Read idoma ÁLUKA 30 Bible Online

ÁLUKA 30 - idoma bible

ÁLUKA 30

¹Umósīsi da aótrɛ̄yí kú ācɛ kú Ísrɛ̄lu ā kahíníī, “Ɛ̄nyā wɛ íne nɛ̄ Óndú ā je á.

²Eko nɛ̄ ɔ̄cɛ lɛ okónu ce lɛ Óndú ā, ó gáā nyíla okónu nɛ̄ ó ce ā ŋ́, amáŋ ó géē yá ɛ́gɛ́nɛ̄ ó ce okónu lɛ ā.”

³Ɔ́dāŋ ka ɔyípɔ̄nɔ̄nyā nōo táajɛ ɔlɛ́ ádā nū, le oji hɛ́ Óndú ā ká anúɔ í yá odée lɛ ɔ́.

⁴Ó géē yá ɔdā dóódu nɛ̄ ó hɛ́ oji nū lɛ Óndú ā, ń táafú ayíka ádā nū yɔ̄ eko nɛ̄ ó yɔ̄ ī hóoji ā, nɛ̄ ó kē ka ɔdā dúú ŋ́, ó lɛ ā oji ā yɔ̄ ɛ́gɛ́nɛ̄ ó lɛ ā kpɔ́.

⁵Ɔ́dāŋ ka eko nɛ̄ ádā nū le pó, nɛ̄ ó tá ká ɔ̄ híī cē oji nɛ̄ ó hɛ́ ā ŋ́, ó gáā lɛ ɔ́ tū ŋ́. Óndú ā í je yá ɔ̄ ɛhi, ohígbū ka ádā nū tá.

⁶Ɔ́dāŋ ka ɔnyā nɛ̄ ó lɛ ɔbá ŋ́, jégēdē ámāŋ kōō jégēdē ŋ́ lɛ oji hɛ́. Anɔ́ɔ ó gaá lɛ ɔbá lɛ á,

⁷ó géē cē oji nɛ̄ ó hɛ́ Óndú ā piíí, ayíka ɔbá nū ā tá, eko nɛ̄ ó pó oji nɛ̄ ó hɛ́ ā.

⁸Ɔ́dāŋ ka ɔbá nū ā tá ká ɔ̄ híī cē oji ā ŋ́ nɛ, ayíka ó gáā cē ŋ́. Óndú ā í je yá ɔ̄ ɛhi.

⁹Ɔ́dāŋ ka ɔnyōkwū, ámāŋ ka ɔnyā nɛ̄ ɔbá nū tá ɔ̄ lɛ oji hɛ́ Óndú ā, ó géē cē oji ɔ́ɔmā gaajɛ piíí.

¹⁰Ɔ́dāŋ ka ɔnyā ō lɛ ɔbá lɛ oji hɛ́ Óndú ā.

¹¹Ó géē cē oji ā jīla lɛ Óndú ā piíí, ayíka ɔbá nū ā tá, eko nɛ̄ ó pó oji nɛ̄ ó cē ā.

¹²Ɔ́dāŋ ka ɔbá nū lɛ oji nɛ̄ ó hɛ́ ā pó, nɛ̄ ó tá, ká ɔ̄ híī hóoji ŋ́. Ó gáā cē oji ā ŋ́, ohígbū ka ɔbá nū tá, eko nɛ̄ ó pó oji nɛ̄ ó hɛ́ ā. Óndú í je yá ɔ̄ ɛhi.

¹³Ɔbá ɔnyā lɛ íkwu kóō cɛ̄ oji nɛ̄ ɔnyā nū hɛ́ ā, ámāŋ ka oōtá kú oji dóódu nɛ̄ ɔnyā hɛ́ lɛ Óndú ā.

¹⁴Amáŋ eko nɛ̄ ó le oji nɛ̄ ɔnyā nū hɛ́ ā pó, nɛ̄ ó ka ɔdā dúúmā ŋ́, ɔdā dóódu nɛ̄ ɔnyā nū hóoji nū ā, ɔnyā géē yá ɔ̄ jīla lɛ Óndú ā piíí. Ohígbū ka ó pó oji nɛ̄ ɔnyā hɛ́ ā, anɔ́ɔ ó kē ka ɔdā dúúmā ŋ́ mā.

¹⁵Amáŋ igbīhāajɛ nɛ̄ ɔbá ɔnyā ā tá oji nɛ̄ ɔnyā nū hɛ́ Óndú ā, ó géē móōwē kú ínoōbīya, abɔ̄ ó yá oji nɛ̄ ɔnyā hɛ́ ā jila ŋ́ ma.”

¹⁶Ɛ̄nyā wɛ íne nɛ̄ Óndú ā je lɛ Umósīsi kóō je lɛ ācɛ kú Ísrɛ̄lu, Ohígbū okónu ō ce mɛ́mla oji ō hɛ́ lɛ Óndú ā, kú ɔyípɔ̄nɔ̄nyā ō táajɛ ɔlɛ́ ádā nū, mɛ́mla ɔnyōkwū, mɛ́mla ɔnyā nɛ̄ ɔbá nū tá ɔ̄, mɛ́mla ɔnyā ō lɛ ɔbá ā.