Read idoma ÁLUKA 8 Bible Online

ÁLUKA 8 - idoma bible

ÁLUKA 8

¹Óndú ā da Umósīsi kahíníī,

²“Le ka lɛ Árɔ̄ni ka, eko nɛ̄ó gáā lɛ ɔlá kwu agege ā, kóō lɛ ɔ́ ce ɔwɛ nɛ̄ agege ahāapa ā géē fíyajɛ ga iyɔ̄bū kú ɔdā ō le agege ce ɔ́ ā.”

³Anɔ́ɔ Árɔ̄ni lɛ ɔlá hɛ́ kwu aágege ā, kwú uwā ú kpó ce kéē fíyajɛ ga iyɔ̄bū kú ɔdā ō le agege ce ɔ́ ā, ɛ́gɛ́nɛ̄ Óndú ā ka lɛ Umósīsi lɛ ā.

⁴Oŋmá icō ga ɔkwu kú ɔdā ō le agege ce ɔ́ ā, ugóolu (oje ɔdɔ) nēé bī le yá ɔ̄ á, ɛ́gɛ́nɛ̄ Óndú ā mafú lɛ Umósīsi kéē yá ɔ̄ lɛ ā.

⁵Anɔ́ɔ Óndú ā da Umósīsi kahíníī,

⁶“Kwú ayí kú Ulífāyi ā ú ŋmá ipú ācɛ kú Ísrɛ̄lu ká ā lɛ uwá iyē gwu yēŋēē.

⁷Ɛ́gɛ́nɛ̄ a géē gwu uwá iyē yēŋēē ā yɔ̄ á, lɛ éŋkpɔ̄ nēé gē lɛ yá uculo kú iyē ō gwu ā, mī klá uwá. A klla í da uwá kéē lɛ ɛjɛ̄ɛ̄jī ɔnwū kú iyē kú uwā wā, cɛ́ɛ́ é klla lɛ īlī kú uwā na, cɛ́ɛ́ kéē lɛ iyī uwā tū yēŋēē.

⁸É í bī ɔyí ɔbá ɛna éyi, mɛ́mla ɔdā kú ɛya kú īkpɔ̄dā. É klla í bī ɔyí ɔbá ɛna ɔhá kú ɛya kú íne ō bīya.

⁹A géē tú odúúdu ójīla kú Ísrɛ̄lu bá, cɛ́ɛ́ a géē yá kú ayí Ulífāyi ā kéē háyi okómpinu kú Áklɔ̄kpīihɔ ā.

¹⁰A í cɛ̄ lɛ odúúdú ójīla kú Ísrɛ̄lu kéē lɛ abɔ̄ kpó ce ayí kú Ulífāyi ā ɛyí.

¹¹Cɛ́ɛ́ Árɔ̄ni kwú ayí Ulífāyi ā ú lɛ Óndú ā bɛ̄ɛka ɛya ojíliyē ā nɛ̄ó cɛgbá nɛ̄ɛ̄nɛ̄hi ŋmá ɛgiyí ācɛ Ísrɛ̄lu. Cɛ́ɛ́ kéē le pīya ācoyúklɔ́ lɛ Óndú ā.

¹²Ayí Ulífāyi ā í kpó abɔ̄ kú uwā ce ɛyí kú aɔ́bá ɛna ā. A géē je éyi gwɛ́ɛya kú íne ō bīya, a klla í je ɔhá gwɛ́ɛya o yɔlá dúúdú kóō wɛ uculo kú iye ogwu mɛ́mla o yá yēŋēē kú uwā.

¹³Kwú ayí Ulífāyi ā ú fu céé kéē gwɛ́ɛya ojíliyē nōo cɛgbá nɛ̄ɛ̄nɛ̄hi ā gā um. Ká ā kwú Árɔ̄ni mɛ́mla ayí nū ú kéē leyīkwu ayí Ulífāyi ā.”

¹⁴Ɛ́gɛ́nyā nāa géē fu ayí Ulífāyi ŋmá ipú ācɛ o hile kú Ísrɛ̄lu ā, ká ē í wɛ ákú um á

¹⁵Eko nāa le ayí Ulífāyi ā yá yēŋēē, klla lɛ uwá iyē gwu, é géē yúklɔ́ gā um ipú Áklɔ̄kpīihɔ kú um.

¹⁶Ohígbū ka n le uwá kpó lɛ iyī um kwɛyí ayí áflɛ́yí kú ācɛ Ísrɛ̄lu, é kē wɛ ákú um ōfōōfū um.

¹⁷Eko nɛ̄ n ŋmó aɔ́kplá kú ācɛ Íjīpiti ā, n kwú aɔ́kplá kú ācɛ kú Ísrɛ̄lu mɛ́mla ákú aɛ́bɛ́ kú uwa ú pīya ákú um.

¹⁸Abālɔbányā, n géē kpó ayí Ulífāyi ā kwɛyí ācɛ kú Ísrɛ̄lu.

¹⁹N kwú uwā ú lɛ Árɔ̄ni mɛ́mla ayí nū bɛ̄ɛka ɔdā ɛ̄gbā nōo ŋmá ɛgiyí ācɛ kú Ísrɛ̄lu ā. Kéē yúklɔ́ gā um ipú Áklɔ̄kpīihɔ kú um. Kéē gbō ācɛ kú Ísrɛ̄lu ŋmá ífi mɛ́mla obɔ̄bí nōo géē wā ɛgiyí uwā, eko nēé túblá ɛga otīihɔ kú um a.

²⁰Umósīsi mɛ́mla Árɔ̄ni mɛ́mla ójila kú Ísrɛ̄lu ā, le ayí kú Ulífāyi fu céé lɛ Óndú ā ɛ́gɛ́nɛ̄ Óndú ā ka lɛ Umósīsi lɛ ā.

²¹Ayí kú Ulífāyi ā le iyī uwā yá yēŋēē ŋmá íne nēé bīya ā, klla le īlī kú uwā na. Anɔ́ɔ Árɔ̄ni kwú uwā ú lɛ Óndú ā bɛ̄ɛka ɛya ojíliyē ā. Árɔ̄ni le ɛya gwó kwɛ́yí uwā kúō lɛ uwá yá yēŋēē klla kwú uwā ú yá tīihɔ.

²²Ācɛ ā lɛ ɔdā dóódu nɛ̄ Óndú ā ka lɛ Umósīsi lɛyíkwu ayí Ulífāyi ā yá kpɛ́mm. Ayí kú Ulífāyi ā géē lɔfú yúklɔ́ ipú Áklɔ̄kpīihɔ ā ɛháajɛ kú Árɔ̄ni mɛ́mla ayí nū mɛ́ɛ́nɛ.

²³Óndú ā da Umósīsi kahíníī,

²⁴“Ayí Ulífāyi dóódu nōo wɛ iháyí ofu ce ɛhɔ̄ géē gbɔɔ́ ō yúklɔ́ kú nū ipú Áklɔ̄kpīihɔ kú um.

²⁵Eko nɛ̄ó wɛ iháyí ofɛpa ce igwó, ó géē mlɛ́nyɔ́ ŋmá úklɔ́ ō yá ipú Áklɔ̄kpīihɔ ā.

²⁶Igbīhi iháyí ofɛpa ce igwó ā, ó géē tá ayí Ulífāyi ɔhá abɔ̄ í yúklɔ́ kú uwā ipú Áklɔ̄kpīihɔ ā glá, amáŋ, ó gáā yúklɔ́ dúúmā ipú Áklɔ̄kpīihɔ abɔ̄yī nū ŋ́. Ɛ́gɛ́nɛ̄ a géē kɔ̄ úklɔ́ kú ayí Ulífāyi ā yɔ̄ á.”