Read idoma ÁLUKA 28 Bible Online

ÁLUKA 28 - idoma bible

ÁLUKA 28

¹Óndú ā da Umósīsi ka,

²“Lɛ ka lɛ ācɛ kú Ísrɛ̄lu ka eko dóódu nɛ̄ eko kú ucɛ mɛ́mla eko ɛ̄gbā ā lɛ yá, é géē bī ɔdā kú ɛ̄gbā gé um ɛ́gɛ́nɛ̄ ō he um ɔtū ā.

³Ɛ̄nyā wɛ ɛya kú ɔdōlé nɛ̄ aá géē bī gé lɛ Óndú ā á, o ka lɛyíkwu ɔdā ɛya o yɔlá dúúdú kú ɛ̄cī dóódu ā, aá géē bī ɔyí omlede kú iháyí éyi nɛ̄ ó le ɛnyá ŋ́.

⁴Kwú ɔyí omlede éyi ā ú gwɛ́ɛya ɔ̄cɔ̄ɔ̄cī, cɛ́ɛ́ a klla kwú ɔhá ā ú gwɛ́ɛya ɔ̄nɔ̄ɔ̄nɛ̄.

⁵Ɔnyɔɔnyɛ kú uwā kóō wā mla umu kú īkpɔ̄dā kú okoolo éyi nēé le wīya tɔ̄há mla ɔjá nɛ̄ŋcɛ́ kú anɔ̄ ólífu.

⁶Ɛ̄nyā wɛ ɔdā kú ɛya nēé géē yɔ̄ ī gwó ɛ̄cī dóódu, nēe géē je ɔ́ yɔlá dúúdú, nēé kē wɛ ɛya nēé gwó aflɛ́yí ɛyí ɛfu kú Usáyínāyi, nɛ̄ ocu kú nū he Óndú ā ɔtū.

⁷A géē pīya ɔjá nɛ̄ŋcɛ́ éyi kú ejé klá ɛyí ede ā mɛ́mla ɛya kú ɔyí omlede kú aflɛ́yí ā.

⁸Ɔ̄nɔ̄ɔ̄nɛ̄, a kwú ɔyí omlede ɔ́mpa ā ú gwɛ́ɛya ɔwɛ ékpónú nāa yá ákú ɔ̄cɔ̄ɔ̄cī ā, mɛ́mla ejé ā dúú. Ó géē wɛ ɛya kú ɔdōlé, ocu kú nū í he Óndú ā ɔtū.”

⁹Ɛ̄cī Usábāti ā aá lɛ ɔyí omlede ɛpa kú iháyí éyi nɛ̄ ó lɛ ɛnyá ŋ́ mā kpó gwɛ́ɛya mɛ́mla okoolo ɛpa kú umu kú īkpɔ̄dā nēé le ɔ́ wīya mla anɔ̄ kú ólīfu kóō wɛ ɛyá kú īkpɔ̄dā mɛ́mla ɛya kú ejé.

¹⁰Aá géē gwɛ́ɛya nyā ɛ̄cī Usábāti dóódu mɛ́mla ɛya nɛ̄ aá í gwó ɛ̄cī dóódu mɛ́mla ejé kú nū ā.

¹¹Ɛ̄cī aflɛ́yí kú ɔyā dóódu, aá lɛ ɔyí ɔbá ɛna ɛpa, omlede éyi, mɛ́mla aálá ahāapa kú iháyí éyi nɛ̄ ó lɛ ɛnyá dúúmā ŋ́ mā, kpó gwɛ́ɛya o yɔlá dúúdú lɛ Óndú ā.

¹²Ákú ɛya kú īkpɔ̄dā ā, aá lɛ umu nēé le ɔ́ wīya tɔ̄há mla anɔ̄ kú ólífu ā, gwɛ́ɛya. Ɛna dóódu kú ɛya ā kóō wā mla okoolo kú umu ɛtá. Omlede dóódu kóō wā mla okoolo kú umu éyi.

¹³Okoolo éyi kú umu kóō wā mla ɔyí omlede kú iháyí éyi eko dóódu. Ocu kú ɛya o yɔlá dúúdú nyā géē he Óndú ā ɔtū.

¹⁴Aá géē bī ɔja nɛ̄ŋcɛ́ kú ejé ɛpa mɛ́mla ɔbá ɛna dóódu, ɔjá nɛ̄ŋcɛ́ éyi ce āyā kú ejé mɛ́mla omlede éyééye. Aá géē lɛ íne kú ɛya ō gwó kú ɛci aflɛ́yí kú ɔyā ā tū piyóó ipú ɛcɛ nyā.

¹⁵Aá kwú opī éyi ú gwɛ́ɛya kú íne ōbīya, eko dóódu nɛ̄ aá gē gwɛ́ɛya kú ɛ̄cī dóódu ā.

¹⁶Aá géē yá ucɛ kú onyatá kú Óndú ā, ɛ̄cī igwɛ́ɛnɛ kú ɔyā éyi

¹⁷Ɛ̄cī ɔ́migwɛ́ɛhɔ̄ ā, ucɛ ā gbɔɔ́, ó kē ī lé ɛ̄cī ahāapa. Eko ɔ́ɔmā, igbō nɛ̄ ó gē nū ŋ́ mā nɛ̄ aá gáā lé á.

¹⁸Ɛ̄cī aflɛ́yí kú ucɛ ā, aá géē jīla tɔ̄ɔ̄há nɛ̄ aá í gbɔ̄ɔkɔ. Ɔ̄cɛ dúúmā í gáā yúklɔ́ ɛ̄cī ɔ́ɔmā ŋ́.

¹⁹Aá lɛ ɔbá ɛna ɛpa, mɛ́mla omlede éyi, mɛ́mla álá ahāapa kú iháyí éyi nēé lɛ ɛcá dúúmā ŋ́ mā, gwɛ́ɛɛya o yɔlá dúúdú kóō wɛ ɛya kú ɔdōlé lɛ Óndú ā.

²⁰Ɛya kú īkpɔ̄dā ā í wɛ umu nēé le anɔ̄ kú ólīfu tū ɔ̄, okoolo ɛtá kú umu mɛ́mla ɔbá ɛna éyi, okoolo kú umu ɛpa mɛ́mla ɔyí omlede ā.

²¹Okoolo éyi mɛ́mla ɔyí omlede kú iháyí éyééye.

²²Aá klla í je opī éyi gwɛ́ɛya kú ínoōbīya, cɛ́ɛ́ aá bī ɔwɛ nyā lɛ uculo kú iyē ō gwu kú ācɛ ā yá dúú.

²³Aá géē yá ɛ̄nyā mɛ́mla ɛya o yɔlá dúúdú ɔ̄cɔ̄ɔ̄cī dóódu.

²⁴Aá géē gwó ɛdɔ ɛya ɛ́gɛ́nyā lɛ Óndú ā, ɛ̄cī ahāapa. Ocu kú nū í he Óndú ā ɔtū. Aá í gwɛ́ɛya kú ejé aā ɛ̄cī dóódu dúú.

²⁵Aá le jīla ɛ̄cī ɔ́maahāapa kú ɔkɔ ō gbā. Ɔ̄cɛ dúúmā kóō híī yúklɔ́ ɛ̄cī ɔ́maahāapa ā ŋ́ dúú.

²⁶Aá géē gwɛ́ɛya kú īkpɔ̄dɛ̄hɔ̄ ɛ̄yīpɛ̄ ō cē lɛ Óndú ā, eko kú ucɛ kú ɔdɛ̄hɔ̄ ō cē ā. Aá géē túbá kú ɔkɔ ō gbā, ɔ̄cɛ dúúmā í gáā yúklɔ́ dúúmā ɛ̄cī ɔ́ɔmā ŋ́.

²⁷Aá lɛ ɛdrɔ́ ɔbá ɛna ɛpa, omlede éyi, mɛ́mla ɔyí omlede kú iháyí éyi ahāapa kú iháyí éyi nēé lɛ ɛnyá ŋ́, gwɛ́ɛya o yɔlá dúúdú lɛ Óndú ā. Ocu kú nū í he Óndú ɔtū.

²⁸Ɛya kú īkpɔ̄dā ā í wɛ, umu kú īkpɔ̄dā nēé le anɔ̄ kú ólīfu tū ɔ̄ ā. Okoolo ɛtá kú umu mla ɔbá ɛna dóódu, okoolo ɛpa kú umu mɛ́mla omlede éyééye.

²⁹Éyi ŋmá ipú igwó kú umu mɛ́mla omlede éyééye.

³⁰Kwú opi éyi ú gwɛ́ɛya kú ínoōbīya, cɛ́ɛ́ a bī ɔwɛ nyā lɛ uculo kú iyē ō gwu kú ācɛ ā mɛ́mla awɔ abɔ̄yī uwɔ yá dúú.

³¹Aá í yá ɛ̄nyā mɛ́mla ɛya kú ejé, mɛ́mla ɛya o yɔlá dúúdú ɛ̄cī dóódu kú aá.