Read idoma ÁLUKA 17 Bible Online

ÁLUKA 17 - idoma bible

ÁLUKA 17

¹Óndú ā da Umósīsi kahíníī,

²“Lɛ ka lɛ ācɛ kú Ísrɛ̄lu kéē lɛ okwutɛ igwɛ́ɛpa kpó gā uwɔ. Éyi kóō ŋmá ɛgiyí otrɛ̄yí kú ipɔ́ɔma dóódu. Lɛ iyē kú ɔnyɔɔnyɛ tá tū okwutɛ ā.

³Lɛ iyē kú Árɔ̄ni tá tū okwutɛ kú ipɔ́ɔma kú Ulífāyi. Ohígbū ka okwutɛ éyi géē ŋmá ipɔ́ɔma dóódu.

⁴Kwú uwā ú kpó ga ipú Áklɔ̄kpīihɔ ā gaá bá iyɔ̄bū kú ikpati ɛka, ɛga nɛ̄ n géē jīla mla awɔ ā.

⁵Okwutɛ kú ɔ̄cɛ nɛ̄ n je ā, géē lū blɔblɔ. Ɔwɛ nyā, n géē bī iŋini nɛ̄ ācɛ kú Ísrɛ̄lu hímáyi ka tú uwɔ ā wā oŋmɛ́yí.

⁶Anɔ́ɔ Umósīsi le ɛlā ka lɛ ācɛ kú Ísrɛ̄lu, anɔ́ɔ ɔnyɔɔnyɛ kú uwā le okwutɛ bī gé lɛ ɔ́, kwɛyí ipɔ́ɔma kú ɔlɛ́ uwā. Okwutɛ ā wɛ igwɛ́ɛpa. Okwutɛ kú Árɔ̄ni yɔ̄ ipú uwā dúú.

⁷Anɔ́ɔ Árɔ̄ni kwú okwutɛ ā ú kpó bá ipú Áklɔ̄kpīihɔ ā iyɔ̄bu kú Ikpati kú okónu ō ce ā.”

⁸Oŋmó ɔ̄cī nū, eko nɛ̄ Umósīsi le tá ipú Áklɔ̄kpīihɔ ā, ó má ka okwutɛ kú Árɔ̄ni, nōo kwɛyí kú ipɔ́ɔma kú Ulífāyi ā le lū, le ēpū lɛ, le híkpɔ́ɔcí, le ododó lɛ. Ó klla le īkpō kú ɔcí nēé hī ka álimɔ̄ndu gwá le pīya

⁹Umósīsi kwú odúúdu okwutɛ ā ú kpó mafú lɛ ācɛ kú Ísrɛ̄lu ā, é le ɔdā nōo yá ā má, anɔ́ɔ ɔnyɔɔnyɛ kwu okwutɛ kú nū ú ga ɔlɛ́ nū á.

¹⁰Óndú ā da Umósīsi kahíníī, “Kwú okwutɛ kú Árɔ̄ni ú cīgbīhi ga iyɔ̄bu kú Ikpati kú Ɛka kú Óndú ā. Ó géē yɔ̄ abɔ́ɔ kóō wɛ ahɔ̄ ō pi lɛ ācɛ kú Ísrɛ̄lu. Ācɛ o yíikpɛ̄yí olɔfú ā géē kwú ɔ́dāŋ ka é mā iŋini ō ka ā tá ŋ́.”

¹¹Umósīsi le yá ɛ́gɛ́nɛ̄ Óndú ā ka lɛ ā.

¹²Anɔ́ɔ ācɛ kú Ísrɛ̄lu ā da Umósīsi kahíníī, “Ayíka oŋmɛ́yí kú odúúdu alɔ yɔ̄ mɛ́ɛ̄ á.

¹³Ɔcɛ dúúmā kú alɔ nōo le túblla Áklɔ̄kpīihɔ ā géē kwú. Ayíka odúúdú alɔ géē je kpó yíífi mɛ́ɛ̄ á ŋ́?”