Read idoma UMÁYÍKA 4 Bible Online

UMÁYÍKA 4 - idoma bible

UMÁYÍKA 4

¹Eko éyi géē wā, nɛ̄ ɛyí ɛfu, ɛga nɛ̄ Agblīihɔ-nɛ̄hi kú Óndú ā kwu ā géē wɛ ɛga o cɛgbá fíyɛ́ ɛga dóódu kú ɛcɛ ā. Aéwo alɛwa géē bá ī pɛ́ ga abɔ́ɔ.

²Ācɛ aéwo ɔ́ɔmā géē wā í ka ka, “Aá wā kú ālɔ̄ ga ɛyí ɛfu kú Óndú ā,[3] ká ālɔ̄ ga Agblīihɔ-nɛ̄hi kú Ɔwɔicō kú Ísrɛ̄lu cɛ́ɛ́ kóō nwū alɔ ɔwɛ kú nū, ká ālɔ̄ yɛ ɔwɛ kú nū. Ohígbū ka aá kē jé ka o ŋmá Usáyɔn nɛ̄ Óndú ā gáā je íne lɛ ācɛ ɔlɛ́ nū Ujérúsālɛm nōó gē kɛlā lɛ uwá ŋmá á”.

³Ó géē ka aéwo alɛwa gwó, ikpɛ́lā kú aéwo nēe lɔfú nēe bá ɛga oligbó mɛ́mla ɛga nōo kwu ajaajɛ. É géē je ɔkpacaŋgelī kú uwā na ɛnū é klá í je óbō kú uwā na ɛ̄wā nēé gē bī lɛ hɛ́ ɔcí ā. Aéwo, í gáā kpɛ́fú tá iyī uwā ɛ́ɛ́ gɛ ŋ́, odúúmā kú uwā í gáā kllɔcɛ́ ɛfú ō kpó ɔhá ɛ́ɛ́ gɛ ŋ́.

⁴Amáŋ, ɔnyɔɔnyɛ géē cīce ɔkwu ɔcí kú ufáyin mla ufíg kú nū ɛbɔ́, ɔ̄cɛ dúú í kē gáā tū uwā ufi gɛ ŋ́. Ohígbū ka Óndú ā cokónu kú ɛlā nyā á.

⁵Éwo éyééye gē gbā ɛcí kú uwā ɛgbā klla í lɛyítáajɛ lɛ uwá, amáŋ, alɔ ā géē gbā Óndú ā, Ɔwɔicō kú alɔ, klla lɛyí táajɛ lɛ ɔ́ piyóó.

⁶Óndú ā kahíníī, “Eko géē wā, nɛ̄ n géē tá ācɛ nēé yá uwā italā ohígbū íne nēé bīya ā, nēe klla ī móowe ajɛ kú ɔfiyɛ ā bá.

⁷É le nyɔ́nyí klla le ligbó ŋmá ɔlɛ́, amáŋ n géē gbɔɔ́ ɛ̄yīpɛ̄ mla ācɛ nōo hile ā. É géē je pīya éwo olɔfú nɛ̄hi. Ami Óndú ā kē wɛ ɔcɛ́ kú uwā ɛyí ɛfu kú Usáyɔn ŋmá abālɔbányā ga eko nōó gē mɛ ŋ́ mā á.”

⁸Anɔ́ɔ awɔ ā, Ujerúsālɛm, ɛga nɛ̄ Ɔwɔicō géē gbō ācɛ ɔlɛ́ nū bɛ̄ɛka ogbāálá ā, géē je pīya ɔlɛ́ otāhɛ̄ kú ajɔ̄ɔ̄cɛ́ nōo tɛtɛ wɛ ákú uwɔ ā igbɔhá kpɔ́ ɛ́ɛ́.

⁹Ɔdí yá ɛ́ɛ́ nāa gē jikwū gbōmgbōm ā? Ɔdí yá ɛ́ɛ́ nāa yɔ̄ ī móōwē bɛ̄ɛka ɔnyā nɛ̄ ɔma lɛ ɔ́ kwú ā? Óhígbū ká á lɛ ɔcɛ́ ŋ́, aígabɔ̄ kú uwɔ klla le pɛ́ gekwú nɛɛ?

¹⁰Aá nya, kú aá klla tíifu, ācɛ kú Usáyɔn kú aá jikwū, ayínɔ̄nyā kú Usáyɔn lɛbɛ̄ɛka ɔnyā nōo yɔ̄ ī yá ɔma, gáā ma ɔyí ā, ohígbū ka abālɔbányā ā géē nyɛ̄ɛ̄ ŋmá ipú igelī, gaá lā ipɔ́lɛ́ o tɛ́ɛcɛ gēdēē. Aá géē ga Ubábīlɔn. Amáŋ Óndú ā géē nya aá tá ŋmá abɔ̄ kú aólɛlā kú aá abɔ́ɔ.

¹¹Abālɔbányā, aéwo alɛwa le túbá lɛyíkwu aá. É kahíníī, “Ujerúsālɛm géē je yíífi piíí! Alɔ géē má ka Usáyɔn géē je wúla tāajɛ piíí.”

¹²Amáŋ, é jé ɔdā nōo yɔ̄ ɔtū kú Óndú ā ŋ́, é jɛ́yí ojuju kú Ɔwɔicō ā ŋ́. É kē jé ka ɔɔ́ lɛ aá túbá kóō yá aá italā ɛ́gɛ́nɛ̄ é gē tú ɛ̄wɛ̄ igwu bá kéē wú ɔ̄ ā ŋ.

¹³Óndú ā kahíníī, “Aá cāŋjɛ kú aá yá aólɛlā kú aá italā bɛ̄ɛka ɛ́gɛ́nɛ̄ é gē wú igwu ā. N géē je ɔfú lɛ aá bɛ̄ɛka ɔbɛ́ɛna nōo lɛ ajī oje, nɛ̄ āpīice kú nū wɛ oje udɔ ā. Aá géē ca ācɛ alɛwa tāajɛ nyɛŋɛnyɛŋɛ, cɛ́ɛ́ aá kwú agbénú kú uwā ú kpó kéē kwú pīya ákú ami nōo wɛ Óndú kú odúúdú ācɛ ā.