Read idoma ÁLUKA 9 Bible Online

ÁLUKA 9 - idoma bible

ÁLUKA 9

¹Óndú ā kɛlā lɛ Umósīsi ipú ígbíli kú Usáyínāyi, ipú ɔyā aflɛ́yí kú iháyí ɔ́mpa, nɛ̄ ācɛ kú Ísrɛ̄lu bɛ̄cɛ ŋmá Íjīpiti ā kahíníī,

²“Da ācɛ kú Ísrɛ̄lu ā, kéē lɛ ucɛ kú onyatá ā tū eko kú nū.

³Aá géē lɛ ɛ̄cī kú ucɛ kú onyatá ā tū, ɛ́gɛ́nɛ̄ odúúdú aíne kú nū lɛ ā. O gbɔɔ́ ŋmá ɔ̄nɔ̄ɔ̄nɛ̄ kú ɛ̄cɛ̄ ɔ́migwɛ́ɛnɛ kú ɔyā nyā.”

⁴Anɔ́ɔ Umósīsi le ka lɛ ācɛ ā kéē lɛ ucɛ kú onyatá nyā lé eko kú nū.

⁵Ɔ̄nɔ̄ɔ̄nɛ̄ kú ɛ̄cī ɔ́migwɛ́ɛnɛ kú ɔyā aflɛ́yí ā, é lɛ ucɛ kú onyatá ā lé ɛ́gɛ́nɛ̄ Óndú ā ka lɛ Umósīsi lɛ ā.

⁶Amáŋ ācɛ ōhī bá abɔ́ɔ nēe le tēelihɔ ohígbū kaé le abɔ̄ kwu okwū, ɔ́ɔmā yá ɛ́ɛ́ nēé gáā lé ucɛ kú onyatá nyā glá ŋ́. É le pɛ́ tá ɛgiyí Umósīsi mɛ́mla Árɔ̄ni, anɔ́ɔ

⁷é kahíníī, “Alɔ le tēelihɔ ohígbū ka alɔ le abɔ̄ kwu okwū, ɔdíyá nēé cɛ̄ lɛ alɔ je iyɛ́ɛya kú alɔ lɛ Óndú ā mla ācɛ kú Ísrɛ̄lu o hile ā ŋ́ mā ā?”

⁸Anɔ́ɔ Umósīsi da uwá kahíníī, “Aá gbēyī ká n̄ lɛ ɔdā nɛ̄ Óndú ā géē ka lɛyíkwu aá ā pó ɛ́ɛ́”

⁹Óndú ā da Umósīsi kahíníī,

¹⁰“Le ka lɛ ācɛ kú Ísrɛ̄lu ka eko nɛ̄ ɔ̄cɛ dóódu kú aá ámāŋ ka ayááyí kú aá le tēelihɔ o ŋmá lɛ abɔ̄ ō kwu okwū, ámaŋ ka o yɔ̄ iyāāwu ɛgaligbó, nɛ̄ ó dɔ̄ɔ̄ka ō lé ucɛ kú onyatá kpɔ́.

¹¹N je ɛga lɛ uwá kéē lɛ ɔ́ tū eko nɛ̄ ɔyā éyi le gla, ikɔkɔ ɛ̄cī ɔ́migwɛɛnɛ kú ɔyā ɔ́mpa ā. Kéē lé ucɛ ā mɛ́mla igbō nɛ̄ó gē nū ŋ́, mɛ́mla ēpū ohɔ́ɔnɔ.

¹²Aá gáā mā ɛbɛ́ kú nū dóódu tá gbó oŋmɔ́ɔci nū ŋ́. Ɛ́ɛ́ nɛ̄ aá géē ca ikpokwu kú ɛbɛ ā dúúmā ŋ́. Aá lé ucɛ ā ɛ́gɛ́nɛ̄ íne kú nū lɛ ā.

¹³Amáŋ, ɔ̄cɛ dúúmā nōo le yēŋēē, nɛ̄ó ga iyāāwu oligbó ŋ́, nɛ̄ó lé ucɛ kú onyatá nyā ŋ́, ń gáā je ɔ̄ ka ó wɛ éyi kú ācɛ ɔlɛ́ um ɛ́ɛ́ gɛ ŋ́. Ohígbū kaó wā í gwɛ́ɛya gā um eko kú nú ŋ́. Ó géē lɛyíkwu ɔdā dúúmā nōo tá íne nɛ̄ ó bīya ā ɔkwu.

¹⁴Ɔ́dāŋ ka ugbɔga dúúmā yɔ̄ ɔlɛ́ aá nōo dɔ̄ɔka kóō lé ucɛ kú onyatá ā, o géē lɛ odúúdu íne kú ucɛ ā tū. Íne kú ucɛ kú onyatá ā wɛ ékpónú lɛ ācɛ dóódu.

¹⁵Ɛ̄cī nēé je Áklɔ̄kpīihɔ kú Óndú ā kwaajɛ ā, ojuja wā í klá anú, ɔ̄nɔ̄ɔ̄nɛ̄ bɛ̄ɛka ɔlá ā otú gbóɔ̄cī.

¹⁶Ɛ́gɔ́ɔmā nɛ̄ ó lɛ piyóó ā. Ojuja klá anú ɔlɛ́ɛnɔ, otú ā, ojuja kwú yá bɛ̄ɛka ɔlá ā.

¹⁷Eko dúúmā nɛ̄ ojuja ā nyɛ̄ɛ̄ ŋmá Áklɔ̄kpīihɔ ā, ācɛ kú Ísrɛ̄lu géē je cālɛ́ ŋmá abɔ́ɔ ga ɛga nɛ̄ ó géē wā í háyi igbɔhá ā.

¹⁸Ācɛ ā géē cālɛ́ klla í gaá lā ɛga ɔhá, ɛ́gɛ́nɛ̄ Óndú ā ka lɛ ā. Ɛ́gɛ́ nɛ̄ ojuja ā gbojī ɛyí kú Áklɔ̄kpīihɔ ā lɛ ā, ɛ́gɔ́ɔmā nɛ̄ ācɛ ā klá abɔ́ɔ gbojī lɛ á.

¹⁹Eko nɛ̄ ojuja ā ma klá Áklɔ̄kpīihɔ ā gbojī nɛ̄ɛ̄nɛ̄hi, é géē lɛyítáajɛ lɛ Óndú ā klla lā abɔ́ɔ.

²⁰Eko ōhī, ojuja ā í gē klá Áklɔ̄kpīihɔ ā ɛ̄cī alɛwa ŋ́, nááná ɛ́gɛ́nɛ̄ Óndú ā ka lɛ ā, nēé gē lā gaá kwu klla gē cālɛ́ á.

²¹Eko ōhī ojuja ā yɔ̄ ŋmá ɔ̄nɔ̄ɔ̄nɛ̄ gaá kwu ɔ̄cɔ̄ɔ̄cī, cɛ́ɛ́ ikpííkpó nɛ́ ojuja ā nyɛ̄ɛ̄ ŋmá Áklɔ̄kpīihɔ ā, é gē cālɛ́.

²²Ó kōō wɛ ɛ̄cī ɛpa, ɔyā éyi, iháyí éyi, ó kōō fíyɛ́ ɔ́ɔmā, ɔ́dāŋ ka ojuja ā klá Áklɔ̄kpīihɔ ā, é géē lā abɔ́ɔ, amáŋ eko dóódu nɛ̄ ó nyɛ̄ɛ̄, é géē cālɛ́.

²³É gē lā ɔlɛ́ ā klla ī cālɛ́ ɛ́gɛ́nɛ̄ Óndú ā ka lɛ uwá lɛ ā. É géē lɛ íne nɛ̄ Óndú ā gē je lɛ uwá bū okónu kú Umósīs ā tū.