Read idoma UHÁGĀYI 2 Bible Online

UHÁGĀYI 2 - idoma bible

UHÁGĀYI 2

¹Ipú ɛ̄cī ofu ce éyi kú ɔyā ahāapa kú iháyí ɔ́mpa kú eko nɛ̄ Udárīyɔsi wā í cɔcɛ́ ā. Óndú ā le ɛlā ɔhá ka bū okónu kú ɔ̄comɛ́ɛbɛ́, Uhágāyi kpɔ́.

²Ó da ɔ́ kɔ́ɔ̄ lɛ ka lɛ Userúbábɛ̄lu, ɔyí nɔ̄nyīlɔ kú Ussiyatíyɛlu nōo wɛ igbómína kú Ujúda ā, mɛ́mla Ujóssuwa, ɔyí nɔ̄nyīlɔ kú Ujɛhosādaku nōo wɛ otrɛyí kú ācogwɛ́ɛya ā, mɛ́mla ācɛ ohile ā.

³Ó kahíníī, “Ɔ̄nyɛ hile ipú aá nōo má ɛ́gɛ́nɛ̄ Agblīihɔ-nɛ̄hi nyā lɔhi klla tɛ̄ɛgahi lɛ tɛtɛ ā? Ɛ́gɛ́nyā nɛ̄ aá má ɔ̄ abālɔbányā ā? Ó lɛbɛ̄ɛka ó wɛ ɔdā dúúmā ikpēyī kú aá gɛ ŋ́ mā ā.

⁴Amáŋ ɔtū kú odúúdú aá kóō híīī gbenyi abālɔbányā ŋ́. Aá yúklɔ́ nyɔ̄, ohígbū ka n yɔ̄ mla aá.” Abɔ̄ Ɔwɔicō, nōo nwuné fíyɛ́ dúú ā ka lɛ á.

⁵Ó klla kɛlā gɔbū ka, “N cokónu lɛ aá eko nɛ̄ aá bɛ̄cɛ ŋmá ajɛ kú Íjīpiti ā, ka Alelékwū kú um í yɔ̄ mla aá. N kē yɔ̄ mla aá kpɔ́, ohígbū ɔ́ɔmā, aá híī yúufi ŋ́.”

⁶Óndú ā kahíníī, “Eko kpií ā, n géē jíla ɔkpáncō mɛ́mla ɛcɛ mɛ́mla ajɛ mɛ́mla ísu iyē

⁷N géē jíla odúúdú aéwo kú ipú ɛcɛ ā iyē, cɛ́ɛ́ kéē lɛ agbénú kú uwā kpó wā amānyā. Cɛ́ɛ́ n le Agblīihɔ-nɛ̄hi ā tū mu mla agbénú.

⁸Oje nɛ̄hɛ́ mɛ́mla ugóolu (oje ɔdɔ) wɛ ákú um.

⁹Agblīihɔ-nɛ̄hi ɛ̄yīpɛ̄ ā géē lɔhi fíyɛ́ ɛnɛ̄ncɛ̄ ā á. Abɔ́ɔ ā, n géē yá kú aá jɛ gɔbū, n klla í yá kú aá bá ɛbɔ́ cííí.” Abɔ̄ Óndú ā nōo lɔfú fíyɛ́ dúú ā ka lɛ á.

¹⁰Ɛ̄cī ofu ce ɛnɛ kú ɔyā ahāanɛ kú ipú iháyí ɔ́mpa nɛ̄ Udárīyɔ̄si lé ɔcɛ́ ā, Óndú ā nōo lɔfú fíyɛ́ dúú ā le ɛlā ɔhá ka lɛ Uhágāyi, ɔ̄comɛ́ɛbɛ́ ā ka,

¹¹“Lɛ ɔ̄kā da ācogwɛ́ɛya ā lɛyíkwu ɔdā nɛ̄ íne ā ka lɛyíkwu ɔdā nyā ā.

¹²Ɔ́dāŋ́ ka, ɔ̄cɛ kwú ɛbɛ́ otīihɔ ú ŋmá ipú ɛbɛ́ nēe le gwɛ́ɛya ā, anɔ́ɔ ó kwú ɔ̄ ú tá ipú īlī kú nū á, anɔ́ɔ ó cɛ̄ lɛ īlī kú nū ɔ́ɔmā gaá kwu ɔdōlé dúúmā nēé yá ā, ejé, anɔ̄ ámāŋ ɛdɔ ɔdōlé dóódu, ó géē yá ká ɔdōlé ā kóō lɛ tīihɔ kpɔ́ nɛɛ?” Eko nɛ̄ ó lɛ ɔ̄kā nyā da ā, Ācogwɛ́ɛya ā tóohi kahíníī, “Ehéee”.

¹³Uhágāyi klla dɔɔ̄kā ɔhá kahíníī, “Ɔ́dāŋ́ ka ɔ̄cɛ le tēelihɔ o ŋmá lɛ o lɛ abɔ̄ kwu okwū, anɔ́ɔ ó gaá kwú abɔ̄ ú kwu odúúmā kú aɔ́dā nēe bá nyā, ɔ́ɔmā géē yá ka ɔdā ɔ́ɔmā kóō kwú tēelihɔ dúú nɛɛ?” Ācogwɛ́ɛya ā tóohi kahíníī, “Īīī”.

¹⁴Anɔ́ɔ Uhágāyi kahíníī, “Óndú ā ka, ɔdā ékpónú ɔ́ɔmā yɔ̄ lɛ ācɛ kú éwo nyā á, mla ɔdā dóódu nēé yá ā á. Ohígbū ɔ́ɔmā ā, ɔdā dóódu nēé bī wā ɛyí ede ā kwú tēelihɔ ohígbū ka uwá abɔ̄yī uwā kwú tēelihɔ.”

¹⁵Óndú ā da ɔ̄kā kahíníī, “Aá má ɔdā nōo yá aá ŋ́ nɛɛ? Ɛ́ɛ́ ká aá géē gbɔɔ́ ō tú Agblīihɔ-nɛ̄hi kú um gwó ā,

¹⁶aá gē nyɔ̄ ɔbā kú īkpɔ̄dā kú aá gē leyīce ka aá géē má okoolo ofu kú īkpɔ̄dā ā, amáŋ igwó ōfōōfūnū hile á. Aá gē nyɔ̄ ī hɛ́ ɔjá ofɛpacigwó kú ejé, amáŋ ɔjá ofu ōfōōfūnū hile á.

¹⁷N gē tū owu okwɔ́la nɛ̄hi klá ɔdā dóódu nɛ̄ aá nyī ā, kóō lɛ uwá kpó yíífi, amáŋ, aá pīyabɔ̄ ŋ́ kpɔ́.

¹⁸Ícɛ wɛ ɛ̄cī ofu cɛnɛ kú ɔyā ahāanɛ, ɛ̄cī nɛ̄ aá lɛ ikpínu kú Agblīihɔ-nɛ̄hi ā tá ajɛ kwɛyí nyā. Aá géē má ɔ́dā nōo géē yá ŋmá abālɔbányā gɔbū ā.

¹⁹Nááná nɛ̄ igwu í hile ŋ́ mā, nɛ̄ ɔcí ufáyin í hile ŋ́, nɛ̄ ɔcí kú ufíg, í gwá ɛ́ɛ́ ŋ́ mā, nááná, o ŋmá abālɔbányā gɔbū ā, n géē hɔ́há ce aá.”

²⁰Ɛ̄cī ékpónú ɔ́ɔmā, ɛ̄cī ofu ce ɛnɛ kú ɔyā ahāanɛ ā, Óndú ā le Uhágāyi tɛ̄hɔ̄ igbɔhá fu Userúbábɛ̄lu, igbómína kú Ujúda ā ka,

²¹“N gáā jíla ɛcɛ mla ɔkpáncō iyē ɛɛ́.

²²N géē je ajɔ̄ɔ̄cɛ́ alɛwa yíífi, nɛ̄ ɔfú kú uwā í mɛ. N géē je úgbɔ́ɔnya ō kpɛ́fú kú uwā mla ācɛ o pɛ́ uwā ā kpó yíífi. Aɔ́nya o kpɛfú ā géē kwú. Ācɛ nēe gē ce aɔ́nya ā géē kpó iyī ūwā ŋmó.

²³Ɛ̄cī ɔ́ɔmā ā, n géē je uwɔ, Userúbábɛ̄lu ɔ̄cocɛ̄hɔ̄ kú um ā, n klla í fu uwɔ ká ā bī iyē kú um le gbāājɛ. Awɔ ā wɛ ɔ̄cɛ nɛ̄ n fu á. Abɔ̄ Óndú ā nōo lɔfú fíyɛ́ dúú ā ka lɛ á.