Read idoma ÁLUKA 11 Bible Online

ÁLUKA 11 - idoma bible

ÁLUKA 11

¹Ācɛ ā gbɔɔ́ kóō ka iŋini ohígbū unwalu kú uwā. Eko nɛ̄ Óndú ā le iŋini nēé ka ā pó ā, ó le cɔ̄nū, anɔ́ɔ ó le ɔlá tū í klá ācɛ ā á. Ɔlá ā kwú ācɛ nēe lā ogwu éyi kú ɛga nēé lā í yi tāajɛ.

²Ācɛ ā gbɔɔ́ ō jikwū klá Umósīsi kóō tá uwā abɔ̄. Umósīsi le ɔkɔ gbā lɛ Óndú ā, anɔ́ɔ ɔlá ā ge nyí á.

³Ohígbū ɛ̄nyā ā, é hī iyē kú abɔ́ɔ ka, Utabéra,[2] ohígbū ka ɔlá kú Óndú ā yi ɔtāhɛ̄ uwā.

⁴Ācɛ ewɔhá ōhī bá ipú ācɛ Ísrɛ̄lu bá ī nyɔ̄ mla uwá. É wɛ ācɛ o yúnwɛ̄bɛ́ nɛ̄ɛ̄nɛ̄hi. Ācɛ kú Ísrɛ̄lu kōō gbɔɔ́ ō ka iŋini dúú kahíníī, “Ɔ́dāŋ ka, alɔ kōō lɛ ɛbɛ́ má kwú lé ōfōōfūnū.”

⁵Alɔ blakwu ɛbéenyi nɛ̄ alɔ gē lé ajɛ kú Íjīpiti ɛ́gɛ́nɛ̄ alɔ cɛgbá lɛ ā. Ógāapɛ, mɛ́mla álibácā, mɛ́mla ɔdā nēé hī ka ukúkūmba ā.

⁶Amáŋ, abālɔbányā abɔ̄ le hɛ́ alɔ iyē ɛɛ́, ɔdā dúúmā ɔhá í yɔ̄ nɛ̄ alɔ gē lé gwū umaná nyā nɛ̄ alɔ gē lé ɛ̄cī dóódu nyā ŋ́.

⁷Umaná ā lɛbɛ̄ɛka īkpɔ̄cí lígíí-lígíí, ɛnɛ̄hɛ́ mla odo ā.

⁸Ācɛ ā ī nyɔ̄ ī tú ɔ̄ bá, cɛ́ɛ́ é lɛ ɔ́ wú ɔjī klla lɛ ɔ́ gbā ɛgɔ̄, kwú ɔ̄ ú ce ɔlá ipú ɛ̄hī. É ge yá igbō ŋmá anú. Ɔnyɛ kú nū lɛbɛ̄ɛka igbō nēé yá mla anɔ̄ ɛ̄yīpɛ̄ ā.

⁹Eko nɛ̄ ébú le ce klla ɔlɛ́ uwā otú nɛ, umaná ā gē wā ajɛ mla anú.

¹⁰Eko nɛ̄ Umósīsi le pó ka ācɛ le túbá ígwíígwu okómpīinu kú ɔlɛ́ uwā bá ī jīkwu ā. Ó le kwú Umósīsi iyē nɛ̄hi, ohígbū ka Óndú ā le cɔ̄nū mla uwá.

¹¹Umósīsi da Óndú ā kahíníī, “Ɔdíyá nāa yá um ɔdɔ̄bɔ̄bí ɛ́gɛ́nyā ā? Ɔdíyá nɛ̄ ɛlā kú um í he uwɔ ɔtū ŋ́ mā? Ɔdíyá nāa je iyó kóō bī ācɛ nēe bá nyā ce um ɛyí ā?

¹²Ó wɛ ami yá uwā ā ŋ́. Ó kē wɛ ami ma uwá ā ŋ́. Ɔdíyá nāa da um ka ami ɔ́ bī uwā ipú abɔ̄ kú um bɛ́gɛ́nɛ̄ é gē bī ɔyí ō gwá amɛ̄ abɔ̄ ā, ga ajɛ nāa cokónu nū lɛ aádáádā uwā ā?

¹³Iní nɛ̄ n géē má ɛbɛ́ ŋmá nōo géē jila odúúdu ɛwa nyā glá ā? Ohígbū keé bá ī jikwū tū um eko dóódu kahíníī, ‘Je ɛbɛ́ lɛ alɔ kú ālɔ̄ lé.’

¹⁴Ń bī ācɛ nēe bá nyā ōfōōfū um glá ŋ́, unwalu kú uwā le ce um bá.

¹⁵Ɔ́dāŋ ka a géē yá um lɛ ā, méyīnyinyi um kú ā lɛ um ŋmó igbo ékpónú, cɛ́ɛ́ ń gáā yɔ̄ ī má ɔplɛ́ca lɛ ā igbɔhá ɛ́ɛ́ gɛ ŋ́.’”

¹⁶Anɔ́ɔ Óndú ā da Umósīsi kahíníī, “Lɛ anyākwɔ́cɛ nēe wɛ aótrɛ̄yí kú Ísrɛ̄lu ofɛtá ce igwó fu, ká ā lɛ uwá kpó gé um ipú Áklɔ̄kpīihɔ ā, cɛ́ɛ́ kéē háyi abɔ́ɔ mla uwɔ.

¹⁷N géē wā í kɛlā mla uwɔ abɔ́ɔ. N géē je alelékwū ōhī nɛ̄ n je gā uwɔ ā ŋmá ɛgiyí uwɔ, cɛ́ɛ́ n kwú lɛ uwá. Cɛ́ɛ́ kéē géē bá ī bī iyó ákanya kú ācɛ kú Ísrɛ̄lu ā mla uwɔ, nɛ̄ á gáā bī iyó ā ōfōōfū uwɔ gɛ ŋ́.

¹⁸Le ka lɛ ācɛ ā kéē lɛ iyī uwā tīihɔ, ohígbū ka óócí, é géē lɛ ɛbɛ́ nēé í lé. Ohígbū kēé le ikwū je klá Óndú ā ka, ɔ̄nyɛ ɔ́ɔ géē je ɛbɛ́ lɛ aá lé ā? Aá ka ɔ́ɔ lɔhi lɛ aá Íjīpiti fíyɛ́. Ohígbū ɔ́ɔmā, ó ka Óndú ā ɔ́ɔ géē je ɛbɛ́ lɛ uwá nēé géē lé.

¹⁹Aá géē lé ɛbɛ́, ó gáā wɛ ɛ̄cī éyi, ámāŋ ɛ̄cī ɛpa ŋ́, ámāŋ ɛ̄cī ɛhɔ̄ ŋ́, ámāŋ ɛ̄cī igwó ŋ́, ámāŋ ɛ̄cī ofu ŋ́.

²⁰Amáŋ, ipú ɔyā odunkwulu jāā gbéeko nɛ̄ ɛbɛ́ ā gbɔɔ́ ō cē bla aá ɛnwū, nɛ̄ó kwú cá aá eyī. Ɔdā nyā géē yá ohígbū ka aá tá Óndú ā nōo yɔ̄ ɔtāhɛ̄ aá ā, gē jikwū kahíníī, “Ɔdíyá nɛ̄ alɔ bɛ̄cɛ ŋmá Íjīpiti ā?”

²¹Amáŋ, Umósīsi kahíníī, “Ācɛ kú Ísrɛ̄lu nɛ̄ n gē leyīkwu uwá ā wɛ úlā bá ɛga úlā ɛtá ce úlā ofu igwɛ́ɛhɔ̄ 600,000, anɔ́ɔ a ka ami ɔ́ɔ géē je ɛbɛ́ lɛ uwá ɔyā odumkulu á ā?

²²Aálá mɛ́mla ɛna nɛ̄ alɔ géē kpó ŋmó ɛ́ɛ́ kóō jɛ̄ uwā áā, kɛ̄ɛ ka odúúdu ɛbéenyi kú ísu nɛ̄ alɔ géē túbá ɛ́ɛ́ nɛ̄ó géē jɛ̄ uwā ā a?”

²³Óndú ā tá Umósīsi ohi kahíníī, “Ɔdā dúúmā ce ɔfú kú um abɔ̄ bá nɛɛ? Abālɔbányā, aá géē má ɔ̄, ɔ́dāŋ ka ɛlā nɛ̄ n ka ā géē yá jīla, ámāŋ koó gáā yá jīla ŋ́.”

²⁴Anɔ́ɔ Umósīsi le tɛ́ɛcɛ gaá lɛ ɛlā nɛ̄ Óndú ā ka ā ka lɛ ācɛ ā. Anɔ́ɔ ó le anyākwɔ́cɛ ofɛtá ce igwó ā fu, kwú uwā ú kwu ɔgba biílí ipu Áklɔ̄kpīihɔ ā.

²⁵Anɔ́ɔ Óndú ā gaajɛ ipú ojuja gaá le ɛlā ka lɛ uwá. Anɔ́ɔ ó kwú ōhī kú alelékwū ú ŋmá ɛgiyí Umósīsi, kwú ɔ̄ ú tá ipú uwā. Eko nɛ̄ó kwú Alelékwū ā ú tá ipú uwā ā, é gbɔɔ́ ō kɛlā bɛ̄ɛka ācomɛ́ɛbɛ́ ā, amáŋ, é ka gɔ́bū fíyɛ́ eko ɔ́ɔmā gɛ ŋ́.

²⁶Ācɛ ɛpa kú anyākwɔ́cɛ ā, Ɛ́lídādi mɛ́mla Umédādi klá ɔlɛ́, é ga ipú Áklɔ̄kpīihɔ ā ŋ́. Alelékwū ā gā ipú uwā, anɔ́ɔ é gbɔɔ́ ō kɛlā bɛ̄ɛka ācomɛ́ɛbɛ́ ā dúú ɔlɛ́ uwā abɔ́ɔ.

²⁷Oklobīya éyi le inya kwu gaá le ka lɛ Umósīsi, ɔdā nɛ̄ Ɛ́ldādi mɛ́mla Umédādi yɔ̄ ī yá ā.

²⁸Anɔ́ɔ Ujóssuwa, ɔyí kú Unɔ́n nōo húmáyī tá Umósīsi abɔ̄ ŋmá eko ɔyípɛ̄ kú nū ā da Umósīsi kahíníī, “Lɛ uwá anú ci ɔkpani.”

²⁹Amáŋ Umósīsi tá ɔ̄ ohi kahíníī, “A gē ka ɛ̄nyā ohígbū olɔhi kú um nɛɛ? Ó géē he um ɔtū, ɔ́dāŋ ka odúúdu ācɛ kú Óndú ā wɛ ācomɛ́ɛbɛ́ nɛ̄ Óndú ā géē je alelékwū kú nū lɛ uwá.”

³⁰Anɔ́ɔ Umósīsi mɛ́mla anyākwɔ́cɛ ofɛɛtá ce igwó ā pīyɛyí wā ɔlɛ́ ŋmá ipú Áklɔ̄kpīihɔ ā á.

³¹Anɔ́ɔ igbeékpónú Óndú ā lɛ owu nɛ̄hi tū wā ajɛ, anɔ́ɔ ó lɛ ɔ́wá kú ígbáanɔ nōo lɛbɛ̄ɛka ɛwá ɔkpá ā kpó gwu wā ŋmá okónu ísu. É wu licō ŋmá ajɛ fíyɛ́ ikpó ɛtá glá ŋ́. É le ce klɛ́ɛcɛ ɛga dóódu kú ipú ɔlɛ́ ā bɛ̄ɛka iyāwu kú ɛ̄cī éyi ā.

³²Ɛ̄cī dóódu, otú dóódu, mɛ́mla oŋmɔ́ɔ̄cī nū, ācɛ ā bá ī yúklɔ́ kú aígbáanɔ ō kwú. É ī kwú nyɛ́ fíyɛ́ utín ofɛpa cigwó ŋ́. É le uwá kpó bá ɛcɛ ɛga dóódu kú ɛga nēé lā ɛbɛɛbɛ.

³³Eko nēé le ɛbɛ́ lɛ nɛ̄hi bá ī lé ā, Óndú ā le cɔ̄nū le ōcē obɔ̄bí tū klá uwá, ó gbɔɔ́ ō ŋmó uwā bónū nɛ̄hi.

³⁴Anɔ́ɔ é kwú iyē ú ce abɔ́ɔ kahíníī, “Unóji kú unwɛbɛ́.” Ohígbū ka abɔ́ɔ ā nēé nyi okwū kú ācɛ o yúnwɛ̄bɛ́ ā á.

³⁵Oŋmá abɔ́ɔ ā, ācɛ ā gbɔɔ́ ō ga Uhásɛ̄rɔtu, ɛga ɔhá nēé gwó ɔlɛ́ ā.