Read idoma USƐFANÍYA 2 Bible Online

USƐFANÍYA 2 - idoma bible

USƐFANÍYA 2

¹Aá le jīla ka aá yá ojuju, aéwo nēé lɛ uwēyī īkpɛ̄yí ŋ́ mā.

²Ɛ́ɛ́ kéē géē nū á ŋmá amānyā, bɛ̄ɛka igbóngbō nɛ̄ owu gē kpó ga ɛbɛɛbɛ ā. Ɛ́ɛ́ kú ícɔ̄nū nɛ̄hi kú Óndú ā kóō wā í klá aá, Gbɔbū lɛ ɛ̄cī nɛ̄ Óndú géē ma ícɔ̄nū kú nū fú.

³Odúúdú aá nēe tú iyī aá wāajɛ ipú ajɛ ā, nēe gē lɛyítáajɛ lɛ íne kú Óndú ā. Aá kwúcē igbīhi wā ɛgiyí Óndú ā, Aá kóō yá ucē okpaakpa, kú aá klla tá iyī aá wāajɛ iyɔ̄bū Óndú ā. Ekōhī, ó géē hɛ́ aá tá ɛ̄cī nɛ̄ ó gáā ma ícɔ̄nū fú ā.

⁴Ācɛ géē pɛ́ kwu ŋmá igelī nɛ̄hi kú Ugása dúúdú. Ásikɛ̄lɔn géē je pīya ipú alácɛ̄. É géē nū ācɛ kú Ássidɔ̄du ŋmá ɔlɛ́ uwā ɛnɔ oyɛ̄ɛyí. É kē í je ācɛ kú Ékrɔn kpó nū ŋmá ipú igelī nɛ̄hi kú uwā.

⁵Ohóō yɔ̄ lɛ aá nēe lā okónu ísu ā. Éwo kú ācɛ kú Ufilístīya, Óndú ā le ɛpɔ̄ ka tū aá ɛɛ́. Ó géē kpó aá yíífi jāā gbéeko nɛ̄ ɔ̄cɛ dúúmā í gáā hile ɔlɛ́ ā ŋ́.

⁶Ajɛ kú aá nōo yɔ̄ okónu ísu ā géē je pīya ipácí, mɛ́mla áklɔ̄kpɛ kú ācogbāálá mɛ́mla ɛga o kpó aálá kú uwā tū.

⁷Ajɛ kú okónu ísu ā géē je pīya ákú ācɛ Ujúda nēe hile ā. É géē gbō álá kú uwā abɔ́ɔ klla kē í gbo ipú inu kú ācɛ Ásikɛ̄lɔn ɔ̄nɔ̄ɔ̄nɛ̄. Ohígbū ka Óndú ā, Ɔwɔicō kú uwā gē yɔ̄ mla uwá, klla í yá kéē jɛ̄ gɔbū igbɔhá kpɔ́ ɛ́ɛ́.

⁸Óndú ā kahíníī, “N le ɛcá, nɛ̄ ācɛ Umówābu mɛ́mla Ámɔn bá ī cá ācɛ ɔlɛ́ um ā mɛ́mla ɛ́gɛ́nɛ̄ é bá ī gwō ka aá ɔ́ɔ géē mīyɛ ajɛ kú uwā ā pó ɛɛ́.

⁹Ohígbū ɔ́ɔmā ā, abɔ̄ ami nōo, we Ɔwɔicō kú Ísrɛ̄lu ā wɛ, Óndú nōo yēeyī ā á, n gbɔkpá ka, “Umówābu mɛ́mla Ámɔn géē je kpó yíífi bɛ̄ɛka Usɔ́dɔm mɛ́mla Ugomóra ā. Ācɛ kú Ámɔn géē lɛbɛ̄ɛka uwá ā. É géē je piya ajɛ ɔmā mla ífi piyóó, ajɛ nɛ̄ ácí le mu tū ɔ̄. Ācɛ ɔlɛ́ um nēe hile ā, géē je uwá ɔlɛ́ wu klla í mīyɛ ajɛ kú uwā.”

¹⁰Ɔwɛ nēé gáā yá ācɛ Umówābu mɛ́mla ācɛ Ámɔn italā ā ohígbū ɔbɔ́ɔ̄cɛ mɛ́mla oōgɔ̄ kú uwā ā yɔ̄ á. Mɛ́mla ɛ́gɛ́nɛ̄ é gwō klla ī cá ācɛ ɔlɛ́ ami Óndú ā nōo lɔfú fíyɛ́ dúú ā ɛcá.

¹¹Óndú ā géē yá kú ɔtū kú uwā kóō gbenyi nɛ̄hi. Ó géē je aɔ́wɔ kú ɛcɛ nyā kpó ca bónū ŋmá ipú ɛcɛ nyā, cɛ́ɛ́ odúúdú aéwo ā géē gbā ɔ̄ ɛ̄gbā ipú ajɛ kú ɔnyɔɔnyɛ kú uwā.

¹²Ācɛ Itiyópiya, aá wɛ ipú uwā dúú. É géē bī ɔkpacańgelī le ŋmó aá.

¹³Óndú ā géē bī ɔfú kú nū je ācɛ Asírīya kpó yíífi. Ó géē je igelī nɛ̄hi kú Unínīfɛ pīya alácɛ̄, lɛbɛ̄ɛka ipú ūpū, nɛ̄ ó lɛ éŋkpɔ̄ ŋ́ mā.

¹⁴Ó géē je pīya ɛga nɛ̄ álá, mɛ́mla ɛna mɛ́mla ɛ́dɔ ɛbɛ́ kú ipácí dóódu géē lā. Ogwugwu géē lā ipú alácɛ̄ kú ɔlɛ́ ā. É géē ce uwíndo kú ɔlɛ́ ā géē bá ī jikwū. Ɔtágláma géē yɔ̄ ī dɛ̄gba, kwaá kwaá, okómpíinu kú ɔlɛ́ uwā. É géē je aɔ́cí ō jɛ̄ nɛ̄hi nēé bī le gwó inu kú uwā ā kpó yíífi.

¹⁵Ɔdā nōo géē yá ācɛ kú igelī nɛ̄hi nōo gē ka ɔbɔ́ɔ̄cɛ nɛ̄hi ka aá lɔfú, aá klla kē jɛ̄ iyī aá yɔ̄ abɔ́ɔ á. É gē gbɛlá lɛbɛ̄ɛka, uwá ōfōōfū uwā yɔ̄, nɛ̄ ɔ̄cɛ ɔhá dúú í yɔ̄ gɛ ŋ́ mā.” Ɔlɛ́ ā géē je pīya ipú alácɛ̄, ɛga nɛ̄ ɛbɛ́ ipácí géē lā klla í mlɛ́nyɔ́. Ɔ̄cɛ dúúmā nōo wā í gwō ɔ̄ tá géē tɔ́ɔcɔ́ klla í mī ɛyí jigijigi.