Read idoma USAKARÍYA 1 Bible Online

USAKARÍYA 1 - idoma bible

USAKARÍYA 1

¹Ipú ɔyā ahātá kú ipú iháyí ɔ́mpa nɛ̄ Udáriyɔsi lé ɔcɛ́ kú Upɛ́sīya ā, Óndú ā le ɛlā ka lɛ Usekaríya nōo wɛ ɔ̄comɛ́ɛbɛ ā. Usekaríya wɛ ɔyí kú Uberékiya, nōo wɛ ɔyí kú ɔyí kú Íddo ɔ̄comɛ́ɛbɛ ā.

²Ó kóō da ācɛ Ísrɛ̄lu ka, Óndú nōo lɔfú fíyɛ́dúú ā tɛtɛ le cɔ̄nū mla aádáádā uwā nɛ̄hi.

³Ó ka amáŋ ɔ́ɔ le ka lɛ uwá kahíníī, “Aá kwúcē wā ɛgiyí um, n géē pīyeyī tá aá.

⁴Aá híī yá ucē bɛ̄ɛka aádáádā aá, nɛ̄ ācomɛ́ɛbɛ kú otɛtɛ ā cɛ̄hɔ̄ kú um lɛ uwá kéē kwúcē ŋmá ipú ɔdōbɔ̄bí nēé bá yɔ̄ ī yá ā. Amáŋ, é pó ŋ́ mā.

⁵Iní nɛ̄ aádáádā aá bá ícɛ nya āa? Ācomɛ́ɛbɛ ā, béeyī piyóó nɛɛ?

⁶Amáŋ, ɛlā nɛ̄ n ka bū okónu kú ācomɛ́ɛbɛ kú um lɛ aádáádā ā, í lɛ uwá kwú ŋ́ nɛɛ? Eko nēé le italā kú ɔdōbɔ̄bí nēé yá ā yá uwā ā, é le pīyabɔ̄, anɔ́ɔ é lɛ um jé klla kahíníī, ‘Óndú ā nōo lɔfú fíyɛ́ dúú ā le italā yá alɔ ɛ́gɛ́nɛ̄ o cíkā lɛ ucē obɔ̄bí nɛ̄ alɔ yá ā, mla ɛ́gɛ́nɛ̄ Óndú ā dɔɔ̄kā kóō yá alɔ lɛ á ɛɛ́.’”

⁷Ɛ̄cī ofu ce ɛnɛ, kú ɔyā igwóléyi nēé hī ka Usɛ́bāti ā, iháyí ɔ́mpa nɛ̄ Udáriyɔ̄si ɔcɛ́nɛ̄hi kú Upɛ́siya ā, Óndú ā kɛlā gā um ipú ɛbɛ nɛ̄ n má otú éyi.

⁸Otú ɔ́ɔmā, n má ɔ̄cɛ éyi ce ɛyí ɔnya nɔ̄wá éyi. Ó gaá māháyi ipú aɔ́cí nēé hī ka umɛ́tulu ā, ɔpɛ́ kú ɛfu éyi, aɔ́nya ɔhá nēe wɛ, ɔnɔ̄wá, ɔgalúlā mɛ́mla ɛnɛ̄hɛ́ bá igbīhi ɔ̄cɛ ɔ́ɔmā

⁹Anɔ́ɔ n le ɔ̄kā da kahíníī, “Aɔ́nya nyá bá yɔ̄ ā, Óndú um?” Anɔ́ɔ Alelékwū ōtɛ̄hɔ̄ nōo yɔ̄ gē kɛlā mla um ā kahíníī, “N géē ma ɔdā nōó wɛ ā fú gā uwɔ.”

¹⁰Anɔ́ɔ Alelékwū nōo māháyi ipú ɔ́cí ā, kahíníī, “Ācɛ nēe bá ā wɛ ācɛ nɛ̄ Óndú ā tɛ̄hɔ̄ kéē gaá lɛ ɛjɛ̄ɛ̄jī ɛcɛ ā jila ga ajɛ gicō ā nɛ.”

¹¹Anɔ́ɔ ācɛ nēe ce ɔnya ā da Alelékwū ō tɛ̄hɔ̄ nōo māháyi ipú aɔ́cí ā kahíníī, “Alɔ lɛ ɛcɛ jila tá kwɛyí ɛɛ́. Alɔ kē má ka odúúdú ɛcɛ bá ɛbɔ́ cíí.”

¹²Anɔ́ɔ Alelékwū ōtɛ̄hɔ̄ kú Óndú ā dɔɔ̄kā kahíníī, “Óndú, eko nyá nāa géē gbēyī í kwu, ɛ́ɛ́ ká ā méyīnyinyi kú ācɛ kú Ujerúsālɛm mɛ́mla Ujúda, nɛ̄ aá húmáyī cɔ̄nū mla uwá iháyí ofɛtá cigwó, nēe gaá yɛ ā?”

¹³Anɔ́ɔ Óndú ā bī ɛlā ōtɔ́tūlé le ohi tá Alelékwū ōtɛ̄hɔ̄ nōo yɔ̄ ī cɔ̄wɔ gā um ā á.

¹⁴Anɔ́ɔ Alelékwū ā le ka gā um ka ami ɔɔ́ ka tɛ́ɛcɛ, ɔdā nɛ̄ Ɔwɔicō nōo lɔfú fíyɛ́ dúú ā kahíníī; “N yíihɔtū nɛ̄hi klla lɛ ɛlá wu Ujerúsālɛm, ɔlɛ́ otīihɔ kú um ā.

¹⁵N le cɔ̄nū nɛ̄hi mla aéwo o yá ɔbɔ́cɛ nēe bá cíí ipú ɛbɔ́ ā abālɔbányā ā. Ohígbū ka eko nɛ̄ n cɔ̄nū lígíí mla ācɛ ɔlɛ́ um ā, ācɛ ɔ́ɔmā yá ka ācɛ ɔlɛ́ um kéē móōwē fíyɛ́.

¹⁶Ohígbū ɔ́ɔmā ā, n kwúcē wā Ujerúsālɛm ká n̄ ményinyi ācɛ Ujerúsālɛm ɛɛ́. É géē tú Agblīihɔ-nɛ̄hi kú um ā gílayá, klla í tú igelī ā gwó kpɔ́ ɛ́ɛ́.”

¹⁷Alelékwū ōtɛ̄hɔ̄ ā klla da um ka n̄ lɛ ka tɛ́ɛcɛ kpɔ́ kahíníī, “Ɔwɔicō nōo lɔfú fíyɛ́ dúú ā ka ācɛ kú igelī kú nū géē gbagbénú nɛ̄hi klla í jɛ̄ gicō kpɔ́ ɛ́ɛ́. Ka anúɔ í fu Ujerúsālɛm kɔ́ɔ̄ wɛ igelī kú anúɔ kpɔ́ klla í tá ācɛ kú ɔlɛ́ anúɔ ɔtū lé.”

¹⁸Ó ka anúɔ je eyī gicō, anɔ́ɔ anúɔ le ajī ɛbɛ́ ɛnɛ má á.

¹⁹Anɔ́ɔ n da Alelékwū ōtɛ̄hɔ̄ nōo húmáyī kɛlā mla um ā ɔ̄kā ká, “Ɔdí nɛ̄ ajī nēe bá nyā wɛ ā?” Anɔ́ɔ ó tá um ohi kahíníī, “É kwɛyí kú aéwo ɛnɛ olɔfú nɛ̄hi nēe je ācɛ kú Ujúda, Ísrɛ̄lu, mla Ujerúsālɛm pahīla klá ɛcɛ ā nɛ.”

²⁰Anɔ́ɔ Óndú ā le aónɔwá ɛnɛ nēe bī omútāgā abɔ̄ mafú gā um á.

²¹Anɔ́ɔ n da ɔ́ ɔ̄kā kahíníī, “Ɔdí nɛ̄ ācɛ nēe bá ā wā gaá yá ā?” Anɔ́ɔ ó tá ohi kahíníī, “É wā gaá tū aéwo nēe je ajɛ kú Ujúda pahīla ufi. É klla í je uwá kpó yíífi.”