Read idoma ÁLUKA 10 Bible Online

ÁLUKA 10 - idoma bible

ÁLUKA 10

¹Óndú ā da Umósīsi kahíníī,

²“Lɛ opo ɛpa kú oje nɛ̄hɛ́ na káā bī ɔ̄ lɛ hī ācɛ igwú tɔ̄ɔhá, mɛ́mla o bī lɛ da ācɛ kéē tútū ō cālɛ́.

³Eko nēé lɛ ɛplɛ́ɛpa kú uwā tá, ācɛ í jīla awɔ eyī okómpīinu kú Áklɔ̄kpīihɔ ā.

⁴Ɔ́dāŋ ka okónu ékpónú nēé tá á nɛɛ, ótrɛ̄yí kú aípɔ́ɔma kú Ísrɛ̄lu kē í jīla awɔ eyī.

⁵Eko nāa lɛ opo ā tá ɔkɔ éyi, ācɛ nēe lā ābɔ̄ ɛnɔ̄ɔ̄cī a géē cālɛ́.

⁶Eko nāa lɛ opo ā tá ɔkɔ okpií okónu ɔ́mpa, ācɛ nēe lā ābɔ̄ ɛháajɛ ā géē cālɛ́. Ohígbū ɔ́ɔmā ɔkɔ kú opo o tá kpií igbɔmpa gē yá kéē cālɛ́.

⁷Amáŋ, eko nāa gáā hī ācɛ kú Ísrɛ̄lu igwú tɔ̄ɔ̄há, a géē tá opo ā ɔkɔ olikpō.

⁸Ayí kú Árɔ̄ni, ɔ̄cogwɛ́ɛya géē tá opo nyā á. A í lɛ aíne nēe bá nyā tū opiyóó.

⁹Eko nɛ̄ aá bá yɔ̄ ī kpɛ́fú ipú ajɛ kú áa, yɔ̄ ī gbāajɛ kú aá ŋmá abɔ̄ kú aólɛlā kú aá nēe wā í kpɛ́fú tá aá, lɛ opo nēe bá nyā tá kéē hī ācɛ igwú wā í kpɛ́fú tá aólɛlā kú aá, nēe wā í nuunu tá aá. Ami nōo wɛ Óndú ā, Ɔwɔicō kú aá ā géē nya aá tá ŋmá abɔ̄ kú aólɛlā kú aá.

¹⁰Aá géē tá opo ā eko nɛ̄ aá yɔ̄ ī gwéeyē, mɛ́mla eko kú ucɛ kú aá, mɛ́mla ohútu kú ɔyā ɛ̄yīpɛ̄ kú aá. Aá géē tá opo nyā, eko nɛ̄ aá gē gwɛ́ɛya o yɔlá dúúdú ā mɛ́mla eko nɛ̄ aá gē gwɛ́ɛya kú ɛbɔ́. N géē tá aá abɔ̄. Ami wɛ Óndú ā, Ɔwɔicō kú aá á.”

¹¹Ɛ̄cī ɔ́mofu kú ɔyā ɔ́mpa kú iháyí ɔ́mpa ā, ŋmíífi nɛ̄ ācɛ ā nyɛ̄ɛ̄ ŋmá Íjīpiti ā, ojuja ā nyɛ̄ɛ̄ ŋmá ɛyí Áklɔ̄kpīihɔ ā.

¹²Anɔ́ɔ ācɛ kú Ísrɛ̄lu kwu cālɛ́ á. Anɔ́ɔ é gbo iyāwu kú uwā ŋmá ipú ígbíli kú Usáyínāyi á. Ojuja ā wā í klá ajɛ ígbíli kú Upáran.

¹³É hútu iyāwu kú uwā ŋmá ɔ́da nɛ̄ Óndú ā je bū okónu kú Umósīsi ā.

¹⁴Eko dóódu nēé le fu ajɛ nɛɛ, ó gē wɛ ɔwɛ ékpónú ɔ́ɔmā. Ācɛ nēe bá ɛháajɛ kú ígwu kú ipɔ́ɔma kú Ujúda ā gbɔɔ́ aflɛ́yí. É yɛ ígwíígwu ɛ́gɛ́nɛ̄ Unássɔn, ɔyí kú Ammínādābu, otrɛ̄yí kú uwā ā ka lɛ uwá lɛ ā.

¹⁵Unatánīyɛlu, ɔyí kú Usúwa leyīkwu ígwu kú ipɔ́ɔma kú Ísāka,

¹⁶anɔ́ɔ Ɛlíyābu, ɔyí kú Uhɛ́lɔn leyīkwu ígwu kú ipɔ́ɔma kú Usɛ́būlɔn á.

¹⁷Eko nēé kwú Áklɔ̄kpīihɔ ā ú wī wā ajɛ ā, ipɔ́ɔma kú Ugɛ́ssɔn mɛ́mla Umerári nēe gē bī ɔ̄ ā, géē gbɔɔ́ kéē nyɔ̄ gbɔbū.

¹⁸Ācɛ nēe bá ipú ígwu kú ipɔ́ɔma kú Urúbɛ̄n ā géē gbɔɔ́ kéē nyɔ̄ ígwíígwu, mɛ́mla Ɛlísɔ, ɔyí kú Ussɛ́deyɔ nōo gē leyīkwu uwá á.

¹⁹Ussélūmīyɛlu, ɔyí kú Usúríssadāyi leyīkwu ipɔ́ɔma kú ígwu kú Usímīyɔn á.

²⁰Ɛlíyāsafu, ɔyí kú Udíyūwɛlu leyīkwu ipɔ́ɔma kú Ugád á.

²¹Cɛ́ɛ́ ipɔ́ɔma kú Ulífāyi ayí kú Ukɔháti ā géē gbɔɔ́ kéē nyɔ̄ mla aɔ́dā otīihɔ nēé bī ā. Ɛ́ɛ́ kéē wā ajɛ ɛga ɔhá nēé gáā lā ā, é géē lɛ Áklɔ̄kpīihɔ ā gwó kwaajɛ abɔ́ɔ.

²²Ācɛ nēe kwūce uwá ā wɛ ipɔ́ɔma kú Ɛfrēm nɛ̄ Ɛlíssāma, ɔyí kú Ammíhūd géē leyīkwu uwá.

²³Ugamálīyɛ̄lu, ɔyí kú Upɛdássɔ gē leyīkwu ipɔ́ɔma kú Umanásɛ á.

²⁴Abídan, ɔyí kú Ugídiyɔni leyīkwu ipɔ́ɔma kú Ubɛ́njamīn á.

²⁵Ámōmɛ kú ígwu ā wɛ ipɔ́ɔma kú Udán nɛ̄ Aheyésa, ɔyí kú Ammíssadāyi kē í gbo ce ɔ́ ā. Uwá wɛ ācɛ nēe gē gbo ācɛ kú Ísrɛ̄lu ɛyi ŋmá igbīhi á.

²⁶Upagíyɛ̄lu, ɔyí kú Ɔ́kran ā gē leyīkwu ipɔ́ɔma kú Ássa á.

²⁷Ahíra, ɔyí, kú Ɛ́nan gē leyīkwu ipɔ́ɔma kú Unáfutāli á.

²⁸Ɛ̄nyā wɛ ɔwɛ kú ɛ́gɛ́nɛ̄ ācɛ kú Ísrɛ̄lu géē hútu iyāwu kú uwā lɛ, eko dóódu nēé gē cālɛ́ ā á.

²⁹Umósīsi da ɔyínɛ́ kú ɔnyā nū, Uhɔ́bābu, ɔyí kú Ujɛ́tro, ɔ̄cɛ kú Umídiyan ā kahíníī, “Alɔ gáā ga ɛga nɛ̄ Óndú ā cokónu ka anúɔ géē je lɛ alɔ ā ɛɛ́. Wā mla alɔ, alɔ géē yá uwɔ lɔhi. Óndú ā cokónu kú ɔdā olɔhi lɛ ācɛ kú Ísrɛ̄lu.”

³⁰Amáŋ Uhɔ́bābu tá ɔ̄ ohi kahíníī, “Ń gáā nyɔ̄ mla aá ŋ́, n géē ga ɔlɛ́ um, mɛ́mla ɛgiyí ācɛ ɔlɛ́ um.”

³¹Anɔ́ɔ Umósīsi da ɔ̄ kahíníī, “Ā híī nyɛ̄ɛ̄ hɛ̄ alɔ tá ŋ́, n gē gbɔ̄ɔkɔ gā uwɔ. Ohígbū ka a jé ɛ́gɛ́nɛ̄ alɔ gē lā ipú ígbíli lɛ ā. Á kē í yɔ̄ ī bī alɔ jé ɔwɛ.

³²Ɔ́dāŋ ka a le yɛ mla alɔ, ɔdā olɔhi dóódu nɛ̄ Óndú ā géē yá lɛ alɔ ā, alɔ géē kɔ̄ ɔ̄ mla awɔ.”

³³Anɔ́ɔ é gbɔɔ́ ŋmá ɛgiyí ɛfu kú Óndú ā, é yāwu ɛ̄cī ɛtá. Ikpati kú Ɛka kú Óndú ā gē gbɔbū lɛ uwá eko dóódu kóō mafú ɛga ɔhá nēé géē lā ā lɛ uwá.

³⁴Abɔ̄ é bá ī nyɔ̄ ɛ̄cī dóódu ā, ojuja kú Óndú ā klá uwá ɛyí ɔlɛ́ɛnɔ.

³⁵Eko dúúmā nɛ̄ Ikpati kú Ɛka kú Óndú ā gbɔɔ́ kóō nyɔ̄, Umósīsi gē kahíníī, “Canjɛ Óndú, cɛ́ɛ́ kú aólɛla kú uwɔ kéē le fíyákátā, kú ācɛ nēe géē wɔ́tū uwɔ ā kéē kwinya ŋmá iyɔ̄bū uwɔ.”

³⁶Eko nēé kwú Ikpati kú Ɛka kú Óndú ā ú háyi ɛga dóódu nɛɛ, ó gē kahíníī, “Pīyɛyí Óndú, wā ɛgiyí ācɛ úlúúlā kú ipɔ́ɔma kú Ísrɛ̄lu ā.”