Read idoma ÁLUKA 35 Bible Online

ÁLUKA 35 - idoma bible

ÁLUKA 35

¹Óndú ā da Umósīsi ipú ɔpɛ́ kú Umówābu, okónu ísu kú Ujɔ́dan nōo leyī pīya kwu Ujérīko ā kahíníī,

²“Lɛ ka lɛ ācɛ kú Ísrɛ̄lu kahíníī, oŋmá ipú ajɛ nēé lɛ ā, é géē je aígelī nɛ̄hi ōhī lɛ ācɛ kú Ulífāyi kéē lā. É klla í je ajɛ ácí nɛ̄ aɔ́dāajɛ kú uwā í lúúlé pīya yɛ aígelī nɛ̄hi jīla tá lɛ uwá dúú.

³Aígelī nēe bá nyā í wɛ ákú ācɛ Ulífāyi, é kē í lā anú. Ajɛ o lúúlé kú ɛna ā géē wɛ ákú ɛna mɛ́mla álá kú uwā.

⁴Ajɛ olɔhi ɛga o lúúlé kú aɛ́bɛ́ nyā kóō gbɔɔ́ ŋmá ɔdɔ kú igá kú igelī nɛ̄hi ā, wɛ uyádi ofɛhɔ̄ ŋmá ɔ́kíkā éyééye, cɛ́ɛ́ igelī nɛ̄hi ā yɔ̄ ɔtāhɛ̄.

⁵Odúúdú nū wɛ uyádi úlā ɛpa cofɛhɔ̄ abɔ̄ ɛpɛplɛ́ɛpa, cɛ́ɛ́ igelī nɛ̄hi ā yɔ̄ ɔtāhɛ̄.

⁶Aá géē kpó aígelī nɛ̄hi ɛhīlī ɛga o kwinya ɔ́ci nyɔ̄ lɛ uwá. Cɛ́ɛ́ kú ɔ̄cɛ nɛ̄ ó jégēdē ŋ́ le ɔcɛ́ ŋmó, lɔfú kwu nyɔ̄ glá. Aá klla í kpó aígelī nɛ̄hi ɔhá ofɛpa blá aɛ́nɛ̄ e bá nyā lɛ uwá.

⁷Odúúdú ajɛ nɛ̄ aá í je lɛ ācɛ Ulífāyi ā mɛ́mla ajɛ o lúúlé kú aɔ́dāajɛ kú uwā ā í wɛ ofɛpa ce ahātá.

⁸Áluka kú aígelī nɛ̄hi nɛ̄ aá í je lɛ ācɛ Ulífāyi ā géē ŋmá lɛ ɛ́gɛ́nɛ̄ odúúdú ajɛ ā í nwuné lɛ ā.” Aípɔ́ɔma nēe nwuné géē kpó aígelī nɛ̄hi nēe lɛwa, aípɔ́ɔma nēé lɛwa ŋ́, aá géē kpó aígelī nɛ̄hi nēé lɛwa ŋ́ lɛ uwá.”

⁹Óndú ā da Umósīsi kahíníī,

¹⁰“Lɛ ka lɛ ācɛ kú Ísrɛ̄lu ka, eko nɛ̄ aá le bēhé ísu kú Ujɔ́dan ga ipú ajɛ kú Ukénan.

¹¹Aá géē fu aígelī nɛ̄hi ō kwinya ɔ́ci nyɔ̄, nɛ̄ ɔ̄cɛ géē kwu nyɔ̄ eko nɛ̄ ó jégēdēē ŋ́, le ɔ̄cɛ ŋmó.

¹²Ācɛ ɔlɛ́ ɔ̄cɛ nēé ŋmó ā, í gáā ga abɔ́ɔ í gwɔ̄ɔ́ci ŋ́, jāā gbéeko nēé lɛ ɛpɔ̄ ka tū ɔ̄.

¹³Aá lɛ aígelī nɛ̄hi ɛhīlī je kéē wɛ ɛga o kwinya ɔ́ci nyɔ̄.

¹⁴Aá géē fu aígelī nɛ̄hi ɛtá ŋmá ogbeé kú Ujɔ́dan, mɛ́mla ɛtá ɔhá ŋmá ipú ajɛ kú Ukénan.

¹⁵Aígelī ɛhīlī nyā í wɛ ɛga o kwinya-ɔ́ci nyɔ̄ kú aá, mɛ́mla aéwɔhá mɛ́mla aúgbɔga nēe lā mla aá. Eko nɛ̄ ɔ̄cɛ dóódu í jégēdēē ŋ́ le ɔ̄cɛ ŋmó, abɔ́ɔ nɛ̄ ó géē kwu nyɔ̄ á.”

¹⁶“Amáŋ, ɔ́dāŋ ka ɔ̄cɛ jégēdēē, bī oje, ámāŋ ɔcí le fīyɛ̄ ɔ́mpa nū le ɔ́ ŋmó, ɔ̄cɛ ɔ́ɔmā wɛ oŋmɔ́ɔ̄cɛ. É géē je ɔ́ ŋmó dúú.

¹⁷Ámāŋ eko nɛ̄ ɔ̄cɛ jégēdēē lɛ ɛcɔ̄ fīyɛ̄ ɔ̄cɛ ɛyí wāajɛ, anɔ́ɔ ó gekwú, ɔ̄cɛ nōo le ɛcɔ̄ fīyɛ̄ ɔ̄cɛ ɔ́ɔmā a, wɛ ɔ̄cɛ o ŋmóɔ̄cɛ. É géē je ɔ́ ŋmó dúú.

¹⁸Ámāŋ ɔ́dāŋ nɛ̄ ɔ̄cɛ lɛ ɔdɔ̄fú dúúmā gɔ́ ɔ̄cɛ ɔhá wāajɛ, anɔ́ɔ ó gekwú, ɔ̄cɛ nōo jégēdēē le ɔdɔ̄fú gɔ̄ ɔ̄cɛ ā wāajɛ ā, kwú pīya ɔ̄cɛ oŋmɔ́ɔ̄cɛ. É géē ŋmó ɔ̄ dúú.

¹⁹Ɔmáapú ɔ̄cɛ nēé ŋmó ā géē gwɔ́ɔ́ci kú ɔ̄cɛ ɔlɛ́ nū nēé ŋmó ā, O ŋmá lɛ o ŋmó ɔ̄cɛ nōo ŋmó ɔmáapú nū ā.

²⁰Ɔ́dāŋ ka ɔ̄cɛ dúúmā wɔ́tū ɔ́mpa nū lɛ ɛ̄wā gwū ɔ̄, ámāŋ ka o hɛ́bayi ɔwɛ gbēyī nū, le odée fīyɛ̄ ɔ̄ wāajɛ, lɛ ɔ́ ŋmó, ámāŋ nɛ̄ ó lɛ abɔ̄ fīyɛ̄ ɔ̄ lɛ ɔ́ ŋmó.

²¹Ɔ̄cɛ ɔ́ɔmā kwú pīya oŋmɔ́ɔ̄cɛ, eko nɛ̄ ɔmáapú ɔ̄cɛ nēé ŋmó ā lɛ ɔ́ má, ó lɔfú ŋmó oŋmɔ́ɔ̄cɛ ā glá.”

²²“Amáŋ, eko nɛ̄ ɔ̄cɛ lɛ ɔ̄cɛ ɔ́mpā nū ŋmó, nɛ̄ ó jégēdēē ŋmó ɔ́ ŋ́, nɛ̄ ó kē tɛtɛ wɔ́tū nū táajɛ ŋ́.

²³Ámāŋ, ɔ̄cɛ í jé ŋ́, nɛ̄ ɔ̄cɛ éyi í kē má ɔ̄cɛ ɔhá ā gbɔbú ŋ́, nɛ̄ ó klla miya táajɛ gbɔbū ka anúɔ géē ŋmó ɔ̄ ŋ́, nɛ̄ ɔ̄cɛ ā í kē tɛtɛ wɛ olɛlā kú nū ŋ́, anɔ́ɔ ó lɛ ɛcɔ̄ tá, anɔ́ɔ ɛcɔ̄ ā gaá fīyɛ̄ ɔ̄cɛ ā lɛ ɔ́ ŋmó á.

²⁴Ipú ikwū ɛ́gɛ́nyā a, ójila kú ācɛ Ísrɛ̄lu géē kɛpɔ̄ kú ɔ̄cɛ nōo ŋmó ɔ́mpa mɛ́mla ɔ̄cɛ nɛ̄ ó ŋmó ā, nɛ̄ ó gáā cɛ̄ lɛ ācɛ ɔlɛ́ ɔ̄cɛ nēé ŋmó ā kéē gwɔ́ɔ́ci ŋ́,

²⁵é géē nya oŋmɔ́ɔ̄cɛ ā tá ŋmá abɔ̄ kú aɔ́máapú ɔ̄cɛ nēé ŋmó ā. É kē í je oŋmɔ́ɔ̄cɛ ā kwúcē igbīhi ga igelī nɛ̄hi okwinya ɔ̄ci nyɔ̄, ɛga nɛ̄ ó kwu nyɔ̄ ā. Ó í lā abɔ́ɔ jāā gbéeko nɛ̄ ɔ̄cɛ nōo wɛ otrɛ̄yí kú ācogwɛ́ɛya eko ɔ́ɔmā ā gekwú.

²⁶Ɔ́dāŋ, ka ɔ̄cɛ nōo ŋmó ɔ̄cɛ ā nyɛ̄ɛ̄ ŋmá ipú igelī nɛ̄hi o kwinya ɔ́ci nyɔ̄ ā,

²⁷anɔ́ɔ ɔmáapú ɔ̄cɛ nɛ̄ ó ŋmó ā, lɛ ɔ́ má lɛ ɔ́ ŋmó. Ɛ̄nya wɛ ɔ́ci nɛ̄ ó gwō á. Ó wɛ ɔ̄cɛ nɛ̄ ó ŋmó ā ŋ́.

²⁸Ɔ̄cɛ nōo ŋmó ɔ̄cɛ ā géē lā ipú igelī nɛ̄hi ō kwinya ɔ́ci nyɔ̄ ā jāā gbéeko nɛ̄ ɔ̄cɛ nōo wɛ otrɛ̄yí kú ācogwɛ́ɛya eko ɔ́ɔmā ā gekwú, ɛ́ɛ́ kóō géē kwúcē īgbīhi wā ɔlɛ́ nū.

²⁹Íne nyā yɔ̄ lɛ aá mɛ́mla ayí aá piyóó ipú ɛcɛ nyā.”

³⁰“Ɔ́dāŋ ka ɔ̄cɛ jégēdēē lɛ ɔ̄cɛ ŋmó, nɛ̄ ācɛ ɛpa lɛ ijáalí cɛ̄ tū ɔ̄, é géē ŋmó ɔ̄cɛ nōo ŋmó ɔ̄cɛ ā. Amáŋ, ijáalí kú ɔ̄cɛ ékpónú í jɛ̄ ō bī lɛ ŋmó oŋmɔ́ɔ̄cɛ kwɛyí ɔ̄cɛ nɛ̄ ó ŋmó ā ŋ́.

³¹É géē ŋmó oŋmɔ́ɔ̄cɛ ā piíí. Ó gáā bī ije lɛ fūla īkpɛ̄yí kú iyī nū ŋ́.

³²Ɔ́dāŋ ka ɔ̄cɛ le ɔ̄cɛ ŋmó, anɔ́ɔ o le kwu ga igelī nɛ̄hi ō kwinya ɔ́ci nyɔ̄ ā, aá cɛ̄ lɛ ɔ́ cíla ije kwɛyí nū, cɛ́ɛ́ kóō wā ɔlɛ́ ŋ́, jāā gbéeko nɛ̄ ɔ̄cɛ nōo wɛ otrɛ̄yí kú ācogwɛ́ɛya kú eko ɔ́ɔmā ā gekwú.

³³Ɔ́dāŋ ka aá cɛ̄ ká ɛ̄nyā kóō lɛ yá, aá géē nyíla ajɛ nɛ̄ aá lā anú ā. Ɔ̄cɛ ō ŋmó gē nyíla ajɛ. Ɔwɛ ɔhá dúúmā í yɔ̄ nɛ̄ ɔ̄cɛ géē gwu ajɛ nōo nyíla ŋ́, ayíka o lɛ ɔ̄cɛ nōo ŋmó ɔ̄cɛ ā ŋmó.

³⁴Aá híī nyíla ajɛ nɛ̄ aá lā ā ŋ́. Ohígbū ka ami Óndú ā, yɔ̄ mla ācɛ ɔlɛ́ um Ísrɛ̄lu.”