Read idoma UHÁBAKŪKU 1 Bible Online

UHÁBAKŪKU 1 - idoma bible

UHÁBAKŪKU 1

¹Ɛ̄nyā wɛ ɛlā nɛ̄ Ɔwɔicō mafú lɛ Uhábakūku, ɔ̄comɛ́ɛbɛ ā.

²“Woó! Óndú, eko nyá nɛ̄ n géē jikwū klá uwɔ ká ā tá um abɔ̄ gaá kwu, ɛ́ɛ́ ká ā géē pó ɔkɔ kú um, ɛ́ɛ́ ká ā nya alɔ tá ŋmá ɔdōbɔ̄bí nēe bá ī yá alɔ nyā ā?

³Ɔdíyá nāa cɛ̄ gā um gē má ɔdōbɔ̄bí ɛ́gɛ́nyā ā. Ɛga dúú nɛ̄ n pīyeyī nyɔ̄, ífi, ucē obɔ̄bí, ikpɛ́la mɛ́mla unu mɛ́mla áafú le um yɛ jīla tá biílí.

⁴Ācɛ í tíne ō bī íne yúklɔ́ gɛ̄ ŋ́, ohígbū ɔ́ɔmā íne ā í klla tīile dúúmā ɛ́ɛ́ gɛ ŋ́. Ācobɔ̄bíipú ā le fíyɛ́ ācɛ okpaakpa abɔ̄ ohígbū ɔ́ɔmā, é le ɛpɔ̄ okpaakpa ā gbájí.

⁵Anɔ́ɔ Óndú ā da um kahíníī, “Leyī kwú aéwo, nēe yɛ aá jīla tá biílí ā mɛ́ɛ́nɛ. Ɔdā nāa géē má ā í hí uwɔ idáagó. N gáā yá odée, nɛ̄ eko nāa le pó, á gáā cɛ̄ ŋ́.

⁶N géē bī ācɛ kú Ubábīlɔn wā gaá cɔcɛ́. Ācɛ nēe tūufi nɛ̄hi nēé klla mlɛ́nyɔ́ ɛfú ō kpó ŋ́ mā. É le bɛ̄cɛ kéē mīyɛ ajɛ kú aéwo ɔhá kú ɛcɛ ā dúúdú ɛɛ́.

⁷É bɔ̄bí klla tūufi nɛ̄hi. Ipú ɔbɔ́cɛ kú uwā ā, ɔdā nōo he uwá ɔtū ā nēé gē yá á, ɔ̄cɛ dúú í ci uwá anú glá ŋ́.

⁸Aɔ́nya kú uwā kwinya fíyaa fíyɛ́ ɛjɛ á, É tūufi fíyɛ́ ɔgwú nɛ̄ ɛmiyɛ yɔ̄ ī ŋmó ɔ̄ ā. Ācɛ okpɛ́fú-ɔnya kú uwā ce ɔnya wā ŋmá ɛga oligbó. Ɔnya kú uwā gē wu kwu olɛlā kú uwā bɛ̄ɛka ucē ō je ugwū ā.

⁹É gē wā ɔfɔ́ɔ́fú kéē yúfú, ɔ̄cɛ dóódu gē yúufi ō wā kú uwā. Ɛwa kú ācɛ nēé kwú ā lɛbɛ̄ɛka úmúlá kú ajɛ ā.

¹⁰É gē je aɔ́cɛ́ bɛ̄ɛka é wɛ ɔdā dúúmā ŋ́ mā. Ācɛ Ubábīlɔn nēe bá ā, wɛ ācɛ nēe gē yá aígabɔ̄ ɛbɛ́. Igelī nɛ̄hi nēé hɛ́ igá olɔfú tū ɔ̄ ā, gē tū uwā ɛhɛ, ohígbū keé gē tū ógbudu tū ɔdɔ ā iyē, cɛ́ɛ́ é lɛ icō ɔdɔ ā tū nyɔ̄ í mīyɛ igelī ā.

¹¹Anɔ́ɔ é gē nwúleyīkwū wā í yɛ fíyaa ɛ́gɛ́nɛ̄ owu gē tá wā í yɛ́ fíyaa ī bí tāajɛ ā. Ɔfú iyē kú uwā lɛbɛ̄ɛka ojibó ku ɛcí nɛ̄ ī gbɛ̄gbā ā.

¹²Uhábakūku da Ɔwɔicō ɔ̄kā kpɔ́ ka, “Óndú ā, o ŋmá ohútu ā, awɔ wɛ Ɔwɔicō á. Awɔ wɛ Ɔwɔicō ō tīihɔ kú um, nōo yɔ̄ piyóó á. Óndú, Ɔwɔicō kú um nōo ī gbō um ā, a lɛ ācɛ kú Ubálīlɔn fu, le uwá pīya ācɛ ólɔfú, cɛ́ɛ́ kéē yá alɔ italā.

¹³Amáŋ, īkpēyī kú uwɔ lɛ yēŋēē fíyɛ́ ō má ɔdōbɔ̄bí ɛ́gɛ́nyā. Īkpēyī kú uwɔ tīihɔ fíyɛ́ ō má ɔdōbɔ̄bí. Á gáā leyīkwu ācɛ icííci kéē bá ī yá ɔdōbɔ̄bí lɛ ā glá ŋ́. Ó lɛ ā, ɔdíyá nɛ̄ á tóohi ŋ́, eko nēé bá ī je ācɛ nōo lɔhi klla le kpaakpa fíyɛ́ uwā ā kpó yíífi ā?

¹⁴A yá alɔ bɛ̄ɛka aɛ́béenyi kú ācɛ kéē kwú alɔ, klla ŋmó nɛɛ? Alɔ klla kwú pīya bɛ̄ɛka aɛ́bɛ́ o lɛ ipú piyajɛ nēé lɛ otrɛ̄yi nōo ī gbō uwā ɛyí ŋmá abɔ̄ kú aólɛlā kú uwā ŋ́ mā nɛɛ?

¹⁵Ācɛ kú Ubábīlɔn ā gē kwú ācɛ mla uwɔ bɛ̄ɛka ɔdā nɛ̄ ācɛ ā wɛ ɛbéenyi ā. É gē pi uwá nyɔ̄ ipú ɛ́yá kú uwā, klá gē gwéeyē kú ɔdā nēé kwú ā.

¹⁶É klla gē gbō ɛ́yá kú uwā ɛ̄gbā klla gē gwɛ́ɛya lɛ uwá dúú, ohígbū ka ɛ́yá kú uwā ā gē je ɔdā olɔhi dóódu nēé gē dɔɔ̄ka ā lɛ uwá.

¹⁷É géē bī ɔkpacaŋ́gelī kú uwā géē yɔ̄ ī kpó ācɛ kú aéwo ŋmó, nēé gáā méyīnyinyi uwā ŋ́ lɛ ā piyóó nɛɛ?”