Read idoma UHÁBAKŪKU 2 Bible Online

UHÁBAKŪKU 2 - idoma bible

UHÁBAKŪKU 2

¹Uhábakūku kahíníī, “N géē lɛ icō inɔ̄ɔda kú um ā tū, kú n̄ gbēyī cɛ́ɛ́, kú n̄ pó ɔdā nɛ̄ Óndú ā gáā ka gā um, mɛ́mla ohi, nɛ̄ ó gáā tá um ā.”

²Uhábakūku ka, anɔ́ɔ Óndú ā ɔ́ɔ le ohi tá anúɔ ka, “Lɛ ɔdā nɛ̄ n gáā mafú gā uwɔ nyā tá tāajɛ péee tū usiléti kú ɔmɛ nɛ̄ ɔ̄cɛ géē lɛ eyī gla anú bōōbū, í jé ɔ̄ glá.

³Lɛ ɔ́ tá tā ajɛ, ohígbū ka eko nɛ̄ ó í yá jīla ā í yá ɛ́ɛ́ ŋ́. Amáŋ, eko nɛ̄ ó í yá jīla ā géē wā fíyaa. Ɔdā nɛ̄ n mafú gā uwɔ nyā géē yá jīla. Ó géē yá uwɔ bɛ̄ɛka ó yɔ̄ ī pi ɔkwu ajɛ ā. Amáŋ gbēyī eko nɛ̄ ó í yá ā. Ó géē yá jīla piíí, ó gáā ligbó ɛ́ɛ́ kóō yá jīla gɛ ŋ́.

⁴Ɔlɛhɔ̄ ā yɔ̄ á, ‘Ācobɔ̄bíipú ā í gáā yēeyī ŋ́. Amáŋ, ācɛ okpaakpa ā géē yēeyī, ohígbū ka é cɛ̄lā Ɔwɔicō.”

⁵Agbénú ō lɛ gē plla ɔ̄cɛ ɛ́gɛ́nɛ̄ ejé gē plla ɔ̄cɛ ā. Ācɛ oyúnwɔ̄dā mɛ́mla ācɛ o yɔ́bɔ́cɛ ā í gáā mlɛ́nyɔ̄ nū glá ŋ́, Unwū ɔ̄dā ō yá lɛbɛ̄ɛka ɔ̄gɔ̄ kú ɔlékwū nɛ̄ ó gē mu ŋ́ mā. Ɔ́ɔmā yá nēé ī mīyɛ ajɛ tāabɔ̄ ŋmá éwo éyi ga éwo ɔhá, o yá kéē lɛ ɛjɛ̄ɛ̄jī uwā pīya ācɛ ɔdā abɔ̄yi ūwā.”

⁶Óndú ā yɔ̄ ī kɛlā kpɔ́ ka, “Ācɛ nēé yálé ā géē leyī gwū ācɛ nēe yá uwā lé ā bónū, í klla ī yá ūwā okónu ka, a le ɔdā nɛ̄ ó wɛ ákú ūwɔ ŋ́ mā kpó tū lɛ iyī uwɔ. Eko nyá nɛ̄ aá gáā bá ī gbagbénú ŋmá lɛ o mīyɛ ɔdā ŋmá abɔ̄ ɔ̄cɛ abɔ̄fú ā gaá kwu ā.

⁷Gbɔbū ɛ́ɛ́ ka í jé, awɔ nōo yá ācɛ ɔhá lé ā, géē je pīya ɔ̄cɛ o bī ulé. Cɛ́ɛ́ é klla gbɔɔ́ ō mīyɛ ije o ce ɔ́ ɛyí ŋmá ɛgiyí uwɔ abɔ̄fú. Aólɛlā kē í wā í tū uwɔ ufi, nāa í fīyēgbúlú. Cɛ́ɛ́ kéē kwú ɔlɛ́ uwɔ ú wu.

⁸Aá le aéwo alɛwa ca tāajɛ klla le uwá ɔlɛ́ wu, ohígbū ācɛ nɛ̄ áa ŋmó ā, mɛ́mla ɔdōōbɔ̄bí nɛ̄ aá yá uwā ā, ācɛ nōo hile ā géē je aá wu.

⁹Ohóō yɔ̄ lɛ ɔ̄cɛ nōo gē je ɔlɛ́ nū gbagbénú ŋmá lɛ itene nɛ̄ ó lɛ ŋmá ɔdōbɔ̄bí nɛ̄ ó gē yá ā. Nōo lɛ ɔlɛ́ nū gwó ka ɔdā dúúmā í gáā yá anúɔ glá ŋ́ mā.

¹⁰Ohígbū ka, ojuju kú aá ā le uwēyī bī gé lɛ ɔlɛ́ aá ɛɛ́. aá le ífi bī gé lɛ iyī aá, o ŋmá lɛ ō je aéwo alɛwa kpó yíífi ɛɛ́.

¹¹Kwu ɛcɔ̄ kú inu ā, yɔ̄ ī jikwū klá aá gbōō, ɔcí ō gba ɔlɛ́ ā gē jikwū mla uwá klá aá dúú.

¹²Ohóō kóō yɔ̄ lɛ aá nōo gē gwó igelī nɛ̄hi kú aá mla oyī kú ācɛ nɛ̄ aá ŋmó ā, mɛ́mla ɔdōbɔ̄bí nɛ̄ aá yá ā.

¹³Aéwo nɛ̄ aá yálé ā bá ī yúklɔ́ tū ōwē áncā. Ɔda dóódu nēé gwó ā géē yɔlá gbewo. Óndú ā nōo lɔfú fíyɛ́ dúú ā yá ɛ̄nyā á.

¹⁴ Amáŋ ācɛ kú ipú ɛcɛ ā géē jé odée nɛ̄ɛ̄nɛ̄hi lɛyíkwu ɔfú kú Óndú ā, ɛ́gɛ́nɛ̄ éŋkpɔ̄ gē mu ísu nɛ̄ɛ̄nɛ̄hi ā.

¹⁵A le jī ɛɛ́! Awɔ nōo gē yá kú aéwo nēe yɛ jīla awɔ tá ā, kéē gwá ejé ŋmá íkókwū kú uwɔ nōo kwɛyí ícɔ̄nū kú uwɔ ā. A lɛ uwá yá kéē ga ɔwɛ ga ácí bɛ̄ɛka ɔdā nɛ̄ ejé le uwá kwú ā, anɔ́ɔ aá klla gbɔɔ́ ō gwéeyē abɔ̄ aá le má keé lɔfú gɛ ŋ́ klla bá ipú uwēyī ā.

¹⁶Awɔ abɔ̄yī uwɔ ā, é géē yá kú uwēyī nɛ̄hi kóō lɛ uwɔ kwú, ikɔkɔ nēé í lɛ ojīlīmā ce uwɔ ā. Awɔ abɔ̄yi uwɔ ā, gē gwá ejé ŋmá íkókwū kú ejé nɛ̄ Óndú ā bī abɔ̄ yɔ̄ ī lɛ nābɔ̄ gā awɔ ā. A í gwá ŋmá ipú nū piíí, ejé ā kē í kwú uwɔ, cɛ́ɛ́ kú ā tóohɛ́ɛwa, kú ācɛ kéē má ohɛ́ɛwa kú uwɔ. É géē leyī gwō uwɔ bónū í klla gáā lɛ ojīlīmā ce uwɔ ŋ́. É klla í cɛ lɛ uwēyī í kwú uwɔ.

¹⁷Aá le ɔcí kú ipú úpú kú Ulɛ́bānɔn hɛ́ bá ajɛ ɛɛ́. Abālɔbányā ā, é géē kpó aá abɔ̄yī aá hɛ́ bá ajɛ dúú. Aá lɛ aɛ́bɛ́ kú nū kpó ŋmó ɛɛ́, aɛ́bɛ́ ā kē í bá ī tū aá ufi. Ɛ̄nyā géē yá aá ohígbū ācɛ nɛ̄ aá ŋmó ā, mla ucē obɔ̄bí mla obíipú nɛ̄ aá bī lɛyíkwú aéwo kú ɛcɛ mla ācɛ ɔlɛ́ uwā ā.

¹⁸Ɔdí wɛ ile kú ɛcí nɛ̄ aá gē pā ā? Eko nɛ̄ ɔ̄cɛ nōo gē yá ɔ̄ ā le ɔ́ yá kwɛyí, ó ka ɔdā dúúmā glá ŋ́, ń táafú ŋ́ ɛ̄kɛ̄mgbɛ̄ ōfōōfū nū ŋ́ nɛɛ? Ɔdíyá nɛ̄ ɔ̄cɛ gēe kpó ɔtūce ɔdā nɛ̄ ó bī abɔ̄ kú nū yá ā? Ɔwɔ nɛ̄ ó kōō kɛlā glá ŋ́ mā!

¹⁹Ōhóō yɔ̄ lɛ ɔ̄cɛ nōo gē da ɔcí kahíníī, “Le héyī!” nōo gēe da ɛcɔ̄ nɛ̄ ó kɛlā glá ŋ́ mā kahíníī, “Cāŋjɛ!” Ojibó kú ɛcí lɔfú ma ɔdā dúúmā fú gā uwɔ glá ā? Nááná nɛ̄ aá lɔfú lɛ oje nɛ̄hɛ́ mɛ́mla ugóolu (oje ɔdɔ) ma plá nū ā, ó kē yēeyī ŋ́.

²⁰Óndú ā yɔ̄ ipú Agblīihɔ-nɛ̄hi kú nū, odúúdú ācɛ kú ɛcɛ kéē bá hímm iyɔ̄bū nū.”