Read idoma UHÁBAKŪKU 3 Bible Online

UHÁBAKŪKU 3 - idoma bible

UHÁBAKŪKU 3

¹Ɛ̄nyā wɛ ɔkɔ nɛ̄ Uhábakūku, ɔ̄comɛ́ɛbɛ ā gbā lɛ Óndú á.

²Óndú, n le ɔ̄kā ɔdā nāa yá ā pó ɛɛ́. Ufi kú uwɔ kē i mu um ɔtū nɛ̄hi. Abālɔbányā, lɛ ɔdā idáagó kú uwɔ ā yá eko kú alɔ, ɛ́gɛ́nɛ̄ a tɛtɛ yá ā. Kóocōō, méyīnyinyi kú alɔ, nááná nāa yɔ̄ ī cɔ̄nū tū alɔ ā.

³Ɔwɔicō wā ŋmá ajɛ kú Ɛ́dɔm. Īīī, n ka Ɔwɔicō nɛ̄ ɔ̄cɛ dúú í tōō le gbla ɔ́ ŋ mā gē wā ŋmá aɛ́fu kú Upáran ɔwɛ ajɛ Ɛ́dɔm ā. Ɛgahi kú nū klá odúúdú ɔkpáncō! Ācɛ dóódu kú ɛcɛ nyā bá gē cɛ̄tra anú.

⁴Abɔ̄ Ɔwɔicō ī wā ā, ó í yá kú ofiyajɛ kú nú kóō lɛbɛ̄ɛka ɔ̄woolímanya ā, ɔlá gē cɛ̄ maámaá ŋmá ipú abɔ̄ kú nū, cɛ́ɛ́ ācɛ kú ɛga dóódu í cɛ̄tra ɔ́.

⁵Ɛga dúú nɛ̄ ó yɛ, ó ī tū ōcē obɔ̄bí klá aólɛlā kú nū, nōo gē kpó uwā ŋmó.

⁶Eko dóódu nɛ̄ ó māháyi, ɛcɛ gē jíliyē. Eko nōo pīyeyī klé má ɛcɛ, aéwo kú ɛcɛ ā gbɔɔ́ ō fīyɛ̄gbúlú. Aɛ́fu nēe húmáyī kwu ŋmá íkííkée ā kwú kpó hɛ́ ga ipú ajɛ. Aɛ́fu nɛ̄ncɛ̄ nēe wɛ ɔwɛ kú nū kú íkííkée ā.

⁷N má ācɛ kú Ukússan bá ī yúufi, anɔ́ɔ ācɛ kú Umídiya kē bá ī fīyégbúlú á.

⁸Óndú, ísu ā yá uwɔ cɔ̄nū á nɛɛ? Ísu nɛ̄hi yá ɛ́ɛ́ nāa cɔ̄nū nɛ̄hi á nɛɛ? A ce ojuja bɛ̄ɛka ɔnyā ā. Ojuja nōo lɛbɛ̄ɛka ɔwɔ ō tū nɛ̄hi ā, wɛ úgbɔ́nya kú uwɔ, eko nāa yá kú ācɛ ɔlɛ́ uwɔ kéē lɛ aólɛlā kú uwā yálé ā.

⁹A lɛ ɔtā kú uwɔ túce, a kē le tútū kú ā tá ɔyī kú uwɔ ɛɛ́[1] Ɔwo olímanya kú uwɔ ā le ɛcɛ yíla ɛpa nɛ̄ aísu le kpó yíla ŋmá anú.

¹⁰Eko nɛ̄ aɛ́fu ā lɛ uwɔ má ā, é gbɔɔ́ ō yúufi éŋkpɔ̄ kē gbɔɔ́ ō pɛ́ wāajɛ ŋmá ɔkpáncō, éŋkpɔ̄ nōo yɔ̄ ɛháajɛ kú ɛcɛ ā gbɔɔ́ ō cēnyi wɛ̄ɛcɛ, klla gbɔɔ́ ō túgbagwú nɛ̄hi yɔ̄ ī hɛ́ gicō lógólógó.

¹¹O cɛ̄ manya kú ɔyī ō cɔ̄ɔ̄lá kú uwɔ nōo yɔ̄ ī yɛ fíyoo ā, mla o fíyajɛ kú óbō kú uwɔ nōo yɔ̄ ī ceyī ā, cɛ̄ lɛ ɛnɔ mɛ́mla ɔyā kéē le ɔnya kwú háyi ɛga éyi cíí.

¹²A yɛ bū ipú ɛcɛ mla ícɔ̄nū nɛ̄hi, a le ikpó da aéwo kú ipú ɛcɛ ā tāajɛ kwɛɛ́kwɛɛ́.

¹³A le bɛ̄cɛ wā gaá lɛ ācɛ ɔlɛ́ uwɔ hɛ́tá, klla le ɔcɛ́ nāa fu ā hɛ́tá. A le otrɛ̄yí kú ācobɔ̄bíipú ā ŋmó wā ajɛ, klla kwú ācɛ nōo gē yɛce ɔ́ ā ú kpó yíífi dúúdú.

¹⁴Aɔ́yī kú uwɔ le bū otrɛ̄yí kú aícɔ́ɔja kú uwā bēhé, eko nēé wā bɛ̄ɛka owu nɛ̄hi ā, kéē je alɔ fíyákátā ā. É bá ī gwéeyē bɛ̄ɛka ācɛ nōo ī lɛ abɔ̄ da ācogbɛhá ɛyí báajɛ ā.

¹⁵A le ikpó da ísu nɛ̄hi ā bá ajɛ mla aɔ́nya ɛfú kú uwɔ, nōo cɛ̄ lɛ ísu nɛ̄hi ɔ́ɔmā kóō gbɔɔ́ cūūwū.

¹⁶Eko nɛ̄ n lɛ odúúdú ɔdā nēe bá nyā pó ā, ufi le mu um ipú, akpókónu kú um yɔ̄ ī fíyɔ̄há kpáákpá ipú ufi. Iyē kú um le kpó ca tāāpū, ikpó kú um kwú gbájí tɔ̄há,[2] N géē gbēyī cíí gbéeko nɛ̄ Ɔwɔicō gáā lɛ italā yá ācɛ nēe ī nuunu tá alɔ ā.

¹⁷Ɔ́dāŋ ka ɔcí kú ufígi í kōō gwá ŋ́, nɛ̄ īkpō kú ɔcí ufáyin dúúmā í kōō kwu ɔcí nū ŋ́, nɛ̄ ɔcí nēé hī ka ólīfu ā, í kōō gwá īkpō ŋ́, nɛ̄ īkpɔ̄dɛ̄hɔ̄ dúúmā í kōō yá ŋ́ nɛ̄ odúúdú aálá mɛ́mla aɛ́na kōō le pɛ́ gekwú, nɛ̄ aɛ́na le pɛ́ gekwú ŋmá ajɛ,

¹⁸náaná, ɔtū í he um nɛ̄ n klla í gwéeyē, ohígbū ka Óndú ā, Ɔwɔicō gē nya um tá á.

¹⁹Óndú, Ɔwɔicō gē je ɔfú gā um á. Ó lɛ ikpó kú um yá lɔfú bɛ̄ɛka ákú ikpɛ̄ɛnu ā, ó klla kwú um ú tū céé īkpɛyí kú aɛ́fu.