Read idoma ÁLUKA 6 Bible Online

ÁLUKA 6 - idoma bible

ÁLUKA 6

¹Óndú ā da Umósīsi kahíníī,

²“Lɛ ka lɛ ācɛ kú Ísrɛ̄lu ka, eko nɛ̄ ɔ̄cɛnyīlɔ ámáŋ ka ɔ̄cɛnya dúúmā le okónu ce ka anɔ́ɔ í wɛ ígwu kú átámɔ̄kpá kú Óndú ā[1]a nɛ̄ ó lɛ iyī nū fō tá ɛyɛ́ɛ́yí lɛ Óndú ā,

³ó géē lɛ iyī nū tū ŋmá ɛgiyí ejé ɔlamu mɛ́mla ejé olɔfú ō gwá. Ó gáā gwá ɛdɔ ejé dóódu nēé yá ŋmá ɔcí kú ufáyin ámāŋ lé īkpō kú ufáyin ɛ̄mɛ̄ɛ̄mɛ̄ ámāŋ ɛ̄nɛ̄ o le ŋmókókó ŋ́.

⁴Eko nɛ̄ó wɛ ígwu kú átámɔ̄kpá kú Óndú ā, ó géē lɛ iyī nū tū ɛyɛ́ɛ́yí lɛ Óndú ā. Ó gáā lé ɔdā dóódu nōo ŋmá ɔcí ufáyin ŋ́, kwu īkpō ámāŋ āpū kú nū.

⁵Ipú odúúdu eko nɛ̄ ɔ̄cɛ cokónu ka anúɔ í wɛ ígwu kú átámɔ̄kpá kú Óndú ā, é gáā lɛ igwu o wɛ́ɛ́yí kwu ɔ́ ɛyí ŋ́, jāā gbéeko nɛ̄ ó je iyī nū tá ɛyɛ́ɛ́yí lɛ Óndú ā le yá jīla. Īnyīlɛyí kú nū géē wɛ oōmutū nɛ̄hi klla géē le gwá cíkpácíkpá.

⁶Ó gáā túblá okwū ŋ́.

⁷Ó kōō wɛ okwū kú ádā nū, ámāŋ ɛ́nɛ́ nū, ámāŋ ɔyínɛ́ nū dóódu. Ó gáā túblá uwá ŋ́. Ó géē je ɔ́ iyē tēelihɔ, ohígbū kaó je iyī nū tá ɛ́yɛ́ɛ́yí lɛ Ɔwɔicō kú nū.

⁸Odúúdú ɛpléeko nɛ̄ ó í wɛ átámɔ̄kpá kú Óndú ā, ó géē wɛ ɔ̄cɛ otīihɔ lɛ Óndú ā.

⁹Ɔ́dāŋ ka ɔ̄cɛ dóódu gekwú acígilí ɛgiyí nū, nɛ̄ó cɛ̄ lɛ iyē otīihɔ kú nū ā kwú tēelihɔ, ó géē gbēyī ɛ̄cī ahāapa, ɛ̄cī nɛ̄ó í je yá yēŋēē ɔ́ɔmā ā, ó géē plla ɛyi kú nū.

¹⁰Ɛ̄cī ɔ́mahātá ā, ó géē bī okóohō ɛpa ámāŋ ka ɔklɛ́ɛbɛ́tɛ ɛpa gé lɛ ɔ̄cogwɛ́ɛya ā, okómpīinu kú Áklɔ̄kpīihɔ ā.

¹¹Ɔ̄cogwɛ́ɛya ā géē je éyi gwɛ́ɛya kú íne nɛ̄ó bīya ā. Ó klla í je ɔhá gwɛ́ɛya ō yɔlá dúúdú. Cɛ́ɛ́ kóō lɛ ɔ́ iyē gwu ŋmá iyē nɛ̄ó tēelihɔ ohígbū iyē nɛ̄ó lɛ kwu okwū ā. Ó klla géē je īnyīlɛ̄yí kú nū yá tīihɔ kpɔ́ ícíícɛ ɔ́ɔmā.

¹²Ó klla í je iyī nū tū ɛyɛ́ɛ́yí igbɔhá lɛ Óndú ā kpɔ́ ɛ́ɛ́. Ó gáā ka eko kú aflɛ́yí ā gɛ ŋ́, ohígbū kaó le iyē nyíilá. Ó géē bī omlede kú iháyí éyi wā kú ɛya nēé í gwó kú ɛpɔ̄bí nɛ̄ó lé ā.

¹³Eko nɛ̄ ɔ̄cɛ ígwu kú átámɔ̄kpá kú Óndú ā lɛ okónu nɛ̄ó ce kóō je iyī nū tū ɛyɛ́ɛ́yí lɛ Ɔwɔicō kú nū ā le yá jīla, é géē bī ɔ̄ wā Okómpīinu kú Áklɔ̄kpīihɔ ā,

¹⁴Ó í je ɔdā ɛ̄gbā kú nū nōo wɛ omlede kú iháyí éyi nɛ̄ó lɛ ɛnyá ŋ́ kú ɛya ō yɔlá dúúdú ā mɛ́mla ɔyí omlede kú iháyí éyi ohígbū íne nɛ̄ó bīya ā. Ó klla í bī omlede kú iháyí éyi ɔhá kú ɛya kú ɛbɔ́.

¹⁵Ó klla í bī ómbilí kú igbō nɛ̄ó gē nū ŋ́ mā, igbō kú umu kú īkpɔ̄dā nēé lɛ anɔ̄ tū ɔ̄, mɛ́mla igbō obákánjɔ̄ nēé le anɔ̄ pīya klá anú ɛyí, mɛ́mla ɛya kú īkpɔ̄dā mɛ́mla ejé.”

¹⁶Ó géē kpó odúúdu ɔdā ɛ̄gbā nyā lɛ Óndú ā klla í gwɛ́ɛya kú íne ō bīya mɛ́mla ɛya ō yɔlá dúúdú.

¹⁷Ó í je omlede ā gwɛ́ɛya kú ɛbɔ́ lɛ Óndú ā mɛ́mla ómbilí kú igbō nɛ̄ó gē nū ŋ́ mā. Ɔ́cogwɛ́ɛya ā géē kpó ɔdā ɛ̄gbā kú īkpɔ̄dā mɛ́mla ejé kú nū ā lɛ Óndú ā dúú.

¹⁸Ɔ̄cɛ ígwu átámɔ̄kpá kú Óndú ā géē wā ɛyí kú nū okómpīinu kú Áklɔ̄kpīihɔ ā, klla í je īnyīlɛ̄yí ā kpó tū ɔlá kú ɛya kú ɛbɔ́ ā.

¹⁹Ɔ̄cogwɛ́ɛya ā géē je ácábɔ̄ éyi kú omlede ā, eko nɛ̄ó le jé mɛ́mla igbō nɛ̄ó gē nū ŋ́ éyi ŋmá ipú ómbilí, mɛ́mla igbō ō bákánjɔ̄ nɛ̄ó gē nū ŋ́ éyi, cɛ́ɛ́ ó lɛ uwá kpó ce abɔ̄ kú ɔ̄cɛ ígwu kú átámɔ̄kpá kú Óndú ā, eko nɛ̄ó le ɛyí kú nū wā ā.

²⁰Cɛ́ɛ́ ɔ̄cogwɛ́ɛya ā géē jíla ɔ́ iyē kú ɛya o jíliyē lɛ Óndú ā, é kē wɛ ɔdā o tīihɔ lɛ ɔ̄cogwɛ́ɛya, uwá mɛ́mla amɛ̄ mɛ́mla átákwū nɛ̄ íne tɛtɛ kóō wɛ ákú ācogwɛ́ɛya ā. Igbīhi ɛ̄nyā aā, ɔ̄cɛ ígwu kú átámɔ̄kpá kú Óndú ā géē lɔfú gwá ejé glá mɛ́ɛ́nɛ.

²¹Ɛ̄nyā wɛ íne kú aátámɔ̄kpá kú Óndú ā á. Ɔ́dāŋ nɛ̄ atámɔ̄kpá le okónu kú ɛya ō gwó ce fíyɛ́ ɔdā nɛ̄ó cokónu kú nū ā. Ó í yá odúúdú ɔdā ó cokónu nū ā pií.”

²²Óndú ā da Umósīsi kahíníī,

²³“Le ka lɛ Árɔ̄ni mɛ́mla ayí nū kéē bī ɛlā nyā lɛ hɔ́hā ce ācɛ ɔlɛ́ um.

²⁴Óndú ā kóō hɔ́hā ce aá, kóō lɛ aá tū.

²⁵Óndú ā kóō gbonɛnɛ lɛ aá, kóō méyīnyinyi aá.

²⁶Ká Óndú ā kóō má aá mla eyī olɔhi kú nū, cɛ́ɛ́ kóō je ɛbɔ́ lɛ aá.”

²⁷Óndú ā klla kahíníī, “Ɔ́dāŋ keé bī iyē kú um lɛ ɔhā hɛ́ ce ācɛ kú Ísrɛ̄lu, n géē hɔ́hā ce uwá.”