Read idoma ÁLUKA 34 Bible Online

ÁLUKA 34 - idoma bible

ÁLUKA 34

¹Óndú ā da Umósīsi kahíníī,

²“Lɛ ka lɛ ācɛ kú Ísrɛ̄lu ā ka, eko nɛ̄ aá gā ipú ajɛ nɛ̄ n gáā je lɛ aá ā, ɛjī kú ajɛ ā géē lɛ ɛ́gɛ́nyā.

³Ɛháajɛ kú ajɛ ā géē gbɔɔ́ ŋmá ígbíli kú Usíni, ɛgiyí ɛjī kú Ɛ́dɔm ā, ɛjī kú ɛháajɛ ā géē gbɔɔ́ ŋmá oŋmɛ́yí kú ísu ɔmā ā, nōo yɔ̄ ɛnɔ̄ɔ̄cī ā.

⁴Ɛjī ā í pīya yɛ ɛháajɛ lɛyíkwu Akrabím gaá bū Usíni jāā ga Ukádɛssi Ubanéya. Cɛ́ɛ́ ó klla géē pīya bū ɛhíícō ga ɛnɔ̄ɔ̄nɛ̄ kú Uhása-Ádaa jāā ga Ásimɔ̄n,

⁵ɛga nɛ̄ ó géē pīya yɛ lɛyíkwu ɔpɛ́, ɛgiyí ɛjī kú Íjīpiti ā, gaá ŋmɛ́yí ísu kú Umeditarénīya ā.

⁶Ɛjī kú ɛnɔ̄ɔ̄nɛ̄ kú nū géē wɛ ísu kú Umeditarénīya ā.

⁷Ɛjī kú ɛhíícō kú nū géē gbɔɔ́ ŋmá ɛjī kú Umeditarénīya ā ga ɛyí ɛfu kú Uhɔ́ru.

⁸Ó klla í ŋmá abɔ́ɔ ga ɔwɛ kú Uhamáti, klla í yɛ nyɔ̄ Usɛ́dādi.

⁹Ó klla í yɛ ga Usífrɔn, cɛ́ɛ́ ó i ŋmɛ́yí Uhasa Ɛ́nan.”

¹⁰“Ɛjī kú ɛnɔ̄ɔ̄cī kú ajɛ ā í gbɔɔ́ ŋmá Uhasa-Ɛ́nan ga Usɛ́nfam.

¹¹Ó klla í yɛ ga ɛháajɛ ga Uríbla, ɛnɔ̄ɔ̄cī kú Áyin, ga ɛyí ɛfu nēe bá ɛnɔ̄ɔ̄cī kú okónu éŋkpɔ̄ kú Ugálīli.

¹²Anɔ́ɔ ó í pīya yɛ ɛháajɛ ga ísu kú Ujɔ́dan gaá kwu ísu ɔmā ā. Ɛga nēe bá nyā géē wɛ ɔkíkā ɛnɛ kú ajɛ kú aá á.”

¹³ Anɔ́ɔ Umósīsi da ācɛ kú Ísrɛ̄lu ā kahíníī, “Ɛ̄nyā wɛ ajɛ nɛ̄ aá géē kɔ̄ lɛ ipɔ́ɔma ahāanɛ ce āyā kú Ísrɛ̄lu, oŋmá lɛ ūlī ō tá īkpɛ̄yí kú ipɔ́ɔma dóódu á.

¹⁴Ipɔ́ɔma kú Urúbɛ̄n mɛ́mla Ugádi, mɛ́mla āyā éyi kú ɛnɔ̄ɔ̄cī kú ipɔ́ɔma kú Umanásɛ, lɛ ajɛ kú uwā lɛ, klla lɛ ɔ́ kɔ̄ lɛ iyī uwā

¹⁵É lɛ ajɛ ā kpó lɛ aípɔ́ɔma ɛpɛlɛ́ɛpa ce āyā ā kē mīyɛ ɔdā kú úgwū kú uwā ɛɛ́. Ajɛ kú uwā gbɔɔ́ ŋmá ɛnɔ̄ɔ̄cī kú okónu ísu kú Ujɔ́dan nōo pīyeyī kwu Ujɛ́rīko ā.”

¹⁶Óndú ā da Umósīsi kahíníī,

¹⁷“Ɛlísa, ɔ̄cogwɛ́ɛya ā mɛ́mla Ujóssuwa, ɔyí kú Unún ā géē kɔ̄ ajɛ ā lɛ uwá á.

¹⁸Lɛ otrɛ̄yí éyééye fu ŋmá ipɔ́ɔma dóódu kéē tá uwā abɔ̄ ká ajɛ ō kɔ̄ ā.

¹⁹Ɛ̄nyā wɛ iyē kú aótrɛ̄yí ā á. Ákú ipɔ́ɔma kú Ujúda wɛ Ukálɛ̄bu ɔyí kú Ujɛ́fūnɛ.

²⁰Ákú ipɔ́ɔma kú Usímīyɔn, wɛ Ussɛ́lumīyɛlu, ɔyí kú Ammíhūd.

²¹Ákú ipɔ́ɔma kú Ubénjamīn wɛ Ɛlídād, ɔyí kú Ukíslɔn.

²²Ákú ipɔ́ɔma kú Udán wɛ, Ubúki, ɔyí kú Ujógli.

²³Ákú ipɔ́ɔma kú Umanásɛ wɛ, Uhánīyɛlu, ɔyí kú Éfɔ̄du.

²⁴Ákú ipɔ́ɔma kú Ɛfrēm wɛ, Ukémūwɛlu, ɔyí kú Ussíftan.

²⁵Ákú ipɔ́ɔma kú Usébūlɔn wɛ, Ɛlísāfan, ɔyí kú Upanáci.

²⁶Ákú ipɔ́ɔma kú Íssāka wɛ, Upatíyɛ̄lu, ɔyí kú Ásaan.

²⁷Ákú ipɔ́ɔma kú Ássa, wɛ Ahihúdu, ɔyí kú Usɛlɔ́mi.

²⁸Ákú ipɔ́ɔma kú Unáfutāli wɛ, Upɛdahɛ́lu, ɔyí kú Ammíhūdu.

²⁹Ācɛ nēe bá nyā nɛ̄ Óndú ā fu kéē kɔ̄ ajɛ ā lɛ ācɛ kú Ísrɛ̄lu, eko nēé lɛ tá ajɛ kú Ukénan ā á.”