Read idoma USAKARÍYA 13 Bible Online

USAKARÍYA 13 - idoma bible

USAKARÍYA 13

¹Óndú ā nōo lɔfú fíyɛ́ dúú ā ka eko ɔ́ɔmā anúɔ géē nwūla njɔlɔ éyi nōo géē na ācɛ kú ipɔ́ɔma kú Udéfīdi mɛ́mla ācɛ kú Ujerúsālɛm ŋmá íne nēé bīya ā mɛ́mla aójibó kú ɔwɔ ɔhá nēé gē gbɛ̄gbā ā.

²Ó klla ka anúɔ géē je iyē kú aɛ́cí ā ŋmónyí ŋmá ipú ajɛ ā dúúdú, nɛ̄ ɔ̄cɛ dúúmā í klla gáā blakwu uwá igbɔhá ɛ́ɛ́ gɛ ŋ́. Ó ka anúɔ géē je ɔ̄cɛ dúúmā nōo je iyī nū ka ɔ̄comɛ́ɛbɛ ámāŋ ka ɔ̄cɛ nōo gē cɛ̄ alelékwū ōbɔ̄bí ɛhɔ̄ ŋmó.

³Ɔ́dāŋ́ ka ɔ̄cɛ dúúmā ka anúɔ yɔ̄ ī mɛ́ɛbɛ ā kpɔ́, ádā nū mɛ́mla ɛ́nɛ́ nū géē da ɔ́ ka, é géē ŋmó ɔ̄, ohígbū ka ó gē ka ka anúɔ ɔ́ɔ gē kɛlā kú Óndú ā, amáŋ nɛ̄ ó kē ī kɛ̄mgbɛ̄ ikɔkɔ ɛlā kú Óndú ā. Eko nɛ̄ ó gbɔɔ́ ō mɛ́ɛbɛ kpɔ́, ɛ́nɛ́ nū mɛ́mla ádā nū géē lɛ ɛ̄wā gwū ɔ̄, í je ɔ́ ŋmó.

⁴Eko nɛ̄ eko ɔ́ɔmā gā, ɛjɛ̄ɛ̄jī ɔ̄comɛ́ɛbɛ́ géē yúwēyī ō ka ɛbɛ ɛ̄kɛ̄mgbɛ̄ nɛ̄ ó má ā tɛ́ɛcɛ. Ó klla gáā yá bɛ̄ɛka ó wɛ ɔ̄comɛ́ɛbɛ ā ámāŋ ka o lɛ úwé kú ācomɛ́ɛbɛ wu iyē, o yá ɛ́ɛ́ kóō plla ācɛ gɛ ŋ́.

⁵Ikɔkɔ ɔ́ɔmā ā, ó géē ka ka anúɔ í wɛ ɔ̄comɛ́ɛbɛ́ ŋ́, ka anúɔ wɛ ɔgɛ́ɛjí nɛ̄. Ó klla í ka ka anúɔ húmáyī hɛ́ɛ́hɔ̄ ŋmífī nɛ̄ anúɔ wɛ ɔyípɛ̄ ā.

⁶Eko nɛ̄ ɔ̄cɛ dúúmā lɛ ɔ̄kā da ɔ́ ka ɔdíyá ɔ̄ ágbe ɔtū mɛ́mla igbīhi yɔ̄ dúú ā, ó géē tá ohi ka, ágbe ɔ́ɔmā ɔ́ɔ yá anúɔ ŋmá ɔlɛ́ aóklóbīya anúɔ nɛ.

⁷Óndú ā, nōo lɔfú fíyɛ́ dúú ā kahíníī, “Aá nēe wɛ aólɛlā kú ācɛ ɔlɛ́ um ā, aá nyāŋjɛ ká aá kpɛ́fú tá uwā, ká aá ŋmó ācɛ ā, kwu aótrɛ̄yí kú uwā nēe kōō ī yúklɔ́ gā um ā. Ācɛ ohile ā géē je fíyákátā [8]. Ó da ɔ́ kóō lɛ ɔ̄cogbāálá ā ŋmó cɛ́ɛ́ aálá ā kē le fíyákátā. Ó ka anúɔ géē kpó ɔfú kwu ɛnɛ̄ŋcɛ̄ ā dúú

⁸Ó ka anúɔ géē je āyā ɛpa ŋmá ipú ɛtá kú ācɛ kú ipú odúúdú ajɛ ā kpó ŋmó. Cɛ́ɛ́ āyā éyi ŋmá ipú ɛtá ā géē yēeyī.

⁹Ó ka anúɔ géē já āyā éyi ŋmá ipú ɛtá kú uwā nēe hile ā má. Ó klla ka anúɔ géē na uwá péee bɛ̄ɛka ɛ́gɛ́nɛ̄ nēé gē bī ɔlá le na oje nɛ̄hɛ́ mɛ́mla ugóolu ā. Ó ka anúɔ géē cɛ̄ lɛ ācɛ ɔlɛ́ anúɔ móōwē nɛ̄ɛ̄nɛ̄hi cɛ́ɛ́ anúɔ bī ōwē ɔ́ɔmā lɛ uwá yá yéŋēē. Cɛ́ɛ́ ó ka é géē gbɔ̄ɔkɔ lɛ anúɔ, anúɔ kē í tá ūwā ohi. Ó ka anúɔ géē da uwá ka é wɛ ācɛ ɔlɛ́ anúɔ. Cɛ́ɛ́ é géē lɛ okónu cɛ̄ ɔ̄ ka anúɔ wɛ Ɔwɔicō kú uwā á.