Read idoma ÁLUKA 15 Bible Online

ÁLUKA 15 - idoma bible

ÁLUKA 15

¹Óndú ā da Umósīsi kahíníī,

²“Eko nɛ̄ aá gā ipú ajɛ nɛ̄ aá gáā lā, nɛ̄ n gáā je lɛ aá ā.

³Nɛ̄ aá géē gwɛ́ɛya o yɔlá dúúdú ámāŋ ka ákú o yá jīla kú okónu ō ce, ámāŋ ka ɛya nɛ̄ aá gē gwó eko kú ucɛ ɛyɛ́ɛyɛ́yí kú iháyí kú aá ā. Aá lɔfú bī ɔbá ɛna, ámāŋ ka omlede ámāŋ ka álá gé le Óndú ā, kú ocu kú nū kóō he Óndú ā ɔtū.

⁴Eko ɔ́ɔmā, ɔ̄cɛ dóódu géē bī ɔdā ɛ̄gbā kú nū wā, gaá je lɛ Óndú ā, ɛya kú īkpɔ̄dā kú okoolo éyi kú umu nēé lɛ ɔ́ wīya tɔ̄há mla ɔjá nɛ̄ŋcɛ́ kú anɔ̄ kú ólīfu,

⁵mɛ́mla ɔjá nɛ̄ŋcɛ́ kú ejé mla anú.

⁶Eko nɛ̄ó wɛ omlede nɛ̄ aá bī gwɛ́ɛya á nɛɛ, aá géē bī okoolo ɛpa kú umu nēé lɛ ɔjá nɛ̄ŋcɛ́ ce ohɛ́pa kú anɔ̄ kú ólīfu tū ɔ̄. Anú wɛ ɛya kú īkpɔ̄dā kú aá á.

⁷Aá klla í bī ɔjá nɛ̄ŋcɛ́ ce ohɛ́pa kú ejé. Ocu kú ɛya nēé gwó nyā he Óndú ɔtū.

⁸Ɔ́dāŋ ka aá kwú ɔbá ɛna ú gwɛ́ɛya lɛ Óndú ā, kú ɛya o yɔlá dúúdú, ámāŋ ɛya ó yá okónu ō ce jīla, ámāŋ ɛya kú olétɔ̄há.

⁹Aá géē bī ɔdā ɛ̄gbā kú īkpɔ̄dā nōo wɛ okoolo ɛtá kú umu mɛ́mla ɔjá nɛ̄ŋcɛ́ ɛpa kú anɔ̄ kú ólīfu,

¹⁰mɛ́mla ɔjá nɛ̄ŋcɛ́ ɛpa kú ejé. Ocu kú ɛya nyā he Óndú ā ɔtū á.

¹¹Ɔdā nɛ̄ aá géē je eko dóódu nɛ̄ aá gē je ɔbá ɛna, ámāŋ omlede, ámāŋ álá amáŋ opī ú gwɛ́ɛya ā yɔ̄ á.

¹²Ɔ́dāŋ ka aá lɛ aɛ́bɛ́ nōo fíyɛ́ éyi kpó gwɛ́ɛya nɛɛ, ɔdā ɛ̄gbā nōo géē bá ɔ̄ iyē ā, géē wɛ ɛ́gɛ́nɛ̄ áluka kú aɛ́bɛ́ ā lɛ ā.

¹³Ɔ̄cɛ kú Ísrɛ̄lu dóódu géē yá ɛ̄nyā eko nōo géē gwɛ́ɛya lɛ Óndú ā, kú ocu kú nū kóō he Óndú ā ɔtū.

¹⁴Eko dóódu nɛ̄ aéwɔhá dóódu nōo lā ipú aá, ɔ́dāŋ ka ó gáā yɔ̄ mla aá eko kpiíí, ámāŋ ka o yɔ̄ piyóó, dɔɔ̄kā kóō gwɛ́ɛya lɛ Óndú ā, ó géē lɛ íne ékpónú ɔ́ɔmā tū dúú.

¹⁵O ŋmá abālɔbányā jāā gbéeko dóódu, íne ékpónú ɔ́ɔmā géē gbō aá mɛ́mla aéwɔhá nēe lā ɔlɛ́ aá piyóó ipú ɛcɛ nyā á. Aá mɛ́mla uwá wɛ ācɛ ékpónú ɛgiyí Óndú ā.

¹⁶Íne kú ɛya ō gwó ékpónú ā yɔ̄ lɛ aá mɛ́mla uwá á.”

¹⁷Óndú ā da Umósīsi kahíníī,

¹⁸“Le ka lɛ ācɛ kú Ísrɛ̄lu ā ka, eko nɛ̄ aá gā ipú ajɛ nɛ̄ n gáā je lɛ aá nyā,

¹⁹eko nɛ̄ aá le ɔdōlé kú ajɛ ā lé, aá géē kpó ōhī kú nū lɛ Óndú ā.

²⁰Igbō kú aflɛ́yí, nɛ̄ aá géē yá ŋmá īkpɔ̄dɛ̄hɔ̄ kú aá ā, aá géē je lɛ Óndú ā, bɛ̄ɛka ɛya kú īkpɔ̄dɛ̄hɔ̄ kú aá nɛ̄ aá gē je lɛ Óndú ā.

²¹O ŋmá abālɔbányā jāā gbéeko dóódu, aá géē bá ī je ɔdā ɛ̄gbā nyā lɛ Óndú ā ŋmá īkpɔ̄dɛ̄hɔ̄ kú aá.”

²²Ɔ̄cɛ í jé ŋ́ nɛ̄ ɔ̄cɛ éyi í jéédé ŋ́ le aíne nɛ̄ Óndú ā je lɛ Umósīsi ā bīya.

²³Anɔ́ɔ ɔ̄cɛ í jé ŋ́ ɛ̄cɔ̄bū nɛ̄ ācɛ ā í yá odúúdú aɔ́dā nɛ̄ Óndú kpó lɛ uwá bū iyē kú Umósīsi ā ŋ́ bɛ́ɛ.

²⁴Ɔ́dāŋ ka aá jégēdē ŋ́, nɛ̄ aá lɛ íne ā bīya, nɛ̄ ójila kú ācɛ Ísrɛ̄lu í jé ŋ́, odúúdu ójīla kú ācɛ Ísrɛ̄lu ā géē je ɛdrɔ́ kú ɔbá ɛna gwɛ́ɛya ō yɔlá dúúdú lɛ Óndú ā. Ocu kú nū gē he Óndú ā ɔtú. Mɛ́mla ɛya kú īkpɔ́dɛ̄hɔ̄ klla mɛ́mla ɛya kú ejé. É klla géē je opī gwɛ́ɛya kú íneōbīya.

²⁵Ɔ̄cogwɛ́ɛya ā géē gwɛ́ɛya kú o je yɛ́hi kú íne nēé bīya ā, lɛ Óndú ā kwɛ́yí odúúdu ójila kú ācɛ Ísrɛ̄lu ā. É kē í je yá uwā ɛhi, ohígbū ka é jégēdē nyíleyī ŋ́. É kē lɛ ɔdā ɛ̄gbā kú ɛya kú íne nēé bīya ā bī wā gé lɛ Óndú ā ɛɛ́.

²⁶Óndú ā kē í je obɔ̄bí nɛ̄ ójila kú Ísrɛ̄lu mɛ́mla aéwɔhá nēe lā ipú uwā yá ā yá uwā ɛhi. Ohígbū ka odúúdu ācɛ nēe nyíleyī ā bīya íne nyā á.

²⁷Ɔ́dāŋ ka ɔ̄cɛ ékpónú í jégēdē ŋ le íne bīya, ó géē je ɔnyā ɛwū kú iháyí éyi gwɛ́ɛya kú íne nɛ̄ ó bīya ā.

²⁸Ɔ̄cogwɛ́ɛya ā géē gwɛ́ɛya kú iyē ō gwu mɛ́mla ákú o je yɛ́ɛhi kú íne ō bīya ɛyí ede, cɛ́ɛ́ é kwú íne nɛ̄ ó bīya ú yá ɔ̄ ɛhi.

²⁹Íne ékpónú ā yɔ̄ lɛ odúúdú ācɛ nēé jégēdē ŋ́ le íne bīya á. É kōō wɛ ācɛ ɔlɛ́ Ísrɛ̄lu, ámāŋ ka éwɔhá nōo lā ipú ācɛ Ísrɛ̄lu.

³⁰Amáŋ, ɔ̄cɛ dúúmā nōo jégēdē lɛ íne bīya, ó kōō wɛ ɔ̄cɛ-ɔlɛ́ ámāŋ éwɔhá, ɔ̄cɛ ɔ́ɔmā lɛ eyī gwō Óndú ā bónū, é géē je ɔ̄cɛ ā ŋmó,

³¹ohígbū ka ɔ̄cɛ ɔ́ɔmā tá ɔdā nɛ̄ Óndú ā ka ā. Ó klla jégēdē le íne kú Óndú ā bīya. Ikwū kú nū ce ɔ́ ɛyí.

³²Eko nɛ̄ ācɛ kú Ísrɛ̄lu bá ipú ígbíli ɛ́ɛ́ mā, ɔ̄cɛ éyi yɔ̄ gē cē ɛfú ɛ̄cī Usábāti.

³³É le ɔ́ bī gé lɛ Umósīsi mɛ́mla Árɔ̄ni, mɛ́mla ójila kú ācɛ Ísrɛ̄lu ā.

³⁴É kwú ɔ̄cɛ ɔ́ɔmā ú tá agbá, ohígbū ka é jé ɔdā nēé géē yá ɔ̄ ā ŋ́.

³⁵Anɔ́ɔ Óndú ā da Umósīsi kahíníī, “Odúúdú ójīla kú ācɛ Ísrɛ̄lu a géē bī ɔ̄cɛ ā ga eyɛ̄ɛcɛ kú ipu ɔlɛ́ ā, cɛ́ɛ́ é lɛ ɔ́ ŋmó.”

³⁶Anɔ́ɔ ójīla kú ācɛ Ísrɛ̄lu ā le ɔ̄cɛ ā bī gɛɛcɛ ŋmá ipú ɔlɛ́ ā, anɔ́ɔ é le ɛcɔ̄ tá klá anú le ɔ́ ŋmó ɛ́gɛ́nɛ̄ Óndú ā ka lɛ ā.

³⁷Óndú ā da Umósīsi kahíníí,

³⁸“Le ka lɛ ācɛ kú Ísrɛ̄lu kéē lɛ owú tígbígbili cɛ́ɛ́ é lɛ ɔ́ŋgbá kú oblú flá tū éyééye kú nū playi okónōgwu kú úwé kú uwā. É géē yɔ̄ ī yá ɛ̄nyā piyóó ipú ɛcɛ nyā

³⁹Owú tígbígbili nya géē yɔ i blatū aá eko dóódu. Eko dúúmā nɛ̄ aá lɛ ɔ́ má, aá géē blatū odúúdu íne kú um klla í lɛyítáajɛ lɛ̄ ɔ́. Aá klla gáā cīgbīhi ŋmá ɔwɛ kú um, ga ī yá ɔdā nōo he aá ɔtū ɛ́ɛ́ gɛ ŋ́.

⁴⁰Owú ō tígbígbili nyā géē tá aá ɛlá kwu odúúdu íne kú um. Aá í wɛ ákú um dúúdú.

⁴¹Ami wɛ Óndú ā, Ɔwɔicō kú aá á. N bī aá bɛ̄cɛ ŋmá Íjīpiti ká n̄ wɛ Ɔwɔicō kú aá. Ami wɛ Óndú á.”