Read idoma UNÁHUM 2 Bible Online

UNÁHUM 2 - idoma bible

UNÁHUM 2

¹Ācɛ kú Unínīfɛ, ɛfú gā ɛɛ́! Ɔfú nōo géē kpó aá ca kɛ́tɛkɛtɛ̄ ā gā ɛɛ́. Aá lɛ aícɔ́ɔja kú ɔlɛ́ aá kpó kwāajɛ ɛyí ɔdɔ kú igá ɛga o kpɛ́ɛ́fú ā! Aá leyīkwu ɔwɛ ā! cɛ́ɛ́ kú aá lɛ tútū kú aá kpɛ́fú!

²Ohígbū ka Óndú ā gáā yá kú ɛgahi nɛ̄ ācɛ Ísrɛ̄lu lɛ gbɔbū, ɛ́ɛ́ nɛ̄ aólɛlā wā í je ɔlɛ́ uwā wu ŋmá ajɛ ā, kóō cīgbīhi gé lɛ uwá.

³Aícɔ́ɔja kú aólɛlā ā bī aɔ́kplɛ́fú nɔ̄wá, é klla lɛ úwé kú ícɔ́ɔja nɔ̄wá wiyē. É bá ī tútū kéē kpɛ́fú. Aúgbɔ́nya o kpɛ́fú kú uwā gē hɛ́ manyamanya bɛ̄ɛka ɔlá! Aɔ́nya kú uwā bá gē hɛ́ɛkwɛ!

⁴Aúgbɔ́ɔnya kú ɛfú kú uwā bá ī kwinya fíyo fíyo bū ipú aúláyi ā. É bá gē nwúleyikwū yɔ̄ ī kwinya fíyo fíyo gicō gaajɛ ɔtāhɛ̄ ipú igelī ā. É gē cɛ̄ nyaá nyaá bɛ̄ɛka ɛmu nēé lɛ ɔlá kwu ɔ́ ā. É klla yɔ̄ ī hɛ́ manya bɛ̄ɛka ɔwolímanya ā.

⁵É le olɛhɔ̄ ɛfú tū fu aógbēnjūwā ā ɛɛ́. É bēē gwōnū, abɔ̄ nēé bá ī nyɔ̄ ā. Aólɛlā ā hápápā lɛyíkwu ɔdɔ kú igá ā. Anɔ́ɔ é le ɔkplɛ́fú ɔda nēé gē ce ɛ́ɛ́ kéē ca ɔdɔ ā tútū á.

⁶Aódūngwɔ̄ɔwɛ nɛ̄ kwu okónu ísu ā le kpó nwūla, anɔ́ɔ ufi nɛ̄hi le mu ācɛ nēe bá ipú agbla kú ɔcɛ́ ā ipú á.

⁷É le ɔcányā ā kwú nyɔ̄, ācocɛ̄hɔ̄ nɔ̄nyā kú nū bá gē jikwū, gē lɛ abɔ̄ gɔ́ ɔtū klla yɔ̄ ī kɛlā bɛ̄ɛka okóohō ō yɔ́tūnōbí ā.

⁸Ācɛ bá ī kwinya ŋmá Unínīfɛ waa bɛ̄ɛka éŋkpɔ̄ kú ɔ̄kā nōo je ca kpoó, gē pɛ́ wɛ̄ɛ̄cɛ̄ ā. Ācɛ yɔ̄ ī dɛ̄gba hī iyī uwā igwú ka, “Aá māháyi, aá māháyi” Amáŋ ɔ̄cɛ dúúmā í pīyeyī má igbīhi ŋ́.

⁹Aá kpó aóje nɛ̄hɛ́ ā wu nyɔ̄. Aá kpó aúgóolu wu nyɔ̄. Ohígbū ka Unínīfɛ gbo agbénú nɛ̄hi.

¹⁰É kwú Unínīfɛ ú yíífi, ɔ̄cɛ dúú í tá ipú nū gɛ ŋ́, ó kwú tá alácɛ̄ ɛɛ́. Ufi cɛ̄ le ɔtū kú ācɛ kwú kpó wogodo ɛɛ́, okwúukwu kú ācɛ yɔ̄ í fīyégblú kpákpákpákpá. Ɛ́nyɔ́ hɛ́ odúúdú ācɛ abɔ̄, Ikpēyī kú ācɛ kwú kwányíhí.

¹¹Iní nɛ̄ igelī nɛ̄hi nōo lɛbɛ̄ɛka ɔgɔ kú ágábá ā yɔ̄ a? Igelī nɛ̄hi nōo lɛbɛ̄ɛka ɛga nɛ̄ aágábá gē je ɔdōlé lɛ ɔyí uwā ā, ɛga nɛ̄ ɔ̄cɛ dúúmā í nyɔ̄ glá ŋ́. Ɛga nɛ̄ ágábá mla ɔnyā ágábá ōfōōfū uwā gē nyɔ̄ ā.

¹²Ágábá ā le ɛbɛ́ kwú, klla ī lɛ ɔ́ fa nyɛŋɛnyɛŋɛ lɛ ɔnya nū mla ayí nū ā. Ó lɛ ɔ̄gɔ̄ kú nū mu mla ícɛ̄bɛ́.

¹³“Ami wɛ olɛlā kú aá nōo bɛ́yíkwu aá á.” abɔ̄ Ɔwɔicō nōo lɔfú fíyɛ́ dúú ā ka lɛ á. “N géē kpó aúgbɔ́ɔnya kú ɛfú kú aá yɔlá. N géē je aícɔ́ɔja kú aá kpó ŋmó ɔgbɛ́fú. Ɔdā dóódu nɛ̄ aá kpó ŋmá ɛgiyí ācɛ ɔhá ā, n géē je ɔ́ kpó ŋmá ɛgiyí aá. Ɛcɛ í gáā póofu ɔfú kú aá gbóógbóō ɛ́ɛ́ gɛ ŋ́.”