Read idoma ÁLUKA 26 Bible Online

ÁLUKA 26 - idoma bible

ÁLUKA 26

¹Igbīhi kú ōcē obɔ̄bí ā, Óndú ā kɛlā lɛ Umósīsi mɛ́mla Ɛlísa, ɔyí kú Árɔ̄ni ā kahíníī,

²“Lɛ odúúdu ācɛ kú Ísrɛ̄lu, nēe wɛ iháyí ofu gicō ā, nēe lɔfú ga ɔgbɛ́fú glá ɛɛ́ mā gbaáluka ipɔ́ɔma ipɔ́ɔma.”

³Umósīsi mɛ́mla Ɛlísa, ɔ̄cogwɛ́ɛya ā le ɛlā ā ka lɛ ācɛ Ísrɛ̄lu ā. Anɔ́ɔ é le uwá túbá ɔpɛ́ kú Umówābu, okónu ísu kú Ujɔ́dan ɛgiyí Ujɛ́rīko ā. Anɔ́ɔ é kahíníī,

⁴“Aá lɛ ācɛ nēe wɛ iháyí ofu gɔbū, nēe lɔfú ga ɔgbɛ́fú glá ā gbaáluka, ɛ́gɛ́nɛ̄ Óndú ā da Umósīsi lɛ ā.” Ācɛ kú Ísrɛ̄lu nēe bɛ̄cɛ ŋmá ajɛ kú Íjīpiti ā wɛ:

⁵Ipɔ́ɔma kú Urúbɛn (Urúbɛn ɔyí aflɛ́yí kú Ujékɔ̄p u), ipɔ́ɔnū kú ɔlɛ́ Uhánɔ̄ku, mɛ́mla Upálu,

⁶Uhɛ́srɔn mɛ́mla Ukarími.

⁷Áluka kú ayí kú Urúbɛ̄n ā wɛ úlā ofɛhɔ̄ ce ula ahāanɛ ce ofɛhīlī ce igwo (43,730).

⁸Ayáyí kú ɔlɛ́ Upálu ā wɛ Ɛlíyābu,

⁹ayí nū nɔ̄nyīlɔ wɛ Unémūwɛlu mɛ́mla Udátan, mɛ́mla Abíram. Udátan mɛ́mla Abíram wɛ ācɛ nɛ̄ ācɛ Ísrɛ̄lu fu á. É le īkpɛ̄yí olɔfú yá tá Umósīsi mɛ́mla Árɔ̄ni nyɔ̄ í wɛ ígwu obɔ̄bí kú Ukɔ́ra eko nēé gē yá īkpɛ̄yí olɔfú tá Óndú ā.

¹⁰Ajɛ le okónu nwūla kwú uwā ú kpó mulɛ nēé le pɛ́ gekwú mla Ukɔ́ra mɛ́mla ígwu kú uwā eko nɛ̄ ɔlá kú Óndú ā je ācɛ ofu igwɛ́ɛpa ce igwó kpó yíífi ā. Ɛ̄nyā ā le pīya ahɔ̄ nēé pi ayí kú Ísrɛ̄lu anú á.

¹¹Amáŋ, é ŋmó ayí kú Ukɔ́ra ŋ́.

¹²Ipɔ́ɔma kú Usímīyɔni ā wɛ ipɔ́ɔnū kú, Unémūwɛlu, Ujámín, Ujakín mɛ́mla,

¹³Uséra mɛ́mla Ussɔ́lu.

¹⁴Ɛwa kú uwā wɛ úlā ofɛpa ce úlā igwɛ́ɛhɔ̄ ce ofigwó (22,200).

¹⁵Ipɔ́ɔma kú Ugádi ā wɛ ipɔ́ɔnū kú, Usɛ́fɔni, Uhággi, Ussúni,

¹⁶Ósini, Ɛ́ri,

¹⁷Árɔdu, mɛ́mla Arɛ́li.

¹⁸Áluka kú uwā wɛ, úlā ofɛhɔ̄ ce úlā éyi ce ofu igwó (40,500).

¹⁹Ipɔ́ɔma kú Ujúda ā wɛ ipɔ́ɔnū kú, Ɛ́ru mɛ́mla Ónan, amáŋ Ɛ́ru mɛ́mla Ónan le pɛ́ gekwú ipú ajɛ kú Ukénan.

²⁰Ayí kú Ujúda ipú ipɔ́ɔnū ipɔ́ɔnū kú uwā bá yɔ̄ á: Ussɛ́la, Upéres, Uséra, Usera, Uhísrɔn, mɛ́mla Uhámul.

²¹

²²Áluka kú uwa wɛ, úlā ofu ahāanɛ ce úlā éyi ce ofɛhɔ̄ (76,500).

²³Ipɔ́ɔma kú Íssāka ā wɛ ipɔ́ɔnū kú, Utóla mɛ́mla Upúwah,

²⁴Ujássūbu mɛ́mla Ussímrɔn.

²⁵Áluka kú uwā wɛ, úlā ofu ahātá ce ofu igwɛ́ɛhɔ̄ (64,300).

²⁶Ipɔ́ɔma kú Usébūlɔn wɛ aípɔ́ɔnū kú Usérēdi, Ɛ́lɔ̄n, Ujahlíli.

²⁷Áluka kú uwā wɛ úlā ofu ahāapa ce úlā igwóléyi ce ofɛhɔ̄ (60,500).

²⁸Ipɔ́ɔma kú Ujósɛ̄fu, nōo wɛ ádā kú ayí nū ɛpa ā, Umanásɛ mɛ́mla Ɛ́frem ā.

²⁹Ipɔ́ɔma kú Umanásɛ ā wɛ, Umáciru, ɔyí kú Umanásɛ nōo wɛ ádā kú Ugílɛ̄di ā mɛ́mla ayí kú aípɔ́ɔnū nyā ā.

³⁰Aípɔ́ɔnū kú Iyésā mɛ́mla Uhɛ́lɛ̄ki mɛ́mla,

³¹Asriyɛ̄lu mɛ́mla Ussɛ́kɛmu,

³²Ussɛmída mɛ́mla Uhɛ́fa.

³³Usɛlófɛ̄hadi ɔyí kú Uhɛ́fa ā í lɛ ayí nɔ̄nyilɔ ŋ́, ayínɔ̄nyā ōfōōfūnū nɛ̄ ó lɛ á. Iyē kú uwā wɛ, Umáhla, Unɔ́wa, Uhɔ́gila, Umílka mɛ́mla Utɛ́sa.

³⁴Áluka kú uwā wɛ úlā ofɛhīlī ce úlā igwóléyi ce ofu igwɛ́ɛhɔ̄ (52,700).

³⁵Ipɔ́ɔma kú Ɛ́frēm wɛ ípɔ́ɔ́nū kú, Ussutɛ́lah, Ubɛ́ka mɛ́mla Utáhan.

³⁶Ipɔ́ɔ́nū kú Erán wɛ ayí kú Ussutéla.

³⁷Áluka kú uwā wɛ úlā ofu ɛnɛ ce úlá éyi ce ofɛhɔ̄ (32,500).

³⁸Ipɔ́ɔma kú Ubɛ́njamīn wɛ ipɔ́ɔ́nū kú Ubɛ́la, Ássibɛ́lu mɛ́mla Ahíram

³⁹Ussifúfam mɛ́mla Uhúfam.

⁴⁰Ipɔ́ɔ́nū kú Ádi mɛ́mla Unaámani wɛ ayí kú Ubɛ́la.

⁴¹Áluka kú uwā wɛ úlā ofu ɛhɔ̄ ce úlā igwɛ́ɛnɛ (42,600).

⁴²Ipɔ́ɔma kú Udán wɛ ipɔ́ɔnū kú Ussɔ́ham.

⁴³Áluka kú uwā wɛ úlā ofu ahātá ce úlā éyi (64,400).

⁴⁴Ipɔ́ɔma kú Ássa wɛ ipɔ́ɔnū kú, Ímnah Íssifi mɛ́mla Ubɛríya.

⁴⁵Aípɔ́ɔnū kú Uhɛ́ba mɛ́mla Umálkīyɛlu wɛ ayí kú Ubɛríya.

⁴⁶Ássa lɛ ɔyínɔ̄nyā éyi nōo lé ka Usɛ́ra.

⁴⁷Áluka kú uwā wɛ úlā ofɛhīlī ce úlā ɛtá ce ofigwó (53,400).

⁴⁸Ipɔ́ɔma kú Unáfutāli wɛ ipɔ́ɔnū kú, Ujasíílu mɛ́mla Ugúni,

⁴⁹Ujésa mɛ́mla Ussílɛm.

⁵⁰Áluka kú uwā wɛ, úlā ofu ɛhɔ̄ ce úlā ɛtá ce ofu igwó (45,400).

⁵¹Opīyatɔ̄há kú áluka kú ɛwa kú odúúdu ācɛ Ísrɛ̄lu ā wɛ, úlā bá ɛga úlā ɛtá, ce úlā ofu igwɛ́ɛhɔ̄ ce úlā ɛnɛ, ce ofu cigwó (601,730).

⁵²Óndú ā da Umósīsi kahíníī,

⁵³“Lɛ ajɛ ā kɔ̄ lɛ aípɔ́ɔma ā, ɛ́gɛ́nɛ̄ ɛwa kú uwā lɛ ā.

⁵⁴Ipɔ́ɔma nɛ̄hi ā, géē lɛ ajɛ nɛ̄hi. Ipɔ́ɔma nɛ̄ŋ́cɛ́ ā, kē í lɛ ajɛ nɛ̄ŋcɛ́.

⁵⁵Amáŋ a géē bī iyē kú aípɔ́ɔmā ā le tá ūlī kóō lɛ kɔ̄ ajɛ ā.

⁵⁶A géē kɔ̄ ajɛ ā ɛ́gɛ́nɛ̄ ɛwa kú ipɔ́ɔma dóódu lɛ ā.”

⁵⁷Ipɔ́ɔma kú Ulífāyi wɛ aípɔ́ɔnū kú, Ugɛ́ssɔn, Ukɔ́hāti mɛ́mla Umerári.

⁵⁸Ayááyí uwā klla wɛ aípɔ́ɔma kú Ulíbīni, Uhɛ́brɔn, Umáhli, Umússi, mɛ́mla Ukɔ́ra. Ukɔ́hāti wɛ ádā kú Ámram,

⁵⁹nōo lɛ ɔyí nɔ̄nyā kú Ulífāyi, nōo lé ka Ujókɛ̄bɛdi, nēé ma ajɛ kú Íjīpiti ā. Ó má ayí ɛpa lɛ Ámram, Árɔ̄ni mɛ́mla Umósīsi, mɛ́mla ɔyí nɔ̄nyā éyi nēé hī ka Umíriyam.

⁶⁰Árɔ̄ni ma ayí ɛnɛ, Unádābu, Abíhu, Ɛlísa mɛ́mla Utáma

⁶¹Unádābu mɛ́mla Abíhu le pɛ́ gekwú eko nēé je ɔlá nɛ̄ ó tīihɔ ŋ́ mā lɛ Óndú ā.

⁶²Áluka kú ācɛnyīlɔ kú ipɔ́ɔma kú Ulífāyi nēe ŋmá ɔyā éyi gɔbū ā wɛ úlā ofu ɛpa ce úlā igwáahāapa ce ofu igwó (23,000). É le uwā kɔ̄ ɛyɛ́ɛyɛ́yí hī ācɛ kú Ísrɛ̄lu o hile ā tá, ohígbū kaé gáā je ajɛ lɛ uwá ipú ayí kú Ísrɛ̄lu ŋ́.

⁶³Umósīsi mɛ́mla Ɛlísa le odúúdu ācɛ kú Ísrɛ̄lu ā gbaáluka klla le iyē kú uwā tá tū ɔkpá ɔpɛ́ kú Umówābu, okónu ísu kú Ujɔ́dan ā ŋmá Ujɛ́rīko.

⁶⁴Ɔ̄cɛ dúúmā í hile nɛ̄ Umósīsi mɛ́mla Árɔ̄ni í gbo ɔ́ áluka eko kú ācɛ ō gbaáluka kú aflɛ́yí ā ŋ́ nɛ̄ ŋ́.

⁶⁵Óndú ā le da uwá ka, odúúdu uwā géē pɛ́kwú ipú ígbíli, ayíka Ukálɛ̄bu, ɔyí kú Ujɛ́fūnɛ mɛ́mla Ujóssuwa, ɔyí kú Unún, ōfōōfū uwā ɛ́ɛ géē ga ajɛ ā á, amáŋ odúúdu ācɛ o hile ā ɛ́ɛ géē pɛ́kwú.