Read idoma ÁLUKA 1 Bible Online

ÁLUKA 1 - idoma bible

ÁLUKA 1

¹Ipú ɛ̄cī aflɛ́yí kú ɔyā ɔ́mpa kú ipu iháyí ɔ́mpa, nɛ̄ ācɛ kú Ísrɛ̄lu bɛ̄cɛ ŋmá Íjīpiti ā, Óndú ā kɛlā lɛ Umósīsi ipu Áklɔ̄kpīihɔ, ipu ígbíli kú Usáyínāyi ā kahíníī,

²“Awɔ mɛ́mla Árɔ̄ni, aá lɛ odúúdu ācɛ kú Ísrɛ̄lu gbaáluka, ipɔ́ɔma mɛ́mla ipú ɔlɛ́ ipú ɔlɛ́.

³Ācɛnyīlɔ nēe wɛ iháyí ofu gɔbū ā, nēe lɔfú ga ɔgbɛ́fú glá ā, aá lɛ iyē kú uwā tá ígwíígwu.

⁴Lɛ otrɛ̄yí éyééye fu ŋmá ipɔ́ɔma éyééye kóō tú uwɔ abɔ̄.

⁵Ācɛ nēe fu ŋmá ipɔ́ɔmā éyééye kéē bá mla uwɔ, cɛ́ɛ́ kéē tú uwɔ abɔ̄ ā bá á. Ɔ̄cɛ nōo géē ŋmá ipɔ́ɔma kú Urúbɛ̄n ā wɛ Ɛlísɔ ɔyí kú Ussɔ́diyu

⁶Ɔ̄cɛ nōo ŋmá ipɔ́ɔma kú Usímīyɔn ā wɛ Ussɔlumíyɛ̄lu, ɔyí kú Usúríssādayi,

⁷Ɔ̄cɛ nōo ŋmá ipɔ́ɔma kú Ujúda ā wɛ Unássɔn, ɔyí kú Ammínādabu.

⁸Ɔ̄cɛ nōo ŋmá ipɔ́ɔma kú Issaka ā wɛ Unɛtánīyɛlu, ɔyí kú Usúwa.

⁹Ɔ̄cɛ nōo ŋmá ipɔ́ɔma kú Usɛ́būlɔn ā wɛ Ɛlíyābu, ɔyí kú Uhɛ́lɔn.

¹⁰Ɔ̄cɛ nōo ŋmá ipɔ́ɔma kú Ɛ́frēm ā wɛ Ɛlíssāma, ɔyí kú Ammíhūdu. Ɔ̄cɛ nōo ŋmá ipɔ́ɔma kú Umanásɛ ā wɛ Ugamálīyɛ̄lu, ɔyí kú Upɛdásu.

¹¹Ɔ̄cɛ nōo ŋmá ipɔ́ɔma kú Ubɛ́njamīn ā wɛ Abídan, ɔyí kú Ugídón.

¹²Ɔ̄cɛ nōo ŋmá ipɔ́ɔma kú Udán ā wɛ Ahiyésa, ɔyí kú Ammíssadāyi.

¹³Ɔ̄cɛ nōo ŋmá ipɔ́ɔma kú Ássa ā wɛ Upagíyɛlu, ɔyí kú Ɔ́ciran.

¹⁴Ɔ̄cɛ nōo ŋmá ipɔ́ɔma kú Ugádi ā wɛ Ɛlíyāsafu, ɔyí kú Udɛ́yūwɛlu

¹⁵Ɔ̄cɛ nōo ŋmá ipɔ́ɔma kú Unáfutāli ā wɛ Ahíra, ɔyí kú Ɛ́nan.

¹⁶Aɛ́nyā wɛ ācɛ nēé fu ŋmá ipú ācɛ kú Ísrɛ̄lu á. Odúúdú uwā wɛ otrɛ̄yí kú ipɔ́ɔma kú ɔlɛ́ uwā.

¹⁷O ŋmá o tábɔ̄ kú ācɛ igwɛ́ɛpa nēe bá nyā ā, Umósīsi mɛ́mla Árɔ̄ni,

¹⁸le odúúdu ójila kú Ísrɛ̄lu hīīgwú tɔ̄ɔ̄há ɛ̄cī aflɛ́yí kú ɔyā ɔ́mpa kú ipú iháyí ɔ́mpa ŋméeko nēé bɛ̄cɛ ŋmá Íjīpiti ā. Ó le odúúdu iyē kú uwā kpó tá tū ɔkpá lɛ uwá gbaáluka ipɔ́ɔma éyééye. É le iyē kú ācɛnyīlɔ nēe wɛ iháyí ofu gɔbū ā tá tū ɔkpá, le uwá gbaáluka.

¹⁹Umósīsi le ācɛ ā gbaáluka le iyē kú uwā tá tū ɔkpá, ɛ́gɛ́nɛ̄ Óndú ā da ɔ́ lɛ ipú ígbíli kú Usáyínāyi ā.

²⁰Ɛjɛ̄ɛ̄jī ayí kú ipɔ́ɔma kú Urúbɛ̄n, ɔyí aflɛ́yí kú Ísrɛ̄lu ā, nēe wɛ iháyí ofu gɔbū ā, nēe kē ga ɔgbɛ́fú glá ɛ́ɛ́ mā wɛ,

²¹ācɛ úlā ofɛhɔ̄ ce úlā igwɛ́ɛhīlī ce ofɛhɔ̄ (46,500).

²²Ɛjɛ̄ɛ̄jī ācɛ ipɔ́ɔma kú Usímīyɔni ā wɛ

²³ācɛ úlā ofu ahāapa ce úlā ahātá ce ofɛhɔ̄ (59,300).

²⁴Ācɛ ipɔ́ɔma kú Ugád ā wɛ

²⁵ācɛ úlā ofɛhɔ̄ ce úlā ɛnɛ ce ofigwɛ́ɛpa ce igwó (45,650).

²⁶Ācɛ kú ipɔ́ɔma kú Ujúda ā wɛ

²⁷ācɛ úlā ofu ahātá ce úlā igwɛ́ɛhli ce ofigwó (74,600).

²⁸Ācɛ kú ipɔ́ɔma kú Ísāka ā wɛ

²⁹ācɛ úlā ofɛhīlī ce úlā ɛhīlī (54,400).

³⁰Ipɔ́ɔma kú Usɛ́būlɔn ā wɛ

³¹ācɛ úlā ofaahāapa ce úlā ɛtá ce ofigwó (57,400).

³²Ācɛ ipɔ́ɔma kú Ɛ́frem ā wɛ

³³ācɛ úlā ofɛhɔ̄ ce úlā éyi ce ofɛhɔ̄ (40,500).

³⁴Ipɔ́ɔma kú Umanásɛ ā wɛ

³⁵ācɛ úlā ofɛɛnɛ ce ofigwó (32,200).

³⁶Ipɔ́ɔma kú Ubɛ́njamīn ā wɛ

³⁷ācɛ úlā ofɛɛnɛ ce úlā ahātá ce ofigwó (35,400).

³⁸Ipɔ́ɔma kú Udán ā wɛ

³⁹ācɛ úlā ofaahāapa ce úlā igwɛ́ɛhīlī ce ofigwɛ́ɛhɔ̄ (62,700).

⁴⁰Ipɔ́ɔma kú Ássa ā wɛ

⁴¹ācɛ úlā ofɛhɔ̄ ce úlā ɛtá ce ofigwó (41,500).

⁴²Áluka kú ipɔ́ɔma kú Unáfutāli, nēe wɛ iháyí ofu gɔbū nēe kē lɔfú ga ɔgbɛ́fú glá ā wɛ

⁴³ācɛ úlā ofɛhīlī ce úlā ɛtá ce ofigwo (53,400).

⁴⁴Ācɛ nēe bá nyā wɛ ācɛ nɛ̄ Umósīsi mɛ́mla Árɔ̄ni gbaáluka ŋmá lɛ o tábɔ̄ kú aótrɛ̄yí igwɛ́ɛpa kú aípɔ́ɔma kú Ísrɛ̄lu ā á.

⁴⁵Odúúdú áluka kú aípɔ́ɔma igwɛ́ɛpa kú ācɛ kú Ísrɛ̄lu ā, ācɛ ɛ̄nɛ̄ e wɛ iháyí ofu gɔbū nēe kē ga ɔgbɛ́fú glá ā wɛ,

⁴⁶ācɛ úlā bá ɛga úlā ɛtá ce úlā ofɛhɔ̄ ce ɛtá ce ofu igwɛ́ɛpa cigwó (603,550).

⁴⁷Umósīsi í gba ayí kú Ulífāyi áluka mla aípɔ́ɔma ɔhá ā ŋ́.

⁴⁸Ohígbū ka Óndú ā tɛtɛ da Umósīsi kahíníī,

⁴⁹“Eko dóódu nāa géē gba ācɛ áluka kú ɛfú ō kpó, ā híī gbo ācɛ kú Ulífāyi áluka tū uwā ŋ́.

⁵⁰Amáŋ, uwá kéē leyīkwu Áklɔ̄kpīihɔ kú um mɛ́mla odúúdu iyó kú nū. É géē je Áklɔ̄kpīihɔ kú um ā ŋmáajɛ mla odúúdu iyó kú nū, klla í je ɔ́ kwaajɛ, é klla í lā yɛ jīla anú tá.

⁵¹Eko dúúmā nɛ̄ aá le cāālɛ́, ayí kú Ulífāyi ā géē je Áklɔ̄kpīihɔ kú um á. É klla í je ɔ́ kwaajɛ ɛga ɛ̄yīpɛ̄ ā. Ɔ̄cɛ ɔhá dóódu nōo túblá anú géē kwú.

⁵²Ācɛ ohile kú Ísrɛ̄lu ā géē gwó ɔlɛ́ uwa ígwíígwu ɛ́gɛ́nɛ̄ ɔfú kú uwā jɛ̄ lɛ ā.

⁵³Amáŋ ayí kú Ulífāyi ā géē lā yɛ jīla Áklɔ̄kpīihɔ kú um ā tá, cɛ́ɛ́ ká ɔ̄cɛ dúúmā kóō túblá anú, ɛ́ɛ́ kéē pūla ɔnū kú Óndú ā klá ayí Ísrɛ̄lu ŋ.”

⁵⁴Anɔ́ɔ ācɛ kú Ísrɛ̄lu kē lɛ odúúdu ɔdā nɛ̄ Óndú ā ka bū okónu kú Umósīsi ā yá.