Read idoma UMÁYÍKA 7 Bible Online

UMÁYÍKA 7 - idoma bible

UMÁYÍKA 7

¹Elé, n le jī ɛɛ́! N lɛbɛ̄ɛka ɔ̄cɛ nɛ̄ ɛmiyɛ yɔ̄ ī ŋmó ɔ̄, nɛ̄ ó má īkpō ɔcí dúúmā kwu ɔcí kóō lé ŋ́ mā. É kwú īkpō ɔcí ufáyin mɛ́mla īkpō ufígi nōo lɔnyɛ ā ú kpó wū ŋmá ɔcí ɛɛ́.

²Ɛhɛ́ɛ! Ɔ̄cɛ nōo ī yá ucē olɔhi tá Ɔwɔicō ɔtū ā í yɔ̄ ajɛ ā gɛ ŋ́. Ɔ̄cɛ ɔ̄kwɛ̄yi dúúmā í yɔ̄ ipú ācɛ gɛ ŋ́. Odúúdú uwā bá yɔ̄ ī gbēyī kéē ŋmó ayínɛ́ uwā. Ɔnyɔɔnyɛ yɔ̄ ī tɔ́ɔtɛ́ kú ɔyínɛ́ nū mla ɛ́yá ō kwú ɛbɛ́.

³É wɛ ɔka kú ɔdōbɔ̄bí ō yá. Aɔ́cɛ́ ō kɛpɔ̄ mɛ́mla aígabɔ̄ kú uwā ā ī dɔɔ̄kā ō mīyɛ ómíci ŋmá abɔ̄ ācɛ lé. Ācɛ nɛ̄hi ā gē da uwá ɔdā nēé dɔɔ̄kā ā, anɔ́ɔ é gē yá ojuju kú ɔdōbɔ̄bí tɔ̄há á.[4]

⁴Ɔ̄cɛ nēé kóō lɔhi klla ī kɛlā ɔkwɔ̄kwɛ̄yi ipú uwā fíyɛ́ kpɛ́mm ā lɛbɛ̄ɛka ácí kú ujē nɛ̄ ó tīile ŋ́. Eko ā gā ɛɛ́, nɛ̄ Óndú géē yá ācɛ ā italā ɛɛ́, ɛ́gɛ́nɛ̄ ó pi uwá ahɔ̄ bū okónu kú ācogbāajɛ nēe wɛ ācomɛ́ɛbɛ ā. Abālɔbányā é le gbájí.

⁵A híī kpɔ́tūce oladóogbe ámāŋ ka oklóbīya uwɔ ŋ́. Lɛ ɛlā kwu ɛlā okónu kú uwɔ, kwu ɛlā nāa í ka lɛ ɔnyā uwɔ ā dúú.

⁶Eko nōo yɔ̄ nyā ā, ɔyí géē yá ádā nū bɛ̄ɛka olíla ā, ayínɔ̄nyā géē tā ɛlā kú ɛ́nɛ́ uwā. Ɔnyā ɔyí gē yíkpɛ́lā mla ɛ́nɛ́ ɔbá nū, aólɛlā kú ɔ̄cɛ wɛ éyi kú ācɛ kú ipɔ́ɔnū kú ɔlɛ́ nū piíí.

⁷Amáŋ, ami ā, n géē gbēyī Óndú ā ohígbū ka n jé ka ó géē nya um tá. Ɔwɔicō kú um kē í pó ɛlā kú um.

⁸Aólɛlā kú um í cíkā ō gwéeyē eko nɛ̄ n má gwōnū ŋ́. N má gwōnū ɛɛ́, n kē í cāŋjɛ igbɔhá kpɔ́ ɛ́ɛ́. N yɔ̄ ipú ajɛ odobū abālɔbányā, amáŋ Óndú géē wɛ ɔlá ōfíyajɛ gā um á.

⁹N géē le ɔtū eko nɛ̄ Ɔwɔicō le cɔ̄nū, ohígbū ka n le íne kú Ɔwɔicō bīya. Amáŋ, igbīhāajɛ ā ó géē cɛ̄ɛ̄pɔ̄ um, klla í je odōbɔ̄bí nēé yá alɔ ā pīya olɔhi. Ó géē bī um wā ipú ɔlá ōfíyajɛ, alɔ géē yēeyī cɛ́ɛ́ kú alɔ má ɔ̄ abɔ̄ ó í nya alɔ tá ā.

¹⁰Eko ɔ́ɔmā ā, aólɛlā kú um géē má ɔ̄, uwēyī kē í kwú ɔ̄cɛ nōo da um kahíníī, “Ɛhɛ̄ɛ, iní nɛ̄ Óndú Ɔwɔicō kú uwɔ ā kē yɔ̄ gɛ?” N géē gwéeyē tū ɔ̄ ɛ̄cī ɔ́ɔmā, eko nɛ̄ n géē má abɔ̄ é je uwá kpó yíífi bá úláyi nɛ̄ ācɛ yɔ̄ ī lɛ ikpó da uwá ɛyí tāajɛ bɛ̄ɛka ɔ́tɔ̄ ā.

¹¹Ācɛ kú Jerúsālɛm, eko nɛ̄ aá géē ma ɔdɔ kú aá nōo ca ā géē wā. Eko ɔ́ɔmā ā, é géē nyīla ɛjī kú ajɛ kú aá.

¹²Ācɛ ɔlɛ́ uwɔ géē pīyɛyí wā ɛgiyí uwɔ ŋmá ɛga dóódu, ŋmá Asíriya ɛnɔ̄ɔ̄cī, ŋmá Íjīpiti ɛháajɛ, ŋmá ajɛ kú Uyúfarétīsi, ŋmá aísu ɛga oligbó, mla ɛyí aɛ́fu nēe bá ɛga oligbó.

¹³Amáŋ, ɛcɛ ā géē je pīya ígbíli ohígbū ɔbíipú nɛ̄hi kú ācɛ nōo lā anú ā.

¹⁴Kwú pīya ɔ̄cogbāálá kú ācɛ ɔlɛ́ uwɔ, nāa fu ā mɛ́ɛ́nɛ, Óndú. Uwá lā hī iyī uwā tá ipú ígbíli nááná ā, ajɛ oyɔ́dɛ̄hɔ̄ kē yɛ jíla uwā tā. Cɛ̄ lɛ uwá kéē kōō nyɔ̄ í lé ɔdōlé kú ajɛ olɔhi kú Ubássan, mɛ́mla Ugílɛ̄di, ɛ́gɛ́nɛ̄ uwá tɛtɛ yá íkée ā.

¹⁵Lɛ úklɔ́ idáagó yá lɛ alɔ Óndú, ɛ́gɛ́nɛ̄ a yá, eko nāa bī alɔ bɛ̄cɛ ŋmá Íjīpiti ā.

¹⁶Aéwo ā géē má ɛ̄nyā, é kē í je gbájí, nááná nēé lɔfú ā. Ufi géē cɛ̄ lɛ uwá í klá okónu kú uwā. É klla í je ɔcí gwū ahɔ̄ kú uwā.

¹⁷É géē yɔ̄ ī pi ajɛ bɛ̄ɛka ɛgwā ā É géē bɛ̄cɛ ŋmá ɔ̄gɔ̄ kú uwā, yɔ̄ ī yúufi klla yɔ̄ ī fīyégbúlú. É géē pīyeyí ipú ufi wā ɛga Óndú, Ɔwɔicō kú alɔ.

¹⁸Ɔwɔ ɔhá dúú í lɛbɛ̄ɛka awɔ ā gɛ ŋ́, Óndú! Á kwú íne nɛ̄ ācɛ ɔlɛ́ uwɔ nēe hile ā bīya ā í yá uwā ɛhi. Ā híī yɔ̄ gē cɔ̄nū piyóó ŋ́, amáŋ, ó wɛ ɔdā ō hī uwɔ ɔtū ká ā yɔ̄ ī ma ihɔtū opiyóó kú uwɔ ā fú lɛ alɔ.

¹⁹A géē méyīnyinyi alɔ igbɔhá kpɔ́ ɛ́ɛ́. A géē je íne nɛ̄ alɔ bīya ā tá ɛháajɛ ikpó kú uwɔ cɛ́ɛ́ ká ā lɛ ikpó da ɔ́ báajɛ, klla í je ɔ́ tá ga ɔkɛklɛ kú ísu.

²⁰A géē ma ɔkpaakpa kú uwɔ, mla ihɔtū opiyóó kú uwɔ fú lɛ ācɛ ɔlɛ́ uwɔ, nēe wɛ aípɔ́ɔma kú Ébrahām mɛ́mla Ujékɔ̄pu ā, ɛ́gɛ́nɛ̄ a cokónu lɛ aádáádā alɔ eko nɛ̄ncɛ̄ ā.”