Read idoma ÁLUKA 22 Bible Online

ÁLUKA 22 - idoma bible

ÁLUKA 22

¹Ācɛ kú Ísrɛ̄lu nyɛ̄ɛ̄ gaá lā ɔpɛ́ kú Umówābu ɛháajɛ kú ísu kú Ujɔ́dan, le eyī pīya kwu Ujɛ́rīko kpaakpa.

²Eko nɛ̄ Ubálāki, ɔyí kú Usípɔ nōo wɛ ɔcɛ́ kú Umówābu ā, le ɔdā nɛ̄ ācɛ kú Ísrɛ̄lu ya ācɛ kú Ámɔn ā pó, anɔ́ɔ ó klla le pó ka é lɛwa nɛ̄hi ā,

³anú mɛ́mla odúúdú ācɛ ɔlɛ́ nū gbɔɔ́ ō yúufi nɛ̄hi.

⁴Ācɛ kú Umówābu da anyākwɔ́cɛ kú Umídīyan kahíníī, “Ɛwa nyā géē je alɔ mɛ́mla odúúdu ɔdā nēe yɛ alɔ jīla tá ā kpó yíífi ānāānā, ɛ́gɛ́nɛ̄ ɛna géē je ácí lé ŋmá ajɛ ā.” Anɔ́ɔ Ubálāki, ɔyí kú Usípɔ, nōo wɛ ɔcɛ́ kú Umówābu eko ɔ́ɔmā ā,

⁵le ɛhɔ̄ tū fu Ubálam, ɔyí kú Ubéyɔ ajɛ kú Upɛ́tɔ, nōo kwu ísu kú Uyúfrétīsi ajaajɛ ipú ajɛ kú Ámɔn ā. É le ɛhɔ̄ kú nu cɛ̄ lɛ ɔ́ kahíníī, “Ācɛ ewo éyi dúúdú le pɛ́ bɛ̄ɛcɛ ŋmá Íjīpiti wā í yɔ̄ ī nyīla tāajɛ. É klla yɔ̄ ī tútū kéē mīyɛ ajɛ kú ɔlɛ́ alɔ tābɔ̄ ɛɛ́.

⁶Wā káā gaá lɛ okónu tá lɛ ācɛ nēe bá nyā gā um, ɛ́gɛ́nɛ̄ é lɛwa ce alɔ abɔ̄ bá ā. Ekōhī n géē lɔfú yá uwā lé glá klla lɛ uwá kpó nū. Ohígbū ka n jé ka, ɔ̄cɛ dóódu nāa lɛ ɔhā hɛ́ ce ɔ́, ó géē bá ɔ̄ iyē, ɔ̄cɛ nāa kē lɛ okónu tá lɛ ɔ́, ó kē í bá ɔ̄ iyē.”

⁷Anyākwɔ́cɛ kú Umówābu mɛ́mla ācɛ Umídiya ā, kwú ije nēé gáā lɛ cíla ulé kú okónu ō tá ā ú, anɔ́ɔ é le tá ɛgiyí Ubálam, le ɛhɔ̄ kú Ubálāki ā cɛ̄ lɛ ɔ́.

⁸Ubálam da uwá kahíníī, “Aá le gbo amānyā gbóócí, cɛ́ɛ́ n géē da aá ɔdā dúúmā nɛ̄ Óndú ā géē ka gā um ā.” Anɔ́ɔ ācɛ ā má klá mla Ubálam á.

⁹Ɔwɔicō gā ɛgiyí Ubálam, anɔ́ɔ ó da ɔ́ kahíníī, “Ānyɛ bá mla uwɔ abɔ́ɔ ā?”

¹⁰Ubálam tá Ɔwɔicō ohi kahíníī, “Ubálāki, ɔyí kú Usípɔ, ɔcɛ́ kú Umówābu, tū uwā ɛhɔ̄ fu um kahíníī,

¹¹“Ācɛ éwo éyi nōo bɛ̄cɛ ŋmá ajɛ kú Íjīpiti ā, le cē klɛ́ɛcɛ odúúdú ajɛ ā, kéē mīyɛ ɔ́ tābɔ̄. Ó dɔɔ̄kā kú n̄ lɛ okónu tá lɛ uwá lɛ ɔ́, eko ōhī anúɔ géē lɔfú kpɛ́fú tá uwā, yá uwā lé klla kpó uwā nū ŋmá ipú ajɛ kú nū ā glá.”

¹²Ɔwɔicō da Ubálam kahíníī, “Á gáā nyɔ̄ mla uwá ŋ́, á gáā tókónu lɛ ācɛ ā ŋ́. Ohígbū kēé le ɔhā hɛ́ ce uwá ɛɛ́.”

¹³Ɔ̄cɔ̄ɔ̄cī oŋmɔ́ɔcī nū, Ubálam cāŋjɛ, anɔ́ɔ ó da ācɛ nɛ̄ Ubálāki tɛ̄hɔ̄ ā kahíníī, “Aá nyɔ̄ kú aá, ohígbū ka Óndú ā tá ka ami ɔ́ɔ́ gáā nyɔ̄ mla aá ŋ́.”

¹⁴Anɔ́ɔ ācɛ ā cānjɛ le yɛ gaá lɛ ka lɛ Ubálāki ka Ubálam ɔ́ɔ tá ka anúɔ í wā mla aá ŋ́.”

¹⁵Ubálāki klla le aótrɛ̄yí alɛwa fíyɛ́ mɛ́mla ācɛ o le ojīlīmā fíyɛ́ tɛ̄hɔ̄ fu Ubálam igbɔhá.

¹⁶Uwá le pɛ́ ga ɛgiyí Ubálam, anɔ́ɔ é ka, Ubálāki, ɔyí kú Usípɔ kahíníī, “Ɔdā dúúmā kóō híī ci uwɔ oōwā ɛgiyí um ŋ́.

¹⁷N géē cíla uwɔ ulé nɛ̄ɛ̄nɛ̄hi, klla géē yá ɔdā dúúmā nāa da um ka um yá ā. Wā káā lɛ okónu tá lɛ ācɛ nēe bá nyā ga um.”

¹⁸Anɔ́ɔ Ubálam ta ācɛ nɛ̄ Ubálāki tɛ̄hɔ̄ ā ohi kahíníī, “Ɔ́dāŋ ka Ubálāki géē je inu kú nū gā um, nɛ̄ ó kōō wɛ o tū mu omōōmu mla oje nɛ̄hɛ́ mɛ́mla ugóolu (oje ɔdɔ), ń gáā tá íne nɛ̄ Óndú ā, Ɔwɔicō kú um je gā um ā glá ŋ́, ɛ́ɛ́ nɛ̄ n gē yá nwuné fíyɛ́ ɔ́ɔmā ŋ́, ámāŋ ka o yá ɔ̄ nyɛ́ fíyɛ́ ŋ́.”

¹⁹Ó da uwá kéē le gbo pī núɔ abɔ́ɔ gbɔ́ɔ̄cī kpɔ́, cɛ́ɛ́ kú anúɔ klla pó ɔdā nɛ̄ Óndā ā géē ka kpɔ́ ā

²⁰Anɔ́ɔ Ɔwɔicō gā ɛgiyí Ubálam otú, gaá da ɔ́ kahíníī, “Ɔ́dāŋ ka ācɛ ā wā lɛ uwɔ hīgwú kpɔ́, nyɔ̄ mla uwá, amáŋ ɔdā nɛ̄ n gáā da uwɔ ā, nāa géē yá á.”

²¹Anɔ́ɔ Ubálam cāŋjɛ ɔ̄cɔ̄ɔ̄cī, le ijakī kú nū tútū, anɔ́ɔ ó le yɛ mla anyākwɔ́cɛ kú Umówābu á.

²²Ɔwɔicō le cɔ̄nū abɔ̄ Ubálam yɔ̄ ī nyɔ̄ ā. Abɔ̄ Ubálam ce ijakī kú nū yɔ̄ ī nyɔ̄ mla ayíkpó kú nū ɛpa ā, alelékwū otɛ̄hɔ̄ kú Óndú ā gaá háyi ɔwɛ kú nū, ó le ɔkpacaŋ́gelī bī abɔ̄.

²³Eko nɛ̄ ijakī ā le alelékwū otɛ̄hɔ̄ ā má háyi ɔwɛ le ɔkpacaŋ́gelī pi ce abɔ̄ ā, ó nyɛ̄ɛ̄ ŋmá ɔwɛ ga ipácí. Anɔ́ɔ Ubálam lɛ ɔdée fīyɛ̄ ɔ̄, lɛ ɔ́ pīyɛyī tá ɔwɛ.

²⁴Anɔ́ɔ alelékwū otɛ̄hɔ̄ ā gaá háyi ɛga nɛ̄ ɔwɛ ā píbá ā, ɛpla kú ɔdɔ kú ɛhɔ̄ kú ɔcí ufáyin nēé le ɛcɔ̄ hɛ́ igá tū abɔ̄ ɛplɛ́ɛpa.

²⁵Eko nɛ̄ ijakī ā lɛ alelékwū otɛ̄hɔ̄ kú Óndú ā má ā, ó le kwu bá ɔdɔ, le Ubálam ikpó kwu bá ɔdɔ ká. Ubálam le ijakī ā gɔ́ igbɔhá lɛ ɔ̄ pīyɛyí tá ɔwɛ.

²⁶Anɔ́ɔ alelékwū otɛ̄hɔ̄ kú Óndú ā gaá háyi ɛga nōo píbá kú ɔwɛ nɛ̄ ɔ̄cɛ í gaá nyā ga ɛga dúúmā glá ŋ́ mā.

²⁷Eko nɛ̄ ijakī ā, le alelékwū ōtɛ̄hɔ̄ kú Óndú ā má kpɔ́ ā, ó má gwutáajɛ. Anɔ́ɔ Ubálam le cɔ̄nū ŋmá ɛyí nū gbɔɔ́ ō fīyɛ̄ ijakī ā ɔcí á.

²⁸Óndú ā le okónu kú ijakī ā nwūla, anɔ́ɔ ijakī ā da Ubálam kahíníī, “Ɔdí nɛ̄ n yá uwɔ ɛ́ɛ́ nāa fīyɛ̄ um ɔcí igbo ɛtá nyā a?”

²⁹Anɔ́ɔ Ubálam tá ijakī ā ohi kahíníī, “Ohígbū ka a yɔ̄ ī yá um olíla, ɔ́dāŋ ka n kōō bī ɔkpacaŋgelī abɔ̄ nɛɛ, ń géē yɛ í lɛ uwɔ ŋmó.”

³⁰Anɔ́ɔ ijakī ā tá ɔ̄ ohi kahíníī, “Ami wɛ ijakī nāa húmáyī ce ipú oyēeyī kú uwɔ ā ŋ́ nɛɛ? N yá uwɔ lɛ ā jéjéē ɛɛ́ ɛ̄ɛ̄?” Anɔ́ɔ Ubálam tá ɔ̄ ohi kahíníī, “Ehée.”

³¹Óndú ā le eyī kú Ubálam nwūla, anɔ́ɔ ó lɛ alelékwū otɛ̄hɔ̄ kú Óndú ā má mla ɔkpacaŋ́gelī ā, anɔ́ɔ ó le okwúukwu kpó kwaajɛ, kwú eyī ú pīya klá ajɛ á.

³²Anɔ́ɔ alelékwū otɛ̄hɔ̄ ā da ɔ́ kahíníī, “Ɔdíyá nāa fīyɛ̄ ijakī kú uwɔ ɔcí igbo ɛtá lɛ ā? Ami wā í háyi ɔwɛ ká n lɛ iyāwu kú uwɔ ā ci á. Ohígbū ka á cíkā ō ga iyāwu ā ŋ́.

³³Amáŋ, ijakī kú uwɔ lɛ um má, le kwu ŋmá ɔwɛ igbo ɛtá. Ɔ́dāŋ kōó kwu ŋ́ nɛɛ, ń géē yɛ í le uwɔ ŋmó, cɛ́ɛ́ n habɔ̄ ijakī ā tá.”

³⁴Ubálam tóohi kahíníī, “N lɛ íne bīya ɛɛ́, ń jé ka a háyi ɔwɛ kú ā lɛ um iyāwu ci ŋ́. Amáŋ, ɔ́dāŋ ka a má ka ɔ́ɔ bɔ̄bí gā um, ká n̄ nyɔ̄ mla ācɛ ā ŋ́, n géē kwúcē ga ɔlɛ́.”

³⁵Amáŋ alelékwū otɛ̄hɔ̄ ā tá ɔ̄ ohi ka, “Nyɔ̄ mla ācɛ ā mɛ́ɛnɛ, amáŋ, ɔdā nɛ̄ n géē ka gā uwɔ ā nāa géē yá á.”

³⁶Eko nɛ̄ Ubálāki le pó ka Ubálam ɔ́ yɔ̄ ī wā ā, ó nyɔ̄ gaá jīla anú ɔwɛ ipú igelī nɛ̄hi kú Áru, igelī nɛ̄hi nōo yɔ̄ okónu ísu kú Ánɔn, ɛjī kú ajɛ kú ācɛ Umówābu ā.

³⁷Ubálāki da Ubálam kahíníī, “Ɔdíyá nɛ̄ á wā eko nɛ̄ um tɛ̄hɔ̄ fu uwɔ aflɛ́yí ā ŋ́ mā ā? A gbɛlá ka amíɔɔ í cíla anúɔ ulé glá ŋ́ nɛɛ?”

³⁸Anɔ́ɔ Ubálam tá ɔ̄ ohi kahíníī, “N kē gā ɛɛ́, ó lɛ ā ŋ́ nɛɛ? Amáŋ ɛlā nɛ̄ Óndú ā ka gā um ka ami ɔ́ ka ā nɛ̄ n géē ka ga uwɔ á.”

³⁹Anɔ́ɔ Ubálam le yɛ mla Ubálāki ga igelī nɛ̄hi kú Uhúsōtu,

⁴⁰ɛga nɛ̄ Ubálāki ŋmó ɛna mɛ́mla álá lɛ Ubálam mɛ́mla anyākwɔ́cɛ ōhī nēe bá mla anú ā.

⁴¹Oŋmɔ́ɔ̄cī nū, Ubálāki kwú Ubálam ú gicō kú Ubamɔtubáal, ɛga nɛ̄ ó lɔfú má ācɛ ōhī kú Ísrɛ̄lu ā ŋmá ā.