Read idoma USAKARÍYA 12 Bible Online

USAKARÍYA 12 - idoma bible

USAKARÍYA 12

¹Ɛ̄nyā wɛ olɛhɔ̄ nɛ̄ Óndú ā nōo nā ɔkpáncō daa klla yá ɛcɛ, nōo cɛ̄ lɛ ācɛ yēeyī ā, ka lɛyíkwu Ísrɛ̄lu á.

²Ó kahíníī, “N géē yá Ujerúsālɛm lɛbɛ̄ɛka íkókwū kú ejé ā. Éwo nēe yɛ ɔ́ jīla tá ā géē gwá ejé ā ŋmá anú, cɛ́ɛ́ é géē bá ī ga ɔwɛ ga ácí bɛ̄ɛka ɔ̄cɛ nɛ̄ ejé lɛ ɔ́ kwú ā. Eko nēé í cīíbɔm tū Ujerúsālɛm ā, nēé géē cīíbɔm tū Ujúda dúú á.

³Amáŋ eko nɛ̄ eko ā gā ā, n géē yá Ujerúsālɛm bɛ̄ɛka ápátɛ́cɔ̄ ō gbɛnú nɛ̄hi ā, nɛ̄ éwo dóódu nōo dɔɔ̄kā ō je ɔ́ ŋmá ajɛ, géē yá iyī nū ágbe. Odúúdú aéwo kú ipú ɛcɛ géē pīyatɔ̄há kéē kpɛ́fú tá ɔ̄.

⁴Óndú ā ka anúɔ géē tū odúúdú aɔ́nya ɛfú kú uwā ā ufi, ka anúɔ klla í yá ká ācɛ o kpɛ́fú ɔnya kú uwā ā kéē le kpó jɛɛ́lɛ́. Ó ka anúɔ géē gbō ācɛ kú Ujúda, amáŋ anúɔ géē kpó aɔ́nya kú aólɛlā kú uwā ā eyī pu.

⁵Cɛ́ɛ́ aípɔ́ɔma kú Ujúda ā géē da iyī uwā ka Óndú, Ɔwɔicō nōo lɔfú fíyɛ́ dúú ā ɔ́ɔ gē je ɔfú lɛ ācɛ ɔlɛ́ nū, nēe lā Ujerúsālɛm ā á.

⁶Óndú ā klla ka eko ɔ́ɔmā ā, anúɔ géē yá ācɛ kú Ujúda bɛ̄ɛka ígblɛ́nyī ɔlá, nōo ī yi ipú ūpū, mɛ́mla ahɔ̄lá nōo hɛ́ í tá ipú ɛfú ōŋmókókó ā. Ka é géē je aéwo ɔhá nēe lā jīla uwá tá ā yíífi ŋmá ajɛ ga abɔ̄ ɛpɛlɛ́ɛpa. Ó ka ācɛ kú Ujerúsālɛm ɔ́ɔ géē lā ɛbɔ́ ipú ɔlɛ́ uwā Ujerúsālɛm.

⁷Ó ka anúɔ nɛ̄ ó wɛ Óndú ā géē cɛ̄ lɛ aícɔ́ɔja kú Ujúda kéē lɛ aólɛlā ā yálé aflɛ́yí, o yá ɛ́ɛ́ ka ɛ́gɛ́nɛ̄ áā cɛ̄tra ipɔ́ɔmā kú Udéfīdi klla í lɛ ojīlīmā ce Ujerúsālɛm lɛ ā, kóō híī fíyɛ́ ákú ācɛ Ujúda ohile ŋ́.

⁸Eko ɔ́ɔmā ā Óndú ā géē leyīkwu ācɛ nēe lā Ujerúsālɛm ā. Ɔ̄cɛ nōo kwáahi ipú uwā fíyɛ́ dúú ā géē je pīya ɔ̄cɛ olɔfú bɛ̄ɛka Udéfīdi ā eko ɔ́ɔmā. Ipɔ́ɔma kú Udéfīdi géē kpó ūwā trɛ̄yí bɛ̄ɛka alelékwū-ōtɛ̄hɔ̄ kú Óndú ā mɛ́mla Ɔwɔicō abɔ̄iyī nū.

⁹Óndú ā ka anúɔ í kpó odúúdú aéwo nēe í wā í dɔɔ̄kā ō kpɛ́fú tū ācɛ Ujerúsālɛm ā yíifi eko ɔ́ɔmā.

¹⁰ Ó ka anúɔ géē je odo kú eyīnyinyi mɛ́mla ákú ɔkɔ ōgbā lɛ ipɔ́ɔma kú Udéfīdi mɛ́mla ācɛ ɔhá kú Ujerúsālɛm ā. Cɛ́ɛ́ eko nēé lɛ ɔ̄cɛ nēé le ɛ̄wā gwō ɔ̄ ŋmó ɔ̄ ga ɔlékwū ā má, nɛ̄ ó géē tū uwā eyīnyinyi. É géē jikwū nū klla í yēkwu kú nū bɛ̄ɛka ɔ̄cɛ nōo gē yēkwu kú ɔyínɔ̄nyīlɔ ékpónú kú nū ā. É géē jikwū klla í tɛ̄gíkwū nɛ̄hi bɛ̄ɛka ɔ̄cɛ nɛ̄ ɔyí aflɛ́yí kú nū gekwú ā.

¹¹Ó klla ka ka eko ɔ́ɔmā ā ekwu nɛ̄ ācɛ kú Ujerúsālɛm géē yɔ̄ ā, géē lɛbɛ̄ɛka ɛ̄nɛ̄ é yɔ̄ ohígbū Uhadadi rímɔn ipú ɔpɛ́ kú Umegído ā.[7]

¹²Ɛjɛ̄ɛ̄jī aípɔ́nū ā géē yēkwu kú abɔ̄ iyī ūwā. Ipɔ́ɔ́nū kú Udéfīdi mɛ́mla anyā ɔlɛ uwā í bá ɛga ɛyɛ́ɛ́yí. Ipɔ́ɔ́nū kú ɔlɛ́ Unátan mɛ́mla anyā ɔlɛ́ uwā í bá ɛga ɛyɛ́ɛ́yí.

¹³Ipɔ́ɔ́nū kú ɔlɛ́ Ulífāyi mɛ́mla anyā ɔlɛ́ ūwā í bá ɛga ɛyɛ́ɛ́yí. Ipɔ́ɔ́nū kú ɔlɛ́ Usímēyi abɔ̄yī ūwā mɛ́mla anyā ɔlɛ́ uwā í bá ɛga ɛyɛ́ɛ́yí.

¹⁴Odúúdú aípɔ́ɔ́nū ɔhá nēe hile ā mɛ́mla anyā ūwā géē bá ī yēkwu kú ūwā ɛga ɛyɛ́ɛyɛ́yí.