Read idoma ÁLUKA 20 Bible Online

ÁLUKA 20 - idoma bible

ÁLUKA 20

¹Ipú ɔyā kú aflɛ́yí ā, odúúdú ójila kú Ísrɛ̄lu ā le pɛ́ wā ipú ígbíli kú Usín, gaá lā Ukádɛssi. Abɔ́ɔ ā, Umíriyam gekwú, é lɛ ɔ́ nyi.

²Éŋkpɔ̄ í yɔ̄ ɛga nēé lā ā ŋ́, anɔ́ɔ ācɛ ā le túbá, le ɛyí bú kwu Umósīsi mɛ́mla Árɔ̄ni.

³É ka iŋini tū Umósīsi kahíníī, “Ó géē yɛ í lɔhi lɛ alɔ fíyɛ́, ɔ́dāŋ ka alɔ le pɛ́ gekwú mla ācɛ Ísrɛ̄lu, ɔ́mpa alɔ ā, okómpíinu kú Áklɔ̄kpīihɔ ā.

⁴Ɔdíyá nāa kpó alɔ wā ígbíli nyā, ká alɔ mɛ́mla aɛ́bɛ́ kú ɔlɛ́ kú ālɔ ká ālɔ̄ le lɛ pɛ́kwú ā?

⁵Ɔdíyá nāa kōō kpó alɔ bɛ̄cɛ ŋmá Íjīpiti wā ajɛ obɔ̄bi nyā, nɛ̄ ɔdɛ̄hɔ̄ dúúmā í gáā jɛ anú glá ŋ́ mā ā? Amānyā í wɛ ajɛ nōo lɔfú yá īkpɔ̄dɛ̄hɔ̄ glá ŋ́, ɔcí ufáyin, ámāŋ ka upomégrenēetí í yɔ̄ amānyā ŋ́, ɛ́ɛ́ nɛ̄ éŋkpɔ̄ nɛ̄ ɔ̄cɛ í gwá kōō ī yɔ̄ ŋ́.”

⁶Umósīsi mɛ́mla Árɔ̄ni nyɛ̄ɛ̄ ŋmá ɛgiyí ācɛ ā, le tá okómpíinu kú Áklɔ̄kpīihɔ ā gaá le eyī pīya klá ajɛ. Anɔ́ɔ ɛgahi kú Óndú ā gaá klá iyɔ̄bū uwā.

⁷Óndú ā da Umósīsi kahíníī,

⁸“Kwú okwutɛ nōo bayi iyɔ̄bū Ikpati kú Ɛka kú Óndú ā ú, cɛ́ɛ́ ká awɔ mɛ́mla Árɔ̄ni kú aá lɛ odúúdu ójila kú ācɛ kú Ísrɛ̄lu ā túbá. Cɛ́ɛ́ ka ikpēyī kú odúúdu uwā kóō má ɔ̄ abɔ́ɔ. Cɛ́ɛ́ kú ā lɛ ɛlā ka lɛ ɛcɔ̄, éŋkpɔ̄ í bɛ̄cɛ ŋmá ipú nū. Ɔwɛ nyā nāa géē bī éŋkpɔ̄ ŋmá ipú ɛcɔ̄ wɛ̄ɛcɛ lɛ ācɛ ā ká uwá mɛ́mla aɛ́bɛ́ ká ɔlɛ́ uwā kéē gwá á.

⁹Umósīsi nyɔ̄ í kwú okwutɛ ā ú, ɛ́gɛ́nɛ̄ Óndú ā ka lɛ ā.

¹⁰Umósīsi mɛ́mla Árɔ̄ni le odúúdu ójila kú ācɛ Ísrɛ̄lu ā túbá iyɔ̄bū ɛcɔ̄ ā. Anɔ́ɔ Umósīsi da uwá ka, “á jāhɔ̄, ācɛ o yíkpɛ̄yí olɔfú, alɔ í bī éŋkpɔ̄ wɛ̄ɛcɛ ŋmá ipú ɛcɔ̄ nyā lɛ aá nɛɛ?”

¹¹Anɔ́ɔ Umósīsi je okwutɛ ā gicɔ̄ lɛ ɔ́ fīyɛ̄ ɛcɔ̄ ā igbɛɛpa. Anɔ́ɔ ɔkpá ku éŋkpɔ̄ nɛ̄hi kwú yíla á. Anɔ́ɔ ācɛ mɛ́mla aɛ́bɛ́ kú ɔlɛ́ uwā gbɔɔ́ ō gwá á.”

¹²Amáŋ, Óndú ā le cɔ̄nū mla Umósīsi mɛ́mla Árɔ̄ni. Anɔ́ɔ ó kahíníī, “Abɔ̄ aá í kpɔ́tūce ɛlā kú um, cɛ́ɛ́ ká aá mafú ɔfú otīihɔ kú um fú iyɔ̄bū kú ācɛ kú Ísrɛ̄lu ŋ́ mā, aá í gáā kpó uwā ga ipú ajɛ nɛ̄ n cokónu ka n gē je lɛ uwá ā ɛ́ɛ́ gɛ ŋ́.

¹³Ɛ̄nyā wɛ éŋkpɔ̄ kú Umɛ́rība, ɛga nɛ̄ ācɛ kú Ísrɛ̄lu táafú mla Óndú ā, nɛ̄ ó ma iyī nū fú lɛ uwá ka anúɔ tīihɔ ā.”

¹⁴Umósīsi lɛ ācɛ tɛ̄hɔ̄ ŋmá Ukádɛssi fu ɔcɛ́ kú Ɛ́dɔm kahíníī, “Ɛhɔ̄ nyā ŋmá ɛgiyí aɔ́mápú aá, aipɔ́ɔma kú Ísrɛ̄lu, a jé ɛ́gɛ́nɛ̄ alɔ móōwē lɛ ā, mɛ́mla

¹⁵ɛ́gɛ́nɛ̄ aádáádā alɔ ga Íjīpiti klla lā iháyí alɛwa abɔ́ɔ ā. Ācɛ kú Íjīpiti yá uwā mɛ́mla alɔ ōwē.

¹⁶Alɔ le ikwū je klá Óndú ā kóō tá alɔ abɔ̄. Ó le ikwū nɛ̄ alɔ je ā pó, anɔ́ɔ ó le alelékwū-otɛ̄hɔ̄ kú nū tɛ̄hɔ̄, anú ó le alɔ kpó bɛ̄cɛ ŋmá abɔ́ɔ á. Abālɔbányā alɔ bá ígbíli kú Ukádɛssi, ɛga nōo yɔ̄ okónōgwu kú ajɛ ɔlɛ́ uwɔ ā.

¹⁷Kóócōō lɛ ɛga je lɛ alɔ kú ālɔ̄ le bū ajɛ kú ɔlɛ́ uwɔ. Alɔ mɛ́mla aɛ́bɛ́ kú alɔ í gáā nyā ŋmá ɔwɛ ga ipú ɛhɔ̄, ámāŋ ka ipɔ́lɛ́, ámāŋ ipácí kú aá ɛ́ɛ́ nɛ̄ alɔ gē gwá éŋkpɔ̄ kú aá ŋ́. Alɔ géē kwu ɔwɛ ā jāā gbéeko nɛ̄ alɔ nyɛ̄ɛ̄ ŋmá ajɛ kú ɔlɛ́ uwɔ ā.”

¹⁸Amáŋ, ɔcɛ́ kú Ɛdɔm tá ɔ̄ ohi kahíníī, “Alɔ í gáā cɛ̄ kú aá bū ipú ajɛ kú ɔlɛ́ alɔ ā ŋ́. Ɔ́dāŋ ka aá jé ɔ̄ má, alɔ géē bɛ̄cɛ í nuunu tá aá.”

¹⁹Ācɛ kú Ísrɛ̄lu kahíníī, “Alɔ géē bá ī yɛ ɔwɛ ā ōfōōfū nū, ɔ́dāŋ ka alɔ mɛ́mla aɛ́bɛ́ kú ɔlɛ́ alɔ le éŋkpɔ̄ kú aá gwá, alɔ géē cíla ulé nū. Alɔ dɔ̄ɔ̄kā ká alɔ yɛ ɔwɛ ā ōfōōfū nū.”

²⁰Amáŋ, ācɛ kú Ɛ́dɔm tóohi kahíníī, “Alɔ tá.” Anɔ́ɔ é bá ī nyɔ̄ mla aícɔ́ɔja kú uwa nɛ̄hi ā kéē í nuunu tá ācɛ kú Ísrɛ̄lu á.

²¹Abɔ̄ ācɛ kú Ɛ́dɔm í cɛ̄ lɛ ācɛ kú Ísrɛ̄lu bū ajɛ kú uwā ŋ́ mā, ācɛ kú Ísrɛ̄lu le pīyeyī, nyɔ̄ í le yɛ ɔwɛ ɔhá.

²²Odúúdú ójila kú Ísrɛ̄lu ā nyɛ̄ɛ̄ ŋmá Ukádɛssi. Anɔ́ɔ é gā ipú ígbíli, ɛyi ɛfu kú Uhɔ́ɔ,

²³ɛjī kú ajɛ kú Ɛ́dɔm ā. Abɔ́ɔ ā, Óndú ā da Umósīsi mɛ́mla Árɔ̄ni kahíníī,

²⁴“Árɔ̄ni í gáā ga ipú ajɛ nɛ̄ n cokónu ka n gē je lɛ ācɛ Ísrɛ̄lu ā ŋ́. Ó géē kwú. Ohígbū ka aá ɛpɛlɛ́ɛpa í lɛyitáajɛ lɛ ɛlā kú um Umɛ́rība ŋ́.

²⁵Kwú Árɔ̄ni mɛ́mla ɔyí nū, Ɛlísa ú ga ɛyí ɛfu kú Uhɔ́ɔ,

²⁶Abɔ́ɔ ā, lɛ awulú kú ɔ̄cogwɛ́ɛya kú Árɔ̄ni ā plla ŋmá ɔɔ́ iyē, cɛ́ɛ́ a kwú ɔ̄ ú klá Ɛlísa ɔyí nū iyē ohígbū ka Árɔ̄ni géē kwú abɔ́ɔ.”

²⁷Anɔ́ɔ Umósīsi le yá ɛ́gɛ́nɛ̄ Óndú ā ka lɛ ā. É le pɛ́ tá icō ɛfu kú Uhɔ́ɔ ā ipéeyī ójīla kú ācɛ Ísrɛ̄lu ā.

²⁸Anɔ́ɔ Umósīsi le awulú kú ɔ̄cogwɛ́ɛya kú Árɔ̄ni ā plla ŋmá ɔɔ́ iyē, anɔ́ɔ ó kwú ɔ̄ ú klla Ɛlísa, ɔyí nū iyē. Ɛyí ɛfu abɔ́ɔ ā, anɔ́ɔ Árɔ̄ni gekwú á. Umósīsi mɛ́mla Ɛlísa pīyɛyí wā ajɛ.

²⁹Eko nɛ̄ odúúdú ójīla kú ācɛ Ísrɛ̄lu ā le jé ka Árɔ̄ni ɔ́ɔ gekwú ā, odúúdu uwā le ekwu kú Árɔ̄ni yɔ̄ ɛ̄cī ofu cigwó.