Read idoma USƐFANÍYA 1 Bible Online

USƐFANÍYA 1 - idoma bible

USƐFANÍYA 1

¹Iyē um lé ka Usɛfaníya, n wɛ ɔyí kú Ukússi, ádā um wɛ ɔyí kú Ugɛdalíya, ádā kú ádā um kē lé ka Amárīya, Amárīya ɔ́ɔmā kē wɛ ɔyí kú Uhɛsɛkíya. Eko nɛ̄ Ujosáya, ɔyí kú Ámɔn wɛ ɔcɛ́ kú Ujúda ā, Óndú ā lɛ olɛhɔ̄ nyā je ga um.

²Ɛlā nɛ̄ Óndú ā ka ā yɔ̄ á, “N géē kpó ɔdā dóódu yíífi ŋmá ipú ɛcɛ dúúdú.

³Kwu alɛɛcɛ, aɛ́bɛ́ kú ipácí, aígbáanɔ mɛ́mla aébéenyi kú ísu. N géē je ācobɔ̄bíipú ā kpó yíífi. N géē je alɛɛcɛ kpó yíífi ŋmá ɛcɛ, nɛ̄ odúúmā kú uwā í gáā hile ŋ́.

⁴“N géē yá ācɛ kú Ujúda italā mɛ́mla odúúdú ācɛ nēe lā Ujerúsālɛm ā. N géē je ɔdā dúú nōo hile kú ɛ̄gbā nēé gbā Ubáalu ā kpó yíífi ŋmá ajɛ, nɛ̄ ɔ̄cɛ dúúmā í gáā blakwu ācopɛ̄cí nēe gē pā ubáal lɛ ācɛ ā gɛ ŋ́.

⁵N géē je ɔ̄cɛ dóódu nōo gē gicō kú inu, yɔ̄ ī túkpɛɛ́ í gbā ɛnɔ, ɔyā mɛ́mla aínyílɔ́wɔ ɛ̄gbā ā kpó yíífi. N géē je ācɛ nēe gē gbā um ɛ̄gbā, amáŋ nēe klla ī bī iyē kú ɛcí nēé hī ka Umílikɔm ā gē le gbɛka ā kpó yíífi.

⁶N géē je ācɛ dóódu nēe kwúcē igbīhi nēé yɛce um gɛ ŋ́ mā kpó yíífi. Ācɛ nēé wā ɛgiyí um gaá da um ka n̄ bī uwā jé ɔwɛ ŋ́ mā géē kpó yíífi dúú.

⁷Aá bá cíí iyɔ̄bū kú Óndú, Ɔwɔicō, ohígbū ka ɛ̄cī nɛ̄ Óndú ā géē kɛpɔ̄ tū ācɛ ā le kwu ajaajɛ ɛɛ́. Óndú ā le tútū kóō ŋmó ācɛ ɔlɛ́ nū bɛ̄ɛka aɛ́bɛ́ nēé gáā le gwɛ́ɛya ā. Ó le aólɛlā hīgwú kéē wā í kwú Ujúda í wu ɛɛ́.

⁸Óndú ā kahíníī, “Ɛ̄cī kú ɛya ō gwó ā, n géē yá aígabɔ̄ ā, mɛ́mla ayínɔ̄nyīlɔ kú aɔ́cɛ́ mɛ́mla odúúdú ācɛ nēe gē yá ucē kú aéwɔhá ā italā.

⁹N géē yá odúúdú ācɛ nēe gē yá uculo bɛ̄ɛka ācopɛ̄cí, ī tómbli gla okómpinu ā, mɛ́mla ācɛ nēe klla gē wūwī, gē ŋmó ɔ̄cɛ o yá ɛ́ɛ́ kéē lɛ inu kú ɔlɛ́ ɔkpani uwā tū mu[1] mla iyó nēé wu ā italā.

¹⁰Óndú ā kahíníī, “Ɛ̄cī ɔ́ɔmā, aá géē pó ikwū ō je ŋmá ɔwɛ nēé hī ka ɔwɛ kú ɛbéenyi kú Ujerúsālɛm ā. Aá klla géē pó ikwū ō je ŋmá ɛga nēé gwó ɛ̄yīpɛ̄ kú ipú igelī nɛ̄hi ā. Aá klla í pó uya kú o wúla tāajɛ ipú aɛ́fu nɛ̄hi ā wuuuu.

¹¹Aá yá ɔtūnōbí, cɛ́ɛ́ kú aá jikwū eko nāa lɛ ɛ̄nyā pó, aá nēe lā ɛháajɛ kú igelī nɛ̄hi ā, ohígbū ka odúúdú ācotɔ́sú nēe gē miya oje nɛ̄hɛ́ lɛ ācɛ ā le pɛ́ gekwú ɛɛ́.

¹²“Eko ɔ́ɔmā, n géē bī ulámpu le jíla Ujerúsālɛm. N géē yá ācɛ nēe jɛ̄ iyī uwā klla lɔtūce iyī uwā ā italā. Ācɛ ɛ́gɔ́ɔmā gē ka lɛ iyī ka, Óndú ā í gáā yá ɔdā dúú ɔwɛ ɔhá ŋ́ má.

¹³É géē je agbénú kú uwā kpó wu klla í je aɔ́lɛ́ kú uwā tá alácɛ̄. É gáā lā ipú inu alɛwa nēé bá ī gwó ā ŋ́. É klla kē gáā gwá ejé kú ɔcí ufáyin nēé yɔ̄ ī tū ā ŋ́.”

¹⁴Ɛ̄cī nōo cɛgbá nɛ̄hi nɛ̄ Óndú ā í kɛpɔ̄ tū ācɛ ā le bá ɛɛ́. Ó le kwu ajaajɛ klla yɔ̄ í wā fíyaa. Ɛ̄cī ɔ́ɔmā géē wɛ ɛ̄cī olɔ̄nɔ ohígbū ka ícɔ́ɔ́ja nōo lɔtū fíyɛ́ dúú ā géē jikwū gbōmgbōm ɛ̄cī ɔ́ɔmā!

¹⁵Ɛ̄cī ɔ́ɔmā géē wɛ ɛ̄cī nɛ̄ Ɔwɔicō í cɔ̄nū nɛ̄hi mla ācɛ. Ɛ̄cī kú unwalu mla ákanya, Ɛ̄cī kú ífi mla ɔdā ō wúla tāajɛ, Ɛ̄cī kú ojuja mla ajɛ odobū. Ɛ̄cī kú ajɛ odobū mla ajɛ odɔlúú,

¹⁶Ɛ̄cī nōo le mu mla opo kú ɛfú nēé géē yɔ̄ ī tá nɛ̄ aícɔ́ɔja í bá ī dɛ̄gba kú ɛfú, lɛyíkwu aígelī nɛ̄hi nēé lɛ igá olɔfú nɛ̄hi hɛ́ tū uwā ā.

¹⁷“N géē cɛ̄ lɛ ífi ɛdɔ obɔ̄bí kóō yá ācɛ, ɛdɔ nōo géē yá kú ɔnyɔɔnyɛ kú uwā kóō yɔ̄ ī yāwu bɛ̄ɛka opeyī ā. Ohígbū keé le ɔ́bíipú bī tū um klla le íne kú ami Óndú ā bīya. Oyī kú uwā géē pɛ́ klá ɛcɛ bɛ̄ɛka éŋkpɔ̄ ā. N géē kpó okwū kú uwā bá ɛcɛ, cɛ́ɛ́ kóō wā bɛ̄ɛka emī ɛna ā.”

¹⁸Ó klla kahíníī, “Ije nɛ̄hɛ́, amáŋ ugóolu (oje ɔdɔ) kú uwā í gáā lɔfú nya uwá tá ɛ̄cī nɛ̄ Ɔwɔicō í cɔ̄nū nɛ̄hi lɛyíkwu ācɛ ā gla ŋ́. Odúúdú ɛcɛ ā géē je kpó yíífi mla ɔlá kú ícɔ̄nū kú nū. Ó géē je odúúdú ācɛ nēe lā ipú ɛcɛ ā kpó yíífi eko nēé leyīce ŋ́ mā.”