Read idoma UMÁYÍKA 1 Bible Online

UMÁYÍKA 1 - idoma bible

UMÁYÍKA 1

¹Ɛpléeko nɛ̄ Ujɔ́tam, Áhās mɛ́mla Uhɛsɛkíya wɛ aɔ́cɛ́ kú Ujúda gboce iyī uwā ā, Óndú ā le ɛhɔ̄ tū Umáyíka nōo ŋmá igelī kú Umɔréset ā lɛyíkwu Usamérīya mɛ́mla Ujerúsālɛm.

²Odúúdú ācɛ kú éwo ā, aá lɛ ɛ̄lā nyā pó. Odúúdú aá nēe lā ipú ajɛ nyā ā, aá jāhɔ̄ lɛ ɛlā nyā. Óndú ā, Ɔwɔicō géē cījáalí tū aá. Aá jāhɔ̄! Ó kɛlā ŋmá Agblīihɔ-nɛ̄hi kú Ɔkpáncō kú nū.

³Óndú ā géē wā ŋmá ɛga otīihɔ kú nū. Ó géē wā ajɛ, klla í yāwu ɛyí aɛ́fu ā.

⁴Anɔ́ɔ aɛ́fu ā kē í je ja wā ɛháajɛ ikpó kú nū bɛ̄ɛka ɔja nōo tá ipú ɔlá ā. É kē í pɛ́ wā aɔ́pɛ́ kú ɛfu ā bɛ̄ɛka éŋkpɔ̄ nōo gē pɛ́ ŋmá ɛyí ɛfu wāajɛ ā.

⁵Ódúúdú aɔ́dā nēe bá ɔ́ɔmā géē yá ohígbū ɔ́bíipú mɛ́mla ikpɛ̄yí olɔfú kú ācɛ Ísrɛ̄lu nēe wɛ ayááyí kú Ujékɔ̄pu ā. Usamérīya nōo wɛ igelī kú ɔlɛ́ otrɛyí kú Ísrɛ̄lu ā yá nɛ̄ Ísrɛ̄lu yá īkpɛ̄yí olɔfú á. Ujerúsālɛm nōo wɛ igelī kú ɔlɛ́ otrɛyí kú Ujúda ā yá nɛ̄ Ujúda bī ɔ́bíipú á.

⁶Ohígbū aɔ́dā ɔ́ɔmā, “N géē tū aólɛlā wā í je Usamérīya catāajɛ, nōó géē je pīya ɛyétutulu kú ɔlɛ́ ō catāajɛ, nōo í tɛ́ɛcɛ péee, ɛga nōo í lɔhi ō nyi ɔcí ufáyin ōfōōfūnū. N géē kpó īmū kú ɔlɛ́ ō catāajɛ ā tū ipú ɔpɛ́ ā, n kē í je aíkpíinu ā táncā.

⁷N géē kpó aójibó kú ɛcí kú nū ā ca tāajɛ nyɛŋɛnyɛŋɛ. Ɔlá géē je aɔ́dā dóódu nēé í je lɛ aákwuna kú ikpɛ́cí ā kpó yíífi. Odúúdú aójibó kú ɛcí kú igelī ā í je pīya eyētutulu ipú alácɛ̄. Usamérīya ī cɛgbá odúúdú aɔ́dā nēe bá ohígbū kóō bī ɔ̄ le yá uculo kú ɛcí ō pā kú nū. Anɔ́ɔ aólɛlā kú uwā ā géē kpó uwā ga ɛga ɔhá gaá yá akwuna kú ikpɛ́cí.”

⁸Anɔ́ɔ Umáyíka kahíníī, “Ohígbū ɔdā nyā ā, n géē yēkwu klla í tɛ̄gíkwū, í lɛ ikpó bá ajɛ klla í tóóhɛ́ɛwa yɔ̄ ī yɛ kú n ma ɔtūnōbí kú um fú. N géē yɔ̄ ī dɛ̄ bɛ̄ɛka ɔgwú ā, klla í jikwū bɛ̄ɛka okońkofí ā.

⁹É gáā tá ágbe kú Usamérīya kóō jé gbóógbóō glá ŋ́. Ujúda kē gáā móōwē ɔwɛ éékpó ɔ́ɔmā dúú ɛɛ́. Ífi gāajɛ okónu igá kú Ujerúsālɛm abɔ̄yīnū, ɛga nɛ̄ ācɛ ɔlɛ́ um lā ā ɛɛ́.

¹⁰Aá ka lɛ aólɛlā kú alɔ nēe bá Ugáti ā keé le alɔ yálé ŋ́. Aá cɛ̄ lɛ uwá má aá abɔ̄ aá yɔ̄ gē jikwū ā ŋ́. Ācɛ kú Ubɛti Uléfra, aá ma otūnōbí kú aá fú o ŋmá lɛ ō lɛ iyī aá míya úmlá.

¹¹Aá nēe wɛ ācɛ kú Ussáfi, aá ga ajɛ ɔfiyɛ, tóohɛ́ɛwa mla uwēyī. Ācɛ nēe lā ipú ɔlɛ́ kú Isáanan ā í jámá bɛ̄cɛ ŋmá ipú igelī ā glá ŋ́. Eko nɛ̄ aá pó abɔ́ɔ ācɛ kú Ubɛtɛ́sɛ̄lu yɔ̄ ī jikwū ā, aá géē jé ka ɛga nāa ī kwu tayínū í yɔ̄ abɔ́ɔ ŋ́.

¹²Ācɛ kú Umárɔ̄ti bá ī gbēyī mla ɔtū kpoókpoó kéē wā í lɛ uwá hɛ́tá, ohígbū ka Óndú ā lɛ ífi bī gaá kwu Ujerúsālɛ̄m ajaajɛ ɛɛ́.

¹³Aá nēe lā Ulákissi ā, aá kwú úgbɔ́ɔnya ā ú pla ɔ́nya igbīhi. Aá bī ɛdɔ kú odōbɔ̄bí éékpó nɛ̄ ācɛ kú Ísrɛ̄lu yá ā, anɔ́ɔ aá cɛ̄ lɛ Ujerúsālɛm le íne bīya á.

¹⁴Ācɛ kú Ujúda, aá lɛ úŋmóō tá ācɛ kú Umɔ́rēssɛti kú Ugáti abālɔbányā. Igelī kú Ákisību í gáā wā í tá aɔ́cɛ́ kú Ísrɛ̄lu abɔ̄ ŋ́.

¹⁵Ācɛ kú Umáássa, Óndú ā géē je aá lɛ olɛlā éyi nōo í je aá yálé klla í mīyɛ ɔlɛ́ aá ŋmá ɛgiyí aá. Aotrɛ̄yí kú Ísrɛ̄lu ā, géē nyɔ̄ í kwu tayínū ipú ɔ̄gɔ̄ ɛcɔ̄ kú Adulám.

¹⁶Ācɛ kú Ujúda, aá lɛ ɛyí kpó wá kú aá yēkwu ohígbū ayípɛ̄ nɛ̄ŋcɛ́ nēe he aá ɔtū ā. Aá lɛ ɛyí kú aá fakpá bɛ̄ɛka ákú epu ā, ohígbū ka é géē kpó ayí aá ŋmá ɛgiyí aá, ga ajɛ éwɔhá abɔ̄fú.