Read idoma ÁLUKA 4 Bible Online

ÁLUKA 4 - idoma bible

ÁLUKA 4

²“Lɛ ayí kú Ukɔ́hāti ā gbaáluka. Gbɔɔ́ ŋmá ipɔ́ɔnū ɔlɛ́ uwā mɛ́mla inu kú ádā uwā.

³Ācɛ nēe ŋmá iháyí ofu ce igwó ga iháyí ofɛpa ce igwó ā, nēe géē ga ipu Áklɔ̄kpīihɔ kú ɛga ō yɔ̄ kú Óndú ā gaá yúklɔ́ glá ā.

⁴Ɛ̄nyā wɛ Úklɔ́ kú ayí kú Ukɔ́hāti ipú Áklɔ̄kpīihɔ ā mɛ́mla ɔdā otīihɔ fíyɛ́ dúú ā.”

⁵Eko nɛ̄ aá gáā cālɛ́, Árɔ̄ni mɛ́mla ayí nū géē ga ipú Áklɔ̄kpīihɔ ā. Kwú ukɔ́tin kú iyɔ̄bū kú Ikpati kú Ɛka kú Óndú ā ú wā ajɛ, klla kwú ɔ̄ ú pīya klla ikpati ā.

⁶É géē pīya īlī nɛ̄hɛ́, ɔkpɛ́ɛwu mɛ́mla īlī odufā ā klá anú, kwú ogbló ō lɛ bī ikpati ā ú wu áklō kú nū.

⁷É í pīya īlī odufā ā klá itébulu kú igbō nēé je gwɛ́ɛya lɛ Óndú ā, klla í kpó ocíbú mɛ́mla ógo kú ɔtulāli ā, mla ógo nēé gē bī lɛ gwɛ́ɛya ā, mɛ́mla ɔjá kú ejé kú ɛya ā kpó ce ɛyí itébulu ā. Igbō ā géē cɛyí itébulu ā eko dóódu.

⁸É géē pīya īlī nɔ̄wá ā klá odúúdu ɔdā nēe bá nyā, klla í pīya ɔkpɛ́ɛwu ā klá anú, klla í je ɔcí ō le bī ɔ̄ ā ú wu ɔ́.

⁹É géē pīya īlī odufā ā klá ɔdā ō lɛ agege ce ɔ́ āa mɛ́mla agege kú nū ā, mla alápā ō bī je ahɔ̄lá mɛ́mla aóflēnjē mɛ́mla oli kú anɔ̄ kú ólīfu.

¹⁰É géē gbo odúúdu nū mɛ́mla iyó kú nū mɛ́mla ɔkpɛ́ɛwū olɔhi, cɛ́ɛ́ é kwú ɔ̄ í ce ɔcí ō le bī ɔ̄ ā.

¹¹É géē je īlī odufā ā pīya klá ede kú oje ɔdɔ ā, klla í je ɔkpɛ́ɛwū olɔhi ā í pīya klá anú, klla í je ɔcí ō le bī ɔ̄ ā wu ɔ́.

¹²É géē kpó aɔ́dā dóódu nēé gē bī le yúklɔ́ ipú Áklɔ̄kpīihɔ ā gbō ipú īlī odufā ā klla í je ɔkpɛ́ɛwū ā pīya klá anú, cɛ́ɛ́ é kwú ɔ̄ ú ce ɛyi ɔcí ō le bī ɔ̄ ā.

¹³É géē kla ewo kú anāānɔ̄ ā ŋmá ede ā, klla í kpó īlī odufā ā pīya klá anú.

¹⁴É í kpó iyó dóódu nēé gē bī le yúklɔ́ abɔ́ɔ ā, ákánjɔ̄ ō bī fɔ́ɔlá, okoolo ō bī ŋmó odée ɔlá, oje o bī tá ɛbɛ́ ŋmá ɔlá, ussɔ́bɛ̄lu, agá mɛ́mla ɔgbanjɛ̄ tū ipú īlī ā. Anɔ́ɔ é géē pīya ɔkpɛ́ɛwū olɔhi klá ɔ́, cɛ́ɛ́ é kwú aógbló ō lɛ bī ɔ̄ ā ú kpó wu ɔ́.

¹⁵Eko nɛ̄ eko ocālɛ́ kú aá le yá, ipɔ́ɔma kú Ukɔ́hāti ā géē wā í kpó iyó otīihɔ nyā, eko nɛ̄ Árɔ̄ni mɛ́mla ayí nū le iyó ā gwótū le ɔ̄ gbō kwɛyí. Amáŋ, ayí kú Ukɔ́hāti kéē híī lɛ abɔ̄ kwu ɔdā nēe bá nyā ŋ́, ohígbū nēé í kwú. Ɛ̄nyā wɛ úklɔ́ kú ipɔ́ɔma kú Ukɔ́hāti, eko dóódu nɛ̄ aá gáā fu Áklɔ̄kpīihɔ ā ŋmá ajɛ á.

¹⁶Ɛlísaa, ɔyí kú Árɔ̄ni, ɔ̄cogwɛ́ɛya ā, géē leyīkwu odúúdú Áklɔ̄kpīihɔ ā, mɛ́mla anɔ̄ kú agege kú nū, ɔtulāli mɛ́mla ɛya kú īkpɔ̄da, mɛ́mla anɔ̄ ō tū ɛyí mɛ́mla ɔdɔ̄há dóódu nēé le tīihɔ lɛ́ Óndú ā.

¹⁷Óndú ā da Umósīsi mɛ́mla Árɔ̄ni kahíníī,

¹⁸“Aá cɛ̄ lɛ ipɔ́ɔma kú Ukɔ́hāti ā

¹⁹je kpó yíífi ŋmá ipɔ́ɔma kú ayí kú Ulífāyi, o ŋmá lɛ o túbla aɔ́dā o tīihɔ nēe bá nyā ŋ́. O yá ɛ́ɛ́ kéē híī kwú ŋ́ mā, Árɔ̄ni mɛ́mla ayí nū géē ga ipú Áklɔ̄kpīihɔ ā gaá je ɔdā nɛ̄ ɔnyɔɔnyɛ kú uwā í bī ā lɛ ɔ́.

²⁰Amáŋ ɔ́dāŋ ka ācɛ kú ipɔ́ɔma kú Ukɔ́hāti ā le tá ipú Áklɔ̄kpīihɔ ā gaá lɛ ɔdā otīihɔ nyā má, eko nɛ̄ ācogwɛ́ɛya ā bá ī tū uwā tū, kéē cālɛ́ ā, é géē kwú.”

²¹Óndú a da Umósīsi kahíníī,

²²“Lɛ ācɛ kú Ulífāyi, ipɔ́ɔma kú Ugɛ́ssɔn ā gbaáluka gbɔɔ́ ŋmá ipɔ́ɔnū ɔlɛ́ uwā mɛ́mla inu kú aádáádā uwā.

²³Lɛ odúúdu ācɛ nēe wɛ iháyí ofu ce igwó gɔbū ga ofɛpa ce nēe lɔfú yúklɔ́ ipú Áklɔ̄kpīihɔ ā glá ā gbaáluka.

²⁴É géē lɛ úklɔ́ kú iyó nēe bá nyā ō bī.

²⁵Áklɔ̄kpīihɔ ā mɛ́mla ukɔ́tin kú nū, mla ɔkpɛ́ɛwū olɔhi nōo klá icō kú nū ā, mɛ́mla ukɔ́tin kú ɔwɛ kú Áklɔ̄kpīihɔ ā.

²⁶Mɛ́mla ukɔ́tin mla ɔ́ŋgbá kú eyīyɛ̄cɛ bīílí kú Áklɔ̄kpīihɔ ā mɛ́mla ɔdā dóódu nēé géē bī le je Áklɔ̄kpīihɔ ā kwu ajɛ ā. Úklɔ́ ɔhá dóódu nōo lɛ iyē kwu āyā nyā ā, uwá gáā yá ɔ̄ á.

²⁷Umósīsi mla Árɔ̄ni í má ka, ipɔ́ɔma kú Ugɛ́ssɔn ā lɛ odúúdú úklɔ́ kú uwā yá, kéē klla bī ɔdā dóódu nɛ̄ Árɔ̄ni mɛ́mla ayí nū je lɛ uwá ā.

²⁸Ɛ̄nyā wɛ úklɔ́ kú ipɔ́ɔma kú Ugɛ́ssɔn ipú Áklɔ̄kpīihɔ ā. É géē yúklɔ́ kú uwā ā ɛháajɛ kú Utáma ɔyí kú Árɔ̄ni, ɔ̄cogwɛ́ɛya ā.”

²⁹Óndú ā da Umósīsi kahíníī, “Lɛ ayí Ulífāyi kú ipɔ́ɔma kú Umerári gbaáluka, gbɔɔ́ ŋmá ipɔ́ɔnū kú ɔlɛ́ uwā mɛ́mla inu kú aádáádā uwā.

³⁰Lɛ ācɛ nēe wɛ iháyí ofu ce igwó ga iháyí ofɛpa ce igwó kú uwā, nēe lɔfú yúklɔ́ ipú Áklɔ̄kpīihɔ ā glá ā gbaáluka.

³¹É géē le úklɔ́ kú o bi ákanaba ō bī gwó Áklɔ̄kpīihɔ ā, ɔcí o kwu ajɛ, ɔcí aflá, mɛ́mla ígbóoje-otáajɛ kú nū.

³²Ogbló, ɔcí ō kwu ajɛ, ígbóoje-otáajɛ, ápíyɛ́kɛ̄ mɛ́mla ɔ́ŋgbá mɛ́mla aɔ́dā ohile dóódu ā. A géē mafú iyó nɛ̄ ɔnyɔɔnyɛ géē bī ā fú lɛ ɔ́.

³³Ɛ̄nyā wɛ úklɔ́ kú Ulífāyi, ipɔ́ɔma kú Umerári ipú Áklɔ̄kpīihɔ ā á. É géē yúklɔ́ kú uwā ā ɛháajɛ kú Utáma, ɔyí kú Árɔ̄ni, ɔ̄cogwɛ́ɛya ā.”

³⁴Umósīsi mɛ́mla Árɔ̄ni mɛ́mla aótrɛ̄yí kú ójīla kú ācɛ Ísrɛ̄lu ā, lɛ ayí kú ipɔ́ɔma kú Ukɔ́hāti ā gbaáluka.

³⁵Ācɛ ɛ̄nɛ̄ e wɛ iháyí ofu ce igwo ga iháyí ofɛpa ce igwó, nēe lɔfú yúklɔ́ lɛ Óndú ā ipú Áklɔ̄kpīihɔ glá ā wɛ,

³⁶úlā ɛhīlī ce ofigwɛ́ɛhɔ̄ ce ofɛpa ce igwó (2,750).

³⁷Ɛ̄nyā wɛ áluka kú ipɔ́ɔma kú Ukɔ́hāti nēe géē yúklɔ́ ipú Áklɔ̄kpīihɔ glá, nɛ̄ Umósīsi mɛ́mla Árɔ̄ni gbaáluka ā.

³⁸Áluka kú ayí kú ipɔ́ɔma mɛ́mla ipɔ́ɔnū kú Ugɛ́ssɔn,

³⁹nēe wɛ iháyí ofu ce igwó ga iháyí ofɛpa ce igwó, nēe yúklɔ́ ipú Áklɔ̄kpīihɔ kú Óndú ā glá ā yɔ̄ á.

⁴⁰É wɛ úlā ɛhīlī ce ofigwóléyi ce igwó (2,630).

⁴¹Ɛ̄nyā wɛ áluka kú ayí kú ipɔ́ɔma kú Ugɛ́ssɔn nēe wɛ iháyí ofu ce igwó gɔbū, nēe géē yúklɔ́ ipu Áklɔ̄kpīihɔ ā glá ā.

⁴²Áluka kú ayí kú ipɔ́ɔma kú Umɛrári,

⁴³ācɛ ɛ̄nɛ̄ e wɛ iháyí ofu ce igwó ga iháyí ofu ɛpa ce igwo, nēe géē yúklɔ́ ipú Áklɔ̄kpīihɔ glá ā wɛ,

⁴⁴úlā ahātá (3,200).

⁴⁵Aɛ́nyā wɛ ācɛ nɛ̄ Umósīsi mɛ́mla Árɔ̄ni gbaáluka ipɔ́ɔma kú Umɛrári ɛ́gɛ́nɛ̄ “Óndú ā ka lɛ ā á.

⁴⁶Odúúdú ācɛ nɛ̄ Umósīsi mɛ́mla Árɔ̄ni mɛ́mla aótrɛ̄yí kú ācɛ kú Ísrɛ̄lu gbaáluka á. É gbɔɔ́ ŋmá ācɛ kú ipɔ́ɔnū mɛ́mla inu kú aádáádā uwā,

⁴⁷nēe wɛ iháyí ofu ce igwó ga iháyí ofɛpa ce igwó nēe géē ga ipú Áklɔ̄kpīihɔ kú Óndú ā gaá yúklɔ́ glá ā.

⁴⁸É wɛ úlā ofu ce éyi, ce ofu ahāanɛ (8,580).

⁴⁹Ɛ́gɛ́nɛ̄ Óndú ā je íne bū okónu kú Umósīsi lɛ ā, é le uwá fu kwu úklɔ́ kú uwā, ipú Áklɔ̄kpīihɔ ā. É klla le uwá gbaáluka ɛ́gɛ́nɛ̄ Óndú ā ka lɛ ā.