Read idoma ÁLUKA 21 Bible Online

ÁLUKA 21 - idoma bible

ÁLUKA 21

¹Eko nɛ̄ Árādi ɔcɛ́ kú ācɛ Ukénan nɛ̄ lā Unégēbu ɛhájɛ kú ajɛ ā le pó ka ācɛ kú Ísrɛ̄lu ɛ́ɛ bá ī wā gaá bū ɔwɛ kú Atarím ā, é le ɔfú kpó í kwu uwá, le ācɛ kú Ísrɛ̄lu ōhī kpó kwú

²Anɔ́ɔ ācɛ kú Ísrɛ̄lu lɛ okónu ce lɛ Óndú ā kahíníī, “Ɔ́dāŋ ka a géē je ācɛ nēe bá nyā tá ipú abɔ̄ kú alɔ, alɔ géē je aígelī nɛ̄hi kú uwā ā yíífi dúúdú.”

³Anɔ́ɔ Óndú ā le ɔkɔ nēé gbā ā pó á. Ó le uwá tá abɔ̄, anɔ́ɔ é le ācɛ kú Ukénan ā yálé á. Ācɛ Ísrɛ̄lu le uwá mɛ́mla aígelī nɛ̄hi kú uwā kpó yíífi dúúdú, klla kwú iyē ú ce abɔ́ɔ ka Uhɔ́ma.

⁴É gbɔɔ́ ŋmá ɛyí ɛfu kú Uhɔ́ɔ abɔ́ɔ, kwú bū ɔwɛ kú ísu igwɛ̄bɛ́ ā, é klla kwú pīya bá ajɛ kú Ɛ́dɔm iyē. Anɔ́ɔ ācɛ ā í lɛ ɔtūlé gɛ ŋ́.

⁵É ka iŋini tū Ɔwɔicō mɛ́mla Umósīsi kahíníī, “Ɔdíyá nɛ̄ aá kpó alɔ bɛ̄cɛ ŋmá Íjīpiti wā í pɛ́ kwú ipú ígbíli ā? Ɔdōlé í yɔ̄ amānyā ŋ́, éŋkpɔ̄ í klla yɔ̄ ŋ́. Alɔ í lé ɔdōlé obɔ̄bí nyā glá ɛ́ɛ́ gɛ ŋ́.”

⁶Anɔ́ɔ Óndú ā le aɛ́gwā obɔ̄bí tɛ̄hɔ̄ gaá gbɔɔ́ ō kwú ācɛ kú Ísrɛ̄lu á. Ácɛ alɛwa kú uwā gbɔɔ́ ō pɛ́ kwú.

⁷Anɔ́ɔ é le pɛ́ ga ɛgiyí Umósīsi gaá da ɔ́ kahíníī, “Alɔ le íne bīya ɛɛ́, alɔ le iŋini ka tū Óndú ā mɛ́mla uwɔ. Gbɔ̄ɔ̄kɔ lɛ Óndú ā kóō kwú ɛgwā nyā ú ŋmá ipú ɔlɛ́ alɔ.” Anɔ́ɔ Umósīsi le ɔkɔ gbā ohígbū ācɛ ā á.

⁸Anɔ́ɔ Óndú ā da Umósīsi kahíníī, “Lɛ ɛgwā kú oje udɔ ma, cɛ́ɛ́ a kwú ɔ̄ ú kwu ɔcí icō. Ɔ̄cɛ dúúmā nɛ̄ ɛgwā lɛ ɔ́ kwú, nɛ̄ ó je eyī gicō lɛ ɛgwā kú oje udɔ ā má, ó géē nyatá ŋmá ɛ́fa kú ɛgwā ā.”

⁹Anɔ́ɔ Umósīsi le ɛgwā kú oje udɔ ā ma, anɔ́ɔ ó kwú ɔ̄ ú kwu ɔcí icō á. Anɔ́ɔ ɔ̄cɛ dóódu nɛ̄ ɛgwā le ɔ̄ kwú nɛ̄ ó je eyī gicō lɛ ɛgwā kú oje udɔ ā má, géē nyatá ŋmá ɛ́fa kú ɛgwā ā, cɛ́ɛ́ ó má yēeyī, ó klla gáā kwú ɛ́ɛ́ gɛ ŋ́.

¹⁰Anɔ́ɔ ācɛ kú Ísrɛ̄lu gbɔɔ́ ŋmá abɔ́ɔ gaá lā Obóti á.

¹¹Eko nēé nyɛ̄ɛ̄ ŋmá abɔ́ɔ ā, é gaá lā ipú alácɛ̄ kú Abarím ipú ígbíli kú ɛnɔ̄ɔ̄cī kú ajɛ kú ācɛ Umówābu.

¹²Anɔ́ɔ é gaá lā ɔpɛ kú Userédi.

¹³É nyɛ̄ɛ̄ ŋmá abɔ́ɔ ā, gaá lā ɛhícō kú āyā ɔhá kú ísu kú Ánɔn, ígbíli nōo gbɔɔ́ ŋmá ɛyí ajɛ kú ācɛ Ámɔn, ohígbū ka o ŋmá ísu kú Ánɔn ā wɛ ɛjī kú ajɛ kú ācɛ Umówābu mɛ́mla Ámɔn á.

¹⁴Ɔdā nōo yá ɛ́ɛ́ nēé tá ipú kú ɛfú kú Óndú ā ka, igelī nɛ̄hi nɛ̄ŋcɛ́ kú Uwáhēbu, ipú ajɛ kú Usúfa mɛ́mla ɔpɛ́ kú ísu kú Ánɔn,

¹⁵mɛ́mla o wúlatū wā ajɛ kú aɔ́pɛ́ nōo tágɔbū ga igelī nɛ̄ŋcɛ́ kú ācɛ kú Áru. Ó klla yɛ lɛyíkwu ɛjī ajɛ kú Umówābu ā.

¹⁶Oŋmá abɔ́ɔ ā, é le tá ɛga nēé hī ka aóbugā, ɛga nɛ̄ Óndú ā da Umósīsi kahíníī, “Lɛ ācɛ a tuba tɔ̄ɔ̄há, n géē je éŋkpɔ̄ lɛ uwá.”

¹⁷Eko ɔ́ɔmā, ācɛ kú Ísrɛ̄lu gwííje nyā ka, “Bū ŋmá ajɛ obugā. Alɔ í gwííjē gā uwɔ.

¹⁸Obugā nɛ̄ ayí-ɔ́cɛ́ bū ā, mɛ́mla ɛ̄nɛ̄ aótrɛ̄yí kú ācɛ, bī okwutɛ mɛ́mla aɔ́cí ō kwajɛ kú uwā bu ā.” Anɔ́ɔ é nyɛ̄ɛ̄ ŋmá ígbíli abɔ́ɔ ā, le yɛ tá Umɛtána.

¹⁹É ŋmá abɔ́ɔ gā Unahálīyɛlu. É klla ŋmá Unahálīyɛlu gā Ubámótu.

²⁰É ŋmá Ubámɔ̄tu ga ɔpɛ́ nōo yɔ̄ ajɛ kú ācɛ Umówābu, nōo yɔ̄ ɛháajɛ kú ɛfu kú Upísga, nōo leyīkwu ígbíli ā.

²¹Ācɛ kú Ísrɛ̄lu le ɛhɔ̄ tū fu ɔcɛ́ kú Ámɔn, Usíhɔn kahíníī,

²²“Lɛ ɛga je gā um cɛ́ɛ́ ká n̄ le bū ajɛ kú ɔlɛ́ aá. Alɔ mɛ́mla aɛ́bɛ́ kú ɔlɛ́ alɔ ā í gáā nyā ga ipú ajɛ, amáŋ, ipú ɛhɔ̄ ɔcí ufáyin kú aá ŋ́, ɛ́ɛ́ nɛ̄ alɔ gē gwá éŋkpɔ̄ kú ɔlɛ́ aá ŋ́, alɔ géē kwu ɔwɛ kú alɔ gbéeko nɛ̄ alɔ lɛ bɛ̄cɛ ŋmá ipú ajɛ kú ɔlɛ́ aá.”

²³Amáŋ Usíhɔn í cɛ̄ ka ācɛ Ísrɛ̄lu kéē bū ipú ajɛ kú ɔlɛ́ nū ŋ́. Anɔ́ɔ ó lɛ aícɔ́ɔja kú nū tútū kéē kpɛ́fu tá ācɛ Ísrɛ̄lu. Ó le yɛ tá ajɛ kú Ujahási gaá le ɔfú kpó kwu ācɛ kú Ísrɛ̄lu ā.

²⁴Amáŋ ācɛ kú Ísrɛ̄lu le aícɔ́ɔja kú uwā alɛwa kpó ŋmó ɔgbɛ́fú ā, é klla mīyɛ ajɛ kú nū ŋmá ɛhíícō kú ísu kú Ámɔn ga ɛhíícō kú Ujábɔ̄ku jāā ga ajɛ kú Ámɔn, ohígbū ka Ujása wɛ ɛjī kú ajɛ kú ācɛ kú Ámɔn á.

²⁵Ācɛ kú Ísrɛ̄lu mīyɛ odúúdu aígelī nɛ̄hi kú ācɛ kú Ámɔn, kwu Uhɛ́ssbɔn, mɛ́mla aígeli nɛ̄ŋ́cɛ̄ nēe yɛ ɔ́ jīlatá ā. É klla má lā anú.

²⁶Uhɛ́ssbɔn wɛ ɔlɛ́ ɔtāhɛ̄ kú ajɛ ɔlɛ́ Usíhɔn nōo wɛ ɔcɛ́ kú ācɛ Ámɔn, nōo kpɛ́fú tá ɔcɛ́ kú Umówābu tɛtɛ ā, Ó mīyɛ odúúdu ajɛ kú nū ŋmá ɛgiyí nū jāā ga ísu kú Ánɔn ā.

²⁷Ohígbū ɔ́ɔmā a, ɔ̄cogwíije éyi ā gwííjē ka, “Wā Uhɛ́ssbɔn, ipú igelī nɛ̄hi kú ɔcɛ́ Usíhɔn. Alɔ dɔɔ̄kā ō má ɔ̄ kéē lɛ ɔ́ gwó igbɔhá ā.

²⁸Eko éyi, aícɔ́ɔja kú Uhɛ́ssbɔn Aícɔ́ɔja kú Usíhɔn bɛ̄cɛ bɛ̄ɛka ɔlá ā ŋmá ipú igelī nɛ̄hi nyā. É kwú ipú igelī nɛ̄hi kú Áru kú Umówābu ú yíífi. É kwu ɛfu kú āyā ɛhícō kú ísu kú Ánɔn ā í kpó yíífi dúú.

²⁹Ó le bɔ̄bí lɛ aá nɛ̄hi ɛɛ́, ācɛ kú Umówābu, Aá nēe ī gbā Ukémɔ̄si, ɔwɔ nɛ̄ŋcɛ́ ā ɛ̄gbā ā. É lɛ aá kpó yíífi ícɛ nyā. Icɛ̄bɔ̄ kú aá cɛ̄ lɛ ācɛ ɔlɛ́ aá kwú pīya alagbá kú ɛfú ɛɛ́. Ācɛnyā kú aá kwu pīya aɔ́fiyɛ kú ɔcɛ́ kú ācɛ kú Ámɔn ɛɛ́.

³⁰Amáŋ abālɔbányā, é kwú ipɔ́ɔma kú uwā í yíífi ɛɛ́, o gbɔɔ́ ŋmá Uhɛ́ssbɔn ga Udíbɔn. O ŋmá Unássim gā Unɔ́fa nōo kwu Umedéba ajaajɛ ā.”

³¹Ācɛ kú Ísrɛ̄lu má lā ipú ajɛ kú ācɛ Ámɔn.

³²Umósīsi lɛ ācɛ tɛ̄ɛhɔ̄ ga ajɛ kú Ujása kéē lɛ ɔkwu kú ɔwɛ nōo í tɔ́ɔtɛ́ fíyɛ́ dúú nɛ̄ aá géē kpɛ́fú tú igelī nɛ̄hi kú Ujása ā bū. Ācɛ kú Ísrɛ̄lu le ɛfú kpó tū uwā klla mīyɛ aípɔ́lɛ nɛ̄ŋcɛ́ nēe yɛ igelī nɛ̄ŋcɛ́ ā jīla ā. Anɔ́ɔ é le ācɛ kú Ámɔn nēe lā abɔ́ɔ ā kpó nū á.

³³Anɔ́ɔ ācɛ kú Ísrɛ̄lu le eyī pīya kwu ɔwɛ kú Ubássan, anɔ́ɔ ɔcɛ́ kú Ubássan, Ógu, gā ɛcɛ mɛ́mla aícɔ́ɔja kú nū kóō kpɛ́fú tá ācɛ kú Ísrɛ̄lu ajɛ kú Édríyɛ.

³⁴Óndú ā da Umósīsi ka ó híī yúufi ɔcɛ́ ā ŋ́, ka anúɔ géē cɛ̄ lɛ ɔ́ yá anú mɛ́mla odúúdú ācɛ ɔlɛ́ nū mla ajɛ kú ɔlɛ́ nū lé. Ó ka ɔ́ɔ géē yá uwā ɔdā nēé yá Usíhɔn, ɔcɛ́ kú ācɛ Ámɔn, Uhɛ́ssbɔn ā.”

³⁵Anɔ́ɔ ācɛ kú Ísrɛ̄lu lɛ Ógu mɛ́mla ayí nū, mɛ́mla odúúdu ācɛ ɔlɛ́ nū kpó ŋmó á. Ɔ̄cɛ dúúmā kú uwā í hile ŋ́, é klla mīyɛ ajɛ kú uwā.