Read idoma UMÁYÍKA 2 Bible Online

UMÁYÍKA 2 - idoma bible

UMÁYÍKA 2

¹Ohóō yɔ̄ lɛ ācɛ nēé gbiyɔ̄lā ŋ́ nēe bá gē miya ɔdōbɔ̄bí ā! Ācɛ nēe gē nyɔ̄ ī yá ɔdā nēé miya otú ā eko nɛ̄ eyī le nyā bōōbū ohígbū ka ɔfú yɔ̄ ipú abɔ̄ kú uwā.

²É gē leyīkwu ajɛ kú ācɛ ɔhá cíí, é mīyɛ abɔ̄fú. Eko nɛ̄ inu kú ācɛ he uwá ɔtū á nɛɛ, é mīyɛ uwá abɔ̄fú. Agbénú kú ɔ̄cɛ dúú í tá cíí lɛ ɔwá glá ŋ́.

³Ohígbū ɔdā nēé yá nyā, Óndú ā kahíníī, “N yɔ̄ ī miya kú n̄ bī ɔdōbɔ̄bí wā í klá aá, anɔ́ɔ aá kē gáā kwu glá ŋ́. Aá géē má iyī aá ipú unwalu nɛ̄ ó gáā cɛ̄ lɛ aá yawu ipú ɔ́bɔ́cɛ ɛ́ɛ́ gɛ ŋ́.

⁴Ɛ̄cī nɛ̄ eko ɔ́ɔmā gā, ācɛ géē bī ɔ̄kā kú ɔdā nōo yá aá ā lɛ yá ocābɔ̄ kú ífi, é klla í gwíijē kú ikwūayidɔ nyā lɛ aá, “Alɔ le yíífi dúúdú! Óndú ā kwú ajɛ kú alɔ ú ŋmá ɛgiyí alɔ Anɔ́ɔ ó kwú ɔ̄ ú lɛ ācɛ nēe kwú alɔ abɔ̄fú ā.”[1]

⁵Ohígbū ɔ́ɔmā ā, ɛ̄cī nɛ̄ eko a gā, kéē i je ajɛ ā cīgbīhi lɛ ācɛ kú Óndú ā, odóódu kú aá í gáā lɛ ukpɛ̄ dúúmā ŋ́.

⁶Ācɛ ā gē kɛlā gā um kahíníī, “A kɛlā icííci ɔ́ɔmā lɛ alɔ ŋ́. A kē tɔ́ɔna lɛyíkwu aɔ́dā ɔ́ɔmā lɛ alɔ ŋ́. Ɔwɔicō í gáā je uwēyī lɛ alɔ ŋ́.

⁷A gbɛlá ka é le okónu tá lɛ ācɛ kú Ísrɛ̄lu nɛɛ?[2] Óndú ā kwú ɔtōōlé kú nū ú tónū nɛɛ? Ó géē yá ɔdā ɛ́gɔ́ɔmā ɔkwɛ̄yi nɛɛ? Ó wɛ anú kɛlā ɔkɔ ogbonɛnɛ lɛ ācɛ nēe gē yá ɔdā okpaakpa ā ŋ́ nɛɛ?”

⁸Óndú ā tá uwā ohi kahíníī, “Aá ī nuunu tá ācɛ ɔlɛ́ um bɛ̄ɛka aólɛlā ā. Ācɛ le pīyɛyí ŋmá ɔgbɛ́fú, yɔ̄ ī gbɛlá ka ɔdā dúú í gáā yá aá ɔlɛ́ glá gɛ ŋ́ mā, amáŋ aá kē bá abɔ́ɔ, bá ī gbēyī kú aá kpó úwé kú uwā uwī, ŋmá uwá igbīhi.

⁹Aá le ācɛnyā kú ācɛ ɔlɛ́ um nū ŋmá ɔlɛ́ nōo he uwá ɔtū ā, a klla kwú ɔhā kú um ú ŋmá ɛgiyí ayípɛ̄ ɔlɛ́ uwā piyóó.

¹⁰Aá cāŋjɛ ká aā nyɔ̄, ohígbū ka ɛga omulɛ́nyɔ́ kú ɛbɔ́ í yɔ̄ amānyā gɛ ŋ́. Ohígbū ka, īnyī mɛ́mla ínoōbīya, nōo gē je ɔ̄cɛ yíífi ā, lɛ amānyā tútū kóō je ɔ́ yíífi dúú ɛɛ́.

¹¹“Ācɛ nēe bá ā gē dɔɔ̄ka ɛdɔ ɔcomɛ́ɛbɛ nēe lɛ mu mla ɛ̄kɛ̄mgbɛ̄ mɛ́mla ɛ́plá, nēe klla ī ka, ‘N mɛ́ɛbɛ ka ejé mɛ́mla ejé olɔfú géē yɔ̄ ī pɛ́ lɛ aá.’

¹²“Amáŋ, N géē tū aá bá, odúúdú aá ācɛ kú Ísrɛ̄lu nēe hile ā. N géē bī uwā í tɔ̄há lɛbɛ̄ɛka aálá nēe bá ī pīyɛyí wā inu ā. Lɛbɛ̄ɛka ipácí ɛga o lé ɔdōlé kú álá nōo le mu ā, ajɛ kú aá géē mu mla ācɛ alɛwa igbɔhá ɛ́ɛ́.”

¹³Ɔwɔicō géē nwūla ɔwɛ lɛ uwá, cɛ́ɛ́ ó lɛ uwā kpó bɛ̄cɛ ŋmá ajɛ nēé kwú uwā nyɔ̄ abɔ̄fú ā. É géē je ca wɛ̄ɛcɛ bū ɔwɛ kú igá kú igelī ā kéē nyɔ̄ áncā. Ɔcɛ́ kú uwā, Óndú ā abɔ̄yīnū géē kpó uwā bɛ̄cɛ.