Read idoma ÁLUKA 31 Bible Online

ÁLUKA 31 - idoma bible

ÁLUKA 31

²“Lɛ ɔ́ci gwō ācɛ kú Umídiya ohígbū ɔdā nēé yá ācɛ kú Ísrɛ̄lu ā. Eko nāa lɛ ɛ̄nyā yá ā, cɛ́ɛ́ a gekwú.

³Anɔ́ɔ Umósīsi da ācɛ kú Ísrɛ̄lu kéē le tútū kú ɛfú ō kpó, cɛ́ɛ́ kéē nyɔ̄ í lɛ ɔ́ci gwō ācɛ kú Umídīyan ohígbū ɔdā nēé yá Óndú ā.

⁴Ó klla da uwá kéē lɛ ācɛ úlā ɛpa ce ofigwó (1,000) fu ŋmá ipɔ́ɔma kú Ísrɛ̄lu dóódu.”

⁵Eko nēé lɛ ācɛ ā fu ŋmá ipɔ́ɔma dóódu ā, ɛwa kú uwā wɛ úlā ofu ce igwo (12,000).

⁶Umósīsi le uwá tū ga ɔgbɛ́fú, mɛ́mla Ufínɛ̄has, ɔyí kú Ɛlísa, ɔ̄cogwɛ́ɛya ā, nōo gē leyīkwu aɔ́da otīīhɔ mɛ́mla opo ō tá kú eko ɛfú ō kpó ā.

⁷É le ɛfú kpó tá ācɛ Umídīyan ɛ́gɛ́nɛ̄ Óndú ā ka āa. É le odúúdu ācɛnyīlɔ kú uwā kpó ŋmó.

⁸Kwu aɔ́cɛ́ ɛhɔ̄ kú Umídīyan ā: Ɛ́fi, Urɛ́kɛm, Usɔ́ru, Uhɔ́ru mɛ́mla Urɛ́ba. É le Ubálam ɔyí kú Ubéyɔ ŋmó dúú.

⁹Ācɛ kú Ísrɛ̄lu ā, lɛ anyā mɛ́mla ayí kú ācɛ kú Umídīyan ā kpó kwú, lɛ ɛna mɛ́mla aɛ́bɛ́ ɔlɛ́ mɛ́mla odúúdu agbénú kú uwā kpó.

¹⁰É klla lɛ odúúdu ɔlɛ́ uwā kpó tɔ̄lá.

¹¹Ācɛ kú Ísrɛ̄lu kwú odúúdú agbénú kú ācɛ ā nēé wu ā, mɛ́mla anyā uwā mɛ́mla ayí uwā nēé kwú ā, mɛ́mla aɛ́bɛ́ ā í kpó gé

¹²lɛ Umósīsi mɛ́mla Ɛlísa, mɛ́mla odúúdu ójila kú Ísrɛ̄lu nēe bá ɔpɛ́ kú Umówābu, okónu ísu kú Ujɔ́dan kú Ujérīko ā.

¹³Umósīsi, Ɛlísa mɛ́mla odúúdu aótrɛ̄yí kú Ísrɛ̄lu ā le pɛ́ wɛ̄ɛcɛ gaá jīla uwá ɔwɛ.

¹⁴Amáŋ, Umósīsi le cɔ̄nū mla aótrɛ̄yí kú aícɔ́ɔja ā.

¹⁵Anɔ́ɔ ó da uwá ɔ̄kā kahíníī, “Aá habɔ̄ odúúdu anyā ɔlɛ́ uwā tá kéē yēeyī nɛɛ?

¹⁶Aá bla ka anyā ɔlɛ́ uwā ā jāhɔ̄ tá ɛlā kú Ubálam ajɛ kú Upéyɔ, anɔ́ɔ é gbɔɔ́ ō cɛ̄ lɛ ācɛ kú Ísrɛ̄lu gbɔɔ́ ō gbā aɔ́wɔ ɔhá ɛ̄gbā á. Ɔdā ɔ́ɔmā bī ōcē obɔ̄bí wā í ŋmó ācɛ ɔlɛ́ alɔ á.

¹⁷Ó lɛ ā, aá lɛ ayípōklóbīya mɛ́mla ayípɔ̄nɔ̄nyā kú uwā dúúmā nōo lɛ ɔ̄cɛnyīlɔ jé ɛɛ́ kpó ŋmó.

¹⁸Amáŋ, aá lɛ ayípɔ̄nɔ̄nyā nɛ̄ ó jé ācɛnyīlɔ jéjé ɛ́ɛ́ ŋ́ mā mɛ́mla ayípāncɛ̄nyā ā kpó wā ɔlɛ́ lɛ iyī aá.

¹⁹Odúúdú aá nēe ŋmó ācɛ klla lɛ abɔ̄ kwu okwū ipú ɛfú nyā a, géē yɔ̄ eyɛ̄ɛcɛ kú ɔlɛ́ ā ɛ̄cī ahāapa. Ɛ̄cī ɔ́mɛɛtá mɛ́mla ɔ́mahāapa, aá lɛ iyī aá mɛ́mla anyā nɛ̄ aá kwú ŋmá ɔgbɛ́fú ā iyē gwu.

²⁰Aá géē gwu odúúdu īlī kú aá, mɛ́mla aɔ́dā nēé bī ɔkpɛ́bɛ́ yá, ámāŋ ka ɔnwū kú ɛwū, ámāŋ ka ɔcí cɛ́ɛ́ é kwú yá yēŋēē.”

²¹Ɛlísaa, ɔ̄cogwɛ́ɛya ā da ācɛ nēe ŋmá ɔgbɛ́fú ā kahíníī, “Ɛ̄nyā wɛ íne nɛ̄ Óndú je lɛ Umósīsi á,

²²Ɔdā dóódu nɛ̄ ó gáā yɔlá glá ŋ́, bɛ̄ɛka ugóolu (oje ɔdɔ), oje nɛ̄hɛ́, mɛ́mla oje udɔ, aá géē lɛ ɔ́ gla ɔlá, cɛ́ɛ́ é kwú yá yēŋēē.

²³Aɔ́dā o hile ɔhá ā, aá géē mī éŋkpɔ̄ kú iyē ō gwu ā klá uwá.

²⁴Ɛ̄cī ɔmahāapa ā, aá géē na īlī kú aá, cɛ́ɛ́, aá kwú yá yēŋēē, cɛ́ɛ́ é lɛ aá nwúla ō wā ɔlɛ́.”

²⁵Óndú ā da Umósīsi kahíníī,

²⁶“Awɔ mɛ́mla Ɛlísa, mɛ́mla aótrɛ̄yí kú ācɛ kú Ísrɛ̄lu ā, géē kɔ̄ ɔdā dóódu nēé kpó ŋmá ɔgbɛ́fú ā. Aá géē kɔ̄ ācɛ mɛ́mla aɛ́bɛ́.

²⁷Aá lɛ odúúdú uwā kpó kɔ̄ ɛpa jōōnjīlɛ̄. Ɛga éyi wɛ ákú aícɔ́ɔja ā, ɛga ɔhá ā wɛ ákú ācɛ o hile kú Ísrɛ̄lu ā.

²⁸Oŋmá ipú ukpɛ̄ nōo wɛ ákú aícɔ́ɔja ā, aá géē je éyi ŋmá ipú úlā ce ofɛhɔ̄ dóódu kú ācɛ, ɛna, ijakī, álá, mɛ́mla ɛwū lɛ Óndú ā.

²⁹Aá kwú uwā ú kpó lɛ Ɛlísa, ɔ̄cogwɛ́ɛya ā, kú ɔ́ɔmā kéē wɛ ákú Óndú ā.

³⁰Ipú ukpɛ̄ nōo wɛ ákú ācɛ o hile kú Ísrɛ̄lu ā, géē je éyi ŋmá ipú ofɛpa ce igwó dóódu kú ācɛ, ɛna, ijakī, álá mɛ́mla ɛwū ā lɛ Óndú ā, aá kwú ɔ́ɔmā ú kpó lɛ ācɛ kú Ulífāyi, nēe gē leyīkwu Áklɔ̄kpīihɔ ā.”

³¹Umósīsi mɛ́mla Ɛlísa le odúúdu ɔdā nɛ̄ Ɔwɔicō ka ā yá.

³²Odúúdú áluka kú agbénú kú ɛfú nɛ̄ ācɛ kú Ísrɛ̄lu kpó wā ɔlɛ́ ā wɛ, úlá bá ɛga úlā ɛnɛ ce úlá ofu ahātá ce ahāapa, ce ofu igwɛ́ɛhɔ̄ (625,000).

³³Ɛna ā wɛ úlā ofu ahāanɛ (72,000).

³⁴Aɔ́nya ā wɛ úlā ofu ahāapa ce úlā igwɛ́ɛpa ce ofu igwó (61,000).

³⁵Ayípācɛnyā nēé jé ācɛnyīlɔ ŋ́ mā wɛ úlā ofu ɛnɛ (32,000).

³⁶Ukpɛ̄ kú ācɛ nēe ga ɔgbɛ́fú ŋmá ipú odúúdu uwa ā wɛ, aálá úlā bá ɛga úlā ɛpa ce úlā ofɛpa ce igwó ce ofɛhɔ̄ (337,500).

³⁷Ukpɛ̄ kú Óndú ā ŋmá ipú álá ā wɛ úlā ce ofu igwɛ́ɛtá ce igwɛ́ɛhɔ̄ (675).

³⁸Aɛ́na ā wɛ, úlā ofɛɛnɛ ce úlā igwó (36,000) Ukpɛ kú Óndú kē wɛ ofɛtá ce igwɛ́ɛpa.

³⁹Aíjakī ā wɛ, úlā ofɛtá ce igwó ɛhīlī ce ofɛhɔ̄ (30,500). Ákú Óndú ā kē í wɛ ofɛtá ce éyi ŋmá anú.

⁴⁰Ukpɛ̄ kú Óndú ŋmá ipú ayípɔ̄nɔ̄nyā nēé jé ɔ̄cɛnyīlɔ ŋ́ mā wɛ ofu ce igwó ɛpa ŋmá úlā ofɛpa (16,000).

⁴¹Umósīsi kwú ukpɛ̄ nōo wɛ ákú Óndú ā ú lɛ Ɛlísa, ɔ̄cogwɛ́ɛya ā.

⁴²Ukpɛ̄ nōo wɛ ákú ācɛ o hile kú ācɛ Ísrɛ̄lu nēé ga ɔgbɛ́fú ŋ́ mā,

⁴³wɛ, úlá bá ɛga úlā ɛpa ce úlā ofɛpa ce igwó ce ofɛhɔ̄ (337,500).

⁴⁴Ɛna ā wɛ úlā ofɛnɛ ce úlā igwó (36,000).

⁴⁵Aíjakī wɛ úlā ofɛtá ce igwɛ́ɛhīlī ce ofɛhɔ̄ (30,500).

⁴⁶Ayípɔ̄nɔ̄nyā nēé jé ācɛnyīlɔ ɛ́ɛ́ ŋ́ mā, wɛ úlā ofɛpa (16,000).

⁴⁷Oŋmá ipú áluka kú ukpɛ̄ kú ācɛ ā, Umósīsi kwú éyi ú ŋmá ipú ofɛpa ce igwó kú ayípɔ̄nɔ̄nyā mɛ́mla, aɛ́bɛ́ ú lɛ ācɛ kú Ulífāyi nēe gē leyīkwu Áklɔ̄kpīihɔ kú Óndú ā, ɛ́gɛ́nɛ̄ Óndú ā da ɔ́ lɛ ā.

⁴⁸Aótrɛ̄yí nēe gē leyīkwu aícɔ́ɔja ā gā ɛgiyí Umósīsi.

⁴⁹Anɔ́ɔ é kahíníī, “Ɔkpani, alɔ lɛ aícɔ́ɔja nēe bá ɛháajɛ kú alɔ ā gbaáluka ɛɛ́, ɔ̄cɛ dúúmā kú uwā í bí ŋmá ipú alɔ ŋ́.

⁵⁰Ohígbū ɔ́ɔmā, alɔ géē bī agbénú kú ugóólu (oje ɔdɔ), agbá kú Ugóolu (oje ɔdɔ), eliká kú ugóolu (oje ɔdɔ), ɔdōplahɔ̄ kú ugóolu (oje ɔdɔ), agbá ō tɔ̄ɔkɔ kú ugóolu (oje ɔdɔ), nɛ̄ ɔnyɔɔnyɛ kú alɔ je ā. Alɔ kwú aɛ́nē e bá ɔ́ɔmā ú gbā Óndú ā, kóō wɛ ulé nɛ̄ alɔ cílá kwɛyí oyēeyī kú alɔ. Cɛ́ɛ́ kóō géē gbō oyēeyī kú alɔ.”

⁵¹Umósīsi mɛ́mla Ɛlísa mīyɛ odúúdu agbénú kú ugóolu (oje ɔdɔ) nēé kpó wā ā.

⁵²Ogbɛnú kú odúúdu ɔdā nɛ̄ aótrɛ̄yí kú aícɔ́ɔja kpó wā ā, wɛ usɛ́kɛlu ofigwó.

⁵³Ācɛ nēé wɛ aótrɛ̄yí kú aícɔ́ɔja ā ŋ́ mā, bī ɔdā nēé wu ŋmá ɔgbɛ́fú ā.

⁵⁴Umósīsi mɛ́mla Ɛlísa kwú agbénú kú ugóolu (oje ɔdɔ) nyā ú kpó ga ipú Áklɔ̄kpīihɔ ā, cɛ́ɛ́ kú Óndú ā kóō gbō ācɛ kú Ísrɛ̄lu ɛyí.