Read idoma ÁLUKA 2 Bible Online

ÁLUKA 2 - idoma bible

ÁLUKA 2

¹Óndú ā da Umósīsi mɛ́mla Árɔ̄ni kahíníī,

²“Eko dóódu nɛ̄ ācɛ kú Ísrɛ̄lu gaá lā ɛga dúúmā, ɔnyɔɔnyɛ géē lā ipɔ́ɔma kú ɔlɛ́ nū, ɛháajɛ otúta kú ipɔ́ɔma kú ɔlɛ́ nū. É kē í pīyeyīkwu Áklɔ̄kpīihɔ ŋmá ɛga dóódu nēé í lā ā.”

³Ācɛ nēe géē lā ɛnɔ̄ɔ̄cī kú Áklɔ̄kpīihɔ ā wɛ ipɔ́ɔma kú Ujúda. Otrɛ̄yí kú ipɔ́ɔma ā kē wɛ Unássɔn, ɔyí kú Ammínādabu.

⁴Ɛwa kú uwā wɛ ācɛ úlā ofu ahātá ce úlā ɛhīlī ce ofigwo (74,600).

⁵Ācɛ nēe í lā gboce uwá ā wɛ ipɔ́ɔma kú Íssāka. Otrɛ̄yí kú ipɔ́ɔma ā wɛ Unatánīyɛlu, ɔyí kú Usúwa.

⁶Ɛwa kú uwā wɛ úlā ofɛhīlī ce úlā ɛhīlī (54,400).

⁷Ācɛ nēe géē lā gboce ipɔ́ɔma nyā ā wɛ ipɔ́ɔma kú Usɛ́būlɔn. Otrɛ̄yí kú ipɔ́ɔma nyā wɛ Ɛlíyābu, ɔyí kú Uhɛ́lɔn.

⁸Ɛwa kú uwā kē wɛ úlā ofu ahāapa ce úlā ɛtá ce ofigwó (57,400).

⁹Odúúdú áluka kú ígwu kú ipɔ́ɔma kú Ujúda ā wɛ úlā bá ɛga úlā ce úlā ofɛɛtá ce úlā ɛhīlī (186,400). Aɛ́nyā wɛ ācɛ nēe gbɔbū á.

¹⁰Ācɛ nēe í lā abɔ̄ ɛháajɛ kú Áklɔ̄kpīihɔ ā wɛ ipɔ́ɔma kú Urúbɛ̄n. Otrɛ̄yí kú ipɔ́ɔma ɔ́ɔmā wɛ Ɛlísu, ɔyí kú Ussidíyu.

¹¹Ɛwa kú uwā wɛ úlā ofɛhɔ̄ ce úlā igwɛ́ɛhīlī ce ofɛhɔ̄ (46,500).

¹²Ācɛ nēe í lā gboce uwá ā wɛ ipɔ́ɔma kú Usímīyɔni, Otrɛ̄yí kú ipɔ́ɔma ā wɛ Usselúmīyɛlu, ɔyí kú Usúríssadāyi.

¹³Ɛwa kú uwā wɛ úlā ofu ahāapa ce úlā ahātá ce ofɛhɔ̄ (59,300).

¹⁴Ācɛ ɔhá nēe í lā gboce ipɔ́ɔma nyā ā wɛ ipɔ́ɔma kú Ugádi. Otrɛ̄yí kú uwā wɛ Ɛlíyāsafu, ɔyí kú Uréwɛ̄lu.

¹⁵Ɛwa kú uwā wɛ úlā ofɛhɔ̄ ce úlā ɛnɛ ce ofɛpa ce igwó (45,650).

¹⁶Odúúdú áluka kú ígwu kú ipɔ́ɔma kú Urúbɛ̄n ā wɛ úlā ofu igwáahātá ce igwáahāapa ce ofigwɛ́ɛpa ce igwo (151,450). É géē kwáajɛ gboce ipɔ́ɔma kú Urúbɛ̄n ā.

¹⁷Ayí kú Ulífāyi géē bī Aklɔ̄kpīihɔ-nɛ̄hi ā bá ī yɛ ɔtāhɛ̄ ígwu ɛpa kú aflɛ́yí ā mɛ́mla ígwu ɔ́mpa ā. Ígwu éyééye géē yɛ ɔwɛ ékpónú ɔ́ɔmā dúú ɛháajɛ otúta kú ipɔ́ɔma kú uwā.

¹⁸Ācɛ nēe í lā abɔ̄ ɛnɔ̄ɔ̄nɛ̄ kú Áklɔ̄kpīihɔ ā wɛ ipɔ́ɔma kú Ɛ́frem. Otrɛ̄yí kú ipɔ́ɔma nyā wɛ Ɛlíssāma, ɔyí kú Ammíhūdu.

¹⁹Ɛwa kú uwā wɛ úlā ofɛhɔ̄ ce úlā ce ofɛhɔ̄ (40,500).

²⁰Ācɛ nēe í lā gboce uwá ā wɛ ipɔ́ɔma kú Umanásɛ. Otrɛ̄yí kú ipɔ́ɔma ā wɛ Ugamálīyɛ̄lu, ɔyí kú Upɛdásɔ.

²¹Ɛwa kú uwā wɛ úlā ofɛnɛ ce ofigwó (32,200).

²²Ipɔ́ɔma ɔhá nōo í lā gboce ipɔ́ɔma nyā wɛ ipɔ́ɔma kú Ubɛ́njamīn, otrɛ̄yí kú ipɔ́ɔma ā wɛ Abídan, ɔyí kú Ugídiyɔn.

²³Ɛwa kú uwā wɛ úlā ofɛɛnɛ ce úlā ahāapa ce ofigwo (35,400).

²⁴Odúúdú ɛwa kú ígwu kú ipɔ́ɔma kú Ɛ́frēm ā wɛ úlā ofigwɛ́ɛtá ce úlā igwó ce ofigwo (108,100). É géē wɛ ígwu ɔ́mɛɛtá nēe bɛ̄cɛ ā.

²⁵Ācɛ nēe í lā ābɔ̄ ɛhíícō kú Áklɔ̄kpīihɔ ā wɛ ipɔ́ɔma kú Udán. Otrɛ̄yí kú ipɔ́ɔma ā wɛ Ahíyēsa, ɔyí kú Ammíssādayi.

²⁶Ɛwa kú uwā wɛ úlā ofahāapa ce úlā igwɛ́ɛhīlī ce ofigwɛ́ɛhɔ̄ (62,700).

²⁷Ācɛ nēe lā gboce ipɔ́ɔma nyā ā wɛ ipɔ́ɔma kú Ássa. Otrɛ̄yí kú ipɔ́ɔma ā wɛ Upagíyɛ̄lu, ɔyí kú Ɔ́kran.

²⁸Ɛwa kú uwā wɛ úlā ofɛhɔ̄ ce úlā ɛtá ce ofigwɛ́ɛhɔ̄ (41,500).

²⁹Ipɔ́ɔma ɔhá nēe lā gboce ipɔ́ɔma nyā ā wɛ ipɔ́ɔma kú Unáfutāli. Otrɛ̄yí kú ipɔ́ɔma ā wɛ Ahíra, ɔyí kú Ɛ́nan.

³⁰Ɛwa kú ipɔ́ɔma ā wɛ úlā ofɛɛhīlī ce úlā ɛtá ce ofigwó (53,400).

³¹Odúúdú ɛwa kú ígwu kú ipɔ́ɔma kú Udán ā wɛ úlā ofigwáahāanɛ ce úlā igwɛ́ɛtá ce ofigáahātá (157,600).

³²Odúúdú ɛwa kú aípɔ́ɔma kú Ísrɛ̄lu nēé tá iyē kú uwā klla gbo uwá áluka ígwíígwu ā wɛ úlā bá ɛga úlā ɛtá, ce úlā ofu cɛɛtá ce ofigwáahāapa ce igwó (603,550).

³³Amáŋ, é gba ācɛ kú Ulífāyi áluka tū ācɛ kú Ísrɛ̄lu ā ŋ́, ɛ́gɛ́nɛ̄ Óndú ā je ɔ́da lɛ Umósīsi lɛ ā.

³⁴Anɔ́ɔ ācɛ kú Ísrɛ̄lu le yá ɛ́gɛ́nɛ̄ Óndú ā ka lɛ uwá bū okónu kú Umósīsi ā. Ɔnyɔɔnyɛ lā ipɔ́ɔma mɛ́mla ígwu kú ipɔ́ɔma kú ɔlɛ́ nū. É kē yɛ ɛ́gɛ́nɛ̄ ipɔ́ɔma kú uwā lɛ ā.