Read idoma ÁLUKA 25 Bible Online

ÁLUKA 25 - idoma bible

ÁLUKA 25

¹Eko nɛ̄ ācɛ kú Ísrɛ̄lu lā ɔpɛ́ kú Asiríya ā, ācɛnyīlɔ kú uwā gbɔɔ́ ō ciikpó ayínɔ̄nyā kú ācɛ Umówābu. É gbɔɔ́ ō je iyī uwā iyē tēelihɔ.

²Āncɛnyā nēe bá nyā le uwá hīīgwú ga ɔnū ucɛ nēe gē gwɛ́ɛya klla í gbō aɔ́wɔ kú uwā ɛ̄gbā ā. Ācɛ kú Ísrɛ̄lu ā bá ī lé ɔdōlé kú aɔ́wɔ kú Umówābu ā, klla bá ī gbā aɔ́wɔ ā ɛ̄gbā.

³Ācɛ Ísrɛ̄lu kwú iyī uwā ikpó í kpó tū o gbā ubáalu kú Upéyɔ ɛ̄gbā. Anɔ́ɔ Óndú ā kwú cɔ̄nū mla uwá nɛ̄hi á.

⁴Anɔ́ɔ Óndú ā da Umósīsi kahíníī, “Kwú odúúdu aótrɛ̄yí kú ācɛ kú Ísrɛ̄lu ā ú tōoli ɛcɛ péee ɔlɛ́ɛnɔ ipéyī um. Cɛ́ɛ́ kú um cɔ̄nū mla ācɛ ā gɛ ŋ́.”

⁵Anɔ́ɔ Umósīsi le ka lɛ aígabɔ̄ kú Ísrɛ̄lu ā kahíníī, “Ɔnyɔɔnyɛ kú aá géē ŋmó ɔ̄cɛ dóódu nōo yɔ̄ ipɔ́ɔma kú nū, nōo gē gbā Ojibó kú ubáal kú Upéyɔ ɛ̄gbā ā.”

⁶Eko nēé bá ī jikwū klá Óndú ā okómpíinu kú Áklɔ̄kpīihɔ ā, ɔ̄cɛ kú Ísrɛ̄lu éyi le ɔnyā Umídīyan éyi bī wā í ga inu kóō gwutá mla anú ipéyī uwā.

⁷Eko nɛ̄ Ufínɛ̄hasi, ɔyí kú Ɛlísa, ɔyí kú ɔyí kú Árɔ̄ni, ɔ̄cogwɛ́ɛya ā lɛ ɔ́ má ā. Ó nyɛ̄ɛ̄ ŋmá ipú ójila gaá kwú óbō ú,

⁸anɔ́ɔ ó le ɔ̄cɛ ā mɛ́mla ɔnyā ā nū ga inu, anɔ́ɔ ó le óbō gwū uwā ɛpɛlɛ́ɛpa bá ajɛ á. Oŋmá ɔdā nɛ̄ ó yá nyā, ōcē obɔ̄bí nōo yɔ̄ ī ŋmó ācɛ kú Ísrɛ̄lu ā mɛ.

⁹Amáŋ gbɔbū lɛ eko nyā ā, ōcē ā lɛ ācɛ úlā ofɛɛtá (24,000) ŋmó ɛɛ́.

¹⁰Anɔ́ɔ Óndú ā da Umósīsi kahíníī,

¹¹“Ohígbū ɔdā nɛ̄ Ufínɛ̄hasi, ɔyɔ́ɔ́yí kú Árɔ̄ni, ɔ̄cogwɛ́ɛya ā yá nyā, ń klla gáā cɔ̄nū mla ācɛ kú Ísrɛ̄lu ɛ́ɛ́ gɛ ŋ́. Ó tá ka anúɔ í gbā ɔwɔ ɔhá ɛ̄gbā ŋ́, ń táafú ayíka ami ōfōōfūnū um. Ɔdā nōo yá ɛ́ɛ́ nɛ̄ ń kpó uwā yíífi ipú ánya mɛ́mla ícɔnū kú um ŋ́ má yɔ̄ abɔ́ɔ á.

¹²Le da ɔ́ ka, n le okónu ce lɛ ɔ́ ka n géē yɔ̄ mla anú piyóó ipú ɛcɛ nyā ā.

¹³Anú mɛ́mla ipɔ́ɔma kú nū géē wɛ ācogwɛ́ɛya kú um piyóó. Ohígbū kēé cɛ̄ ká ācɛ kú Ísrɛ̄lu kéē gbā ɔwɔ ɔhá ɛ̄gbā ŋ́. Ó klla cɛ̄ gā um kwú íne nɛ̄ ācɛ ɔlɛ́ um Ísrɛ̄lu, bīya ā í yá uwā ɛhi.”

¹⁴Ɔ̄cɛnyīlɔ kú Ísrɛ̄lu nɛ̄ ó ŋmó mɛ́mla ɔ̄cɛnya kú Umídīyan ā wɛ Usímīri, ɔyí kú Usálu, otrɛ̄yí kú ipɔ́ɔma kú Usímīyɔ̄n.

¹⁵Ɔ̄ncɛnyā ā wɛ Ukɔ́sibi, ɔyí kú Úsɔ nɛ̄ ádā nū wɛ otrɛ̄yí kú ígwu éyi kú ipɔ́ɔma kú ācɛ Umídīyan ā.

¹⁶Óndú ā da Umósīsi kahíníī,

¹⁷“Cāŋjɛ kú ā lɛ ācɛ kú Umídīyan ā kpó yíífi,

¹⁸ohígbū ɔdōbɔ̄bí nēé yá aá eko nēé plla aá ajɛ kú Upéyɔ ā mɛ́mla ohígbū Ukɔ́sībi, ɔyínɔ̄nyā nēé ŋmó eko kú ōcē obɔ̄bí ā.”