Read idoma ÁLUKA 16 Bible Online

ÁLUKA 16 - idoma bible

ÁLUKA 16

¹Ukóra, ɔyí kú Ísar, ɔyí kú Ukɔ́hāti, ɔyí kú Ulífāyi, mɛ́mla Udátan mɛ́mla Abíram, ayí kú Ɛlíyābu, ɔyí kú Upélɛ̄ti, ayí kú Urúbɛ̄n, mɛ́mla anyākwɔ́cɛ kú Ísrɛ̄lu, ofigwɛ́ɛpa ce igwó (250).

²lɛ ācɛ kpó, anɔ́ɔ é cāŋjɛ lɛyíkwu Umósīsi.

³É lɛ iyī uwā túbá lɛyíkwu Umósīsi mɛ́mla Árɔ̄ni. Anɔ́ɔ é kahíníī, “Aá le yá fíyɛ́ abɔ̄. Odúúdú ójīla kú ācɛ kú Ísrɛ̄lu ā wɛ ákú Óndú. Óndú ā yɔ̄ mla éyééye kú alɔ, ɔdíyá nɛ̄ aá gē je iyī aá gicō fíyɛ́ ācɛ ohile kú ójila kú Óndú ā?”

⁴Eko nɛ̄ Umósīsi le ɛ̄nyā pó ā, ó leyī pīya klá ajɛ le ɔkɔ gbā.

⁵Anɔ́ɔ ó da Ukɔ́ra mɛ́mla ígwu kú nū ā kahíníī, “Ɔ̄cɔ̄ɔ̄cī óócí, Óndú ā géē mafú ɔ̄cɛ nōo wɛ ákú nū ā lɛ alɔ. Ó kē í cɛ̄ lɛ ɔ̄cɛ nōo wɛ ákú nū ā, nɛ̄ ó kē fu ā, kóō túblá anú.

⁶Óócí, awɔ, Ukɔ́ra mɛ́mla aígwu kú uwɔ kóō kwu ákánjɔ̄ ú.

⁷Cɛ́ɛ́ aá lɛ ahɔ̄lá fú tū ɔ̄, ká aá lɛ ɔtulalī tū ɔ̄, cɛ́ɛ́ aá kwú ɔ́ ú ga ɛyí ede. Alɔ géē má ɔ̄cɛ nōo tīihɔ ā eko ɔ́ɔmā. Aá le yá fíyɛ́ abɔ̄, ayí kú Ulífāyi.”

⁸Anɔ́ɔ Umósīsi da Ukɔ́ra kahíníī, “Aá pó, ayí kú Ulífāyi.

⁹Aá gbɛlá ka ó wɛ ɔdā nɛ̄ŋcɛ́ ka, Óndú ā kóō lɛ á fu ŋmá ipú ójila kú ācɛ Ísrɛ̄lu, cɛ́ɛ́ kú aá wā ɛgiyí nū ajaajɛ, kú aá yúklɔ́ lɛ ɔ́ ipú Áklɔ̄kpīihɔ kú nū, kú aá yúklɔ́ lɛ ācɛ kú Ísrɛ̄lu ā nɛɛ?

¹⁰Óndú ā lɛ ojīlīmā nyā je lɛ aá mɛ́mla ayí kú Ulífāyi o hile ā, abālɔbányā ɛga kú ɔcogwɛ́ɛya ā, nɛ̄ aá gē dɔɔ̄kā mɛ́ɛ̄ á.

¹¹Ohígbū ɔ́ɔmā ā, Óndú ā nɛ̄ awɔ mɛ́mla ígwu kú uwɔ túbá yɔ̄ ī bɛ́yíkwu ɔ́ á, ó wɛ ɔ́ɔmā gɛ ŋ́, ɔnyɛ wɛ Árɔ̄ni ɛ́ɛ́ nɛ̄ aá gē ka iŋini tú ɔ̄ ā?”

¹²Umósīsi lɛ ɛhɔ̄ tū gaá le Udátan mɛ́mla Abíram hīīgwú klla lɛ ayí kú Ɛlíyābu hīīgwú, amáŋ é kahíníī, “Alɔ í gáā wā ŋ́.

¹³Ó wɛ ɔdā nɛ̄ŋcɛ́ nɛɛ mɛ́ ŋ́, nēé kpó alɔ bɛ̄cɛ ŋmá ajɛ kú Íjīpiti nōo gbo alɔ iyē nɛɛ, ɛga nɛ̄ ɔdōlé kpɔ nɛ̄ɛ̄nɛ̄hi, cɛ́ɛ́ kú ā kpó alɔ ŋmó ipú ígbíli amānyā nɛɛ? A klla lɛ iyī uwɔ yá ɔcɛ́ kú alɔ.

¹⁴Ofíyɛ́ dúú ā, a le alɔ bī wā ajɛ nɛ̄ ó lɔhi gbo alɔ iyē nɛɛ nɛ̄ ɔdōlé í yɔ̄ ŋ́. Á klla je ajɛ kú úgwū mɛ́mla ajɛ kú ɛhɔ̄ mɛ́mla ajɛ ɛhɔ̄ kú ɔcí ufáyin lɛ alɔ ŋ́. A kē gbɔɔ́ ō plla alɔ ɛɛ ɛ́ alɔ í wā ŋ́.”

¹⁵Umósīsi le cɔ̄nū nɛ̄hi, anɔ́ɔ ó da Óndú ā ka, ā híī mīyɛ ɔdā ɛ̄gbā nɛ̄ ācɛ nēe bá nyā bī wā ā ŋ́. Ń yá ɔ̄cɛ dóódu kú uwā ɔdōbɔ̄bí ɛ́ɛ́ nɛ̄ n ge mīyɛ ijakī kú ɔ̄cɛ dúúmā kú uwā ŋ́.”

¹⁶Anɔ́ɔ Umósīsi da Ukɔ́ra kahíníī, “Awɔ mɛ́mla aígwu kú uwɔ, mɛ́mla Árɔ̄ni, aá gā iyɔ̄bū kú Óndú ā óócí ipú Áklɔ̄kpīihɔ ā.

¹⁷Ɔnyɔɔnyɛ kú aá géē bī ákánjɔ̄ kú nū, lɛ ahɔ̄lá fú tū ɔ̄, lɛ umu kú ɔtulalī tū ɔ̄, cɛ́ɛ́ kú aá kwú ɔ̄ ú ce ɛyí ede, Árɔ̄ni wɛ dúú.

¹⁸Anɔ́ɔ ɔnyɔnyɛ kú ācɛ ofu igwɛ́ɛpa ce igwó ā, kwú ákánjɔ̄ kú uwā ú kpó, le ahɔ̄lá fú tū ɔ̄, le ɔtulalī tū ɔ̄. Anɔ́ɔ é gaá māháyi okómpīinu kú Áklɔ̄kpīihɔ ā mɛ́mla Umósīsi mɛ́mla Árɔ̄ni.

¹⁹Anɔ́ɔ Ukɔ́ra lɛ odúúdu ójila kú ācɛ ā túbá háyi lɛ eyī pīya kwu Umósīsi mɛ́mla Árɔ̄ni okómpinu kú Áklɔ̄kpīihɔ ā. Anɔ́ɔ igbeékpónú ɛgahi kú Óndú ā le hɛ́bɛ̄cɛ ɛgiyí ójila kú ācɛ ā.

²⁰Anɔ́ɔ Óndú ā da Umósīsi mɛ́mla Árɔ̄ni ka,

²¹“Áa háyi ɛga ɛyɛ́ ɛyɛ́ɛ́yí yí hɛ̄ ācɛ ā tá, cɛ́ɛ́ kú n̄ kwú uwā ú kpó yíífi fíyaa.”

²²Anɔ́ɔ Umósīsi mɛ́mla Árɔ̄ni le ɔkɔ gbā lɛ eyī pīya klá ajɛ kahíníī, “Ɔwɔicō, awɔ nōo lɛ ɛjɛ̄ɛ̄jī oyēēyī ā, ɔ́dāŋ ka ɔ̄cɛ ékpónú le íne kú uwɔ bīya, a gē cɔ̄nū mla odúúdú ójīla kú ācɛ kú Ísrɛ̄lu nɛɛ?

²³Anɔ́ɔ Óndú ā da Umósīsi kahíníī,

²⁴“Lɛ ka lɛ ācɛ Ísrɛ̄lu ā kéē nyɛ̄ɛ̄ ŋmá ɛga nɛ̄ Ukɔ́ra, Udátan mla Abíram lā ā.”

²⁵Anɔ́ɔ Umósīsi mɛ́mla anyākwɔ́cɛ kú Ísrɛ̄lu ā le tá ɛgiyí Udátan mɛ́mla Abíram.

²⁶Anɔ́ɔ o da ójīla kú ācɛ Ísrɛ̄lu a kahíníī, “Aá nyɛ̄ɛ̄ ŋmá ɛgiyí ɔlɛ́ kú ācobɔ̄bíipú nyā, aá kóō híī lɛ abɔ̄ kwu ɔda dúúmā kú uwā ŋ́, ohígbū nēé géē kpó aá yíífi bónū mla ācɛ obɔ̄bí nyā.

²⁷Anɔ́ɔ ācɛ ā nyɛ̄ɛ̄ ŋmá ɛga nɛ̄ Ukɔ́ra, Udátan mɛ́mla Abíram lā ā. Anɔ́ɔ uwá ɛtɛ́trɛ́ɛtá ā gaá háyi okómpīinu kú ɔlɛ́ uwā mɛ́mla anyā ɔlɛ́ uwā mɛ́mla ayí uwā, mɛ́mla ayí olugwulugwu kú ɔlɛ́ uwā ā.

²⁸Anɔ́ɔ Umósīsi da uwá kahíníī, “Abālɔbányā, aá géē jé ka Óndú ā tū um ɛhɔ̄ wā í yúklɔ́ nɛ̄ n gē yá ā á, ka ń yá ɔdā dúúmā abɔ̄yī um ŋ́.

²⁹Ɔ́dāŋ ka ācɛ nēe bá nyā gekwú ɛ́gɛ́nɛ̄ ācɛ ɔhá gē kwú, nɛ̄ ó wɛ ɔdā dóódu ŋmá ɛgiyí Óndú ā wā í kpó uwā ŋmó ohígbū íne ō bīya kú ūwā ŋ́, ayíka ó wɛ Óndú tū um ɛhɔ̄ ā ŋ́.

³⁰Amáŋ, ɔ́dāŋ ka Óndú ā lɛ ɔdā nɛ̄ ó yá jééjē ŋ́ yá, nɛ̄ ajɛ lɛ okónu nwūla kwú ācɛ ā ú mulɛ mla ɔdā dóódu nēé lɛ ā, nēé lɛ tá ɔlékwū oyēeyī, cɛ́ɛ́ aá géē jé ka ācɛ nēe bá nyā tá Óndú ā, klla leyī gwō ɔ̄ bónū.”

³¹Ikpííkpó nɛ̄ Umósīsi le ɛlā ka mɛ ā, ajɛ ɛga nēé háyi ā kwú hɛ́ ɛpa kɔ.

³²Anɔ́ɔ ajɛ lɛ okónu nwūla kwú uwā ú kpó mulɛ mɛ́mla ɔdā dóódu nēé lɛ ā.

³³Uwá mɛ́mla ɔdā dóódu nēé lɛ ā, le pɛ́ ga ɔlékwū oyēeyī. Anɔ́ɔ ajɛ ā kwú okónu ú klá tū uwā kpim á. É kwú kpó yíífi ŋmá ipú ójila kú ācɛ Ísrɛ̄lu ā.

³⁴Eko nēé bá ī dɛ̄gba ā, ācɛ kú Ísrɛ̄lu o hile ā gbɔɔ́ ō kwu, kú ajɛ ā kóō je uwá mulɛ mla ācɛ ā ŋ́.

³⁵Ɔlá ŋmá ɛgiyí Óndú ā gaá kwú ācɛ ofu igwɛ́ɛpa ce igwó ɔhá (255) o hile nēe bá ī yi ɔtulalī ɔlá ipú ákánjɔ̄ lɛ Óndú ā í yi ŋmá ajɛ.

³⁶Óndú ā da Umósīsi kahíníī,

³⁷“Lɛ ka lɛ Ɛlísa, ɔyí kú Árɔ̄ni ā, kóō kwú ákánjɔ̄ kú oje udɔ o fɔ́ɔ́lá ā ú ŋmá ɛgiyí okwū kú ācɛ nɛ̄ ɔlá je yi ā, kóō lɛ ahā kú ɔlá ā pīya klá ɛga ɔhá ohígbū ka ákánjɔ̄ kú oje udɔ ā tīihɔ.

³⁸É kwú ɔ̄ ú tīihɔ ŋmá eko nēé bī ɔ̄ wā ɛyí ede kú Óndú ā. Lɛ ákánjɔ̄ ō fɔ́ɔ́lá kú ācɛ nēe kwú ohígbū íne nēé bīya ā kpó, cɛ́ɛ́ kú kwú ɔ̄ ú na oje oplákátá ō bī le klá ɛyí ede ā. Kóō wɛ ahɔ̄ ō pi lɛ ācɛ kú Ísrɛ̄lu.

³⁹Anɔ́ɔ Ɛlísa, ɔ̄cogwɛ́ɛya ā kwú ákánjɔ̄ kú oje udɔ ú lɛ ɔ́ na kwú ɔ̄ ú pīya ɔdā ō lɛ klá ɛyí ede ā.

⁴⁰Ɛ̄nyā wɛ ahɔ̄ nēé pi ācɛ kú Ísrɛ̄lu ka, ɔ̄cɛ dúúmā nɛ̄ ó wɛ ipɔ́ɔma kú Árɔ̄ni ā ŋ́, í gáā wā ɛyí ede í yi umu kú ɔtulalī ɔlá lɛ Óndú ā ŋ́. Ohígbū nēé géē je yíífi bɛ̄ɛka, Ukɔ́ra mɛ́mla ācɛ ígwu kú nū ā. Ɛlísa lɛ odúúdu ɔdā nyā kpó yá ɛ́gɛ́nɛ̄ Óndú ā je íne lɛ ɔ́ bū okónu kú Umósīsi lɛ ā.”

⁴¹Oŋmɔ́ɔ̄cī nū ā, ācɛ kú Ísrɛ̄lu le iŋini ka tú Umósīsi mɛ́mla Árɔ̄ni kahíníī, “Aá le ācɛ kú Óndú ā kpó ŋmó ɛɛ́.”

⁴²Eko nɛ̄ ācɛ ā jīla bɛ́yí kwu Umósīsi mɛ́mla Árɔ̄ni ā, é le pɛ́ ga ɛgiyí Áklɔ̄kpīihɔ ā. Anɔ́ɔ é má ɛgahi kú Óndú ā le hɛ́bɛ̄cɛ ipú ojuja ā klá Áklɔ̄kpīihɔ ā.

⁴³Anɔ́ɔ Umósīsi mɛ́mla Árɔ̄ni gā iyɔ̄bū kú Áklɔ̄kpīihɔ ā.

⁴⁴Anɔ́ɔ Óndú ā da Umósīsi kahíníī,

⁴⁵“Aá nyɛ̄ɛ̄ ŋmá ɛgiyí ācɛ ā, cɛ́ɛ́ kú n̄ kwú uwā ú kpó yíífi fíyaa.” Anɔ́ɔ é kwú eyī ú pīya klá ajɛ gbɔɔ́ ō gbɔ̄ɔkɔ.

⁴⁶Anɔ́ɔ Umósīsi da Árɔ̄ni ka, kwú ákánjɔ̄ ofɔ́ɔ́lá kú uwɔ ú, cɛ́ɛ́ a lɛ ahɔ̄lá fú tā ɔ̄ ŋmá ɛyí ede, kú ā lɛ umu kú ɔtulalī fú tū ɔ̄, kú ā ga ɛgiyí ācɛ ā fíyaa kú ā lɛ ɛya kú iyē ō gwu gwó kwɛyí uwā, ohígbū ka ícɔ̄nū kú Óndú ā ga ɛɛ́, ōcē obɔ̄bí kē gáā bɛ̄cɛ dúú ɛɛ́.”

⁴⁷Anɔ́ɔ Árɔ̄ni le yá fíyaa ɛ́gɛ́nɛ̄ Umósīsi ka ā. Anɔ́ɔ ó le inya kwu ga ipú ójila kú ācɛ Ísrɛ̄lu ā, ó má ōcē obɔ̄bí le bɛ̄cɛ ɛga nɛ̄ ācɛ ā bá ā ɛɛ́, anɔ́ɔ ó lɛ umu kú ɔtulalī fú tū ɔlá. Anɔ́ɔ ó le ɛya gwó kwɛyí ācɛ ā.

⁴⁸Anɔ́ɔ ó má háyi ɔtāhɛ kú ācɛ nēe pɛ́kwú ā mɛ́mla ācɛ nōo yēeyī ā, anɔ́ɔ ōcē obɔ̄bí ā mɛ á.

⁴⁹Ācɛ nēe kwú ipú ōcē obɔ̄bí nyā, mɛ́mla ācɛ nēe kwú eko kú Ukɔ́ra ā í wɛ áluka kú uwā ɛ́ɛ́ ŋ́ mā, wɛ ulá ofu ce igwɛ́ɛhɔ̄ ce úlā éyi ce ofu igwɛ́ɛhɔ̄ (14,700).

⁵⁰Árɔ̄ni pīyɛyí wā ɛgiyí Umósīsi Okómpíinu kú Áklɔ̄kpīihɔ ā eko nɛ̄ ōcē obɔ̄bí ā mɛ ā.