācɛ Ísrɛ̄lu, aá lɛbɛ̄ɛka ɛ́gɛ́nɛ̄ ācɛ Itiyópiya lɛ ga um mā. Ɛ́gɛ́nɛ̄ n bī aá bɛ̄cɛ ŋmá Íjīpiti ā, nɛ̄ n bī ācɛ Ufilístiya bɛ̄cɛ ŋmá Ukáfutɔ, klla bī ācɛ Usiríya bɛ̄cɛ ŋmá Ukɛ́ri dúú á.

⁸Īkpēyī kú ami nɛ̄ wɛ Óndú, Ɔwɔicō, nōo lɔfú fíyɛ́ dúú ā kwu ajɔ̄ɔ̄cɛ́ kú Ísrɛ̄lu nōo bɔ̄bíipú tū um nɛ̄hi ā. N kē í je ɔ́ yíífi ŋmá ajɛ dúúdú, amáŋ ń gáā kpó ayááyí kú Ujékɔ̄pu ā yíífi dúúdú ŋ́.”

⁹Óndú ā yɔ̄ ī kɛlā kpɔ́ kahíníī, “N géē je ɔ́da, cɛ́ɛ́ n lɛ ācɛ Ísrɛ̄lu cīla, ɛ́gɛ́nɛ̄ ɔ̄cɛ gē cīla igwu ipú ɔlīyalīyā ā. N cīla uwā ŋmá ipú aéwo kú ɛcɛ nyā, ká n̄ lɛ aɛ́nɛ̄ ó tīile ŋ́ mā yā ŋmá ipú uwā.

¹⁰Ɛfú géē lé odúúdú ācɛ ɔlɛ́ um nēe bīya íne kú um ā. Aɛ́nɛ̄ e gē ka ka ɔdōbɔ̄bí dúúmā í gáā yá aá glá mā, ɛfú géē lé uwā.”

¹¹Óndú ā kahíníī, “Ɛ̄cī éyi géē wā, nɛ̄ n géē je ajɔ̄ɔ̄cɛ́ kú Udéfīdi, nōo lɛbɛ̄ɛka inu nōo le ca tāajɛ ā, gwó kwicō iyínū kpɔ́. N géē je abɔ́ɔ nōo kwú pīya ipálácɛ̄ ā, pīya ɔlɛ́ nɛ̄ ācɛ í lā kpɔ́. N klla géē ma ɔdɔ kú nū bɛ̄ɛka ɛ́gɛ́nɛ̄ ó tɛtɛ lɛ íkée ā.

¹²Cɛ́ɛ́ kú ācɛ Ísrɛ̄lu kéē lɛ ācɛ nɛ̄ hile ŋmá ipú ajɛ kú Ɛ́dɔm mɛ́mla odúúdú aéwo nēe tɛtɛ wɛ ákú um kpó yálé. Ami nōo wɛ Óndú ā le ɛlā ka ɛɛ́, ó kē í yá piíí.

¹³Óndú ā klla kahíníī, “Eko éyi yɔ̄ ī wā nɛ̄ ajɛ o hɛ́ɛhɔ̄ ā, géē je lɔhi nɛ̄hi, nɛ̄ ó géē cɛ̄ lɛ ɔdɛ̄hɔ̄ jé eko fíyaa nɛ̄ɛ̄nɛ̄hi nɛ̄ ɛplá í gáā táajɛ ɔtāhɛ̄ kú eko nɛ̄ ācɛ í nyi ɔdɛ̄hɔ̄ mɛ́mla eko nēé kē í cē ɔdɛ̄hɔ̄ ā ŋ́. Īkpɔ̄cí géē kpɔ nɛ̄ɛ̄nɛ̄hi nɛ̄ ācɛ í gáā lɔfú je ɔ́ yá ejé kwɛyí ŋmá ajɛ glá ŋ́. Enyi kú īkpō kú ɔcí ufáyin nōo pīya ā, géē yɔ̄ ī pɛ́ wāajɛ bū ɔpɛ́ kú ɛfu nɛ̄hi, ɛga nɛ̄ ɛ́nɛ́ ɔcí ā jɛ̄ bá ā.”

¹⁴Óndú ā klla ka kpɔ́ kahíníī, “N géē kpó ācɛ ɔlɛ́ um kwúcē wā í lā ajɛ kú uwā kpɔ́. É géē tú aígelī nɛ̄hi kú uwā gwó kpɔ́, cɛ́ɛ́ kéē lā abɔ́ɔ. É géē nyi ɔcí kú ufáyin klla í gwá ejé kú nū, É géē hɛ́hɔ̄ klla í lé ɔdɛ̄hɔ̄ nēé bī ŋmá ɛhɔ̄ nēé hí ā.

¹⁵N géē bū ācɛ ɔlɛ́ um tū ipú ajɛ nɛ̄ n je lɛ uwá ā kli, ɛ́gɛ́nɛ̄ ɔ̄cɛ gē bū ɔcí tāajɛ kli ā, cɛ́ɛ́ ɔdā dúúmā í gáā fu uwá ɔkwu ŋmá ajɛ abɔ́ɔ glá ɛ́ɛ́ gɛ ŋ́.”