Read idoma ÁLUKA 29 Bible Online

ÁLUKA 29 - idoma bible

ÁLUKA 29

¹Ɛ̄cī aflɛ́yí kú ɔyā ahāapa ā, aá géē jīla tɔ̄há kú aá gbā Ɔwɔicō ɛ̄gbā. Ɔ̄cɛ dúúmā í gáā yúklɔ́ ɛ̄cī ɔ́ɔmā ŋ́. Ɛ̄cī ɔ́ɔmā, í wɛ ɛ̄cī nēé í tá opo.

²Aá géē je ɛdrɔ́ kú ɔbá ɛna éyi, omlede éyi mɛ́mla ɔyí omlede éyi nɛ̄ ó lɛ ɛnyá ŋ́, kpó gwɛ́ɛya o yɔlá dúúdú lɛ Óndú ā.

³Aá í gwɛ́ɛya kú umu kú īkpɔ̄dā nēé le anɔ̄ kú ólīfu tū ɔ̄ mɛ́mla okoolo ɛtá kú umu kú īkpɔ̄dā mɛ́mla ɔbá ɛna ā. Okoolo ɛpa kú umu mɛ́mla omlede ā,

⁴mɛ́mla okoolo éyi kú umu mɛ́mla ɔyí omlede éyééye.

⁵Aá klla géē je opī éyi gwɛ́ɛya kú ínoōbīya, cɛ́ɛ́ aá bī ɔwɛ nyā lɛ uculo kú iyē ō gwu kú ācɛ ā yá béekpóó.

⁶Aá géē yá ɛ̄nyā mla ɛya o yɔlá dúúdú kú ɛci aflɛ́yí kú ɔyā a, mɛ́mla ɛya o yɔlá dúúdú kú ɛ̄cī dóódu ā. Aá klla géē gwɛ́ɛya kú īkpɔ̄dā mɛ́mla ákú ejé dúú. Ocu kú nū í he Óndú ɔtū.

⁷Aá géē jīla tɔ̄ɔ̄há kú ɛ̄gbā ō gbā Ɔwɔicō kú ɛ̄cī ɔ́migwó kú ɔyā ɔ́maahāapa. Ɔ̄cɛ dúúmā í gáā lé ɔdōlé ɛ́ɛ́ nɛ̄ ó gē yúklɔ́ ŋ́.

⁸Aa géē bī ɛdrɔ́ kú ɔbá ɛna mɛ́mla omlede éyi mɛ́mla aómlede kú iháyí éyi nɛ̄ ó lɛ ɛnyá ŋ́ aháapa lɛ gwɛ́ɛya o yɔlá dúúdú lɛ Óndú ā.

⁹Aá géē gwɛ́ɛya kú umu kú īkpɔ̄dā nēé lɛ anɔ̄ kú ólífu tū ɔ̄. Okoolo ɛtá kú umu mla ɔbá ɛna éyi, ɛpa ŋmá ipu igwó kú umu mla omlede éyi.

¹⁰Aá klla í bī okoolo éyī mɛ́mla ɔyí omlede éyééye.

¹¹Aá í je opī éyi gwɛ́ɛya kú ínoōbīya, mɛ́mla ɛwū nēé je gwɛ́ɛya kú iyē ō gwu kú ācɛ ā dúú. Aá géē gwɛ́ɛya o yɔlá dúúdú kú ɛ̄cī dóódu ā mɛ́mla ɛya kú īkpɔ̄dā mla ɛya kú ejé.

¹²Aá lɛ túbá ɛ̄cī ɔ́migwɛ́ɛhɔ̄ kú ɔyā ahāapa kú aá gbā Ɔwɔicō ɛ̄gbā. Aá í yá ucɛ nyā lɛ Óndú ā ɛ̄cī ahāapa, ɔ̄cɛ dúúmā í gáā yúklɔ́ ɛ̄cī ɔ́ɔmā ŋ́.

¹³Ɛ̄cī aflɛ́yí kú ucɛ ā, aa géē kpó ɛdrɔ́ kú ɔbá ɛna igwɛ́ɛtā, mɛ́mla aómlede ɛpa, mɛ́mla ayí omlede igwɛ́ɛnɛ kú iháyí éyi nēé lɛ ɛnyá ŋ́,

¹⁴gwɛ́ɛya o yɔlá dúúdú lɛ Óndú ā. Aá í je umu kú īkpɔ̄dā nēé wīya tɔ̄há mla anɔ̄ kú ólīfu, okoolo ɛtá gwɛ́ɛya mla ɔbá ɛna éyééye. Aá í lɛ okoolo ɛpa kú umu gwɛ́ɛya mla omlede éyééye.

¹⁵Aá klla í bī okoolo éyi kú umu mla omlede éyééye mɛ́mla ɛ̄jīla kú ejé nōo cɛgbá ā.

¹⁶Aá géē je opī éyi gwɛ́ɛya kú ínoōbīya. Aá klla géē gwɛ́ɛya nyā tɔ̄há mla ɛya kú ɔdā ɛ̄gbā ō je yɔlá dúúdú nēé gē gwó ɛ̄cī dóódu ā, mɛ́mla ɛya kú īkpɔ̄dā mɛ́mla ákú ejé ā.

¹⁷Ɛ̄cī ɔ́mpa kú ucɛ ā, aá géē je ɛdrɔ́ kú aɔ́bá ɛna igwɛ́ɛpa, omlede ɛpa, omlede kú iháyí éyi nēé lɛ ɛnyá ŋ́, igwɛ́ɛnɛ kpó gwɛ́ɛya.

¹⁸Aá í lɛ odúúdú aɔ́dā ɛ̄gbā kú īkpɔ̄dā ā,

¹⁹mɛ́mla ɛya kú aɔ́bá ɛna, ákú aómlede ɛ́gɛ́nɛ̄ ó lɛ ɛ̄cī aflɛ́yí ā.

²⁰Ɛ̄cī ɔ́mɛ́ɛtá kú ucɛ ā, aá kpó aɛ́drɔ́ kú ɔbá ɛna igwóléyi, aómlede ɛpa, mɛ́mla ayí omlede kú iháyí éyi nēé lɛ ɛnyá ŋ́ igwɛ́ɛnɛ gwɛ́ɛya.

²¹Mɛ́mla ɔdā ɛ̄gbā kú īkpɔ̄dā.

²²Mɛ́mla ɔdā ɛ̄gbā kú ejé bɛ̄ɛka ákú ɛ̄cī kú aflɛ́yí kú ucɛ ā.

²³Ɛ̄cī ɔ́mɛɛnɛ kú ucɛ ā, aá géē kpó aɛ́drɔ́ kú ɔbá ɛna igwó, aómlede ɛpa, aómlede kú iháyí éyi nēé lɛ ɛnyá ŋ́ igwɛ́ɛnɛ gwɛ́ɛya.

²⁴Mɛ́mla ɔdā ɛ̄gbā kú īkpɔ̄dā,

²⁵mɛ́mla aɔ́dā ɛ̄gbā kú ejé ā bɛ̄ɛka ákú ɛ̄cī aflɛ́yí ā.

²⁶Ɛ̄cī ɔ́mɛɛhɔ̄ kú ucɛ ā, aá géē kpó aɛ́drɔ́ kú ɔbá ɛna ahāanɛ, aómlede ɛpa, aómlede kú iháyí éyi nēé lɛ ɛnyá ŋ́ igwɛ́ɛnɛ gwɛ́ɛya,

²⁷mɛ́mla aɔ́dā ɛ̄gbā kú īkpɔ̄dā.

²⁸Mɛ́mla aɔ́dā ɛ̄gbā kú ejé bɛ̄ɛka ákú ɛ̄cī aflɛ́yí ā.

²⁹Ɛ̄cī ɔ́mɛɛhīlī kú ucɛ ā, aá géē kpó aɛ́drɔ́ kú ɔbá ɛna ahātá, aómlede ɛpa, mɛ́mla aómlede kú iháyí éyi nēé lɛ ɛnyá ŋ́ gwɛ́ɛya,

³⁰mɛ́mla aɔ́dā ɛ̄gbā kú īkpɔ̄dā,

³¹mɛ́mla aɔ́dā ɛ̄gbā kú ejé bɛ̄ɛka ákú ɛ̄cī aflɛ́yí ā.

³²Ɛ̄cī ɔ́mahāapa kú ucɛ ā, aá lɛ aɛ́drɔ́ kú ɔbá ɛna ahāapa, aómlede ɛpa, mɛ́mla aómlede kú iháyí éyi nēé lɛ ɛnyá ŋ́ gwɛ́ɛya.

³³Mɛ́mla aɔ́dā ɛ̄gbā kú īkpɔ̄dā,

³⁴Mɛ́mla aɔ́dā ɛ̄gbā kú ejé bɛ̄ɛka ákú ɛ̄cī aflɛ́yí ā.

³⁵Ɛ̄cī ɔ́mahātá ā, aá géē jīla kú aá gbā ɔ́wɔicō ɛ̄gbā. Aá híī yúklɔ́ dúúmā ɛ̄cī ɔ́ɔmā ŋ́.

³⁶Aá kwú ɛdrɔ́ kú ɔbá ɛna éyi ú, mɛ́mla omlede éyi, aómlede ahāapa kú iháyí nēé lɛ ɛnyá ŋ́ gwɛ́ɛya o yɔlá dúúdú lɛ Óndú ā. Ocu kú nū í he ɔ́ ɔtū.

³⁷Aá géē gwɛ́ɛya kú īkpɔ̄dā,

³⁸mɛ́mla aɔ́dā ɛ̄gbā kú ejé ā bɛ̄ɛka ákú ɛ̄cī aflɛ́yí kú ucɛ ā.

³⁹Aɛ́nyā wɛ aíne lɛyíkwu ɛya o yɔlá dúúdú, ɛya kú īkpɔ̄dā, ɛya kú ejé, mɛ́mla ɛya nēé ī gwó ohígbū ɛbɔ́ ā lɛ Óndú ā, Ɔwɔicō kú aá, eko nɛ̄ ɛ̄cī ā gā ā. Aɛ́nyā gáā kwɛyí ɛya kóō yá jīla kú okónu ō ce ámāŋ ka ɛya kú ɛbɔ́ kú aá á.

⁴⁰Anɔ́ɔ Umósīsi le odúúdu ɔdā nɛ̄ Óndú ā ka lɛ ɔ́ ā kpó ka lɛ ācɛ kú Ísrɛ̄lu á.