Read idoma USAKARÍYA 10 Bible Online

USAKARÍYA 10 - idoma bible

USAKARÍYA 10

¹Usekaríya da ācɛ kahíníī, “Aá ba Óndú ā ɛ̄ba kú ɔwɔ kóō yá eko ɔgwā ā. Anú gē yá nɛ̄ ɔwɔ ī tū klla ī yā wā ajɛ á. Anú gē cɛ̄ lɛ ɔdɛ̄hɔ̄ kéē yá lɔhi á.

² Ācɛ gē dɔɔ̄kā ɔdā alɛwa ŋmá ɛgiyí aɛ́cí mɛ́mla aógwɛ́bā, amáŋ, ohi nēé gē tā uwā ā wɛ ɛ̄kɛ̄mgbɛ̄ mɛ́mla ɛlā icííci nɛ̄ ó lɛyí ŋ́. Ācɛ nēe gē ka ɛyí ɔ̄na ā, gē bī aá nyíleyī. Ɔtū nēé tá aá anú lé ā, wɛ áncā nɛ n. Ohígbū ɔ́ɔmā ā, ācɛ ā bá ī yɛ gicō gajɛ bɛ̄ɛka aálá nēe pɛ́ gebí ā. É bá ipú unwalu, ohígbū ka é lɛ otrɛ̄yí nōo gē gbō uwā ŋ́.”

³Ó ka Óndú ā ɔ́ɔ kahíníī, “N le cɔ̄nū nɛ̄hi lɛyíkwu aéwɔhá nēe gē gbo ācɛ ɔlɛ́ um ā. N kē í yá uwā italā. Ācɛ kú Ujúda ā wɛ ákú um. Ami Óndú ā, nōo lɔfú fíyɛ́ dúú ā, gē leyīkwu uwá á. N géē yá uwā kéē lɛbɛ̄ɛka aɔ́nya o bī kpɛ́fú kú um nōo lɔfú nɛ̄hi ā.

⁴Aótrɛ̄yí nēe géē lɔfú kwu ajɛ kli bɛ̄ɛka ɛcɔ̄ nōo ī bī ikpínu háyi ā, ámāŋ ka aótrɛ̄yí nēe lɔfú kwa ajɛ kli bɛ̄ɛka ákanaba nōo ī bī inu háyi ā mɛ́mla aɛ́nɛ̄ o í lɔfú bɛ̄ɛka ɔtā ō bī kpɛ́fú ā. Ɛdɔ kú otrɛ̄yí dúúmā géē bɛ̄cɛ ŋmá ipú uwā.

⁵Ācɛ kú Ujúda gē yá aólɛlā kú uwā lé, bɛ̄ɛka aícɔ́ɔja nēe gē lɛ ikpó da aólɛlā kú uwā ɛyí tū ɔ́tɔ̄ ipú úláyi ā. É géē kpɛ́fú ohígbū ka Óndú ā yɔ̄ mla uwá. É klla géē yá ācɛ okpɛ́fú ɔnya alɛwa kú aólɛlā kú uwā ā lé.

⁶Óndú ā klla ka kpɔ́ kahíníī, “N géē yá ācɛ kú Ujúda kéē le pīya ācɛ olɔfú. N géē hɛ́ ācɛ kú Ísrɛ̄lu tá. N géē ményinyi uwā klla í kpó uwā wā ɔlɛ́. É géē lɛbɛ̄ɛka ācɛ nɛ̄ ń tá uwā jéjéē ɛ́ɛ́ ŋ́ mā. Ami nōo wɛ Óndú, Ɔwɔicō kú uwā ā, géē pó ɔkɔ nēé í gbā gā um ā, n klla kē í tú uwā ohi.

⁷Ācɛ kú Ísrɛ̄lu géē lɔfú bɛ̄ɛka aícɔ́ɔja ā. É klla géē gwéeyē bɛ̄ɛka ācɛ nēe bá ī gwá ejé ā. Ayí kú ɔlɛ́ uwā géē má ɛ́gɛ́nɛ̄ aádā uwā bá ī gwéeyē lɛ ā. Ɔtū géē he uwá, é klla í cɛ̄tra Óndú ohígbū ɔdā nɛ̄ ó yá lɛ uwá ā.”

⁸Óndú ā ka kpɔ́ kahíníī, “N géē hī ācɛ ɔlɛ́ um igwú, n géē tū uwā bá tɔ̄há. N le ɔ́ ŋmó tū ipú ɔtū kú um ka n géē hɛ́ uwā tá ɛɛ́. N klla í yá kéē le nyīla īkpō ācɛ bɛ̄ɛka ɛ́gɛ́nɛ̄ é tɛtɛ lɛ ā.

⁹Nááná nēé le fíyákátā tū ipú aéwɔhá ā, amáŋ ka o bá ɛgaligbó ɔ́ɔmā ā, nááná, é géē blakwu um. Uwá mla ayí uwā géē hile, klla géē pīyɛyí wā ɔlɛ́ tɔ̄ɔ̄há.

¹⁰N géē kpó uwā wā ɔlɛ́, ŋmá Íjīpiti mla Asírīya, N géē kpó uwá gaá lā Ugílɛ́di mla Ulɛ́bānɔn dúú, jāā gbéeko nɛ̄ odúúdú ajɛ ā kwú mu mla ācɛ.

¹¹Eko nēé bá ī bū ipú ísu kú unwalu kú uwā, n géē tú úgbagwú kú ísu ā ɔtū wāajɛ. N klla í je ɛga nōo lipú fíyɛ́ dúú kú ísu nēé hi ka Unáyilu, ā ŋmó kīklīkīī. N géē je uwēyī lɛ ācɛ Asírīya nēe gē yá ɔbɔ́ɔcɛ̄ ā. N kē í yá kú ɔfú kú ācɛ Íjīpiti ā kóō mɛ.

¹²N géē je ɔfú kú um lɛ ācɛ ɔlɛ́ um. É géē gbā um ɛ̄gbā klla í lɛyítáajɛ gā um.” Óndú ā lɛ ɛlā ka ɛɛ́.