Read idoma UMÁYÍKA 5 Bible Online

UMÁYÍKA 5 - idoma bible

UMÁYÍKA 5

¹Ācɛ kú Ujerúsālɛm, aá lɛ aícɔ́ɔja kú aá túbá! É le íbɔm cē tū alɔ lɛ alɔ yɛjīla tá biílí ɛɛ́! É yɔ̄ ī nuunu tá aótrɛ̄yí kú Ísrɛ̄lu.

²Óndú ā kahíníí, Awɔ, Ubɛ́tlɛhɛ̄m Éfrāta ipú ajɛ kú Ujudíya, nyɛ́ fíyɛ́ dúú á ipú ajɛ kú Juda á, amáŋ anúɔ géē bī otrɛ̄yí ŋmá ipú uwɔ wā nōo géē leyīkwu ācɛ ɔlɛ́ nū Ísrɛ̄lu ā. Anú nɛ̄ ohútu kú ipɔ́ɔma kú nū gbɔɔ́ ŋmá eko nɛncɛ̄ kú íkííkée ā.

³Ohígbū ɔ́ɔmā ā, Óndú ā géē cīgbīhi kwu ācɛ ɔlɛ́ nū lɛ aólɛlā kú uwā, jāā gbéeko nɛ̄ ɔnyā nōo ī yá ɔma ā lɛ ɔyí ma. Cɛ́ɛ́ ācɛ nēe hile bá ajɛ kú aéwɔhá ā pīyɛyí wā í pīyatɔ̄há mɛ́mla ācɛ ɔlɛ́ uwā, Ísrɛ̄lu.

⁴Eko nɛ̄ otrɛyí ɔ́ɔmā gā ā, ó géē leyīkwu ācɛ ɔlɛ́ nū ŋmá lɛ ɔfú nōo ŋmá ɛgiyí Ɔwɔicō ā, mɛ́mla ɛgahi kú Óndú Ɔwɔicō abɔ̄yīnū. Ācɛ ɔlɛ́ nū géē lā ɛbɔ́ ohígbū ka aéwo dóódu géē jé ka ó lɔfú nɛ̄hi,

⁵ó géē bī ɛbɔ́ wā. Eko nɛ̄ ācɛ kú Asíriya wā gaá ca ɔlɛ́ alɔ kéē ca ɛga olɔfú kú alɔ ā, alɔ géē tū aótrɛ̄yí kú alɔ nēe lɛwa jɛ̄ kéē gaá nuunu tū uwā.

⁶É géē bī ɔkpacańgelī le yá ācɛ kú Asírīya lé klla í mīyɛ ajɛ ɔlɛ́ uwā nōo wɛ ákú Unímrɔ̄du ā. Cɛ́ɛ́ é lɛ alɔ hɛ́tá ŋmá abɔ̄ kú ācɛ kú Asiríya, eko nɛ̄ ācɛ Asírīya lɛ ikpó bá ɛjī kú ɔlɛ́ alɔ klla le behé wā ipú ajɛ kú alɔ.

⁷Ācɛ kú Ísrɛ̄lu nōo hile ā géē lɛbɛ̄ɛka ébú nɛ̄ Óndú ā tɛ̄hɔ̄ klá aéwo alɛwa, ó í lɛbɛ̄ɛka ɔwɔ ō mí klá ɛyí ācí ɛ̄mɛ̄ɛ̄mɛ̄ nōo yɔ̄ ī jɛ̄ ā. É géē gboló ce Ɔwɔicō, é kē gáā yājɛ lɛ̄ ācɛ ɔlamu ŋ́.

⁸Ācɛ nēé mā uwā tá ipú aéwo ā, géē lɛbɛ̄ɛka ágábá nōo yɔ̄ ī dɔɔ̄kā ɔdōlé ipúúpū ámāŋ ka ipácí ā. Ó le bēhé ga ipú aálá ā le uwá kwú kwú uwā ú híla nyɛŋɛnyɛŋɛ. É leyīce ka ɔ̄cɛ dúú ɔ́ɔ lɔfú hɛ́ aá tá glá ŋ́.

⁹Ísrɛ̄lu géē yá aólɛlā kú uwā lé klla í je uwá yíífi dúúdú.

¹⁰Óndú ā kahíníī, “Ɛ̄cī ɔ́ɔmá ā, n géē kpó aɔ́nya kú aá ŋmá ɛgiyí á, klla í kpó aúgbɔ́nya kú ɛfú kú aá yíífi.

¹¹N géē je odúúdú aígelī nɛ̄hi nōo bá ajɛ kú aá kpó yíífi, klla í kpó aínɔ̄ɔda kú ɔkplɛ́fú kú aá ca tāajɛ.

¹²N géē je ācopɛ̄cí mla aógwɛ́bā kpó yíífi ŋmá ipú aá, nɛ̄ aá klla gáā lɛ ācogwɛ́bā ipú aá gɛ ŋ́.

¹³N géē je aójibó mɛ́mla ɛcɔ̄ okwu ajɛ kú ɛcí kú aá kpó yíífi, nɛ̄ aá klla gáā túkpɛɛ́ lɛ okwúukwu kwu ajɛ lɛ ɔdā nɛ̄ aá bī abɔ̄ kú aá yá gɛ ŋ́.

¹⁴N géē je aójibó kú ɔwɔ, nōo lé ka Ássɛ̄ra ā ca tāajɛ ŋmá ipú aá klla í je aígelī nɛ̄hi kú aá kpó yíífi.

¹⁵Anɔ́ɔ ipú icɔ̄nū nɛ̄hi mɛ́mla ánya, n géē gwō aéwo dóódu nɛ̄ ó lɛyítáajɛ gā um ŋ́ mā ɔ́ci.”