Read idoma UMÁYÍKA 3 Bible Online

UMÁYÍKA 3 - idoma bible

UMÁYÍKA 3

¹Aá jāhɔ̄! Aótrɛ̄yí kú ɔlɛ́ Ujékɔ̄pu, mla aótrɛ̄yí kú inu kú Ísrɛ̄lu, aá cíkā ō jé ɛpɔ̄ okpaakpa ŋ́ nɛɛ?

²Aá nēe gē wɔ́tū ɔdā olɔhi, klla ī yíihɔtū kú ɔdōbɔ̄bí ā. Aá nēe le ācɛ ɔlɛ́ um wá ɔkpá oyēeyī klla lɛ ícɛ̄bɛ́ wā ŋmá ikpokwú kú uwā ā.

³Aá kwú ācɛ ɔlɛ́ um ú lé. Aá le ɔkpá tá ŋmá uwá iyē klla le aíkpokwú kú uwā kpó ca, klla le ɛbɛ́ kú uwā wā nyɛ̄ŋɛnyɛ̄ŋɛ bɛ̄ɛka ɛbɛ́ nēé gáā kpó tū ipú ɛ̄hī ā.

⁴Eko gē wā, nɛ̄ aá géē jikwū klá Óndú ā, amáŋ ó gáā tá aá ohi ŋ́. Ó gáā jāhɔ̄ lɛ ɔkɔ nɛ̄ aá gáā gbā eko ɔ́ɔmā ŋ́. Ohígbū ka aá lɛ ɔdōbɔ̄bí yá.

⁵Ācomɛ́ɛbɛ ɛ̄kɛ̄mgbɛ̄ nōo cokónu kú ɛbɔ́ lɛ ācɛ nēe ī je odée lɛ uwá amáŋ é gē tū ācɛ nēé ī je ɔdā dúúmā lɛ uwá ŋ́ mā ufi ka é géē wā í kpɛ́fú tá uwā ā.

⁶Ohígbū ɔ́ɔmā ā, ācomɛ́ɛbɛ, ɛ̄cī kú aá le bá kóō mɛ ɛ́ɛ́, otú géē bī da aá nɛ̄ aá gáā mɛ́ɛbɛ gɛ ŋ́. Ohígbū ka aá le ācɛ ɔlɛ́ um bī nyíleyī. Aá klla gáā lɔfú mɛ́ɛbɛ kú ócí ɛ́ɛ́ gɛ ŋ́. Aá gáā lɔfú ka ɔdā dúú kú ɛ̄cɔ̄bū glá gɛ ŋ́.”

⁷Uwēyī géē kwú ācomɛ́ɛbɛ ɛ̄kɛ̄mgbɛ̄ ā, ohígbū ka ɛbɛ kú uwā í gáā cɛ̄ gɛ ŋ́. É géē lɛ okónu klá cíí ohígbū ka Ɔwɔicō í gáā tú uwā ohi gɛ ŋ́.

⁸Amáŋ, ami ā, Óndú ā le um tūmu mla ɔfú kú alelékwū kú nū. Ó klla je íjéeyī kú ɛpɔ̄ okpaakpa ō ka mɛ́mla ɔtū ō lɛ ká n̄ kɛlā lɛ ācɛ kú Ísrɛ̄lu lɛyíkwu íne nēé bīya ā.

⁹Aá jāhɔ̄ gā um, aótrɛ̄yí kú inu kú Ísrɛ̄lu mɛ́mla anyākwɔ́cɛ kú ɔlɛ́ kú Ísrɛ̄lu nēe gē wɔ́tū ɛpɔ̄ okpaakpa klla gē je ɔdōlɔhi pīya ɔdōbɔ̄bí ā.

¹⁰Aá yɔ̄ ī gwó Ujerúsālɛm nōo wɛ igelī kú Ɔwɔicō ā mla ikpó ō táajɛ kú ɔ̄cɛ ō ŋmó mɛ́mla ɔdōbɔ̄bí ō yá.

¹¹Aótrɛ̄yí ā gē mīyɛ ómíci ɛ́ɛ́ kéē hɛ́pɔ̄, ācogwɛ́ɛya ā gē mīyɛ ije ɛ́ɛ́ nēé gē cɔ̄ɔwɔ kú īne ā, ācomɛ́ɛbɛ ā gē ka ɛbɛ nēé má lɛ ācɛ nēe gbā ije lɛ uwá ā. Nááná ā, é gē gbɛlá klla ī ka ka, Óndú ā ɔ́ɔ yɔ̄ mla aá. É gē kahíníī, “Ɔdōbɔ̄bí dóódu ɔ́ɔ yá alɔ glá ŋ́, ohígbū ka Óndú ā yɔ̄ mla alɔ.”

¹²Ohígbū aá, é géē je Usáyɔn hɛ́hɔ̄ bɛ̄ɛka ajɛ o hɛ́ɛhɔ̄ ā. Ujerúsālɛm géē pīya ɛyétutulu kú ífi, Agblīihɔ-nɛ̄hi ā kē géē je pīya ipú ūpū.