Read idoma ÁLUKA 13 Bible Online

ÁLUKA 13 - idoma bible

ÁLUKA 13

¹Óndú ā da Umósīsi ka,

²“Lɛ otrɛ̄yí éyééye fu ŋmá ipɔ́ɔma éyééye igwɛ́ɛpa ā, cɛ́ɛ́ káā lɛ uwá tɛ̄hɔ̄ kéē gaá lɛ ajɛ kú Ukénan jila tayínū. Ajɛ nɛ̄ n gáā je lɛ ācɛ kú Ísrɛ̄lu ā.”

³Anɔ́ɔ Umósīsi lɛ ācɛ ā fu ŋmá ipɔ́ɔma éyééye ā, le uwá tɛ̄hɔ̄ ŋmá ígbíli kú Upáran ga ajɛ kú Ukénan.

⁴Iyē kú ācɛ nɛ̄ Umósīsi fu klla tɛ̄hɔ̄ nyɔ̄ ā bá yɔ̄ á: Ussámmuwa, ɔyí kú Usákɔ̄ ŋmá ipɔ́ɔma kú Urúbɛ̄n.

⁵Ussáfāti, ɔyí kú Uhóri ŋmá ipɔ́ɔma kú Usímīyɔn.

⁶Ukálɛ̄bu, ɔyí kú Ujɛ́fūnɛ ŋmá ipɔ́ɔma kú Ujúda.

⁷Ígal, ɔyí kú Ujósɛ̄fu ŋmá ipɔ́ɔma kú Íssāka.

⁸Uhosíya, ɔyí kú Unún ŋmá ipɔ́ɔma kú Ɛ́frēm.

⁹Upáliti, ɔyí kú Uráfu ŋmá ipɔ́ɔma kú Ubɛ́njamīn.

¹⁰Ugadíyɛ, ɔyí kú Usɔ́di ŋmá ipɔ́ɔma kú Usɛ́būlɔn.

¹¹Ugadíyɛ ɔyí kú Usúsi ŋmá ipɔ́ɔma kú Umanásɛ.

¹²Ámiyɛ̄lu, ɔyí kú Ugɛmáli ŋmá ipɔ́ɔma kú Udán.

¹³Usɛ́tɔ, ɔyí kú Umíkɛlu ŋmá ipɔ́ɔma kú Ássa.

¹⁴Unábi, ɔyí kú Ufɔ́fisi ŋmá ipɔ́ɔma kú Unáfutāli.

¹⁵Ugéyulu, ɔyí kú Umɛ́ki ŋmá ipɔ́ɔma kú Ugádi.

¹⁶Ɛ̄nyā wɛ ācɛ nɛ̄ Umósīsi tɛ̄hɔ̄ ga ajɛ kú Ukénan kéē lɛ ɔ́ jila tayínū á. Ó lɛ iyē kú Uhosíya ɔyí kú Unún pīyabɔ̄ ga Ujóssuwa.

¹⁷Eko nɛ̄ Umósīsi tū uwā ɛhɔ̄ ā ó kahíníī, “Aá nyɔ̄ lɛyíkwu ɛháajɛ ga Unégēbu, klla yɛ gɔbū gicō ɛfu kú ajɛ ā,

¹⁸káā má ɛdɔ ajɛ nɛ̄ó wɛ ā, mɛ́mla ācɛ nēe lā ipú ajɛ ā, ɔ́dāŋ keé wɛ ācɛ okwáahi amáŋ keé wɛ ācɛ olɔfú, ɔ́dāŋ keé lɛwa ámāŋ keé le ligíí.

¹⁹Ɔ́dāŋ ka ajɛ nēé lā ā lɔhi ámāŋ koó bɔ̄bí, ɔ́dāŋ keé lā áklɔ̄kpɛ ámāŋ ipú igelī nɛ̄hi nēé lɛ igá hɛ́ tū ɔ̄.

²⁰Ɔ́dāŋ ka ajɛ ā lɔhi, ámāŋ ka ó lɔhi ŋ́, ɔ́dāŋ ka ɔcí yɔ̄ abɔ́ɔ ámāŋ ka ó yɔ̄ ŋ́. Aá lɛ ɔtū lɛ, kú aá lɛ ikpɔ̄ɔ̄cí ōhī kú ajɛ ā bī wā.” Eko nēé nyɔ̄ ā, wɛ eko nɛ̄ “īkpɔ̄cí ufáyin” yɔ̄ ī pīya.

²¹Anɔ́ɔ ācɛ ā le yɛ gaá lɛ ajɛ ā jila bū ígbíli kú Usín jāā ga Uréhɔ̄bu ga okónu ɔwɛ kú Uhámāti.

²²É le bū ɛháajɛ ā ga Uhɛ́brɔn. Ahíman, Usséssayi mɛ́mla Utálimāyi nēe wɛ aípɔ́ɔma kú aágwu nēé hī ka Ánāki ā, lā abɔ́ɔ. É le Uhɛ́burɔn gwó iháyí ahāapa gbɔbū lɛ Usówan kú Íjīpiti ā.

²³É yɛ ga ɔpɛ́ kú Ɛ́ssikɔlu ā, anɔ́ɔ é lɛ abɔ̄ kú oōgwā kú īkpɔ̄cí ufáyin éyi hɛ́ ŋmá abɔ́ɔ á. Anɔ́ɔ uwá kwú ɔ̄ ú playi ɔcí éyi nɛ̄ ācɛ ɛpa kú uwā je ce ɔkɔ ohígbū ōgwá nwuné kú nū. É kōō bī upomégrenēeti wā dúú.

²⁴É hī iyē kú abɔ́ɔ ka Ɛ́ssikɔ̄lu ohígbū ka abɔ́ɔ nɛ̄ ācɛ kú Ísrɛ̄lu hɛ́ abɔ́ɔ kú oōgwá kú ikpɔ̄cí kú ajɛ ā ŋmá á.

²⁵Eko nēé le ajɛ ā jila ɛ̄cī ofɛpa ā, é pīyɛyí wā ɔlɛ́ uwā.

²⁶Anɔ́ɔ é gā ɛgiyí Umósīsi mɛ́mla Árɔ̄ni mɛ́mla odúúdu ójila kú Ísrɛ̄lu ā, ipú ígbíli kú Upáran ipú Ukádɛssi. É le ohi kú iyāwu kú uwā kpó lɛ uwá mɛ́mla odúúdu ójila kú Ísrɛ̄lu. É klla le ikpɔ̄cí kú ajɛ ā mafú lɛ uwá.

²⁷Anɔ́ɔ é kahíníī, “Alɔ i yɛ ga ajɛ nɛ̄ aá tū alɔ ɛhɔ̄ nyɔ̄ ā. Ajɛ ā lɔhi nɛ̄hi, ɔdōlé kpɔ anú nɛ̄hi dúú. Īkpɔ̄cí kú ajɛ ā bá yɔ̄ á.

²⁸Ācɛ nēe lā ajɛ ā lɔfú. É lā ipú aígelī nɛ̄hi nēé lɛ igá hɛ́ tū uwā. Alɔ klla má aípɔ́ɔma kú ayí kú Ánāki, nēe wɛ aɔ́báagwu ā.

²⁹Ācɛ kú Ámālēki lā Unégēbu, ācɛ Uhɛ́ti, Ujébūsi, mɛ́mla ācɛ Ámɔn lā ɛyí ɛfu ā. Ācɛ kú Ukénan lā pīya ísu kú Umeditarénīya mɛ́mla okónu ísu kú Ujɔ́dan ā á.”

³⁰Amáŋ, Ukálɛ̄bu da ācɛ ā nēe gbɔɔ́ ō ka iŋini tú Umósīsi ā kéē lɛ okónu klá cíí, anɔ́ɔ ó da uwá ka, “Ālɔ̄ nyɔ̄ gaá mīyɛ ajɛ ā bōōbū, ohígbū ka alɔ lɔfú nɛ̄ alɔ mīyɛ ajɛ ā glá.”

³¹Anɔ́ɔ ācɛ nēe nyɔ̄ mla anú ā kahíníī, “Alɔ í lɔfú nɛ̄ alɔ ī mīyɛ ajɛ ā glá ŋ́, ohígbū ka ācɛ kú ajɛ ā lɔfú fíyɛ́ alɔ á.”

³²É lɛ ohi obɔ̄bí mɛ́mla ohi ɛ̄kɛ̄mgbɛ̄ bī gé lɛ ācɛ kú Ísrɛ̄lu kahíníī, “Ajɛ ā í gáā yá ɔdɛ̄hɔ̄ nōo géē jɛ̄ ācɛ nēe lā anú ā glá ŋ́, odúúdu ācɛ nēe lā ajɛ ā wɛ aɔ́báagwu klla jɛ̄ nɛ̄hi.

³³Alɔ má ācɛ kú Unefilím nēe wɛ ayí kú Ánāki nēe wɛ aɔ́báagwu nɛ̄hi ā abɔ́ɔ. Alɔ nyɛ́ lígíí bɛ̄ɛka aíkpaŋgā ā ɛgiyí uwā. Ɛ́gɔ́ɔmā nēé kōō má alɔ lɛ á”