Read idoma UMÁYÍKA 6 Bible Online

UMÁYÍKA 6 - idoma bible

UMÁYÍKA 6

¹Jāhɔ̄ lɛ ɛpɔ̄ nɛ̄ Óndú ā bī lɛyíkwu Ísrɛ̄lu ā. Cāŋjɛ, Ó! Óndú ā, ká ā kɛpɔ̄ kú uwɔ, ká aɛ́fu nɛ̄hi mɛ́mla aɛ́fu nɛ̄ŋcɛ́ kéē pó ɔkɔ kú uwɔ.

²Aá pó, aɛ́fu, aá nōo wɛ etikpa opiyóó kú ɛcɛ ā, aá jāhɔ̄ ɛpɔ̄ kú Óndú ā! Ó lɛ ɛpɔ̄ mla ācɛ ɔlɛ́ nū. Ó yɔ̄ ī kpó ɛlā ce Ísrɛ̄lu.

³Óndú kahíníī, “Ācɛ ɔlɛ́ um, ɔdí nɛ̄ n yá aá? N húmáyī wɛ iyó ogbɛnú ce aá nɛɛ? Aá tá um ohi.

⁴Ami bī aá bɛ̄cɛ ŋmá ajɛ Íjīpiti á. Ami nya aá tá ŋmá ajɛ kú ɔfiyɛ á. N tū Umósīsi mɛ́mla Árɔ̄ni mɛ́mla Umírīyam ɛhɔ̄ gé lɛ aá, kéē bī aá tá.

⁵Ācɛ ɔlɛ́ um, blakwu ɔdā nɛ̄ Ubálāki ɔcɛ́ kú Umówābu tútū ō yá aá ā, mla ɛ́gɛ́nɛ̄ Ubálam ɔyínɔ̄nyīlɔ kú Ubéyo tá ɔ̄ ohi lɛ ā. Blakwu ɔdā nōo yá ŋmá ɔwɛ kú Usittím ga Ugígalu ā, cɛ́ɛ́ ká aá géē jé úklɔ́ nɛ̄ n yá, o yá kú um lɛ aá nyatá ā.”

⁶“Ɔdí nɛ̄ n géē bī gé lɛ Ɔwɔicō kú ɔkpáncō, eko nɛ̄ n wā iyɔ̄bū nū gáā gbā ɔ̄ ɛgbā ā? N̄ bī ɔyí ɛna nōo lɔhi fíyɛ́dúú ā wā í le gwɛ́ɛya o yɔlá dúúdú lɛ ɔ́ nɛɛ?

⁷Ɔtū géē hi Óndú ā ɔ́dāŋ nɛ̄ n bī omlede úlúúlā? Kɛ̄ɛ ka ɔgālā kú anɔ̄ kú ólīfu úlá ofu cigwó? N̄ kwú ɔyínɔ̄nyīlɔ aflɛ́yí kú um í gwɛ́ɛya kú n̄ lɛ gbɛfiyɛ kú íne nɛ̄ ami abɔ̄yī um bīya ā nɛɛ?

⁸Ehée, Óndú ā le ɔdā nōo lɔhi ā mafú lɛ alɔ ɛɛ́. Ɔdā nɛ̄ Óndú dɔɔ̄ka ŋmá ɛgiyí alɔ ā wɛ ka alɔ lā oyēeyī okpaakpa, kú alɔ̄ yíihɔtū tá ācɛ eko dóódu, ká alɔ̄ klla tú iyī alɔ wāajɛ ipú ɛma kú alɔ mla Ɔwɔicō kú alɔ.

⁹Ó wɛ ɔdā kú íjééyī ka ɔ̄cɛ kóō yúufi Ɔwɔicō. Óndú ā hī aígelī nɛ̄hi ā igwú, “Aá jāhɔ̄, aá ācɛ nēe jīla tɔhā ipú igelī ā.

¹⁰Agbénú nɛ̄ ācobɔ̄bíipú lɛ ɔwɛ kú ɔ́bíipú ā bá ipú inu ɔlɛ́ uwā. É gē bī ɔdā ō miya ɔdā kú újí ī le miya ɔdā. Ɛ̄nyā kē wɛ ɔdā nōo wú um ɔtū.

¹¹Ācɛ nēe gē bī okoolo újí le miya īkpɔ̄dā lɛ ācɛ ā, ɛ́gɛ́nyā nɛ̄ n géē je yá uwā ɛhi lɛ ā?

¹²Ācɛ ogbagbénú kú aá gē hɛ́ aógbɛhá lé, odúúdú aá kpɛ́mm klla gē kɛ̄mgbɛ̄.

¹³Ohígbū ɔdā nyā, n gbɔɔ́ ō kpó aá yíífi ɛɛ́ klla ī je ɔlɛ́ aá tá alácɛ̄ ohígbū íne nɛ̄ aá bīya ā.

¹⁴Aá géē lé ɔdōlé, amáŋ, aá gáā nū ipú ŋ́, ɛmiyɛ géē yɔ̄ ī ŋmá aá kpɔ́. Aá géē kpó aɔ́dā nyɔ̄ í tayínū, amáŋ é gáā tá abɔ́ɔ cíí lɛ aá ŋ́, ɔdā dúúmā nɛ̄ aá kē kwú tayínū, n kē í tū ɛfú wā í je uwá kpó yíífi ŋmá ajɛ.

¹⁵Aá géē nyi ɔdɛ̄hɔ̄, amáŋ, aá gáā cē ɔdɛ̄hɔ̄ kú aá ŋ́. Aá géē pí anɔ̄ ŋmá īkpō kú ólīfu, amáŋ, aá gáā má anɔ̄ dúú ŋ́. Aá géē yá ejé ŋmá īkpō kú Ufáyin, amáŋ, aá gáā má ejé gwá ŋ́.

¹⁶Ɛ̄nyā géē yá piíí, ohígbū ka, aá le yɛce ucē obɔ̄bí kú ɔcɛ́ ómri mɛ́mla ákú ɔyínɔ̄nyīlɔ kú nū, ɔcɛ́ Áhābu. Ɔdōbɔ̄bí nēé yá ā nɛ̄ aá yɔ̄ gē gɔbū gē yá dúú á. Ohígbū ɔ́ɔmā ā, n géē kpó aá yíífi, anɔ́ɔ odúúdú ācɛ géē lɛ eyī gla aá bónū, ācɛ kú ɛga dóódu í gáā lɛ ojīlīmā ce aá gɛ ŋ́.