Read idoma ÁLUKA 14 Bible Online

ÁLUKA 14 - idoma bible

ÁLUKA 14

¹Odúúdú ójíla kú ācɛ Ísrɛ̄lu ā, je ɔkɔ gicō nɛ̄hi jikwu otú gbɔ́ɔ̄cī.

²É ka iŋini tá Umósīsi mɛ́mla Árɔ̄ni kahíníī, “Ó géē yɛ í lɔhi lɛ alɔ fíyɛ́ kú alɔ le pɛ́ gekwú ipú ajɛ kú Íjīpiti ikɔkɔ ō wá í pɛ́ kwú ipú ígbíli amānyā.

³Ɔdíyá nɛ̄ Óndú yɔ̄ ī kpó alɔ ga ipú ajɛ ɔ́ɔmā ā? É géē je alɔ kpó ŋmó ɔgbɛ́fú klla í je anyā alɔ mɛ́mla ayí alɔ kpó kwú, cɛ́ɛ́ é kwú uwā ú yá aɔ́fiyɛ. Ó géē lɔhi fíyɛ́ lɛ alɔ kú ālɔ̄ le cīgbīhi ga Íjīpiti ŋ́ nɛɛ?

⁴Anɔ́ɔ é da iyī ūwā kahíníī, “Alɔ lɛ ɔ̄cɛ éyi fu kóō kpó alɔ trɛ̄yí, cɛ́ɛ́ kú ālɔ̄ lɛ cīgbīhi ga Íjīpiti.”

⁵Anɔ́ɔ Umósīsi mɛ́mla Árɔ̄ni lɛ eyī pīya klá ajɛ iyɔ̄bū ācɛ ā.

⁶Ujóssuwa, ɔyí kú Unún mɛ́mla Ukálɛ̄bu, ɔyí kú Ujɛ́fūnɛ, ācɛ ɛpa ŋmá ipú ācɛ o bɔkwu ɛlā tayínū ā le īlī kú uwā híla tīiyē ohígbū ɔtūnōbí.

⁷Anɔ́ɔ é da ācɛ ā kahíníī, “Ajɛ nɛ̄ alɔ nyɔ̄ gaá jila ā wɛ ajɛ olɔhi nɛ̄hi.

⁸Ɔ́daŋ ka alɔ he Óndú ā ɔtū, ó géē bī alɔ wā ajɛ ɔ́ɔmā klla í je ɔ́ lɛ alɔ. Ajɛ ɔ́ɔmā nōo lɔhi gbiyē nɛɛ, nɛ̄ ɔdōlé kpɔ anú nɛ̄hi ā.

⁹Aá híī yíikpɛ̄yí olɔfú tá Óndú ā ŋ́. Aá kéē híī yúufi kú ācɛ nēe lā ajɛ ā ŋ́, o yá uwā lé í tɔ́ɔtɛ́ lɛbɛ̄ɛka igbō nɛ̄ ɔ̄cɛ ī je lé ā. Óndú ā yɔ̄ mla alɔ, ó kōō tá alɔ abɔ̄ le aɔ́wɔ nēe gē gbō uwā ɛyí ā kpó yálé ɛɛ́. Ohígbū ɔ́ɔmā aá yúufi ŋ́.”

¹⁰Amáŋ, odúúdu ójīla kú ācɛ Ísrɛ̄lu ā le tútū kéē tá ɛcɔ̄ klá uwá kéē lɛ uwá kpó ŋmó. Ɔkwɔɔkwu ɔ́ɔmā ācɛ le ofíyajɛ kú ɛgahi nōo gē mafú ka Óndú ā ɔ́ɔ yɔ̄ ɛgée ā má. Ó le hɛ́wɛ̄ɛcɛ wā í ce ɛyí Áklɔ̄kpīihɔ ā.

¹¹Óndú ā da Umósīsi kahíníī, “Eko nyá nɛ̄ ācɛ nēe bá nyā géē tá um, klla leyī gwū um bónū í kwu ā? Eko nyá nēé géē tá kéē kpɔ́tūce um í kwu ā, nááná, nɛ̄ n yɔ̄ ī yá aɔ́dā ō hídáagó ipéyī uwā a?

¹²N géē tū ōcē obɔ̄bí wā í kpó uwā yíífi, amáŋ n géē je uwɔ pīya ádā kú éwo nēe lɛwa klla lɔfú fíyɛ́ ācɛ nēe bá nyā.”

¹³Amáŋ, Umósīsi tá Óndú ā ohi kahíníī, “A bī ācɛ nēe bá nyā wɛ̄ɛcɛ ŋmá Íjīpiti mla ɔfú nɛ̄hi kú uwɔ ā. Ɔ́dāŋ ka ācɛ kú Íjīpiti lɛ ɔdā nāa yá ācɛ kú uwɔ ipu ígbíli ā pó,

¹⁴é géē ka lɛ ācɛ nēe lā ipú ajɛ nyā ā. Ācɛ ā kē tɛtɛ le pó ka awɔ, Óndú ā ɔ́ɔ yɔ̄ mla alɔ ɛɛ́, é kē ī má uwɔ yēŋēē eko nɛ̄ ojuja kú uwɔ gē wā ajɛ ɛgiyí alɔ ā. A klla ī bī alɔ tá ipú iyāwu kú alɔ mla ojuja ɔlɛ́ɛnɔ, mla ojuja kú ɔlá otú.

¹⁵Ɔ́dāŋ ka a lɛ odúúdu ācɛ kú uwɔ nēe bá nyā kpó ŋmó, aéwo nēé lɛ ofu kú ɔfú kú uwɔ pó ɛɛ́ mā géē ka,

¹⁶a le ācɛ ɔlɛ́ uwɔ ā kpó ŋmó ipu ígbíli ohígbū, ka á lɔfú bī uwā ga ajɛ nāa cokónu ka anúɔ géē je lɛ uwā ā glá ŋ́.

¹⁷Abālɔbányā, Óndú, lɛ ɔfú kú uwɔ mafú, ká ā le yá ɛ́gɛ́nɛ̄ a cokónu ka,

¹⁸anúɔ wɛ Óndú ā á, anúɔ í gē cɔ̄nū fíyaa ŋ́, anúɔ klla le mu mla ihɔtū o yɔ̄ piyóó ipú ɛcɛ nyā, anúɔ gē méyīnyinyi, klla ī je íne nɛ̄ ācɛ bīya ā mɛ́mla ikpɛ̄yí olɔfú nɛ̄ ācɛ yá ā yɛ́ɛhi. Amáŋ anúɔ géē yá ācɛ o lɛ́pɔ̄bí ā italā piíí. Ó ka anúɔ géē yá ayááyí italā kú íne nɛ̄ ádā uwā bīya ā, o ŋmá ayááyí éyi ga ayááyí ɔ́mpa, ɔ́mɛɛtá, jāā ga ɔ́mɛɛnɛ

¹⁹Kwú íne nɛ̄ ācɛ ɔlɛ́ uwɔ bīya ā í yá uwā ɛhi Óndú, n géē gbɔ̄ɔkɔ gā uwɔ ohígbū ihɔtū kú uwɔ nɛ̄ó ī pīyabɔ̄ ŋ́ mā, mɛ́mla ɛ́gɛ́nɛ̄ a gē méyīnyinyi uwā klla je ucē obɔ̄bí kú uwā yá uwā ɛhi ŋmífī nēé ŋmá Íjīpiti ā.”

²⁰Anɔ́ɔ Óndú ā kahíníī, “N géē je yá uwā ɛhi ɛ́gɛ́nɛ̄ a gbɔ̄ɔkɔ lɛ a.

²¹Amáŋ, ɛ́gɛ́nɛ̄ n yēeyī ā, mɛ́mla ɛ́gɛ́nɛ̄ ɛgahi kú um lɛ mu odúúdu ɛcɛ ā,

²²odúúmā kú ācɛ nēe bá nyā í gáā yēeyī kóō ga ɔlɛ́ ā ŋ́. É le ɛgahi kú um mɛ́mla úklɔ́ o hídáagó nɛ̄ n yá Íjīpiti mɛ́mla ipú ígbíli ā má, amáŋ é le um jámá igbo alewa, anɔ́ɔ é klla lɛyítáajɛ lɛ ɛlā kú um ŋ́.

²³É gáā má ajɛ nɛ̄ n cokónu ka n̄ gē je le ádā uwā ā ŋ́. Ɔ̄cɛ dóódu nēe leyī gwō um bónū ā í gáā bēhé ga ɔ́ ŋ́.

²⁴Amáŋ ɔ̄cocɛ̄hɔ̄ kú um Ukálɛ̄bu ā, ohígbū alelékwū ɛyɛ́ɛ́yí nɛ̄ó lɛ nɛ̄ó klla yɛce um kpaakpa ā, n géē bī ɔ̄ wā ipú ajɛ nɛ̄ó nyɔ̄ í jila má ā. Ipɔ́ɔma kú nū klla í lé úgwū kú ajɛ ā.

²⁵Ipɔ́ɔma kú ɔlɛ́ nū géē lā ɔpɛ́ nɛ̄ ācɛ Ámālɛ̄ki mɛ́mla ācɛ kú Ukénan lā abālɔbányā ā. Aá gbɔɔ́ ŋmá amānyā óóci kú aá yɛ lɛyíkwu ígbíli bū ɔwɛ kú ísu igwɛ̄bɛ́ ā.”

²⁶Óndú a da Umósīsi mɛ́mla Árɔ̄ni kahíníī,

²⁷“Eko nyá nɛ̄ ipɔ́ɔma kú ɔ́bíipú nyā ā í ka iŋini tū um gaá kwu ā? N le iŋini nɛ̄ ācɛ kú Ísrɛ̄lu ge ka tú um ā pó ɛ́ɛ́.

²⁸Le da uwá ka, ɛ́gɛ́nɛ̄ n yēeyī ā, ɔdā nɛ̄ aá ka nɛ̄ n pó ā nɛ̄ n géē yá aá á.

²⁹Aá géē pɛ́kwú ipú ígbíli nyā. Okwū kú aá í wɛ o pahīla klá ajɛ ɛbɛɛbɛ. Ohígbū iŋini nɛ̄ aá ka ā. Odóódu kú aá nēe wɛ iháyí ofu gɔbū ā í gáā ga ipú ajɛ ā ŋ́.

³⁰N cokónu lɛ aá ka, aá géē lā abɔ́ɔ, amáŋ, odúúdú aá í gáā lā abɔ́ɔ ɛ́ɛ́ gɛ ŋ́, ayíka Ukálɛ̄bu mɛ́mla Ujóssuwa ōfōōfū uwā nɛ.

³¹Aá ka kēé géē kwú ayí aá je uwá yá ɔfiyɛ, amáŋ n géē bī uwā wā ipú ajɛ nɛ̄ aá tá ā. Ó kē í wɛ ɔlɛ́ uwā.

³²Aá géē pɛ́kwú ipú ígbíli amānyā.

³³Ayípɛ̄ ɔlɛ́ aá géē bá ī yɛ ipú ígbíli ā iháyí ofɛpa. É géē bá ī móōwē kú íne nēé bīya mɛ́mla īkpɛ̄yí olɔfú kú aá, gbéeko nɛ̄ ámōōmɛ kú aá ā gekwú

³⁴Aá géē mōowē kú íne nēé bīya ā iháyí ofɛpa. Iháyí éyi kwɛyí ɛ̄cī éyi kú ɛ̄cī ofɛpa nɛ̄ aá bī le jila ajɛ ā. Aá í jé ícɔ̄nū kú um eko ɔ́ɔmā.

³⁵N géē yá aá ɛ̄nyā piíí, aá ācɛ ɔ́bíipú nēe le túbá lɛyíkwu um ā. Ipu ígbíli amānyā, éyééye kú aá géē kwú. Ami Óndú ā lɛ ɛlā ka ɛɛ́.”

³⁶Ācɛ nɛ̄ Umósīsi tɛ̄hɔ̄ gaá jila ajɛ, nēe pīyɛyí wā ɛgiyí ācɛ kú Ísrɛ̄lu, mɛ́mla ohi ɛ̄kɛ̄mgbɛ̄ kú iyāwu kú uwā ā, yá ɛ́ɛ́ nɛ̄ ācɛ ā ka iŋini tá Óndá ā á. Anɔ́ɔ Óndú ā le ōcē obɔ̄bí tū klá uwá, anɔ́ɔ ó le uwá kpó ŋmó ipú ígbíli á.

³⁷

³⁸Amáŋ Ujóssuwa ɔyí kú Unún mɛ́mla Ukálɛ̄bu, ɔyí kú Ujɛ́fūnɛ ōfōōfū uwā yēeyī á.

³⁹Eko nɛ̄ Umósīsi le ɔda nɛ̄ Óndú ā ka ā ka lɛ ācɛ kú Ísrɛ̄lu ā, ācɛ ā yɔ́tūnōbí nɛ̄hi.

⁴⁰Oŋmá ɔ̄cī nū, é cāŋjɛ lɛyíkwu ajɛ kú ɛyí ɛfu ā kéē kpɛ́fú. Anɔ́ɔ é kahíníī, “Má ɔ̄, alɔ lɛ tútū ō ga ɛga nɛ̄ Óndú ā cokónu nū lɛ alɔ ā ɛɛ́, alɔ le íne bīya.”

⁴¹Amáŋ, Umósīsi da uwá kahíníī, “Ɔdíyá nɛ̄ aá lɛyítáajɛ lɛ Óndú ā ŋ́, klla ī bīya íne ā? Ɔdā nɛ̄ aá gē yá ɔ́ɔmā í gáā lɛyí lɛ aá ŋ́.

⁴²Aá híī nyɔ̄ ŋ́. Óndú ā í yɔ̄ mla aá ŋ́. Aólɛlā kú aá géē yá aá lé.

⁴³Eko nɛ̄ aá gáā nuunu tá ācɛ Ámālɛ̄ki mɛ́mla ācɛ Ukénan ā, aá géē pɛ́kwú ɔgbɛ́fú ā. Óndú ā í gáā yɔ̄ mla aá ŋ́. Ohígbū ka aá tá ká aá yɛce Óndú ā ŋ́.”

⁴⁴Nááná nēé dɔɔ̄kā kéē ga ɛyí ɛfu ā kpɔ́ ā, Umósīsi, amáŋ ka Ikpati kú Ɛka kú Óndú ā í fu ajɛ ŋmá ipú ɔlɛ́ ā mla uwá ŋ́.

⁴⁵Anɔ́ɔ ācɛ kú Ámālɛ̄ki mɛ́mla ācɛ kú Ukénan nēe lā ɛyí ɛfu ā le unu nū tá uwā, le uwá yálé, klla le uwá nīinya ŋmá abɔ́ɔ jāā ga Uhɔ́ma.