Read idoma ÁLUKA 24 Bible Online

ÁLUKA 24 - idoma bible

ÁLUKA 24

¹Abālɔbányā, Ubálam le jé ka Óndú ā ɔ́ dɔɔ̄kā ká anúɔ hɔ́hā ce ācɛ kú Ísrɛ̄lu. Anɔ́ɔ ó klla nyɔ̄ gaá tíne kóō má eyī kú Óndú ā, ɛ́gɛ́nɛ̄ ó tɛtɛ gē yá ā ɛ́ɛ́ gɛ ŋ́. Ó le eyī pīya kwu ígbíli ā,

²anɔ́ɔ ó má ācɛ kú Ísrɛ̄lu lā ígwíígwu ɛ́gɛ́nɛ̄ ipɔ́ɔma kú uwā lɛ ā. Alelékwū ihɔ kú Ɔwɔicō kwú ɔ̄ ú,

³anɔ́ɔ ó kahíníī, “Olɛhɔ̄ nɛ̄ Ubálam, ɔyí kú Ubéyɔ bī wā ā, ɛlā kú ɔ̄cɛ nōo gē mɛ́ɛbɛ yēŋēē ā [3]

⁴Ɔ̄nyɛ lɔfú pó ɛlā nɛ̄ Ɔwɔicō géē ka ā glá, N le eyī kwɛcɛ cɔɔ, ipú obócí ádēde, n gē mɛ́ɛbɛ kú Ɔwɔicō nōo lɔfú fíyɛ́ dúú ā.

⁵Ɔlɛ́ kú ācɛ kú Ísrɛ̄lu lɔhi nɛ̄hi,

⁶Bɛ̄ɛka aɔ́cí kú alī nēe hɔ́ɔgba likpō-līkpō ā, Amáŋ ka ɛhɔ̄ nōo yɔ̄ okónu ísu ā, Ámāŋ bɛ̄ɛka ɔcí kú álɔ̄si nɛ̄ Óndú ā tū, ámāŋ bɛ̄ɛka ɔcí kú Usɛ́da kú okónu ísu ā.

⁷Ɔwɔ gē yā lɛ uwā cabá-cabá eko dóódu. É klla í nyi īkpɔ̄dɛ̄hɔ̄ kú uwā, ajɛ nɛ̄ ɔwɔ le yā tū ɔ̄ lɔɔlɔhi. Ɔcɛ́ kú uwā géē nwuné fíyɛ́ Ágāgi, ɔcɛ́ á, Ajɔ̄cɛ́ kú nū géē nyīla ga ɛga dóódu.

⁸Ɔwɔicō bī uwā bɛ̄cɛ ŋmá Íjīpiti á, Ó géē nuunu lɛ uwá bɛ̄ɛka ɔbá ɛyī ā. É géē je aólɛlā kú uwā kpó yíífi, É klla í je ikpokwú kú uwā ca kwɛɛ́kwɛɛ́, É klla í je ɔtā mɛ́mla ɔyí kú uwā kpó cē.

⁹Éwo ā lɛbɛ̄ɛka ágábá olɔfú nɛ̄hi ā, Eko dóódu nɛ̄ ó yɔ̄ ī gbiyɔ̄lā, ɔ̄cɛ dúúmā í jámá hé ɔ̄ eyī glá ŋ́. Ɔ̄cɛ dúúmā nōo hɔ́hā ce Ísrɛ̄lu, é géē hɔ́hā ce ɔ́, ɔ̄cɛ dúúmā nōo tókónu lɛ Ísrɛ̄lu, é géē tókónu lɛ ɔ́.”

¹⁰Ubálāki kwú cɔ̄nū nɛ̄hi le abɔ̄ kú nū fīyɛ̄ ɔhá gbáyíí, anɔ́ɔ ó da Ubálam kahíníī, “N hī uwɔ igwú kú ā gaá tókónu lɛ aólɛlā kú um, amáŋ igbo ɔ́mɛɛtá nāa hɔ́hā ce uwá yɔ̄ mɛ́ɛ̄ á.

¹¹Ga ɔlɛ́ mɛ́ɛ́nɛ. N cokónu ka n géē cíla awɔ ulé, amáŋ Óndú ā lɛ ulé nāa í yɛ í mīyɛ ā ci ɛɛ́.

¹²Ubálam le ohi tá ɔ̄ ka, n da ācɛ nāa tɛ̄hɔ̄ fu um ā kahíníī,

¹³“Ɔ́dāŋ ka a kwú inu ɔlɛ́ uwɔ ú gā um, mɛ́mla odúúdu oje nɛ̄hɛ́ mɛ́mla Ugóolu (oje ɔdɔ) nēe bá anú ā, ń gáā tá ɛlā kú Óndú ā nyɔ̄ í yá ɔdā abɔ̄yī um ŋ́. Ɔdā nɛ̄ Óndú ā ka gā um ā ōfōōfū nū nɛ̄ n géē ka á.”

¹⁴Ubálam da Ubálāki kahíníī, “N gē ga ɔlɛ́ um ɛgiyí ācɛ ɔlɛ́ um ɛɛ́, amáŋ, ɛ́ɛ́ ká n̄ nyɔ̄ ā, n géē pi uwɔ ahɔ̄ kú ɔdā nɛ̄ ācɛ kú Ísrɛ̄lu géē yá ācɛ ɔlɛ́ uwɔ ekɔ̄bū ā.”

¹⁵Anɔ́ɔ Ubálam kahíníī, “Ɛhɔ̄ kú Ubálam ɔyí kú Ubéyɔ, ɛlā kú ɔ̄cɛ nōo gē mɛ́ɛbɛ yēŋēē ā.

¹⁶Ɔ̄cɛ nōo gē pó ɛlā nɛ̄ Ɔwɔicō gē ka glá ā. Ɔ̄cɛ nōo ī mīyɛ íjééyī nōo ŋmá ɛgiyí Ɔwɔicō, nōo lɔfú fíyɛ́ dúú ā. N le eyī kwɛɛcɛ cɔɔ ipú obócí-ádēde, n mɛ́ɛbɛ ŋmá ɛgiyí Ɔwɔicō nōo lɔfú fíyɛ́ dúú ā.

¹⁷N mɛ́ɛbɛ kú ɛ̄cɔ̄bū, Anɔ́ɔ n le éwo kú Ísrɛ̄lu má, Ɔcɛ́ nōo lɛbɛ̄ɛka ínyílɔ́wɔ, ogbɔlɛ́ gbēyī ɔyá ā, géē bɛ̄cɛ ŋmá ewo ɔ́ɔmā. Bɛ̄ɛka ɔ́kpa ɔlá kú ínyílɔ́wɔ nōo géē wā, ŋmá Ísrɛ̄lu ā. Ó géē ŋmó aótrɛ̄yí kú ācɛ kú Umówābu, Ó klla í je odúúdu ācɛ kú ajɛ ā wúla tāajɛ, klla í kpó ayí kú Usɛ́ɛ́ti ā ŋmó.

¹⁸Ó géē yá aólɛlā kú nū, nēe wɛ ācɛ Ɛ́dɔm ā lé, klla í je ajɛ kú Ɛ́dɔm pīya agbénú kú nū. Amáŋ éwo kú Ísrɛ̄lu géē yɔ̄ ī yá aólɛlā kú uwā lé piyóó.

¹⁹Ayí kú Ísrɛ̄lu géē lɛ ikpó da aólɛlā kú uwa ɛyi tāajɛ, É klla í je aóhile kú uwā ā kpó yíífi ŋmá ajɛ.”

²⁰Ipú ɛbɛ nɛ̄ Ubálam má ā, ó le ācɛ kú Ámālɛ̄ki ā má, anɔ́ɔ ó ka ka ācɛ kú Ámālɛ̄ki ɔ́ lɔfú fíyɛ́ odúúdu aéwo á, amáŋ igbīhāajɛ ā, é géē je uwá yíífi ŋmá ipú ɛcɛ nyā piyóó.

²¹Ipú ɛbɛ nɛ̄ ó má ā, ó le ācɛ kú Ukéniti ā má, anɔ́ɔ ó kahíníī, “Ɛga nɛ̄ aá lā ā, É yɔ̄ ɛbɔ́ bɛ̄ɛka ɔlɛ́ ígbáanɔ nōo ce ágēnégēne kú ápátɛ́cɔ̄ kú ɛyí ɛfu ā.

²²Amáŋ, aá ācɛ kú Ukéniti, é géē kpó aá yíífi, eko nɛ̄ ācɛ kú Asírīya géē wā í je aá kpó kwú ga ɔlɛ́ uwā.

²³Anɔ́ɔ Ubálam ka, ānyɛ wɛ ācɛ nēé bá ī túbá ɛhíícō yɔ̄ ā?

²⁴Ācɛ nēe wā í mīyɛ ajɛ abɔ̄fú ā géē wā ipú úgbéenyi ŋmá Usáyíprɔ̄si. É géē yá ācɛ kú Asírīya mɛ́mla ācɛ kú Éba lé. Amáŋ, igbīhāajɛ ā, é géē je uwá kpó yíífi ŋmá ipú ɛcɛ piyóó.”

²⁵Anɔ́ɔ Ubálam le tútū, kē nyɛ̄ɛ̄ le tá ɔlɛ́ nū á, anɔ́ɔ Ubálāki kē nyɛ̄ɛ̄ ŋmá ɛgiyí nū á.