Read idoma UNÁHUM 3 Bible Online

UNÁHUM 3 - idoma bible

UNÁHUM 3

¹Ohóō yɔ̄ lɛ igelī nɛ̄hi nōo le mu mla ācɛ o ŋmó ācɛ mɛ́mla ācɛ o kɛ̄mgbɛ̄ ā. Ɛga nēé ɔ́ tū mu mla agbénú nɛ̄ ācɛ ɔhá géē wā í wu klla í kpó ga ɔlɛ́ uwā.

²Aá jāhɔ̄ kú aá pó ɔkɛ̄lā kú itali nōo yɔ̄ ī dɛ̄ kpáwáyí kpáwáyí ā, akā kú úgbɔ́ɔnya kú ɛfú yɔ̄ ī dɛ̄-ajɛ klákákláká, abɔ̄ é bá yɛ fíyo-fíyo ā, ikpó kú ɔnya ɛfú yɔ̄ ī dɛ̄ ajɛ gidigba-gidigba.

³Ācɛ okpɛ́fú ɔnya ā gē wā ɛɛ́, ɔkpacaŋ́gelī yɔ̄ ī pīyeyī mlámlá! Óbō yɔ̄ ī yɛ fíyo fíyo! É le okwū tīkwū klá ajɛ! Okwū ā í tōō gbaáluka ŋ́. Ācɛ bá ī gwōnū klá okwū ɛbɛɛbɛ.

⁴É yɔ̄ ī yá Unínīfɛ italā nyā kpɛ́mm ohígbū ka ó kwú pīya bɛ̄ɛka akwuna nōo bī ɛcí kú nū le aéwo já klla le uwá kpó kwú, ɛ́gɛ́nɛ̄ ukpa ī kwú odée ā. Anɔ́ɔ é kwú pīya aɔ́fiyɛ á.

⁵Ɔwɔicō nōo lɔfú fíyɛ́ dúú ā kahíníī, “Unínīfɛ, n géē yá uwɔ italā! N géē je uwɔ tóohɛ́ɛwa klla géē cɛ̄ lɛ odúúdú aéwo ā, kéē má ohɛ́ɛwa kú uwɔ̄. É géē má ɛga otūwēyī kú uwɔ.

⁶N géē lɛ eyī gwō uwɔ bónū, klla í pīya īmū klá awɔ, a géē je pīya ɛbɛ ohéyī lɛ ācɛ.

⁷Odúúdú ācɛ nēe géē má uwɔ ā, géē yɛ ɔkwɔɔkwu ŋmá ɛgiyí uwɔ. É géē ka, “Ɛhɛ́ɛ, Unínīfɛ je yíífi klla má tá alácɛ̄ yɔ̄ɔ̄! Ɔ̄nyɛ géē ményinyi nū gɛ?” Ɔ̄nyɛ géē dɔɔ̄kā ō tú ɔ̄ ɔtūlé gɛ?

⁸Unínīfɛ, awɔ lɔhi fíyɛ́ Utébīsi, nōo wɛ ɔlɛ́ ɔtāhɛ̄ kú Íjīpiti á nɛɛ? Ísu kú Unáyilu le igá hɛ́ tū ɔ̄ bɛ̄ɛka ɔkplɛ́fú ā dúú.

⁹Ācɛ Itiyópiya mla Íjīpiti le ɔfú tū uwā iyē á. Ɔfú kú uwā í kē lɛ ɛjī ŋ́. Aéwo kú Upúti mla ācɛ kú Ulíbīya wɛ ācɛ nēe gē tá uwā abɔ̄ dúú.

¹⁰Nááná, é kē lɛ ācɛ kú Utébīsi kpó ga ajɛ kú ɔfiyɛ. Ɔ́kíkā kú úláyi dóódu, é le ayípɛ̄ nɛ̄ŋ́cɛ̄ kú uwā gɔ́klɛ́ɛcɔ̄ le uwá kpó ŋmó icííci. É le agbá kwu aótrɛ̄yí kú uwā abɔ̄ klla le uwá kpó kɔ̄ lɛ ācɛ nēe kwú uwā ā.

¹¹Unínīfɛ, awɔ ā dúú géē yɔ̄ bɛ̄ɛka ɔdā nɛ̄ ejé lɛ uwɔ kwú, anɔ́ɔ a yɔ̄ gē túgagá ga ɔwɛ ga ácí ā. A géē dɔɔ̄kā ɛga ō kwu nyɔ̄ ŋmá ɛgiyí aólɛlā kú uwɔ.

¹²Odúúdú aínɔ̄ɔda ɔkplɛ́fú kú aá kpɛ́m ā, géē je pīya bɛ̄ɛka ɔcí kú ufíg nɛ̄ īkpō kú nū le pīya. Ɔ́dāŋ ka é lɛ ɔcí ufígi ā jíliyē, īkpō ā í hɛ́ wā í tá ipú okónu kú ācɛ nēe jíla ɔ́ iyē ā glá.

¹³Aícɔ́ɔja kú uwɔ lɛbɛ̄ɛka ācɛnyā ā, ɔ̄cɛ dóódu í yɔ̄ nōo gē gbō ɔlɛ́ aá eko nɛ̄ aólɛlā kú aá lɛ ɔfú kpó kwu aá ŋ́. Ɔlá kwú ogbló ō gwɔ̄wɛ kú ɔlɛ́ aá í yíífi tāajɛ.

¹⁴Aá lɛ éŋkpɔ̄ kpó bá ajɛ ohígbū íbɔm nēé gáā cē tū aá ā. Aá lɛ inɔ̄ɔda ɔkplɛ́fú kú igá kú ɔlɛ́ aá nɛ̄ ācɛ gē bá ɛyí nū gē kpɛ́fú ā tútū! Aá lɛ ɔmɛ o bī ma ublɔ́kwu da, cɛ́ɛ́ kú aá lɛ ɔdā ō bī ma ublɔ́kwu tútū!

¹⁵Ɛ́gɛ́dúú nɛ̄ aá tútū kú aá gbō ɔlɛ́ aá lɛ, náaná, é géē kpó aá yɔlá ga ɔlékwū. É géē kpó aá yíífi ŋmá ajɛ bɛ̄ɛka ɔdɛ̄hɔ̄ nɛ̄ aéfūma je kpó lé ŋmá ajɛ ā. Aá kōō le nyīla bɛ̄ɛka aéfūma ámāŋ bɛ̄ɛka aíkpaŋgā ā, nááná, é géē kpó aá yíífi ŋmá ajɛ kpɔ́.

¹⁶Ācotɔ́sú kú aá lɛwa bɛ̄ɛka aínyílɔ́wɔ kú ɔkpáncō ā, amáŋ, abālɔbányā, é mɛ ŋmá ajɛ, bɛ̄ɛka aéfūma nōo le acá nwūla lɛ wu nyɛ̄ɛ̄ ɛɛ́ mā.

¹⁷Aígabɔ̄ kú aá lɛbɛ̄ɛka ɔ́wá kú aéfūma nōo klá ɛyí ɔdɔ kpɛm eko nɛ̄ iyē ī hīlaŋ́dɔ́ ā. Amáŋ, eko nɛ̄ ɛnɔ gā ɛcɛ, é le pɛ́ wu nyɛ̄ɛ̄, ɔ̄cɛ dúúmā í jé ɛga nēé pɛ́ nyɔ̄ ā ŋ́.

¹⁸Ágábáidu, ɔcɛ́nɛ̄hi kú Asírīya, aígbómína kú ɔlɛ́ uwɔ le pɛ́ gekwú ɛɛ́. Aígabɔ̄ kú ɔlɛ́ uwɔ ā, le iyɔ̄lā kpó gbo piyóó ɛɛ́. Ɔ́ɔmā yá ɛ́ɛ́ nɛ̄ ācɛ ɔlɛ́ uwɔ kwú pɛ́ kwu ɛyí aɛ́fu nɛ̄hi ā, anɔ́ɔ é lɛ pahíla ga ɛga ɛyɛ́ɛyɛ́yí ɛyí nū bɛ̄ɛka aálá, nēé má ɔ̄cɛ dúúmā pī uwá ɛyí wā ɔlɛ́ gɛ ŋ́ mā.

¹⁹A lɛbɛ̄ɛka ɔ̄cɛ nēé lɛ ɔ́ yágbe nɛ̄ ɛcí nōo lɔfú jé ágbe kú nū í yɔ̄ ŋ́ mā. Ágbe ā í kē gáā jé gbóógbóō ɛ́ɛ́ gɛ ŋ́. Odúúdú ācɛ nēe pó ɔ̄kā kú ífi kú uwɔ ā, gwéeyē klla tɔ́ɔga nɛ̄hi. Ohígbū ka ucē kú ɔ́bíipú nɛ̄hi kú uwɔ ā, í cē ɔ̄cɛ dúúmā tá ŋ́.