Read idoma UNÁHUM 1 Bible Online

UNÁHUM 1 - idoma bible

UNÁHUM 1

¹Ɛlā nyā wɛ olɛhɔ̄ kú ɛbɛ nɛ̄ Unáhum nōo wɛ ɔyí kú Ɛukóssiā má lɛyíkwu Unínīfɛ.

²Óndú, Ɔwɔicō í gē cɛ̄ lɛ ɔdā dúúmā kwu ɔ́ ɔkɔ ŋ́. Ó gē gwɔ̄ aólɛlā kú nū ɔ́ci. Ó gē yá aólɛlā kú nū italā.

³Óndú ā í gē cɔ̄nū fíya ŋ́, amáŋ, ó lɔfú nɛ̄hi, ó gáā habɔ̄ ācɛ nēe lɛ́pɔ̄bí ā tá nyɔ̄ icííci nōó gáā yá uwā italā ŋ́ nɛɛ ŋ́. Ɛga nɛ̄ Óndú ā gē yāwu, owu nɛ̄hi gē tá kwu ɔ́ ɔkwu, ojuja ā wɛ úmúlá nɛ̄ ikpó kú nū gē wuklíicō á!

⁴Ó le ɔ́da je lɛ ísu, ó kē ī je ŋmó ŋmá ajɛ. Ó ī yá ka aísu nɛŋcɛ́ ā kéē le kpó ŋmó ŋmá ajɛ. Ácí kú Ubássan le kpó yɔlá kwajɛ yéwúú. Aɔ́dā nēe jɛ̄ bá ɛyí ɛfu nēé hī ka Ukámɛ̄lu ā kwú ŋmɔ́lá yōō, anɔ́ɔ ododó kú Ulɛ́bānɔn le pɛ́ gekwú boolo á.

⁵Aɛ́fu nɛ̄hi gē jíliyē iyɔ̄bū Óndú ā, aɛ́fu nɛ̄ŋcɛ́ ā gē je ja tāajɛ pitoo eko nɛ̄ Óndú ā gā ɛcɛ. Ɛcɛ kpátáá ā le jíliyē, odúúdú ācɛ nēe lā ipú nū ā gē yúufi ī fīyégbúlú.

⁶Ɔ̄nyɛ yēeyī glá eko nɛ̄ Óndú ā lɛ cɔ̄nū ā? Ɔ̄nyɛ lɔfú yɔ̄ iyɔ̄bū Óndú ā glá, eko nɛ̄ ó lɛ cɔ̄nū ɛdɔ obɔ̄bí a? Ápátácɔ̄ gē ca putuu kwú pīya úmúlá, eko nɛ̄ ó le cɔ̄nū.

⁷Óndú ā lɔhi. Ó lɛbɛ̄ɛka igá kú ɔdɔ nɛ̄ ācɛ ɔlɛ́ nū gē kwu í tayínū ipú nū eko kú unwalu ā. Ó gē leyīkwu ācɛ nēe kwu ga ɛgiyí nū ā.

⁸Amáŋ, ó géē kpó aólɛlā kú nū yíífi dúúdú bɛ̄ɛka ɔkpá nōo gē cēenyi gē kpó ɔlɛ́ ācɛ ā. Ó géē nū aólɛlā kú nū inya jāā gbéeko nēé le pɛ́ gekwú.

⁹Ojuju obɔ̄bí nyá nɛ̄ aá bá ī yá lɛyíkwu Óndú a? Ó géē kpó aá yíífi. Ɔ̄cɛ dóódu í gē bɛ́yíkwu Óndú ā igbɛɛpa glá ŋ́.

¹⁰Ó géē kpó aá yɔlá tāajɛ bɛ̄ɛka ujē ōŋmókókó nōo klla le gbájí tɔ̄há ā.

¹¹Unínīfɛ, ɔ̄cɛ éyi le bɛ̄cɛ ŋmá ipú uwɔ nōo yɔ̄ ī yá ojuju kú ɔbíipú tū Óndú ā.

¹²Ɔdā nɛ̄ Óndú ā ka lɛ ācɛ ɔlɛ́ nū, Ísrɛ̄lu ā yɔ̄ á, “Nááná nɛ̄ ācɛ kú Asírīya kē lɔfú klla lɛwa nɛ̄hi ā, é géē je uwá kpó yíífi ŋmá ajɛ dúúdú. Ācɛ ɔlɛ́ um, n tɛtɛ cɛ̄ lɛ aá móōwē, amáŋ aá gáā móōwē igbɔhá ɛ́ɛ́ gɛ ŋ́.

¹³N géē yá kú ɔfú nɛ̄ ācɛ kú Asírīya lɛ īkpɛ̄yí kú aá ā kóō má kwɛjī.”

¹⁴Ɛ̄nyā wɛ íne nɛ̄ Óndú je ohígbū ācɛ kú Asírīya ā. Ó kahíníī, “É gáā lɛ ayááyí dúúmā nēe géē lé iyē kwu uwá ɛ́ɛ́ gɛ ŋ́. N géē kpó ájibó kú aɛ́cí nōo bá ipú Agblīihɔ-nɛ̄hi kú aá ā yíífi. N géē bū únóji bá ajɛ lɛ ācɛ kú Asírīya, ohígbū keé cíkā ō yēeyī gɛ ŋ́.”

¹⁵Unáhum kahíníī, “Aá má ɔ̄, n má ɔ̄cocɛ̄hɔ̄ éyī yɔ̄ ī wā ŋmá ɛyí ɛfu mla ɔ̄kā olɔhi. Ó yɔ̄ ī wā gaá ka lɛ ācɛ Ujúda ka é le yálé ɛɛ́. Ācɛ Ujúda, aá lé ucɛ kú áa, cɛ́ɛ́ kú aá kpó ɔdā dóódu nɛ̄ aá cokónu ō je lɛ Ɔwɔicō ā, lɛ ɔ́ mɛ́ɛnɛ. Ācobɔ̄bíipú ā í wā gáā nuunu tū aá ipú ajɛ kú aá glá ɛ́ɛ́ gɛ ŋ́. Ohígbū ka é kwú uwā ú kpó yíífi ŋmá ajɛ ɛɛ́.