Read idoma ÁLUKA 27 Bible Online

ÁLUKA 27 - idoma bible

ÁLUKA 27

¹Umálah, Unówa, Uhɔ́gila, Umílka, mɛ́mla Utɛ́sah wɛ ayínɔ̄nyā kú Usɛ́lōfɛhadi, ɔyí kú Uhɛ́fa kú Ugílɛ̄di, ɔyí kú Umácīru, ɔyí kú Umanásɛ, ɔyí kú Ujósɛ̄fu ā.

²É gaá háyi ɛgiyí Umósīsi mɛ́mla Ɛlísa, ɔ̄cogwɛ́ɛya ā, mɛ́mla anyākwɔ́cɛ mɛ́mla ójila kú Ísrɛ̄lu ā okómpinu kú Áklɔ̄kpīihɔ ā, anɔ́ɔ é kahíníī,

³“Ádā alɔ gekwú ipú ígbíli, ó ma ɔyínɔ̄nyīlɔ dúúmā ŋ́, ó wɛ ígwu kú Ukɔ́ra nōo yíīkpɛ̄yí olɔfú tá Óndú ā ŋ́, ó kwú ohígbū íne nɛ̄ ó bīya abɔ̄yī nū.

⁴Ɔdíyá nɛ̄ iyē kú ádā alɔ cíkā ō bí ŋmá ipú ācɛ kú Ísrɛ̄lu ā? Ohígbū ka abɔ̄ ó ma ɔyínɔ̄nyīlɔ dúúmā ŋ́ mā nɛɛ. Aá lɛ ajɛ je lɛ alɔ pi aɔ́máapú kú ádā alɔ.”

⁵Umósīsi kwú ɛlā kú uwā ú gé lɛ Óndú ā.

⁶Anɔ́ɔ Óndú ā da ɔ́ kahíníī,

⁷“Ɛlā nɛ̄ ayínɔ̄nya kú Usɛ́lōfɛhadi ka ā le kpaakpa. Aá lɛ ajɛ je lɛ uwá pī aɔ́máapú kú ádā uwā, kú úgwū kú ádā uwā kóō wɛ ákú uwā.

⁸Lɛ ka lɛ ācɛ kú Ísrɛ̄lu ka, eko dúúmā nɛ̄ ɔ̄cɛ gekwú nɛ̄ ó ma ɔyínɔ̄nyilɔ ŋ́, ayínɔ̄nyā kú nū géē lé úgwū kú nū piíí á.

⁹Ɔ́dāŋ ka ó lɛ ayínɔ̄nyā ŋ́, ayínɛ̄ nū nɔ̄nyīlɔ ā géē lé úgwū kú nū.

¹⁰Ɔ́dāŋ kōó lɛ ayínɛ́ nɔ̄nyilɔ dúúmā ŋ́, ɔmáapú nū nōo kwu ɔ́ ajaajɛ fíyɛ́ ā, géē lé úgwū kú nū.

¹¹Ācɛ kú Ísrɛ̄lu géē lɛ íne nyā tū piyóó ipú ɛcɛ nyā. Ami nōo wɛ Óndú ā kɛlā nyā á.”

¹²Óndú ā da Umósīsi ka, “Nyɔ̄ gicɔ̄ ɛfu kú Abarím kú ā gaá lɛ ajɛ nɛ̄ n géē je lɛ ācɛ kú Ísrɛ̄lu ā má

¹³Eko nāa lɛ ɔ́ má kwɛyí, a géē kwú bɛ̄ɛka Árɔ̄ni, ɔyínɛ́ uwɔ ā.

¹⁴Ohígbū ka aá ɛpɛlɛ́ɛpa í lɛyí táajɛ lɛ íne kú um ipú ígbíli kú Usíni ā ŋ́. Eko nɛ̄ ācɛ kú Ísrɛ̄lu ka iŋini tú um ohígbū éŋkpɔ̄ kú Umɛ́rība ā. Aá tá ō ma ɔfú otīihɔ kú um ā fú ipéyī ācɛ ā.”

¹⁵Anɔ́ɔ Umósīsi gbɔ̄ɔkɔ lɛ Óndú ā kahíníī,

¹⁶“Óndú, Ɔwɔicō ohútu mɛ́mla okwutɛ kú oyēeyī, n gē gbɔ̄ɔkɔ gā uwɔ, lɛ ɔ̄cɛ éyi fu, nōo géē wɛ otrɛ̄yí kú uwā,

¹⁷nōo géē kpó uwā trɛ̄yí eko nēé í kpɛ́fú, cɛ́ɛ́ kú ójila kú ācɛ kú uwɔ ā kéē híī lɛbɛ̄ɛka aálá nēé lɛ ɔ̄cɛ nōo gē gbo uwā ŋ́ mā ŋ́.”

¹⁸Óndú ā da Umósīsi kahíníī, “Kwú Ujóssuwa, ɔyí kú Unɔ́n ú, ɔ̄cɛ nōo lɔfú kwɛyí uwɔ glá, cɛ́ɛ́ kú ā lɛ abɔ̄ kú uwɔ kpó ce ɔ́ ɛyí

¹⁹Kwú ɔ̄ ú háyi iyɔ̄bū kú Ɛlísa, ɔ̄cogwɛ́ɛya ā mɛ́mla odúúdu ójila kú ācɛ Ísrɛ̄lu. Káā lɛ ka lɛ uwá abɔ́ɔ ka anú ɔ́ɔ kwɛyí anúɔ mɛ́ɛ̄ á.

²⁰Lɛ íkwu mɛ́mla ɔfú kú uwɔ ōhī kpó lɛ ɔ́, cɛ́ɛ́ kú ójila kú Ísrɛ̄lu ā géē lɛyítáajɛ lɛ ɔ́.

²¹Ó géē gboló ce Ɛlísa, ɔ̄cogwɛ́ɛya ā, nōo géē yɔ̄ ī jé ɔtū kú um oŋmá lɛ o tá ūlī kú Úrim mɛ́mla Utúmim[4] Ɔwɛ nyā, cɛ́ɛ́ Ɛlísa géē bī Ujóssuwa mɛ́mla odúúdú ójila kú ācɛ Ísrɛ̄lu jé ɔdā dóódu nēé gáā yá ā.

²²Umósīsi le yá ɛ́gɛ́nɛ̄ Óndú ā da ɔ́ ā. Ó cɛ̄ lɛ Ujóssuwa wā í háyi iyɔ̄bū kú Ɛlísa, ɔ̄cogwɛ́ɛya ā mɛ́mla odúúdu ójila kú ācɛ Ísrɛ̄lu.

²³Ɛ́gɛ́nɛ̄ Óndú ā ka lɛ ā, Umósīsi lɛ abɔ̄ kpó ce ɔ́ ɛyí, le ka lɛ odúúdu ācɛ ā ka Ujóssuwa ɔ́ɔ kwɛyí anúɔ mɛ́ɛ̄ á.”