Read idoma USAKARÍYA 11 Bible Online

USAKARÍYA 11 - idoma bible

USAKARÍYA 11

¹Usekaríya kahíníī, “Aá lɛ aódūngwɔ̄wɛ kú aá kpó nwūla, ācɛ Ulɛ́bānɔn, cɛ́ɛ́ kú ɔlá kóō kpó aɔ́cí kú Uséda kú aá yi tāajɛ![5]

²Aá jikwū ká aá tɛ̄gíkwū bɛ̄ɛka ɔ̄cɛ ā, aá nɛ̄ wɛ aɔ́cí nēé hī ka usáyíprɛ̄si ā, ohígbū ɔcí nēé hī ka óoku kú Ubásan ā. É le ūpū nōo dobū nɛ̄hi ā hɛ́ wā ajɛ ícɛ ɛɛ́. Aɔ́cí nēe tū ɛgahi nɛ̄hi ɔ́ɔmā kwú kpó yíífi ɛɛ́.

³Aá jāhɔ̄ kú aá pó! Aótrɛ̄yí ā bá gē tɛ̄gíkwū. Ɛgahi kú uwā le yɛ ɛɛ́. Aá jāhɔ̄ kú aá pó oji nɛ̄ ágábá tū ā. Ohígbū ka ɔlɛ́ uwā kú ipú ūpū kú okónu ísu kú Ujɔ́dan ā kwú yíífi ɛɛ́!

⁴Óndú, Ɔwɔicō kú um da um kahíníī, ‘Kwú iyī uwɔ ú yá bɛ̄ɛka ɔ̄cogbāálá kú aálá nēé gáā je kpó ŋmó ā.

⁵Ācɛ nēe í lá aálá ā gē kpó uwā ŋmó, ɔ̄cɛ dúúmā í kē yá ūwā italā ŋ́. É kwú ɛbɛ́ kú ūwā ú lá, anɔ́ɔ é ka aá cɛ̄tra Óndú ā, aá kwú gbagbénú ɛɛ́! Ācɛ nēe gē gbō aálá ā nááná ā í ményinyi ūwā ŋ́ dúú.’”

⁶Óndú ā kahíníī, “Ń klla gáā ményinyi ācɛ kú Ujúda ɛ́ɛ́ gɛ ŋ́. Ami abɔ̄yī um géē yá kú ɔnyɔɔnyɛ kú ūwā kóō héyī kwu ɔ́mpa nū, klla í kpó ūwā tū aɔ́cɛ́ kú ūwā abɔ̄. Aɔ́cɛ́ nēe bá ā géē je ajɛ ā yíífi. Ń kē gáā nyā ācɛ ā tá ŋmá abɔ̄ kú aɔ́cɛ́ ā ŋ́.”

⁷Ācotɔ́sú álá ā kwú um ú pīya ɔ̄cɛ nōo í gbō aálá nēé gáā kpó ŋmó ā. N lɛ okwutɛ ɛpa kpó. N hī éyi ka “Ɛhi”, ɔhá ā kē lé ka “opīyatɔ̄há”. Anɔ́ɔ n kē leyīkwu aálá ā.

⁸N le ɔtū lé mla ācogbāálá ɛtá ɔhá nēe gē wɔ́ɔ́tū um ā gɛ ŋ́, anɔ́ɔ n kwú uwā ú nū, ipú ɔyā éékpónú á.

⁹Anɔ́ɔ n da aálá ā ka ń gáā leyīkwu uwá gɛ ŋ́. Aálá nōo í pɛ́ kwú nɛɛ, kéē pɛ́ kwú, aɛ́nɛ̄ o í pɛ́ bí nɛɛ, kéē pɛ́ bí. Aɛ́nɛ̄ e í hile ā géē kpó aɔ́mpa uwā yíífi.

¹⁰Anɔ́ɔ n kwú okwutɛ kú um, nɛ̄ n hī ka “ɛhi” ā ú, lɛ ɔ́ cē kóō mafú ka Óndú ā kwú ɛka nɛ̄ ó gbo lɛ odúúdú aéwo ā, ú bīya ɛɛ́.

¹¹Anɔ́ɔ ɛka ā kwú bīya ɛ̄cī ɔ́ɔmā á. Anɔ́ɔ ācotɔ́su álá nēe bá ī má um ā jé ka Óndú ā ɔ́ɔ bī ɔdā nɛ̄ n yá ā yɔ̄ ī kɛlā lɛ aá.

¹² N da uwá ka ɔ́dāŋ ka é cɛ̄ ɛ́mba é lɛ ulé kú úklɔ́ nɛ̄ n yá ā gbā gā um. Ɔ́dāŋ ka ó lɛ ā ŋ́, kéē bī. Anɔ́ɔ é le īkpīje nɛ̄hɛ́ ofu cigwó gbā gā um kóō wɛ ulé kú úklɔ́ nɛ̄ um yá ā.

¹³Óndú ā da um ka ami ɔ́ɔ̄ kwú īkpīje ofu cigwó ā ú gbā tū ɛga o kpíje tū kú Agblīihɔ-nɛ̄hi ā[6] Anɔ́ɔ n kwú ikpīje ofu cigwó nɛ̄ ācɛ gbɛlá ka ó cíkā lɛ úklɔ́ nɛ̄ n yá ā í pīya tú ipú ɛkpa kú Agblīihɔ-nɛ̄hi ā.

¹⁴Anɔ́ɔ n le okwutɛ ɔ́mpa nēé hī ka “opīyatɔ̄há” ā cē, cɛ́ɛ́ kóō mafú ka ɛma kú Ujúda mɛ́mla Ísrɛ̄lu kwú hɛ́ ɛɛ́.

¹⁵Óndú ā da um igbɔhá ka um kwú úklɔ́ kú ɔ̄cogbāálá ú kpɔ́, ka um yá bɛ̄ɛka ācogbāálá ɛflɛ́ɛfu ā.

¹⁶Ó ka ohígbū ka anúɔ yɔ̄ ī fu ɔ̄cogbāálá éyi ipú ajɛ ā nɛ̄ ɔ́ gáā leyīkwu aálá nēe bá ī pɛ́kwú ā ŋ́, ɛ́ɛ́ nɔ́ɔ gē dɔɔ̄ka aɛ́nɛ̄ e bá ī bí ā ŋ́, ɛ́ɛ́ nɔ́ɔ gē tá ágbe kú aɛ́nɛ̄ é yá uwā ágbe ā ŋ́, ɛ́ɛ́ nɔ́ɔ ī je ɔdōlé lɛ aɛ́nɛ̄ é lɛ ɔfú iyē ŋ́ mā ŋ́. Amáŋ ó gē je ɛbɛ́ kú aálá ojɔ̄kwū fíyɛ́ dúú ā lé klla gē plá uwá āpīice.

¹⁷Ohóō lɛ ācogbāálá ɛfulɛ́ɛfu nōo gē kwu hī aálá ā tá. Ká ɔfú kú nū kóō mɛ ɔgbɛ́fú. Abɔ̄ kú nū kóō lɛ ŋmó tíiyē, cɛ́ɛ́ kú eyī abɔ̄lɔ́ná kú nū kóō kwú pu.”