Read idoma UHÁGĀYI 1 Bible Online

UHÁGĀYI 1 - idoma bible

UHÁGĀYI 1

¹Ɛplá iháyí ɔ́mpa nɛ̄ Udárīyɔ̄si lé ɔcɛ́nɛ̄hi kú Upɛ́sīya ā, ɛ̄cī aflɛ́yí kú ɔyā ɔ́mɛhīlī ā, Óndú ā le ɛlā ka bū okónu kú ɔ̄comɛ́ɛbɛ Uhágāyi gé lɛ Userúbābɛlu, ɔyí kú Ussiyatīyɛlu, nōo wɛ igbómína kú Ujúda ā, mɛ́mla Ujóssuwa, ɔyí kú Ujɛhósādāki, Otrɛ̄yí kú ācogwɛ́ɛya ā.

²Óndú ā da Uhágāyi kahíníī, “Ācɛ nēe bá nyā ka eko ɔ́ yá nɛ̄ aá géē gwó Agblīihɔ-nɛ̄hi kú Ɔwɔicō ā igbɔhá ɛ́ɛ́ ŋ́.”

³Olɛhɔ̄ nɛ̄ Óndú tū Uhágāyi fu ācɛ ā yɔ̄ á.

⁴Ó kahíníī, “Ācɛ ɔlɛ́ um, ɔdíyá nɛ̄ aá cíka ō lā ipú ɔlɛ́ aá nɛ̄ aá gwó lɔɔlɔhi ā, nɛ̄ Agblīihɔ-nɛ̄hi kú um ā kē le catāajɛ kpɔ́ ā?

⁵Aá má ɔdā nōo yɔ̄ ī yá aá ā ŋ́ nɛɛ?

⁶Aá lɛ īkpɔ̄dɛ̄hɔ̄ hí nɛ̄hi, amáŋ ɛ̄nɛ̄ aá gē cē ā í nwuné ŋ́. Aá lɛ ɔdōlé, amáŋ ó nwuné jɛ̄ nōo ī nū aá ipú ŋ́. Aá lɛ ejé nɛ̄ aá ī gwá, amáŋ ó nwuné jɛ̄ nɛ̄ aá ī gwá kóō kwú aá ŋ́. Aá lɛ īlī ō klá iyē amáŋ ó jɛ̄ nōo ī ci ofū ō ŋmó aá ŋ́. Ɔ̄cɛ o yúklɔ́ kú ipú aá gē mīyɛ ijē amáŋ ó gē bī ije ā le yá ɔdā dúúmā glá ŋ́.

⁷Aá gbɛlá tū ɔdā nōo yá ɛ́ɛ́, nɛ̄ aɔ́da nyā yá ā.

⁸Abālɔbányā, aá nyɔ̄ ga ɛyí aɛ́fu kú aá hɛ́ ɔcí, cɛ́ɛ́ kú aá le kpó wā í lɛ Agblīihɔ-nɛ̄hi kú um ā tūgwó. Cɛ́ɛ́ ɔtū le he um, cɛ́ɛ́ aá gbɔɔ́ ō gbā um ɛ̄gbā ɛ́gɛ́nɛ̄ o cíkā ā.

⁹Aá leyīce ka aá í cē ɔdɛ̄hɔ̄ nwuné nɛ̄hi, amáŋ, ɛ̄nɛ̄ aá má cē mɛ́ɛ̄ ā le lígíí ā. Eko nɛ̄ aá lɛ ɔ́ɔmā bī wā ɔlɛ́ ɛɛ́,[1] cɛ́ɛ́ n lɛ owu mu ɔɔ́ bónū. Ɔdíyá nɛ̄ n yá lɛ ā? Ohígbū ka Agblīihɔ-nɛ̄hi kú um le catāajɛ, nááná nɛ̄ ɔnyɔɔnyɛ kú aá yɔ̄ ī yɛ tāajɛ kóō lɛ ɔlɛ́ nū túgwó ā.

¹⁰Ɔdā nōo yá ɛ́ɛ́, nɛ̄ ɔwɔ í yā kú ɔdɛ̄hɔ̄ dúúmā kóō jɛ̄ ŋ́ mā yɔ̄ á.

¹¹N lɛ ɔwɔ ohɛ́ɛnɔ tū klá ajɛ mla ɛfu, ɛhɔ̄ kú īkpɔ̄dā, mla ɛhɔ̄ kú ɔcí ufáyin mɛ́mla ɛhɔ̄ kú ɔcí nēé hī ka ɔ́līfu ā mɛ́mla ɔdɛ̄hɔ̄ dóódu nēe gē jɛ̄ ajɛ ā. N klla tū ɔwɔ ohɛ́ɛnɔ klá ācɛ mɛ́mla aɛ́bɛ́ mɛ́mla ɔdā dóódu nɛ̄ aá gē yúklɔ́ kú aá hí ā.”

¹²Anɔ́ɔ Userúbábɛ̄lu mɛ́mla Ujóssuwa mɛ́mla odúúdú ācɛ nēe pīyɛyi ŋmá ajɛ ɔfiyɛ, Ubábīlɔn ā, le ɔdā nɛ̄ Ɔwɔicō da uwá kéē yá ā kpó yá á. É le ufi yá klla kwú ɛyí ú táajɛ lɛ ɛlā nɛ̄ Uhágāyi, ɔ̄comɛ́ɛbɛ́ mɛ́mla ɔ̄cocɛ̄hɔ̄ kú Óndú ā, da uwá ā.

¹³Anɔ́ɔ Uhágāyi, ɔ̄cocɛ̄hɔ̄ kú Óndú ā, lɛ ɛhɔ̄ kú Óndú ā cɛ̄ lɛ ācɛ ā, ka Óndú ā ka anúɔ géē yɔ̄ mla uwá.

¹⁴Óndú ā lɛ ɔtū tū uwā ɔtū kéē yúklɔ́ kú Agblīihɔ-nɛ̄hi kú nū ā. Anɔ́ɔ Userúbábɛ̄lu, ɔyí nɔ̄nyīlɔ kú Ussíyatiyɛlu, igbómína kú Ujúda ā, mɛ́mla Ujóssuwa, ɔyí nɔ̄nyilɔ kú Ujɛhósādāki, mɛ́mla otrɛ̄yí kú ācogwɛ́ɛya ā, mɛ́mla odúúdú ācɛ, kwu ācɛ nēe hile ɔlɛ́ mɛ́mla ācɛ nēe pīyɛyí ŋmá ajɛ ɔfiyɛ ā, gbɔɔ́ ō yúklɔ́ kú Agblīihɔ-nɛ̄hi kú Óndú ā, nōo lɔfú fíyɛ́ dúú, nōo wɛ Ɔwɔicō kú uwā ā.

¹⁵É gbo úklɔ́ nyā ɛ̄cī ofu ce ɛnɛ kú ɔyā ɔ́mɛhīlī kú iháyí ɔ́mpa kú eko nɛ̄ Udárīyɔ̄si cɔcɛ́ ā.